CAPÍTULO 6
“Dios nindoo kaʼyoo Esteban, ikhaa jngóo nixnúu tsiakii”
Dí najmañulú ga̱jma̱a̱ numuu Esteban índo̱ ni̱jkha̱ náa inún xa̱bu̱ ede̱ Sanedrín
Dí na̱ʼkha̱ raʼthí náa Hechos 6:8–8:3
1-3. a) Ndiéjuunʼ niraʼnuu Esteban ga̱jma̱a̱ ndiéjuunʼ niʼni xá. b) Ndiéjuunʼ graxe̱ gúʼyáá rá.
ESTEBAN wíji̱ náa inún mbá 71 xa̱bu̱ ede̱. Mbáa guʼwá ñajunʼ rígi̱ gíʼ mijngii náa guʼwá rí nduyamajkuíí Dios dí rígá náa Jerusalén. Bi̱ nunimbaníí xkujndu ndrígóo nindxu̱ún xa̱bu̱ bi̱ najmaʼniúúnʼ, tikhuun dí ikhiin nda̱a̱ gamajkhún ga̱jma̱a̱ nditháan tágáwíinʼ a̱jkiu̱ún kuyáá. Ndxajkuun bi̱ phú kayá edxu̱u̱ bi̱ mbiʼyuu Caifás nigímbíin xa̱bu̱ bugi̱. Ikha̱á má nindxu̱u̱ bi̱ niʼthí dí makhañúu Jesús nákha wapháá. Ndiéjuunʼ gáʼni Esteban rá. Lá mamiñúu xáʼ.
2 Na̱nguá nikujmaa á mu nimíñuu, asndu xa̱bu̱ ede̱ bi̱ tri̱gi̱i̱n ikhí “ndiyáá rí inuu nakujmaa xóo inuu mbáa ángel” (Hech. 6:15). Xó má kaʼniún ángeles bi̱ nagún kuñu̱u̱n ajngóo Jeobá, tsémiñún ga̱jma̱a̱ nindxu̱ún míjíinʼ, xúʼko̱ kaʼnii nikujmaa Esteban. Asndu xa̱bu̱ bi̱ táʼndún gúyáá ndiyáá dí xúʼko̱ kaʼnii. Náá numuu dí támiñuu xá.
3 Mbaʼa dí gájmañulú á mu nduʼyáá xóo exti̱ʼña̱a̱ graxe̱ rígi̱. Mú ginii guʼyáá náá numuu dí Esteban ndiyóoʼ maraʼnuu dí gakhi̱i̱ wéñuuʼ rígi̱. Xú káʼnii nisngájma dí támiñuu nákha wapháá mu maʼthí ga̱jma̱a̱ numuu dí naʼnimbo̱o̱ xá. Ga̱jma̱a̱, xú káʼnii gándoo gúʼyaridáá xá.
“Nixkajxi̱i̱n xa̱bu̱ xuajen” (Hechos 6:8-15)
4, 5. a) Ndíjkha dí Esteban nigiʼdoo numuu náa congregación dí nirígá nákha siglo timbá rá. b) Ndíjkha dí náa Hechos 6:8 naʼthí dí ‹Dios nindoo kaʼyoo Esteban ga̱jma̱a̱ nixnúu tsiakii› rá.
4 Náa capítulo dí ninújngoo ndiʼyáá dí Esteban nindxu̱u̱ mbáa bi̱ nigiʼdoo numuu náa congregación dí níkhú nigíʼdu̱u̱ nirígá. Ikhaa nindxu̱u̱ mbáa bi̱ nixtaʼwíi mu mambáñún apóstoles. Maski ajndu ikhaa nikhánáá mbaʼa ñajunʼ maʼni, mú ninindxu̱u̱ xa̱bu̱ guabaaʼ. Náa Hechos 6:8 naʼthí dí ma̱ngaa “niʼni milagro” xó má eʼwíinʼ apóstoles ga̱jma̱a̱ naʼthí dí “Dios nindoo kaʼyoo, ikhaa jngóo nixnúu tsiakii”. Ndiéjuunʼ eyoo gáʼthúu̱n dí Dios nindoo kaʼyoo ikhaa jngóo nixnúu tsiakii xá.
5 Ajngáa griego rí nijuiʼtájuíi “Dios nindoo kaʼyoo” ma̱ngaa ma̱ndoo mani̱ndxu̱u̱ xóo “xnduʼwáa” o “májáanʼ xa̱bu̱”. Esteban ninindxu̱u̱ mbáa xa̱bu̱ májáanʼ a̱jkiu̱u̱n ga̱jma̱a̱ gamajkhuii, niʼngo̱o̱ niʼni dí xa̱bu̱ bi̱ nudxawíín dí naʼthí maguánú mbuyáá dí gajkhun nindxu̱u̱ dí naʼthí ga̱jma̱a̱ dí rúʼko̱ ma̱ndoo mambáñún. Índo̱ naʼthí rí “nixnúu tsiakii” nandoo gáʼthí rí ikhaa niniñaminaʼ dí espíritu santo maxnúu ikha. Na̱nguá niʼnimbamínáʼ ga̱jma̱a̱ numuu rí niʼngo̱o̱ niʼni, niniñuuʼ dí gamajkhu maʼga̱a̱ náa Jeobá, ma̱ngaa nixmiéjuunʼ kaʼñún xa̱bu̱ bi̱ niʼsngúún. Ikhaa numuu rígi̱ niʼni dí xa̱bu̱ sia̱nʼ mamíñúún kuyáá.
6-8. a) Ndiéjuunʼ nduwaʼ nithi ga̱jma̱a̱ numuu Esteban xá. b) Náá numuu nini̱ xúʼko̱ xá. c) Ndíjkha dí nambáyulú wéñuuʼ xóo niʼni Esteban rá.
6 Mbaʼiin xa̱bu̱ “nigún gági̱ʼdu̱u̱n gajmiún Esteban. Mú ikhiin tájmiin gútháán, numuu rí Esteban najmañuu ga̱jma̱a̱ nambáyúu espíritu santo”. a Índo̱ ndiyáá dí tséʼngu̱u̱n, ikhú “nisngruʼúún ngu̱ʼwa̱á xa̱bu̱” mu muthi dí nduwaʼ ga̱jma̱a̱ numuu Esteban. Ma̱ngaa “nixkajxi̱i̱n xa̱bu̱ xuajen ga̱jma̱a̱ xabuanii ma̱ngaa bi̱ nusngáa xtángoo” mu xúʼko̱ ma̱ndoo magún kuya̱a̱ ga̱jma̱a̱ tsiakii náa kúwá xa̱bu̱ ede̱ (Hech. 6:9-12). Xa̱bu̱ bi̱ nixrui̱ga̱a̱ nithi dí niʼthá wéñuuʼ Dios ga̱jma̱a̱ Moisés. Náá numuu dí xígi̱ kaʼnii nini̱i̱ xá.
7 Timbá rí nithi xa̱bu̱ bi̱ nixrui̱ga̱a̱ Esteban, dí ikhaa niʼthá wéñuuʼ Dios, numuu dí niʼthí dí raʼkhí ga̱jma̱a̱ numuu guʼwá náa nduyamajkuíí Dios dí rígá náa Jerusalén (Hech. 6:13). Dí maʼni ragajma, ninitsu̱di̱i̱ dí niʼthá wéñuuʼ Moisés, numuu dí niʼthí dí raʼkhí ga̱jma̱a̱ numuu xtángoo dí niʼnirámáʼ, ma̱ngaa dí nindoo mariʼkhu̱u̱ dí ikhiin naguʼwún nuni̱ xó má niniñuuʼ Moisés. Ra̱ʼkhá tháán mbiiʼ dí ninitsu̱di̱i̱, numuu dí judíos bi̱ nikúwá nákha ikhú nduyáá dí guʼwá náa nduyamajkuíí Dios gíʼdoo wéñuuʼ numuu ga̱jma̱a̱ dí naʼthí náa xtángoo, ma̱ngaa i̱ʼwáʼ dí nigumarámáʼ dí ikhiin naguʼwún nuni̱. Ikhaa jngóo nithi dí Esteban nindxu̱u̱ mbáa xa̱bu̱ ra̱májáanʼ ga̱jma̱a̱ kaʼyoo makhañúu.
8 Tséʼniulú tsiánguá dí xa̱bu̱ bi̱ nagún náa i̱ʼwáʼ religión nuthi dí nduwaʼ mu xúʼko̱ maguáʼdáá xkujndu xa̱bi̱i̱ Dios. Xúʼko̱ má rígá asndu rí mbiʼi xúgi̱, natsudiin xa̱bu̱ ñajunʼ mu muni̱ gíníin Testigos de Jeobá. Ndiéjuunʼ gúʼni̱ á mu nuni̱ tsu̱du̱lú o nuthi dí nduwaʼ ga̱jma̱a̱ numulú xá. Xkri̱da ndrígóo Esteban mambáyulú mbuʼyáá ndiéjuunʼ gúʼni.
Naʼthí ga̱jma̱a̱ numuu “Dios bi̱ mba̱a̱” (Hechos 7:1-53)
9, 10. Ndiéjuunʼ nithi tikhuun ga̱jma̱a̱ dí xóo niʼthí Esteban náa inún xa̱bu̱ ede̱ rá. b) Ndiéjuunʼ gíʼmaa marmáʼáan a̱jkiu̱lú rá.
9 Xó má ndi’yáá náa ragajma kutriga̱, índo̱ Esteban xtáa raʼdxuun náá numuu dí nuxu̱riga̱a̱, ikhaa nditháan tsémiñuu rí asndu inuu nindxu̱u̱ xóo ndrígóo mbáa ángel. Ikhú Caifás nirajxu̱u̱: “Lá gajkhun nindxu̱u̱ rígi̱ ráʼ.” (Hech. 7:1.) Rí xúgi̱, ni̱jkha̱nú mbiʼi dí ikhaa maʼthí.
10 Mbaʼiin bi̱ nunigájma̱a̱ ga̱jma̱a̱ numuu rígi̱, nuthi dí raʼkhí xóo niʼni Esteban. Ikhiin nakumu̱ún dí mbaʼ niʼthíí ga̱jma̱a̱ tasngájma dí ragíʼdoo aʼkhúun. Lá gajkhun nindxu̱u̱ dí nuthi xáʼ. Na̱nguá, ikhaa niniñuuʼ mbá májánʼ xkri̱da xóo gíʼmaa muʼni índo̱ gúriʼñáá asndu tsáá má bi̱ gándu̱ʼu̱lú muʼthá ga̱jma̱a̱ numuu ajngáa rí májánʼ (1 Ped. 3:15). Garmáʼáan a̱jkiu̱lú dí Esteban ninitsu̱di̱i̱ dí niʼthá wéñuuʼ Dios ga̱jma̱a̱ Moisés. Mu mariʼña̱a̱ ga̱jma̱a̱ numuu dí nixrui̱ga̱a̱, niʼthí mbá ajtsú enii xóo ni̱ʼkha̱ rarígá náa Israel. Guʼyáá dí niʼthí.
11, 12. a) Ndiéjuunʼ nirígá índo̱ Esteban niʼthí ga̱jma̱a̱ numuu Abrahán rá. b) Náá numuu dí niʼthí ga̱jma̱a̱ numuu José xá.
11 Mbiʼi dí nixtáa xa̱bu̱ nikhi̱i̱ Abrahán (Hech. 7:1-16). Esteban nigíʼdu̱u̱ niʼthí ga̱jma̱a̱ numuu Abrahán bi̱ nduyamajkuíí judíos ga̱jma̱a̱ numuu fe dí nigiʼdoo, mbá dí ikhiin má mangiin nunimbu̱ún. Niʼthí dí xa̱bu̱ nikhi̱i̱ Abrahán ndiʼyoo “Dios bi̱ mba̱a̱” índo̱ nixtáa náa Mesopotamia, nda̱wa̱á nixtáa xóo xa̱bu̱ na̱ʼkha̱á náa ku̱ba̱ʼ rí nijuiʼthá makánún (Hech. 7:2). Nákha mbiʼi dí nixtáa Abrahán na̱nguá nirígá templo ni má xtángoo ndrígóo Moisés. Rúʼko̱ nandoo gáʼthúu̱n dí ma̱ndoo má mu̱ʼni̱ ñajuunʼ Jeobá tséʼñuu á mu nda̱a̱ rígi̱.
12 Esteban ma̱ngaa niʼthí ga̱jma̱a̱ numuu José bi̱ na̱ʼkha̱ náa Abrahán. Ikhaa niʼni marmáʼáan a̱jkiu̱ún dí bi̱ nini̱ gínáa ga̱jma̱a̱ nigujua̱a̱, nindxu̱ún má a̱ngui̱i̱n náa ni̱ʼkha̱ tribu ndrígóo Israel. Jeobá nijmiuu José mu maʼni káwíin xa̱bu̱ Israel náa ewiʼ. Esteban ni̱jkha̱nú ndiʼyoo dí nambríguii xóo niʼni José ga̱jma̱a̱ Jesús. Mú táʼthí ga̱jma̱a̱ numuu rígi̱, numuu dí rígá mbaʼa dí maʼthúún bi̱ kúwá rudxawíín.
13. Ndiéjuunʼ niyambáá dí Esteban niʼthí ga̱jma̱a̱ numuu Moisés rá. b) Ndiéjuunʼ nisngájma Esteban índo̱ niʼthí ga̱jma̱a̱ numuu rígi̱ rá.
13 Mbiʼi dí nixtáa Moisés (Hech. 7:17-43). Esteban ndijyúuʼ mu maʼthí ga̱jma̱a̱ numuu Moisés, májánʼ ninindxu̱u̱ rígi̱ numuu dí mbaʼiin bi̱ kúwá náa guʼwá Sanedrín nindxu̱ún saduceos ga̱jma̱a̱ ikhiin nunimbu̱ún dí ikhaa niʼnirámáʼ. Garmáʼáan a̱jkiu̱lú dí ikhiin ninitsu̱di̱i̱ dí niʼthá wéñuuʼ Moisés, mú índo̱ niʼthí ga̱jma̱a̱ numuu rígi̱ nisngájma dí ikhaa ndaʼyamajkuu Moisés ga̱jma̱a̱ Xtángoo ndrígóo (Hech. 7:38). Ma̱ngaa niʼthí dí israelitas táʼndún gúyáá Moisés maski ajndu ikhaa nindoo maʼnikáwíin ga̱jma̱a̱ túnimbu̱u̱n dí niʼthúún índo̱ gíʼdoo 40 tsiguuʼ. Mbá 40 tsiguʼ nda̱wa̱á, mbaʼa nuthu túniñami̱jna̱ dí maʼtáñajúúnʼ. b Xígi̱ kaʼnii Esteban nisngájma dí táʼndún gúñún xa̱bu̱ bi̱ Jeobá niraʼwíin mu muxna ikha náa xuajñuu.
14. Ndiéjuunʼ niʼni mbuyáá índo̱ Esteban niʼthí ga̱jma̱a̱ numuu Moisés rá.
14 Esteban niʼthí dí mina̱a̱ʼ má Moisés niʼtáriyaʼ dí maxtáa i̱mba̱a̱ profeta xó má ikhaa. Tsáá gánindxu̱u̱ ga̱jma̱a̱ xú káʼnii gúndríguíi xá. Ikhaa na̱nguá niriʼña̱a̱ núkhu graxe̱ rígi̱. Ma̱ngaa niʼthúún dí índo̱ Jeobá niʼtámíjná ga̱jma̱a̱ Moisés náa xtáʼdu̱u̱ iná tsuwanʼ dí nakha ga̱jma̱a̱ ku̱ba̱ʼ niʼni̱i̱ mikaʼwu, nisngájma dí asndu náá ma̱ndoo maʼni mikaʼwu. Ikhaa jngóo, lá i̱ndó ma̱ndoo mbiʼyamajkuíí Jeobá náa mbá guʼwá xóo templo dí nirígá náa Jerusalén ráʼ. Guʼyáá dí niʼthí Esteban.
15, 16. a) Ndíjkha dí Esteban niʼthí ga̱jma̱a̱ numuu tabernáculo rá. b) Ndiéjuunʼ nisngájma Esteban índo̱ niʼthí ga̱jma̱a̱ numuu guʼwá rí nduyamajkuíí Dios rá.
15 Mbiʼi dí nirígá tabernáculo ga̱jma̱a̱ guʼwá rí nduyamajkuíí Dios (Hech. 7:44-50). Esteban niʼni marmáʼáan a̱jkiu̱ún xa̱bu̱ ede̱ dí nákhi xóó tséguma templo, Jeobá niʼthúu̱n Moisés dí maʼni mbá tabernáculo, nindxu̱u̱ mbá guʼwá xtíin náa mbiʼyamajkuíí. Nimbáa xándoo maʼthí dí tabernáculo dí Moisés nijmuu mu mbaʼyamajkuu Dios na̱nguá gíʼdoo wéñuʼ numuu ki xóo templo.
16 Esteban niʼthí rí Salomón nindxu̱u̱ bi̱ niʼni guʼwá náa nduyamajkuíí Dios náa Jerusalén. Ikhú nijmuu ajngáa rí Salomón niʼthí índo̱ nitajkháan, mu xúʼko̱ masngájmún mbá rí gíʼdoo numuu: “Dios bi̱ phú mba̱a̱ na̱nguá xtáa náa guʼwá rí nuni̱ xa̱bu̱ numbaaʼ” (Hech. 7:48; 2 Cró. 6:18). Raʼkháa i̱ndó náa guʼwá rí nduyamajkuíí ma̱ndoo majmuu Jeobá mu mambanúu dí nandoo, ma̱ngaa ma̱ndoo majmuu i̱ʼwáʼ enii. Ikhaa jngóo xa̱bi̱i̱ ragíʼmaa mundxaʼwamíjna dí i̱ndó náa guʼwá rí nuni̱ xa̱bu̱ú ma̱ndoo mbiʼyamajkuíí Dios. Esteban niguámbóo niʼthí ga̱jma̱a̱ ajngáa dí niʼnirámáʼ Isaías náa naʼthí: “Mekhu nindxu̱u̱ xíliúʼ ga̱jma̱a̱ ku̱ba̱ʼ nindxu̱u̱ náa frúwán rajkúʼ. Xú káʼnii goʼwóʼ gúnila rá. Eʼthí Jeobá. O náá mina̱a̱ʼ gáyáa jxu̱ʼ rá. Lá raʼkháa ñawúnʼ má ikhúúnʼ ni̱ni̱ ga̱jma̱a̱ xúgíʼ rígi̱ ráʼ.” (Hech. 7:49, 50; Isa. 66:1, 2.)
17. a) Xú káʼnii nisngájma Esteban dí raʼkhí nini̱ bi̱ nixuri̱ga̱a̱ rá. b) Xú káʼnii niriʼña̱a̱ dí nini̱ tsu̱di̱i̱ xá.
17 Guʼyáá ndiéjuunʼ rí niʼngo̱o̱ niʼni Esteban ga̱jma̱a̱ dí niʼthí. Nakujmaa kaʼwu dí ikhaa ra̱ʼkhá tháán nijmañuu xóo masngájma dí raʼkhí xóo kúwá runi̱ xa̱bu̱ bi̱ nuxuriga̱a̱. Nisngájmúún dí Jeobá najmuu mbaʼa enii xóo maʼnimbánuu rí nandoo, raʼkháa dí xóo nuni̱ xa̱bu̱. Xa̱bu̱ ede̱ bi̱ kúwá náa Sanedrín nindúún kuyáá wéñuʼ guʼwá náa nduyamajkuíí Dios ga̱jma̱a̱ rí xa̱bu̱ niniraʼmáaʼ náa xtángoo. Mú na̱nguá nixtiʼñamijná mbuyáá náá numuu rí Jeobá nixná xtángoo ga̱jma̱a̱ mbá guʼwá náa mbuyamajkuíí. Xúgíʼ rí niʼthí Esteban nindxu̱u̱ asndu xóo nixtáa raraxu̱u̱n: “Xú káʼnii phú gíʼmaa mbiʼyamajkuíí xtángoo ga̱jma̱a̱ guʼwá náa nduyamajkuíí Dios rá. Lá raʼkháa dí muʼnimbulú kuʼyáá Jeobá ráʼ.” Rigi̱ numuu dí nixuriga̱a̱ Esteban ga̱jma̱a̱ xúgi̱ kaʼnii nimbáyuminaʼ ma̱ngaa xígi̱ kaʼnii nisngájma di ikhaa ragíʼdoo aʼkhúun, numuu rí ikhaa niʼni asndu xó má eʼngo̱o̱ mu maʼnimbo̱o̱ kaʼyoo Jeobá.
18. Xú káʼnii gándoo gúʼyaridáá Esteban rá.
18 Ndiéjuunʼ xóó ma̱ndoo mambáyulú dí niʼthí Esteban rá. Ikhaa nikro̱ʼo̱o̱ májánʼ dí naʼthí náa Ajngá rawuunʼ Dios. Xúʼko̱ má dí mbiʼi xúgi̱, mangáánʼlú gíʼmaa muʼnigajma̱a̱ májánʼ dí naʼthí náa Biblia, mu xúʼko̱ ma̱ndoo majmulú májánʼ ‹ajngá rawuunʼ Dios, xó má gíʼmaa› (2 Tim. 2:15). I̱mba̱ rí naʼsngúlú xkri̱da ndrígóo Esteban dí ikháanʼ ndayóoʼ rí xámiñulúʼ muʼthúún xa̱bu̱ mú gu̱ʼni̱ ga̱jma̱a̱ ajngáa wabaʼ. Ra̱ʼkhá tháán jmagu̱u̱n xa̱bu̱ bi̱ nixuriga̱a̱. Maski ajndu xúʼko̱, ikhaa mbaʼa rí niʼngo̱o̱ niʼthúún dí ikhiin má najmañún ga̱jma̱a̱ rí nduyáá dí gíʼdoo wéñuuʼ numuu. Índo̱ niʼtámíjná gajmíi̱n xabuanii, ikhaa niʼthún ‹a̱ngui̱nʼ› mu masngájma gamajkhu (Hech. 7:2). Xúʼko̱ má gúʼni mangáánʼlú índo̱ gúʼthá ga̱jma̱a̱ numuu ajngá rawuunʼ Dios, gu̱ʼni̱ ‹ga̱jma̱a̱ gamajkhu, ma̱ngaa xákiʼnáánʼ› (1 Ped. 3:15).
19. Ndiéjuunʼ dí támiñuu maʼthí Esteban rá.
19 Xámiñulú dí muʼthá dí na̱ʼkha̱ raʼthí náa Biblia maski ajndu xa̱bu̱ xánigu̱u̱nʼ, ni má xámiñulú muʼthá dí gáʼni gajmíi̱n Jeobá xa̱bu̱ ra̱míjíinʼ. Esteban niniñuuʼ mbá májánʼ xkri̱da, ndiʼyoo má dí niʼthí táʼga̱nú asndu náa a̱jkiu̱ún xa̱bu̱ ede̱ bugi̱. Índo̱ nigiʼdoo espíritu santo támiñuu maʼthúún dí nindxu̱ún xóo wajinʼ xiʼñúúnʼ bi̱ táʼndún gúyáá José, Moisés ga̱jma̱a̱ xúgíinʼ profetas (Hech. 7:51-53). Ikhiin nindxu̱ún bi̱ ninújnguramúúnʼ Xtángoo índo̱ nixiyáa Mesías, bi̱ Moisés ga̱jma̱a̱ profeta nithi dí ma̱ʼkha̱.
“Tátá Jesús, atagruígúu xi̱ʼ ndrígóʼ” (Hechos 7:54–8:3)
“Índo̱ nidxawíín rígi̱, ikhiin nikiʼníin wéñuuʼ náa awúu̱n a̱jkiu̱ún ga̱jma̱a̱ asndu naʼpuduun iñúnʼ índo̱ nduyáá.” (Hechos 7:54)
20, 21. a) Ndiéjuunʼ nini̱ xa̱bu̱ ede̱ índo̱ niguámbóo niʼthí Esteban rá. b) Xú káʼnii nixnúu tsiakii Jeobá xá.
20 Ga̱jma̱a̱ numuu dí niʼthí, niʼni dí xa̱bu̱ ede̱ makiʼníin wéñuuʼ dí asndu túni xó má kaʼyoo, ikhaa jngóo asndu ni̱ʼphu̱ ndu iñúúnʼ. Rúʼko̱ niʼni mbaʼyoo Esteban dí muni̱i̱ ikhaa kayuúʼ xó má Jesús.
21 Esteban nigruigú tsiakii rí ndiyóoʼ índo̱ ndiʼyoo dí nisngájmuu Jeobá. Ndiʼyoo Dios gíʼ náa xíliu̱u̱ ga̱jma̱a̱ náa ñawúun mújúunʼ wíji̱ Cristo. Índo̱ xtáa raʼthí dí nisngájmuu Dios, xa̱bu̱ ede̱ niruguáá cháʼwúún. Náá numuu rá. Numuu dí mina̱a̱ʼ má Jesús niʼthí náa inún xa̱bu̱ ede̱ bugi̱ dí ikhaa nindxu̱u̱ Mesías ga̱jma̱a̱ dí nánguá má mbayuuʼ magiʼi náa níjñúu Anu̱u̱ (Mar. 14:62). Dí nisngájmuu Jeobá nisngájma dí xúgíʼ dí niʼthí Jesus nindxu̱u̱ gajkhun. Xó má xa̱bu̱ ede̱ bugi̱ túnimbu̱ún kuyáá Mesías ga̱jma̱a̱ nixiyáa, xúʼko̱ má nini̱i̱ Esteban ma̱ngaa, xúgíinʼ nigún kuya̱a̱, ikhú nixiyáa ga̱jma̱a̱ itsí. c
22, 23. a) Náá numuu nuʼthá dí Esteban nikháñúu ikha̱á xó má Jesús rá. b) Náá numuu dí gíʼmaa mbuʼyáá ikha̱á xó má Esteban rá.
22 Esteban nikháñuu ikha̱á kayuuʼ xó má Jesús, nirígá má xúʼko̱ dí tsímáá náa awúu̱n a̱jkiu̱u̱n, nikumu̱u̱ kaʼyoo Jeobá ga̱jma̱a̱ niʼni mba̱a̱ a̱jkiu̱u̱n kaʼñún bi̱ nixiyáa. Iwáá ajngáa dí niʼthí nindxu̱u̱: “Tátá Jesús, atagruígúu xi̱ʼ ndrígóʼ”. Mbáa niʼthí ajngáa rígi̱ numuu dí kaʼníí xtáa raʼyoo Jesús bi̱ gíʼ náa níjñúu Anu̱u̱. Mbáa ma̱ngaa narmáʼáan a̱jkiu̱u̱n dí niʼthí Jesús: “Ikhúúnʼ ni̱ndxu̱ʼ bi̱ naʼnigabiín xa̱bu̱ ga̱jma̱a̱ na̱ni̱ rí mbuya” (Juan 11:25). Ndawaá niʼthúu̱n Jeobá ga̱jma̱a̱ aʼwá gakhi̱i̱: “Jeobá, xátani̱ rí mumíniiʼ náa aʼkhá rígi̱”. Ikhú nikháñuu (Hech. 7:59, 60).
23 Esteban ni̱jkha̱nú ninindxu̱u̱ timbáa mártir o mbáa bi̱ nixiyáa ga̱jma̱a̱ numuu rí niʼnimbo̱o̱ kaʼyoo Jesús (atayáá náa kúgumaʼá “ Esteban, mbáa testigo ga̱jma̱a̱ bi̱ ninigínáa”.) Asndu dí mbiʼi xúgi̱ nuradíin xa̱bi̱i̱ Jeobá numuu rí tsíñún gúñún. Maski ajndu xúʼko̱ erígá ndayóoʼ makumulú xó má Esteban, numuu dí Jesús ni̱jkha̱nú má ninindxu̱u̱ rey ga̱jma̱a̱ Anu̱u̱ nixnúu tsiakii, nimbá nda̱a̱ dí gárikoo mu maʼnigabi̱ín xa̱bi̱i̱ bi̱ nikháñún (Juan 5:28, 29).
24. a) Xú káʼnii niyambáá Saulo mu makhañúu Esteban rá. b) Lá nikáguabiinʼ eʼwíinʼ xa̱bi̱i̱ Jesús índo̱ nikháñúu Esteban ráʼ.
24 Saulo ma̱ngaa nixtáa náa majñu̱únʼ xa̱bu̱ bi̱ nixiyáa Esteban ga̱jma̱a̱ itsí. Ikhaa ma̱ngaa nindoo dí muxiyáa dí asndu niñewu̱u̱n xtíñún xa̱bu̱ buʼko̱. Tájyúuʼ má índo̱ ikhaa nigíʼdu̱u̱ niʼni gíníi xa̱bi̱i̱ Jesús. Mú dí xóo nikháñúu Esteban nixnúún wéñuuʼ tsiakii a̱ngiu̱lú mu xúʼko̱ maʼngu̱u̱n náa dí mbaʼyóoʼ muraʼníí. Itháan nda̱wa̱á Saulo bi̱ nigu mbiʼyuu Pablo nigáwíinʼ a̱jkiu̱u̱n ga̱jma̱a̱ numuu xúgíʼ dí ikhaa niʼni (Hech. 22:20). Maski asndu ikhaa ma̱ngaa nindoo dí makhañúu Esteban, mú ni̱jkha̱nú ndiʼyoo dí ikhaa “niʼthá wéñúúnʼ, ni̱ʼni̱ gíníi xa̱bi̱i̱ Jesús ga̱jma̱a̱ tágiʼdoo gamajkuu” (1 Tim. 1:13). Ikhaa nditháan xámbumuu dí xóo niʼni Esteban. Náa discurso ga̱jma̱a̱ carta dí nikuʼma náa inún a̱ngiu̱lú niʼnirámáʼ dí niʼthí Esteban (Hech. 7:48; 17:24; Heb. 9:24). Nda̱wa̱á Pablo ndiʼyáridoo fe ga̱jma̱a̱ rí xóo támiñuu Esteban bi̱ ‹Dios nindoo kaʼyoo, ga̱jma̱a̱ nixnúu tsiakii›. Májánʼ gáʼni dí murajximíjnalú mangáánʼ: Lá maʼngo̱ʼ ikhúún ma̱ngaa ráʼ.
a Bi̱ niʼtámíjná gajmíi̱n Esteban nindxu̱ún “xa̱bu̱ bi̱ niguma káwíin”. Mbáa nindxu̱ún judíos bi̱ ni̱jkha̱ kiʼdiin náa Roma mú nda̱wa̱á niguma káwíin o mbáa nindxu̱ún ñumbáá bi̱ niguma káwíin mu nirtajximijnáá judíos. Ikhí nikúwá mangiin bi̱ naguwáʼ náa Cilicia, náa na̱ʼkha̱ Saulo bi̱ Tarso. Náa relato tséʼthi á mu ma̱ngaa nixtáa náa dí táʼngu̱u̱n gútamíjná gajmiún Esteban.
b Dí niʼthí Esteban na̱nguá e̱ʼkha̱ náa i̱ʼwáʼ libro ndrígóo Biblia, xóo kiʼsngáa dí nigruigú Moisés náa Egipto, nguáthá tsiguuʼ índo̱ nigájnuu ikhí ga̱jma̱a̱ nguáthá mbayuuʼ nixtáa náa Madián.
c Náa xtángoo ndrígu̱ún xa̱bu̱ romanos naʼthí dí xa̱bu̱ ede̱ bi̱ kúwá náa Sanedrín xándoo muxiyáa mbáa xa̱bu̱ (Juan 18:31). Nakujmaa kaʼwu rí Esteban nixiyáa i̱ndó ga̱jma̱a̱ numuu dí nikasgañu̱únʼ eʼni.
