1, 2. a) Ndiéjuunʼ dí ra̱májánʼ nigíʼnuu Pablo gajmíi̱n a̱ngui̱i̱n náa Éfeso rá. b) Ndiéjuunʼ gúʼyáá náa capítulo rígi̱ rá.

 NÁA ta̱pha̱ xuajin Éfeso nagún rundxa̱ʼwa̱ xa̱bu̱, rígi̱ niʼni dí mbaʼiin magajnún rundxa̱ʼwa̱. Numuu dí ndiʼkhú niguámbu̱u̱n nirajtuwiin Gayo ga̱jma̱a̱ Aristarco, nigún ruxmajtiin mbá kamba̱a̱. Xa̱bu̱ bi̱ ra̱ʼkhá tháán mbaʼiin buʼko̱ nigún rundxa̱ʼwa̱ má xúʼko̱ asndu nitu̱ʼu̱u̱n náa teatro, náa naʼngo̱o̱ najchún mbá 25,000 xa̱bu̱. Mbaʼiin xa̱bu̱ tséyáá náá numuu dí nagún rundxa̱ʼwa̱, mú ikhiin nikumu̱ún dí nandún muni̱ gámbáa diosa ndrígu̱ún ga̱jma̱a̱ templo, ikhaa jngóo mangiin nindxa̱ʼwa̱, nithi: “¡Majphú mba̱a̱ nindxu̱u̱ Ártemis ndrígu̱ún xa̱bu̱ efesios!” (Hech. 19:34).

² Gixa̱a̱ nijmiuu xa̱bu̱ bi̱ mbaʼiin bugi̱ murikhún a̱ngiu̱lú dí xútaraʼa ajngáa dí májánʼ. Raʼkháa i̱ndó tsáʼkhá rígi̱ ejmuu, rígá mbaʼa dí ikhaa najmuu. Náa capítulo rígi̱ mbuʼyáá ndiéjuunʼ tsáʼkhá nijmuu mu xájuiʼtáraʼa ga̱jma̱a̱ ndiéjuunʼ niʼni mu markuájíinʼ a̱ngiu̱lú bi̱ nikúwá nákha siglo timbá. Mú dí itháan gíʼdoo numuu dí mbuʼyáá, nindxu̱u̱ dí ikhaa táʼngo̱o̱ gárikoo ñajunʼ rígi̱, numuu dí “tsiakii ndrígóo Jeobá niʼni rí ajngóo mudxawíín mbaʼin ga̱jma̱a̱ mawán ri̱go̱o̱” (Hech. 19:20). A̱ngiu̱lú buʼko̱ tákáguabiinʼ nitaraʼa má xúʼko̱, xó má e̱ʼni̱ ikháánʼlú dí mbiʼi xúgi̱. Gajkhun má dí Jeobá nindxu̱u̱ bi̱ nambáyulú, mú mangáánʼ má ndayóoʼ mu̱ʼni̱ tsiakimíjna̱ dí maʼngulú. Espíritu santo gámbáyulú mu ma̱ndoo muguáʼdáá cualidades dí mambáyúlú náa nuʼtáraʼa. Dí xúgi̱ guʼyáá ndiéjuunʼ gándoo gájmañulú náa xkri̱da ndrígóo Apolos.

3, 4. Ndiéjuunʼ ndiʼyoo Áquila ga̱jma̱a̱ Priscila dí ndayóoʼ majmañuu Apolos ga̱jma̱a̱ ndiéjuunʼ nini̱ mu mumbayíí xá.

³ Índo̱ Pablo ni̱jkha̱ xóo ajtsú nuthu náa Éfeso, ikhí ni̱jkha̱nú mbáa judío bi̱ na̱ʼkha̱ náa Alejandría bi̱ mbiʼyuu Apolos, ikhaa mbaʼa dí  najmañuu. Raʼkháa i̱ndó tséʼniuu gakhi̱i̱ maʼthí, ma̱ngaa “naʼninuuʼ májánʼ dí naʼthí náa Kiʼnirámáʼ”. Asndu ‹espíritu santo naʼni rí magiʼdoo gagi›. Ra̱ʼkhá tháán eyóoʼ maʼthí ga̱jma̱a̱ numuu Dios, ikhaa jngóo támiñuu maʼga gáxná discurso náa guʼwá dí judíos nuxnáá gamajkhu Dios (Hech. 18:24, 25).

⁴ Ikhí xtáa Áquila ga̱jma̱a̱ Priscila, ikhiin ra̱ʼkhá tháán nidxún índo̱ ndiyáá dí Apolos “niʼsngáa mbájmbu ga̱jma̱a̱ numuu Jesús”. Maski ajndu ikhaa naʼsngáa májánʼ ga̱jma̱a̱ numuu Jesús, mú ndiyáá dí ndayóoʼ mbaʼyoo dí itháan gíʼdoo numuu, ikhaa “i̱ndó naʼninuuʼ dí Juan nakumíinʼ iyááʼ xa̱bu̱”. A̱ngiu̱lú bugi̱ ndiyáʼ xóo mumbayíí, na̱nguá nimíñúún muthán maski ajndu ikhaa najmañuu májánʼ, ikhiin “nigún kuya̱a̱ kanííʼ, nitháán kuduun xú káʼnii nindxu̱u̱ kambo̱o̱ Dios” (Hech. 18:25, 26). Lá nikiʼnáa Apolos ga̱jma̱a̱ numuu dí nitháán ráʼ. Na̱nguá, ikhaa nisngájma dí ninindxu̱u̱ xa̱bu̱ guabaaʼ, xó má gíʼmaa mani̱ndxu̱ún xúgíinʼ xa̱bi̱i̱ Dios.

5, 6. Ndiéjuunʼ nimbáyúu Apolos mu maʼni má xúʼko̱ ñajuunʼ Jeobá ga̱jma̱a̱ ndiéjuunʼ eʼsngúlú xkridoo xá.

⁵ Ga̱jma̱a̱ numuu dí Apolos niʼdxawuun dí nitháán xa̱bu̱ gajmii bugi̱, ni̱jkha̱nú ninindxu̱u̱ mbáa cristiano bi̱ niʼsngáa. Ni̱jkha̱ náa xuajin Acaya, náa “nimbáñún mbaʼin” xa̱bi̱i̱ Cristo. Ga̱jma̱a̱ támíñúu dí maʼtámíjná gajmíi̱n xa̱bu̱ bi̱ tsénimbu̱ún dí Jesús nindxu̱u̱ Mesías. Lucas niʼnirámáʼ dí ikhaa “támiñuu masngájma rí bi̱ judíos na̱nguá esngáa májánʼ, nisngájmúún rí náa Kiʼnirámáʼ naʼthí rí Jesús nindxu̱u̱ Cristo” (Hech. 18:27, 28). Núma̱aʼ má ga̱jma̱a̱ numuu xúgíʼ dí ikhaa niʼni, rígi̱ niyambáá mu “ajngóo Jeobá” majuiʼtáraʼa má xúʼko̱.

⁶ Ndiéjuunʼ eʼsngúlú xóo niʼni Apolos rá. Naʼsngúlú dí ndayóoʼ manindxu̱lú xa̱bu̱ guabaaʼ, gíʼdoo wéñuuʼ numuu dí muguaʼdáálú cualidad rígi̱. Xúgiáánʼ kuaʼdáá mbá dí najmañulú nu̱ʼni̱, kuaʼdáá experiencia o ku̱ma̱. Mú dí itháan gíʼdoo numuu náa xúgíʼ rígi̱ nindxu̱u̱ dí manindxu̱lú xa̱bu̱ guabaaʼ. Á mu na̱nguá kuaʼdáá cualidad rígi̱ migamíi mu̱ʼni̱ mbaʼumíjna̱ (1 Cor. 4:7; Sant. 4:6). Dí manindxu̱lú xa̱bu̱ guabaaʼ mambáyúlú mbuʼyáá dí eʼwíinʼ itháan guáʼdáá numún ki xóo ikháánʼ (Filip. 2:3). Xákiʼnáánʼ índo̱ nuxpri̱gúlú, índo̱ nuxnulú ikha o índo̱ na̱jkha̱nú naxtiʼkhu̱u̱ xóo ekru̱ʼu̱lú dí naʼthí náa Biblia, xákumulú dí itháan najmañulú ikháánʼ, guniʼñámi̱jna̱ dí maxnúlú ikha espíritu santo ndrígóo Dios. Á mu ikháánʼlú nu̱ʼni̱ xígi̱ kaʼnii, Jeobá ga̱jma̱a̱ Jesús muxnúlú má xúʼko̱ ñajunʼ dí mu̱ʼni̱ (Luc. 1:51, 52).

7. Ndiéjuunʼ xkri̱da niniñuuʼ Pablo ga̱jma̱a̱ Apolos rá.

⁷ Dí manindxu̱lú xa̱bu̱ guabaaʼ mambáyúlú mu xúguaʼdáá xkujndu gajmiúlú mbáa. ¡Gixa̱a̱ ra̱ʼkhá tháán ndiyáʼ xóo maʼni mu murkuajímíjná a̱ngiu̱lú bi̱ nikúwá nákha siglo timbá! Maʼdxuu wéñuuʼ á mu niʼngo̱o̱ niʼni dí Pablo ga̱jma̱a̱ Apolos mugi̱ʼdu̱u̱n o mbuyáá tsáa dí ikhiin najmañuu itháan ga̱jma̱a̱ tsáa bi̱ itháan numbañún a̱ngiu̱lú. Ikhiin xáʼniún gakhi̱i̱ muni̱ rígi̱, xó má eʼyáá dí xúʼko̱ nirígá náa Corinto, nikúwá bi̱ nithi: “Ikhúúnʼ na̱jkhá kidxuuʼ Pablo”, eʼwíinʼ nithi: “Ikhúúnʼ na̱jkhá kidxuuʼ Apolos”. Lá nirkuajimina̱ʼ  Pablo ga̱jma̱a̱ Apolos ráʼ. Na̱nguá, numuu dí Pablo ni̱jkha̱nú ndiʼyoo dí Apolos tséʼniuu gakhi̱i̱ maʼthí, ikhaa jngóo nixnúu mbaʼa ñajunʼ dí maʼni, Apolos nigíʼ niʼni dí niʼthúu̱n Pablo (1 Cor. 1:10-12; 3:6, 9; Tito 3:12, 13). ¡Ni̱ndxu̱u̱ mbá májánʼ xkri̱da xóo ikhiin ninindxu̱ún xa̱bu̱ guabiinʼ ga̱jma̱a̱ niñejunʼ mbóó!

8. Xú káʼnii kamba̱a̱ niguajtuun Pablo mu matanga̱a̱ náa Éfeso ga̱jma̱a̱ náá numuu dí niʼni xúʼko̱ xá.

⁸ Pablo nixná ajngóo dí matanga̱a̱ náa Éfeso ga̱jma̱a̱ ikhaa niʼnimbánuu (Hech. 18:20, 21). a Gúʼyáá náa kamba̱a̱ ni̱jkha̱. Dí iwáá kayuuʼ, ndiʼyáá dí niguanúu náa Antioquía mbaaʼ dí kaʼyoo Siria, ikhaa jngóo ma̱ndoo maʼga xígií náa Seleucia ikhí naguanúu itháan mijngii, xájyúuʼ gáʼga̱nú ga̱jma̱a̱ barco náa Éfeso. Mú ikhaa niraʼwíí maʼga náa “kamba̱a̱ rí naguanúu mitsínguánʼ náa lamáa” dí naʼni xóo 1,600 kilómetros. Náá numuu dí ni̱jkha̱ náa kamba̱a̱ dí mitsínguánʼ wéñuuʼ xá. Numuu dí xúʼko̱ nindoo ni̱jkha̱ “raxnúún tsiakii xa̱bi̱i̱ Jesús” (Hech. 18:23; 19:1). Maski ajndu rígi̱ ni̱ndxu̱u̱ ajtsú aʼphu̱ dí matanga̱a̱ xóo misionero, niʼniminaʼ dí maʼga xó má nákha ginii, ndiyóoʼ maʼni gínáminaʼ, ndiʼyoo má dí tsiaki̱i̱ dí gáʼni xánindxu̱u̱ ndíí. Xúgi̱ ma̱ngaa, bi̱ nindxu̱ún circuito nagún gajmiún guʼñún náa mámbá congregación, nuni̱ gínámijná, nusngajma rí nandún kuñún a̱ngiu̱lú. Ra̱ʼkhá tháán exníínlú núma̱aʼ a̱ngiu̱lú bugi̱.

9. Ndíjkha dí nitangiín nijngún iyááʼ xa̱bi̱i̱ Juan ga̱jma̱a̱ ndiéjuunʼ eʼsngúlú rígi̱ rá.

⁹ Índo̱ Pablo ni̱jkha̱nú náa Éfeso, ikhí nixkamiin xóo mbá gu̱wa̱ʼ ejmi̱i̱n xa̱bi̱i̱ Juan bi̱ nakumíinʼ iyááʼ xa̱bu̱. Ikhiin káaʼ nijngún iyááʼ dí nikumíinʼ Juan, mú rígi̱ nánguá gíʼdoo numuu, nakujmaa dí ikhiin tséyáá wéñuuʼ o nditháan má túdxawíín ga̱jma̱a̱ numuu espíritu santo. Mangiin ninindxu̱ún xa̱bu̱ guabiinʼ xó má Apolos ga̱jma̱a̱ nindúún majmañún itháan, ikha jngóo niniñami̱jna̱ dí Pablo maʼsngúún. Nda̱wa̱á ikhiin mangiin nijngún iyááʼ ga̱jma̱a̱ mbiʼyuu Jesús, ikhú nindrigú espíritu santo ga̱jma̱a̱ nini̱ mbaʼa milagro. Ndiéjuunʼ eʼsngúlú rígi̱ rá. Naʼsngúlú dí á mu nuʼnimbáníí ikha xó má naxná xuajñuu Jeobá maguma tsajkurámáánʼlú wéñuuʼ (Hech. 19:1-7).

10. Náá numuu dí Pablo ni̱jkha̱ gátaraʼa náa nuniga̱jma̱a̱ e̱ji̱n ga̱jma̱a̱ xú káʼnii gándoo gúʼyaridáá ikháánʼlú náa nuʼtáraʼa rá.

¹⁰ Nda̱wa̱á ni̱jkha̱nú ndiʼyoo dí tikhuun na̱nguá nindúún gúdxawíín ga̱jma̱a̱ numuu Dios. Rígi̱ nirígá índo̱ ikhaa xtáa má raʼtáraʼa ajtsú igu̱nʼ náa guʼwá dí bi̱ judíos nuxnáá gamajkhu Dios ga̱jma̱a̱ nimbáñún “makru̱ʼu̱u̱n májánʼ ga̱jma̱a̱ numuu Xa̱bu̱ Ñajunʼ ndrígóo Dios”. Índo̱ ndiʼyoo dí nikiʼníin ga̱jma̱a̱ “nithi dí raʼkhí ga̱jma̱a̱ numuu kamba̱a̱ rí gajkhun”, ikhú niraʼwíí dí maʼga gáʼtaraʼa i̱mba̱ xuajin mu xúʼko̱ xáʼnimbáti̱ga̱ mbiʼi gajmíi̱n xa̱bu̱ buʼko̱.  Ni̱jkha̱ náa kúwá runiga̱jma̱a̱ e̱ji̱n ga̱jma̱a̱ mbaʼiin nigún kidxuuʼ bi̱ nindúún mudxawíín xóó dí naʼsngáa, ma̱ngaa mu majmañún itháan ga̱jma̱a̱ numuu Dios (Hech. 19:8, 9). Xó má niʼni Pablo, xúʼko̱ má ma̱ndoo mu̱ʼni̱ mangáánʼ, á mu nduʼyáá dí xa̱bu̱ bi̱ nuʼtáruʼúún tsíñún gúdxawíín ga̱jma̱a̱ i̱ndó nandún majmangu̱u̱nʼ guniʼñááʼ ruʼtáruʼúún. Numuu dí kúwíin mbaʼiin xa̱bu̱ míjíinʼ bi̱ nandún mudxawíín ajngáa rí májánʼ.

11, 12. a) Xú káʼnii nisngájma Pablo dí niñajunʼ gakhi̱i̱ ga̱jma̱a̱ niʼtáráʼa hora dí naguaphiin xa̱bu̱ rá. b) Xú káʼnii eʼyaridáá Pablo índo̱ nuʼtáraʼa rá.

¹¹ Mbáa apóstol Pablo nixná discurso xúgíʼ mbiʼi náa guʼwá rí nuniga̱jma̱a̱ e̱ji̱n, mbáa nagíʼdu̱u̱ mbá las 11 dí miʼcha̱ ga̱jma̱a̱ naguámbóo las 4 dí wakíʼ (Hech. 19:9). Hora rúʼko̱ dí naguaphiin xa̱bu̱, numuu dí naʼni mijkha ga̱jma̱a̱ mbaʼiin ndu̱ya̱a̱ xu̱únʼ mbá xngaa ga̱jma̱a̱ nuphiʼtsu. Lá xígi̱ kaʼnii niʼni náa mbá a̱jma̱ tsiguʼ dí nixtáa ikhí xáʼ. Á mu dí xúʼko̱, ikhaa niʼtáráʼa itháan dí 3,000 hora. b Gi̱i̱ nduʼyáá i̱mba̱ numuu dí ni̱jkha̱ rajoo má xúʼko̱ ajngá rawuunʼ Jeobá, numuu dí bi̱ niʼsngáa niñajunʼ gakhi̱i̱ ga̱jma̱a̱ ndiyáʼ maʼtáraʼa índo̱ xa̱bu̱ naguaphiin. Ndiéjuunʼ dí májánʼ nirígá rá. “Xúgíinʼ bi̱ kúwá náa mbayuuʼ Asia, xó má judíos ga̱jma̱a̱ griegos nidxawíín ajngóo Tátá” (Hech. 19:10). ¡Ikhaa niʼtáráʼa kájxi̱!

¹² Dí mbiʼi xúgi̱, ikháánʼlú mangáánʼ nuʼnimíjna̱ mu̱ʼgua̱ náa hora dí kaʼnii muxkamiin xa̱bu̱ náa kúwá. Ikhaa jngóo na̱jkua̱ gúʼtáraʼa náa kamba̱a̱, náa naxtagujua̱, náa naguájun carro, xóo ga̱jma̱a̱ teléfono, correo. Ma̱ngaa na̱jkua̱ náa guʼún hora dí kaʼnii muxkamiin.

13, 14. a) Ndiéjuunʼ nijmaa niʼni Pablo ga̱jma̱a̱ tsiaki̱i̱ ndrígóo Jeobá rá. b) Ndiéjuunʼ dí raʼkhí nini̱ e̱ji̱i̱n Esceva ga̱jma̱a̱ xú káʼnii esngájma dí nuni̱ ikháá má kayuuʼ bi̱ nagún náa i̱ʼwáʼ religión rá.

¹³ Lucas naʼthí dí nda̱wa̱á dí ni̱jkha̱ ikhí nirígá mbá dí ninindxu̱u̱ kiejuunʼ wéñuuʼ. Jeobá niniñuuʼ dí Pablo “maʼni má xúʼko̱ milagros rí mba̱ʼu̱”. Índo̱ xa̱bu̱ nurugua̱ xtíñuu o mandil dí kagíʼ naguma thanún ga̱jma̱a̱ asndu naguwíin xa̱bu̱ wéñiiʼ (Hech. 19:11, 12). c Ga̱jma̱a̱ numuu xúgíʼ rí niʼni, xó má dí nixkawíin xa̱bu̱ wéñiiʼ niʼni dí mbaʼiin xa̱bu̱ maguwáʼ kanuu náa ikhaa, mú raʼkháa xúgíinʼ ninigu̱u̱nʼ.

¹⁴ “Tikhuun judíos bi̱ nagún rajngruʼwún mámbá xuajen ruxkawíin xa̱bu̱ wéñiiʼ”, ninimi̱jna̱ mangiin muni̱ milagro rúʼko̱ ga̱jma̱a̱ nijmún mbiʼyuu Jesús ga̱jma̱a̱ Pablo. Tikhuun dí ikhiin ninindxu̱ún e̱ji̱i̱n Esceva bi̱ naguwáʼ náa mbá guʼwíin bi̱ nindxu̱ún ndxajkuun. Índo̱ nindúún muxkriya̱a̱ʼ xa̱bu̱ wéñiiʼ, ikhaa niʼthúún: “Naninúwiinʼ Jesús ga̱jma̱a̱ nda̱yo̱o̱ tsáá nindxu̱u̱ Pablo. Mú tsáá nindxa̱la ikháanʼla rá.” Ikhú xa̱bu̱ bi̱ gíʼdaa giñán wéñiiʼ niʼni gíníi xa̱bu̱ buʼko̱, xóo eʼni mbáa xujkhú xáná, nigáñún mbráʼtsiinʼ ga̱jma̱a̱ niguma gíníi (Hech. 19:13-16). Ga̱jma̱a̱ numuu dí nirígá niʼni dí maguma mba̱a̱ ajngóo Jeobá, numuu dí niʼni makujmaa kaʼwu xú káʼnii mixtiʼkhu nindxu̱u̱ tsiaki̱i̱ dí na̱ʼkha̱ náa Dios dí Pablo nijmuu ga̱jma̱a̱ dí nini̱ xa̱bu̱ buʼko̱ bi̱ a̱jma̱ inún. Dí mbiʼi xúgi̱, mbaʼiin xa̱bu̱ i̱ndó najmún mbiʼyuu Jesús o nuthíí dí nindxu̱ún cristianos. Mú xó má niʼthí Jesús dí i̱ndó ma̱ndoo muguáʼti̱i̱n mbá dí májánʼ nda̱wa̱á á mu nuni̱ xó má dí nandoo Anu̱u̱ (Mat. 7:21-23).

15. Xú káʼnii gándoo gúʼyaridúún bi̱ nikúwá náa Éfeso índo̱ niniña̱a̱nʼ xúgíʼ dí na̱ʼkha̱ náa xawan rá.

¹⁵ Xa̱bu̱ bi̱ kúwá náa Éfeso naguʼwún nuni̱ magia, xawan, xóo maguáʼdáá dí ikhiin nakumu̱ún dí narikhún náa xa̱bu̱ wéñiiʼ ga̱jma̱a̱ i̱ʼwáʼ dí kajua̱a̱ ga̱jma̱a̱ xawan. Mú ga̱jma̱a̱ numuu dí niguáʼníí e̱ji̱i̱n Esceva niʼni dí mamiñún kuyáá Dios bi̱ gajkhun xúgíinʼ xa̱bu̱ bi̱ kúwá náa xuajin rúʼko̱. Mbaʼiin xa̱bu̱ nindúún mudxawíín ajngáa dí májánʼ ga̱jma̱a̱ niniña̱a̱nʼ xawan. Niguwáʼ kudúún libriu̱ún  náa nuniga̱jma̱a̱ magia, ikhú nitsikha̱a̱ náa inún mbaʼiin xa̱bu̱, maski ajndu libro rúʼko̱ minumuu wéñuuʼ. d “Tsiakii ndrígóo Jeobá niʼni rí ajngóo mudxawíín mbaʼin ga̱jma̱a̱ mawán ri̱go̱o̱” (Hech. 19:17-20). ¡Dí gajkhun nagájnuriyo̱o̱ʼ itháan náa rí minduwaʼ ga̱jma̱a̱ dí na̱ʼkha̱ náa xa̱bu̱ wéñiiʼ! Xa̱bu̱ buʼko̱ niniña̱a̱nʼ mbá májánʼ xkri̱da. Ikháánʼlú ma̱ngaa kuwáánʼlú náa mbá numbaaʼ dí rígá wéñuuʼ xawan ga̱jma̱a̱ i̱ʼwáʼ dí na̱ʼkha̱ náa Gixa̱a̱. Á mu nduʼyáá dí tikhuu dí kuaʼdáá kuajtuminaʼ ga̱jma̱a̱ dí na̱ʼkha̱ náa xawan, gu̱ʼni̱ xó má nini̱ bi̱ nikúwá náa Éfeso. Tséʼñuu á mu naʼñulú gakhi̱i̱, gu̱ʼni̱ tsíngumi̱jna̱ náa dí nda̱a̱ dí ejmaa mbá kayuuʼ.

16, 17. a) Xú káʼnii nigíʼdu̱u̱ xkujndu Demetrio rá. b) Xú káʼnii nini̱ xa̱bu̱ bi̱ nikúwá náa Éfeso rá.

¹⁶ Rí xúgi̱, muʼthá imbo̱o̱ tsáʼkhá dí najmuu Gixa̱a̱. Lucas niʼthí: “Nirígá xkujndu ga̱jma̱a̱ numuu kamba̱a̱ rí gajkhun” (Hech. 19:23). e Xkujndu rígi̱ nigi̱ʼdu̱u̱ índo̱ Demetrio bi̱ nagujua̱ plata, niʼthúún eʼwíinʼ xa̱bu̱ bi̱ nugujua̱ ikháá má rígi̱, dí ikhiin guáʼdáá mbújkha̱a̱ numuu dí nugujui̱i̱n xándú. Mú nda̱wa̱á niʼthí dí cristianos tséyamajkhún xándú buʼko̱ ga̱jma̱a̱ dí naʼtáraʼa Pablo naʼni dí ikhiin mandáti̱gu̱u̱n náa dí nugujua̱. Ikhú niʼthúún bi̱ kúwá náa Éfeso mbá dí ikhiin nduyáá dí gíʼdoo numuu, xóo náa naguwáʼ. Ma̱ngaa niʼthúún dí diosa ndrígu̱ún bi̱ mbiʼyuu Ártemis ga̱jma̱a̱ templo ndrígóo dí najmaʼnuuʼ náa xúgíʼ numbaaʼ migamíi rí mambumún kuyáá, ga̱jma̱a̱ dí “ní xágruigú gamajkhu” xó má gíʼmaa (Hech. 19:24-27).

¹⁷ Xó má niʼthá náa timbá kutriga̱, xa̱bu̱ ninimbu̱ún dí niʼthí Demetrio. Ikhú nigíʼdi̱i̱ nindxa̱ʼwa̱ f xóo xa̱bu̱ skágunʼ: “¡Phú mba̱a̱ nindxu̱u̱ Ártemis ndrígu̱ún xa̱bu̱ efesios!”. Numuu dí Pablo nindxu̱u̱ mbáa xa̱bu̱ bi̱ naʼni gínáminaʼ ga̱jma̱a̱ numún eʼwíinʼ, ikhaa jngóo nindoo maʼga náa teatro mu maʼthúún xa̱bu̱ buʼko̱, mú eʼwíinʼ a̱ngiu̱lú nitháán dí xáʼga̱ numuu dí nindxu̱u̱ migamíi. Ikhú mbáa xa̱bu̱ bi̱ mbiʼyuu Alejandro nigíʼdu̱u̱ niʼthí. Ga̱jma̱a̱ numuu dí ikhaa nindxu̱u̱ judío, mbáa ikhaa nindoo maʼthí xú káʼnii mixtiʼkhu nindxu̱u̱ religión ndrígu̱ún bi̱ judíos ga̱jma̱a̱ religión ndrígu̱ún bi̱ cristianos. Mú tágiʼdoo numuu dí ikhaa niʼthí náa majñu̱únʼ xa̱bu̱ buʼko̱, numuu dí nditháan tsémbríguii kayuuʼ nájma̱ religión rígi̱. Índo̱ ndiyáá dí ikhaa nindxu̱u̱ xa̱bu̱ Hebreo,  nindxa̱ʼwa̱jmaa mu maguanúu wíí ga̱jma̱a̱ nitangiín nindxa̱ʼwa̱ mbu̱júu̱ʼ: “¡Phú mba̱a̱ nindxu̱u̱ Ártemis ndrígu̱ún xa̱bu̱ efesios!”, Xígi̱ kaʼnii nindxa̱ʼwa̱ a̱jma̱ hora. Asndu dí mbiʼi xúgi̱ bi̱ nagún náa i̱ʼwáʼ religión na̱nguá eriʼkumijnáa, ga̱jma̱a̱ tseniñami̱jna̱ mudxawíín (Hech. 19:28-34).

18, 19. a) Ndiéjuunʼ niʼni mbáa xa̱bu̱ ñajunʼ bi̱ xtáa náa Éfeso mu ma̱ndoo majxoo xkujndu rá. b) Xú káʼnii eni̱ tikhuun xa̱bu̱ ñajunʼ mu muñewu̱u̱n xa̱bi̱i̱ Jeobá ga̱jma̱a̱ xú káʼnii gándoo gúʼni̱ ikháánʼlú mu ikhiin muñewu̱nlú xá.

¹⁸ Nda̱wa̱á mbáa xa̱bu̱ ñajunʼ bi̱ gíʼdoo numuu náa xuajin rúʼko̱ niʼni dí majxoo xkujndu. Nisngájma dí nindxu̱u̱ mbáa xa̱bu̱ bi̱ najmañuu, nandxa̱ʼóo májánʼ edxu̱u̱ ga̱jma̱a̱ tsémiñuu maʼthí. Ikhaa niʼthún dí Pablo gajmíi̱n a̱ngui̱i̱n tátuʼwu̱u̱n gúni̱ kuʼwáʼ náa guʼwá rí nuxnún gamajkhu dioses ndrígu̱ún, ni má túta wéñííʼ diosa ndrígu̱ún, ma̱ngaa dí túni̱ nimbá dí raʼkhí náa inún mbá najmiin ikhiin. Mú niʼthúún dí á mu nandún muxruigi̱i̱n rígá xtángoo dí ma̱ndoo mambáñún, ma̱ngaa niʼthún mbá dí ni̱jkha̱nú náa a̱jkiu̱ún dí á mu ikhiin tséniña̱a̱ʼ nundxa̱ʼwa̱ nanújngurámún xtángoo, ma̱ngaa rí muni̱ dí makiʼníin xa̱bu̱ ñajunʼ bi̱ kúwá náa Roma. Nda̱wa̱á dí niʼthí rúʼko̱ ikhú niʼtángawúún xúgíinʼ xa̱bu̱. Ga̱jma̱a̱ numuu dí ikhaa niʼthí niʼni dí xa̱bu̱ muniña̱a̱ʼ rakiʼníin mbá nacha̱ (Hech. 19:35-41).

¹⁹ Nákha ikhú, na̱nguá ninindxu̱u̱ timbá aʼphu̱ ni má iwáá kayuuʼ dí xa̱bu̱ ñajunʼ bi̱ nandxaʼwóo májánʼ edxu̱u̱ nañewu̱u̱n xa̱bi̱i̱ Jesús. Apóstol Juan ndiʼyoo náa mbá dí nijuasngájmáá xú káʼnii gákuwáánʼlú náa iwáá mbiʼi. Ikhaa ndiʼyoo dí Ku̱ba̱ʼ nikuajan rawuunʼ ga̱jma̱a̱ niʼga̱a̱n iya mañu, xóo muʼthá dí xa̱bu̱ ñajunʼ numbañún cristianos índo̱ Gixa̱a̱ naʼni gíníi (Apoc. 12:15, 16). Xúʼko̱ má erígá, mbaʼiin xa̱bu̱ ñajunʼ numbayúlúʼ mu ma̱ndoo muʼtáraʼa ajngáa rí májánʼ ga̱jma̱a̱ mu magimbáánʼ mu mbuyamajkuíí Dios. Gajkhun má dí ga̱jma̱a̱ xóo nindxu̱lú naʼni dí marigá xúʼko̱ kaʼnii. Ga̱jma̱a̱ numuu dí Pablo ninindxu̱u̱ májáanʼ xa̱bu̱, rúʼko̱ niʼni dí mbuyamajkuíí xa̱bu̱ ñajunʼ Éfeso. Ga̱jma̱a̱ numuu rúʼko̱ dí xa̱bu̱ ñajunʼ táʼndún dí ikhaa mamínuuʼ (Hech. 19:31). Á mu ikháánʼlú nuʼthá ga̱jma̱a̱ nu̱ʼni̱ xó má kaʼyoo ma̱ngaa guaʼdáá gamajkulú, rúʼko̱ gáʼni̱ dí eʼwíinʼ mbuyáá dí ikháánʼ nindxu̱lú májáanʼ xa̱bu̱. Na̱nguá eʼyáá ndiéjuunʼ gárígá ga̱jma̱a̱ numuu dí xóo nuʼnilú.

20. a) Xú kaʼnii kumu̱lú ikháánʼ índo̱ nduʼyáá dí ajngóo Jeobá tándáti̱ga̱ nákha siglo timbá ni má dí mbiʼi xúgi̱ rá. b) Xú káʼnii eruguambáá ikháánʼ dí mbiʼi xúgi̱ mu maguma mba̱a̱ mbiʼyuu Jeobá rá.

²⁰ Ra̱ʼkhá tháán mitsaanʼ índo̱ nduʼyáá dí “Jeobá niʼni rí ajngóo mudxawíín mbaʼin ga̱jma̱a̱ mawán ri̱go̱o̱” nákha siglo timbá. Xúʼko̱ má edxulú mangáánʼ dí mbiʼi xúgi̱ numuu dí Jeobá nayambáá má xúʼko̱. Lá nanigulúʼ mangáánʼ muñambáá mu xa̱bu̱ ñajunʼ mumbayulúʼ ráʼ. Á mu dí xúʼko̱, guʼyarídúún bi̱ nijmañulúʼ ga̱jma̱a̱ numún náa capítulo rígi̱. Ganindxu̱lú xa̱bu̱ guabaaʼ, guʼnimbulúʼ má xúʼko̱ ikha dí naxná xuajñuu Jeobá, guñajunʼ ga̱jma̱a̱ xúgíʼ tsiaki̱i̱ ndrígulú, gu̱ʼni̱ gaʼduunʼ xúgíʼ dí na̱ʼkha̱ náa xawan, ganindxu̱lú mbáa xa̱bu̱ bi̱ naʼni dí májánʼ ga̱jma̱a̱ bi̱ gíʼdoo gamajkuu mu xúʼko̱ eʼwíinʼ xa̱bu̱ manigu̱u̱nʼ mudxawíín ajngáa dí na̱jkua̱ kaʼyulú.