CAPÍTULO 21
“Ragúʼdoo aʼkhúnʼ ga̱jma̱a̱ numuu eʼdiún xúgíinʼ xa̱bu̱”
Pablo ninindxu̱u̱ mbá májánʼ xkri̱da náa niʼtáráʼa, naxnún consejo bi̱ kuya̱ edxu̱u̱
Dí na̱ʼkha̱ raʼthí náa Hechos 20:1-38
1-3. a) Xú káʼnii niʼni dí nikháñúu Eutico rá. b) Ndiéjuunʼ niʼni Pablo, ga̱jma̱a̱ ndiéjuunʼ nisngájma dí niʼni rígi̱ xá.
PABLO xtáa náa xuajin Troas náa mbá guʼwá rí kúwá mbaʼiin xa̱bu̱. Numuu rí nixná mbá discurso dí ndajyúuʼ mbayuuʼ hora, ikha jngóo niʼni má tikhu nduʼun kaʼníí xóó xtáa ikhí. Tséniñuuʼ raʼsngáa, numuu rí i̱ndó mbruʼun rúʼko̱ xóó xtáa gajmíi̱n a̱ngiu̱lú buʼko̱. Náa guʼwá rúʼko̱ nakamuu mbaʼa aguʼ, mbáa naʼni gúní ga̱jma̱a̱ naʼni mijkha. Náa ventana gíʼ mbáa dxámá bi̱ mbiʼyuu Eutico, bi̱ niʼgu índo̱ Pablo xtáa raxná discurso, ikhú nixpátriguíi náa mbá guʼwá dí gíʼdoo ajtsú piso.
2 Lucas nigajtaa ragáyúu mu mambáyúu Eutico, mbáa numuu rí ikhaa ninindxu̱u̱ médico. Nakujmaa gajkhun dí ikhaa nikháñuu numuu dí mínaaʼ má Lucas niʼnirámáʼ dí “nikháñuu má índo̱ nixujxi̱i̱” (Hech. 20:9). Mú nirígá mbá ¡milagro! Apóstol ni̱jkha̱ kanuu náa dxámá ga̱jma̱a̱ naʼthúún bi̱ kúwá ikhí: “Xámiñalaʼ. Ikhaa tákháñuu”. ¡Ikhaa niʼniga̱bi̱i̱! (Hech. 20:10.)
3 Dí nirígá rígi̱ nasngájma kaʼwu nguáthá mba̱a̱ tsiaki̱i̱ gíʼdoo espíritu santo. Maski ajndu Pablo ragíʼdoo aʼkhúun dí nikháñuu dxámá buʼko̱, mú tániñuuʼ dí rúʼko̱ maʼni rí xágiʼdoo numuu mbiʼi rúʼko̱ ga̱jma̱a̱ rí eʼwíinʼ maʼndún mudxawíín má xúʼko̱ ajngá rawuunʼ Dios. Índo̱ niʼni rí matuxi̱i̱ dxámá, niʼni̱i̱ a̱jkiu̱ún ga̱jma̱a̱ nida̱a̱ tsiakii a̱ngiu̱lú mutaraʼa. Nikujmaa kaʼwu dí ikhaa ndiʼyoo rí gíʼdoo numuu vida ndrígu̱ún eʼwíinʼ, xó má nasngájma ajngáa dí niʼthí nda̱wa̱á: “Ragúʼdoo aʼkhúnʼ ga̱jma̱a̱ numuu eʼdiún xúgíinʼ xa̱bu̱” (Hech. 20:26). Ikháánʼlú ma̱ngaa gíʼmaa mu̱ʼni̱ xúʼko̱, ikhaa jngóo májánʼ gáʼni dí mbuʼyaridáá xkridoo.
“Ni̱jkha̱ náa Macedonia” (Hechos 20:1, 2)
4. Ndiéjuunʼ dí niraʼnuu Pablo rá.
4 Xó má ndiʼyáá náa capítulo dí ninújngoo, apóstol Pablo niraʼnuu mbá xkujndu gakhi̱i̱ náa Éfeso. Ga̱jma̱a̱ numuu dí ikhaa niʼtáráʼa, mbaʼiin xa̱bu̱ bi̱ nagujua̱ plata nikiʼníin wéñuuʼ, numuu dí nuda̱a̱ʼ mba̱a̱ wéñuuʼ mbújkha̱a̱ ga̱jma̱a̱ numuu rí nduyamajkuíí Ártemis. Náa Hechos 20:1 naʼthí dí “índo̱ nijxoo xkujndu, Pablo nindxaʼwún maguwáʼ xa̱bi̱i̱ Jesús. Nda̱wa̱á dí nixnúún tsiakii ga̱jma̱a̱ niʼtángawún ikhú ni̱jkha̱ náa Macedonia”.
5, 6. a) Nguáthá mba̱yu̱u̱ʼ nixtáa Pablo náa Macedonia, ga̱jma̱a̱ xú káʼnii nimbáñún a̱ngiu̱lú bi̱ kúwá ikhí xá. b) Xú káʼnii ndiʼñún a̱ngiu̱lú xá.
5 Índo̱ xtáa ra̱jkha̱ Macedonia niwi̱ji̱ náa na̱jkha̱núu mbaʼa barco náa Troas, ikhí niguanúu mbá nguáthá mbiʼi ga̱jma̱a̱ ikhí nigi̱ʼthu̱u̱n Tito, numuu dí ikhaa ni̱jkha̱ náa Corinto (2 Cor. 2:12, 13). Mú índo̱ ndiʼyoo dí Tito tséʼkha̱núu ni̱jkha̱ náa xuajin dí rígá Macedonia, ikhí “ni̱jkha̱ raxnúún tsiakii” a̱ngiu̱lú ndijyúuʼ xóo mbá tsiguʼ ikhí (Hech. 20:2). a Nda̱wa̱á nixka̱ma̱a̱ Tito, ikhaa ni̱ʼkha̱a̱ gáʼthúu̱n dí a̱ngiu̱lú Corinto nindrigú májánʼ timbá i̱yi̱i̱ʼ dí nikuʼma náa inún (2 Cor. 7:5-7). Ikhaa jngóo Pablo nikuʼma imbo̱o̱ i̱yi̱i̱ʼ náa inún a̱ngiu̱lú bugi̱, dí xúgi̱ nagumbiʼyuu raga̱jma̱ i̱yi̱i̱ʼ rí na̱jkha̱ inún Corintios.
6 Lucas niʼnirámáʼ xóo niʼni Pablo índo̱ ni̱jkha̱ náa Éfeso ga̱jma̱a̱ Macedonia, nijmuu a̱jma̱ nuthu ajngáa naxnún tsiaki̱i̱. ¡Ajngáa rígi̱ naxnáa ga̱jma̱a̱ rí xóo niʼni Pablo! Ikhaa niʼni gínáminaʼ ga̱jma̱a̱ numún eʼwíinʼ, raʼkháa xóo fariseos bi̱ ra̱ʼkhá tháán nini̱ mbaʼumíjna̱, bi̱ ndiyáá dí eʼwíinʼ raguáʼdáá numún (Juan 7:47-49; 1 Cor. 3:9). Ndiʼñún a̱ngiu̱lú xóo bi̱ nañajunʼ mbóó gajmíi̱n, nixnúún má xúʼko̱ tsiaki̱i̱ maski asndu nguáná ndiyóoʼ maxprígún (2 Cor. 2:4).
7. Xú káʼnii gándoo gúyaridáá Pablo a̱ngiu̱lú bi̱ kuya̱ edxu̱u̱ rá.
7 Dí mbiʼi xúgi̱ bi̱ kuya̱ edxu̱u̱ náa congregación ga̱jma̱a̱ circuito nunimíjna̱ mbuyaridáá xkridoo Pablo. Maski ajndu ndayóoʼ dí muxpriguíí mbáa ndxájulú, mú nditháan tségumún dí muxnáá tsiaki̱i̱. Nunimíjna̱ maku̱mu̱ún xóo eku̱mu̱u̱ eʼwíinʼ ga̱jma̱a̱ nunimíjna̱ dí muxnún tsiaki̱i̱, raʼkháa rí muthún dí raʼkhí kúwá runi̱. Mbáa circuito bi̱ ni̱jkha̱ mbaʼa nuthu náa congregación mba̱yu̱u̱ʼ tsiguʼ niʼthí: “Mbaʼiin a̱ngiu̱lú nandún muni̱ dí májánʼ, mú nguáná ndayóoʼ maʼngu̱u̱n ga̱jma̱a̱ dí naxmiéjúúnʼ, dí namíñúún o nakumu̱ún dí xájmiin gúni̱ májánʼ ñajunʼ dí guáʼdáá”. Índo̱ a̱ngiu̱lú nakumu̱ún xúʼko̱, ikhú bi̱ kuya̱ edxu̱u̱ ma̱ndoo muxnún tsiaki̱i̱ (Heb. 12:12, 13).
“Niri̱ya̱ʼ awan rí muxiyáa” (Hechos 20:3, 4)
8, 9. a) Ndiéjuunʼ niʼni dí Pablo táʼga náa Siria rá. b) Náá numuu dí judíos táʼndún gúyáá Pablo rá.
8 Pablo nigájnuu Macedonia mu maʼga Corinto, náa nixtáa mbá ajtsú igu̱nʼ. b Ikhú niríyaʼ awan dí maʼga náa Cencreas náa maguajtuun barco mu maʼga Siria, nda̱wa̱á maʼga náa Jerusalén náa maxnájxi̱i̱ mbújkha̱a̱ dí mambáñún ga̱jma̱a̱ a̱ngiu̱lú bi̱ nda̱ñúunʼ (Hech. 24:17; Rom. 15:25, 26). c Náa Hechos 20:3 naʼthí dí “judíos niri̱ya̱ʼ awan rí muxiyáa”, ikhaa jngóo ndiyóoʼ mariʼkhu̱u̱ kamba̱a̱ náa maʼga ga̱jma̱a̱.
9 Judíos bi̱ kúwá náa Corinto na̱nguá nigáwíinʼ a̱jkiu̱ún kuyáá Pablo, nithi dí ikhaa nindxu̱u̱ mbáa apóstata. Numuu dí táʼni má mba̱yu̱u̱ʼ dí ikhaa niʼngo̱o̱ niʼni dí Crispo bi̱ kayá edxu̱u̱ náa guʼwá dí ikhiin nuxnáá gamajkhu Dios mani̱ndxu̱u̱ xa̱bi̱i̱ Cristo (Hech. 18:7, 8; 1 Cor. 1:14). I̱mba̱ miʼtsu nixrui̱ga̱a̱ náa Galión, xa̱bu̱ ñajunʼ bi̱ xtáa náa Acaya, ikhaa táʼnimbo̱o̱ dí nithi, ikhaa jngóo itháan nikiʼníin kuyáá Pablo (Hech. 18:12-17). Índo̱ nidxawíín dí xa̱bu̱ sia̱nʼ ndrígu̱ún maʼga náa Cencreas, niriya̱ʼ awan dí muguaʼthi̱i̱n náa kamba̱a̱ mu muxiyáa. Ndiéjuunʼ niʼni Pablo índo̱ niʼdxawuun awan dí niri̱ya̱ʼ xá.
10. Lá nimíñuu Pablo ikhaa jngóo táʼga náa Cencreas ráʼ.
10 Mu nda̱a̱ dí gágíʼnuu ga̱jma̱a̱ mañewuun mbújkha̱a̱ dí kagu̱ táʼga náa Cencreas, ikha jngóo nitanga̱a̱ náa ni̱ʼkha̱ má ga̱jma̱a̱. Lá ragámíin kamba̱a̱ rúʼko̱ ráʼ. Gamíi má, numuu dí ikhí mbaʼa náa nagájnún bi̱ nuni̱ kuʼwáʼ ga̱jma̱a̱ náa guʼwá dí naguanún gamíi wéñuuʼ, maski ajndu xúʼko̱ Pablo niraʼwíí dí matanga̱a̱ ga̱jma̱a̱ ikhí, ki xóo dí maʼga náa Cencreas. Mú ikhaa na̱nguá má ni̱jkha̱ mbáwíí, ma̱ngaa ni̱jkha̱ Aristarco, Gayo, Segundo, Sópater, Timoteo, Tíquico ga̱jma̱a̱ Trófimo (Hech. 20:3, 4).
11. Xú káʼnii eñawumíjna̱ xa̱bi̱i̱ Dios, ga̱jma̱a̱ ndiéjuunʼ xkri̱da niniñuuʼ Cristo rá.
11 Xúʼko̱ má e̱ʼni̱ mangáánʼlú dí mbiʼi xúgi̱, nuñewamíjna̱ índo̱ najkua gúʼtaraʼa. Náa gamíi muʼgua ndajkuáánʼ, najkua mbaʼáanʼ o najkua gajmiúlú i̱mba̱a̱. Ma̱ngaa ndayóoʼ mu̱ʼni̱ tsumáá índo̱ naguma ngínáá. Gajkhun má dí xándoo gúrikháá xkujndu rígi̱, mú ndayóoʼ dí muñewamíjna̱ (Juan 15:20; 2 Tim. 3:12). Gu̱ʼni̱ xó má niʼni Jesús, índo̱ ikhaa xtáa náa Jerusalén ndiʼyoo dí xa̱bu̱ sia̱nʼ nurajxi̱ itsí mu muxnáá ga̱jma̱a̱, ikhaa “nirkaʼwumi̱na̱ʼ ga̱jma̱a̱ nigájnáa náa guʼwá rí nduyamajkuíí Dios” (Juan 8:59). Nda̱wa̱á índo̱ niʼdxawuun dí niri̱ya̱ʼ awan muxiyáa “niniñuuʼ rajngruigo̱o̱ pa̱jnu náa majñúnʼ judíos, ga̱jma̱a̱ nigájnuu ni̱jkha̱ náa mbá xuajen rí [...] gíʼ mijngii náa ku̱ba̱ʼ mijxooʼ” (Juan 11:54). Jesús ndiyáʼ xóo maʼni mu mañewumínáʼ, nindxu̱u̱ mbá májánʼ xkri̱da dí ma̱ndoo mbuʼyaridáá (Mat. 10:16).
“Ra̱ʼkhá tháán niʼni̱i̱ a̱jkiu̱ún” (Hechos 20:5-12)
12, 13. a) Xú káʼnii nikumu̱ún a̱ngiu̱lú índo̱ ndiyáá dí nigabi̱i̱ Eutico rá. b) Ndiéjuunʼ gándoo gáxnúún tsiaki̱i̱ bi̱ nikháñún a̱ngiu̱ún rá.
12 Pablo gajmíi̱n a̱ngui̱i̱n nigún mbóó náa Macedonia, nakujmaa dí ikhí mámbáa tsáa ni̱jkha̱, xóo muʼthá nigún náa mixtiʼkhu xuajin, mú nda̱wa̱á ndiyamijnáá náa Troas. d Náa Hechos 20:6 naʼthí dí ‹índo̱ niʼni witsu mbiʼi nixkamamijnáá náa Troas›. e Náa xuajin rúʼko̱ nirígá milagro dí nigabi̱i̱ Eutico bi̱ niʼtálú ga̱jma̱a̱ numuu náa kutriga̱ dí na̱ʼkha̱ náa nagi̱ʼdu̱u̱ capítulo rígi̱. ¡“Ra̱ʼkhá tháán niʼni̱i̱ a̱jkiu̱ún” a̱ngiu̱lú índo̱ ndiyáá dí nigabi̱i̱! (Hech. 20:12).
13 Xúgi̱ nánguá rígá milagro xóo nákha ginii. Mú bi̱ nakháñún a̱ngiu̱ún ‹naʼni̱i̱ a̱jkiu̱ún› índo̱ nduyáá dí náa Biblia naʼthí dí matujxi̱ín (Juan 5:28, 29). Maski ajndu Eutico nigabi̱i̱, mú nikháñúu má mbu̱júu̱ numuu dí nindxu̱u̱ xa̱bu̱ aʼkhá (Rom. 6:23). Mú xa̱bu̱ bi̱ gátujxi̱ín náa ku̱ba̱ʼ nuxi̱ʼ ma̱ndoo makuwá kámuu mbiʼi. Ga̱jma̱a̱ bi̱ gátujxi̱ín mu mutañajunʼ gajmiún Jesús náa mekhuíí nditháan xákháñún (1 Cor. 15:51-53). Ikhaa jngóo bi̱ kaxtaʼwíin ga̱jma̱a̱ “eʼwíinʼ mugu̱” rígá mbaʼa numuu dí maʼni̱i̱ a̱jkiu̱ún (Juan 10:16).
“Nisngála náa inún mbaʼin xa̱bu̱ ga̱jma̱a̱ náa mámbá guʼwá” (Hechos 20:13-24)
14. Ndiéjuunʼ niʼthún Pablo bi̱ kuya̱ edxu̱u̱ náa Éfeso índo̱ ndiyamijná náa Mileto rá.
14 Pablo gajmíi̱n a̱ngui̱i̱n nigún náa Troas mu magún náa Asón, nda̱wa̱á náa Mitilene, Quíos, Samos ga̱jma̱a̱ Mileto. Ga̱jma̱a̱ numuu dí apóstol ndiyóoʼ maʼga̱nú nacha̱ náa Jerusalén nákha xóó tsérígá ndxa̱a̱ Pentecostés, ndiyóoʼ matanga̱a̱ ga̱jma̱a̱ barco dí xáʼga̱nú náa Éfeso. Mú nindoo maʼtámíjná gajmíi̱n bi̱ kuya̱ edxu̱u̱ náa xuajin rúʼko̱, ikhaa jngóo niʼthún dí magajnún gútsijníí náa Mileto (Hech. 20:13-17). Ikhú niʼthún ajngáa rígi̱: “Ikháanʼ ndu̱ya̱a̱ májánʼ xú káʼnii ni̱ni̱ índo̱ nixtáá náa ikháanʼla asndu timbá mbiʼi dí ni̱ʼkhánú náa mbayuuʼ Asia. Ni̱ni̱ guabaminaʼ índo̱ ninindxu̱ʼ ñumbáá ndrígóo Tátá, ga̱jma̱a̱ nimbi̱ya̱ʼ, ma̱ngaa nimínuuʼ wéñuuʼ índo̱ xa̱bu̱ judíos nindúún muxiñún. Maski ajndu xúʼko̱ táni a̱jma̱ a̱jkiu̱nʼ mu ma̱tala mbá rí mambáyala, ma̱ngaa nisngála náa inún mbaʼin xa̱bu̱ ga̱jma̱a̱ náa mámbá guʼwá. Dí ni̱ni̱, ni̱thu̱u̱n mbá ajngáa kájxi̱ xa̱bu̱ judíos ga̱jma̱a̱ griegos rí ndayóoʼ dí matanga̱a̱ a̱jkiu̱ún náa dí raʼkhí nini̱ ga̱jma̱a̱ rí matangi̱i̱n náa Dios ga̱jma̱a̱ rí muguáʼdáá fe náa Tátá Jesús” (Hech. 20:18-21).
15. Ndiéjuunʼ erígá índo̱ najkua gúʼtaraʼa náa mámbá guʼwá rá.
15 Dí mbiʼi xúgi̱ rígá mbaʼa enii xóo ma̱ndoo muʼtáraʼa ajngáa rí májánʼ. Nu̱ʼni̱ xó má niʼni Pablo, nduʼñíinʼ xa̱bu̱ asndu náá má kúwíin, náa naguáʼnú carro, náa kamba̱a̱ dí nanújngúún mbaʼiin xa̱bu̱, náa naxtagujua̱ ga̱jma̱a̱ náa i̱ʼwáʼ náa ma̱ndoo muʼtáraʼa. Mú dí itháan nu̱ʼni̱ nindxu̱u̱ dí najkua mámbá guʼwá. Náá numuu rá. Timbá, numuu dí xúʼko̱ esngájma dí tséraʼwíin xa̱bu̱ xó má e̱ʼni̱ Dios ga̱jma̱a̱ xúʼko̱ numbáñún xúgíinʼ xa̱bu̱ mudxawíín ga̱jma̱a̱ numuu Xa̱bu̱ Ñajunʼ ndrígóo Dios. Raga̱jma̱, numuu dí xúʼko̱ nandoo numbáyíí mámbáa xa̱bu̱ bi̱ nandoo maʼdxawuun. Ragajtsú, numuu dí xúʼko̱ naʼni itháan mba̱a̱ fe ndrígúlú ga̱jma̱a̱ dí maʼngulú. Bi̱ phú nindxu̱ún cristianos gajkhun najmaʼniún ga̱jma̱a̱ xóo nutaraʼa “náa inún mbaʼin xa̱bu̱ ga̱jma̱a̱ náa mámbá guʼwá”.
16, 17. Xú káʼnii xkri̱da niniñuuʼ Pablo ga̱jma̱a̱ xú káʼnii gándoo gúʼyaridáá xá.
16 Nda̱wa̱á Pablo niʼthún bi̱ kuya̱ edxu̱u̱ náa Éfeso dí maski ajndu tséʼyoo ndiéjuunʼ gágíʼnuu náa Jerusalén, mú ikhaa niʼthí: “Tsixmiéjunʼ ga̱jma̱a̱ numuu vida ndrígóʼ, i̱ndó nandoʼ manimbánuu rí kaʼyoʼ ma̱ni̱ ga̱jma̱a̱ ñajunʼ dí nigruígú náa Tátá Jesús, ñajunʼ rígi̱ nindxu̱u̱ dí mataráʼa ajngáa rí májánʼ ga̱jma̱a̱ numuu rí májáanʼ a̱jkiu̱u̱n Dios” (Hech. 20:24). Xó má eʼyáá, ikhaa támíñúu, tániñuuʼ dí niguma gínáa, nandii o i̱ʼwáʼ xkujndu marikhoo dí xáʼnimbánuu ñajunʼ dí nikhánáá.
17 Cristianos bi̱ kúwá dí mbiʼi xúgi̱ mangiin tsémiñún índo̱ nuraʼníí mbaʼa enii xkujndu. Tikhuun dí ikhiin ndayóoʼ maʼngu̱u̱n náa tséniñu̱u̱nʼ mutaraʼa ga̱jma̱a̱ dí nuni̱ gíníin. Eʼwíinʼ naʼniún nandii rí gakhi̱i̱ ma̱ngaa jiámá ga̱jma̱a̱ wa̱ʼxa̱ʼ ndayóoʼ maʼngu̱u̱n índo̱ bi̱ nuniga̱jma̱a̱ gajmiún nutsudiin muni̱ dí ra̱májánʼ. Tséʼniuu asndu xú káʼnii kuwáánʼ, guʼnimíjna mbuʼyaridáá Pablo, xúniʼñáánʼ ‹ruʼtáraʼa kájxi̱ ajngáa rí májánʼ ga̱jma̱a̱ numuu Reino›.
“Guñeumíjna̱ má ikháanʼla ga̱jma̱a̱ guñewu̱u̱n mugu̱” (Hechos 20:25-38)
18. a) Náá numuu dí Pablo niʼthí dí ragíʼdoo aʼkhúun ga̱jma̱a̱ numuu eʼdiún xa̱bu̱ rá. b) Xú káʼnii gándoo gúni̱ mu xaguaʼdáá aʼkhúún mangiin bi̱ kuya̱ edxu̱u̱ náa Éfeso rá.
18 Nda̱wa̱á kayuuʼ Pablo nijmuu xkri̱da xó má ikhaa nixtáa, nixnúún mbájmbu consejo a̱ngiu̱lú bi̱ kuya̱ edxu̱u̱. Índo̱ niʼthún dí mbáa ikhaa ni xátanga̱a̱ mbaʼñúún, ikhú niʼthí ajngáa rígi̱: “Ragúʼdoo aʼkhúnʼ ga̱jma̱a̱ numuu eʼdiún xúgíinʼ xa̱bu̱, numuu rí táni a̱jma̱ a̱jkiu̱nʼ mu ma̱tala xúgíʼ rí nandoo Dios mbu̱ya̱a̱la”. Nda̱wa̱á niʼthún xú káʼnii gándoo mbuyaridáá ga̱jma̱a̱ xú káʼnii gúni̱ mu xáguáʼdáá aʼkhúún á mu mbáa tsékríya̱a̱ʼ, niʼthún: “Guñeumíjna̱ má ikháanʼla ga̱jma̱a̱ guñewu̱u̱n mugu̱, numuu rí espíritu santo nigruigáanʼ ikháanʼla mu muñewu̱u̱n ga̱jma̱a̱ muxnu̱u̱ ikha mugiu̱u̱ Dios, ikhaa mínaaʼ niʼtsiwíin ga̱jma̱a̱ eʼdiuu A̱ʼdióo” (Hech. 20:26-28). Ma̱ngaa niʼthí dí náa majñu̱únʼ mugu̱ makuwá “lobos bi̱ najmangu̱u̱nʼ” bi̱ “muthi ajngáa dí ragájkhun mu muninduwiinʼ xa̱bi̱i̱ Jesús, ga̱jma̱a̱ magún kidxu̱únʼ ikhiin”. Xú káʼnii gándoo gúraʼníí xúgíʼ rúʼko̱ xá. Ikhaa niʼthún: “Gakuwáanʼ xawii ga̱jma̱a̱ garmáʼáan a̱jkia̱la rí mbá ajtsú tsiguʼ, mbiʼíí mbruʼun ga̱jma̱a̱ asndu xtambi̱ya̱ʼ tániʼñúuʼ raxnala consejo mámbáa dí ikháanʼla” (Hech. 20:29-31).
19. Ndiéjuunʼ nirígá índo̱ na̱jkha̱ rámbáa siglo timbá, ga̱jma̱a̱ xú káʼnii ni̱jkha̱ rajoo rígi̱ tsiguʼ nda̱wa̱á rá.
19 Índo̱ ni̱jkha̱ rámbá siglo timbá, nikujmiin bi̱ nindxu̱ún xóo “lobos bi̱ najmangu̱u̱nʼ”. Nákha tsiguʼ 98, apóstol Juan niʼnirámáʼ: “Nikujmiin mbaʼin bi̱ tsíñún guyáá Cristo [...]. Ikhiin nigájnún náa majñulú, mú na̱nguá ni̱ndxu̱ún xó má ikháanʼlú, á mu ni̱ndxu̱ún xó má ikháánʼ, ikhiin maguanún ga̱jma̱á ni̱ndxu̱lú” (1 Juan 2:18, 19). Nákha siglo ajtsú, nikujmiin bi̱ tsíñún gúyáá Dios ga̱jma̱a̱ nikúwíin bi̱ ndiya̱ edxu̱u̱ náa religión nduwaʼ. Nákha siglo a̱jkhu̱, xa̱bu̱ ñajunʼ Constantino nixná permiso dí ma̱ndoo makuwíin xa̱bu̱ bugi̱. Índo̱ niniri̱ya̱a̱ʼ ndxa̱a̱ dí nuni̱ eʼwíinʼ xa̱bu̱, nini̱ makujmaa xóo májánʼ nindxu̱u̱ ndxa̱a̱ rígi̱ náa awúu̱n religión, numuu dí xa̱bu̱ ede̱ nisngáa “dí ragájkhun”. Ga̱jma̱a̱ numuu rí nisngáa dí minduwaʼ nákha ikhú, nakujmaa xóó asndu dí mbiʼi xúgi̱ náa nusngáa ga̱jma̱a̱ rí xóo nuni̱.
20, 21. a) Xú káʼnii nisngájma Pablo dí niʼni gínáminaʼ ga̱jma̱a̱ numún eʼwíinʼ rá. b) Xú káʼnii eyaridáá Pablo a̱ngiu̱lú bi̱ kuya̱ edxu̱u̱ dí mbiʼi xúgi̱ rá.
20 ¡Ra̱ʼkhá tháán mixtiʼkuii ninindxu̱u̱ Pablo xóo xa̱bu̱ bi̱ nurawi káñún dí guáʼdáá mugiuún! Ikhaa niñejunʼ gakhi̱i̱ mu mbayáʼ dí ndayóoʼ mu xúʼko̱ xáxnún ñajunʼ bi̱ kúwá náa congregación. Ikhaa nditháan táguwi káñún mbújku̱ún a̱ngiu̱lú. Asndu niʼthún a̱ngiu̱lú bi̱ kuya̱ edxu̱u̱ náa Éfeso dí gíʼmaa muni̱ gínámijná ga̱jma̱a̱ numún eʼwíinʼ, niʼthún: “Gíʼmaa muñejunʼ gakhi̱i̱ mu mumbáñún bi̱ guabiinʼ, ga̱jma̱a̱ gíʼmaa marmáʼáan a̱jkia̱la ajngáa rígi̱ rí niʼthí Tátá Jesús: ‹Rígá itháan gagi dí maraxna̱ ki xóo dí makánaa’›” (Hech. 20:35).
21 Dí mbiʼi xúgi̱ ma̱ngaa a̱ngiu̱lú bi̱ guáʼdáá mbá ñajunʼ náa congregación nuni̱ gínámijná ga̱jma̱a̱ numún eʼwíinʼ. Raʼkháa xóo bi̱ kuya̱ edxu̱u̱ náa i̱ʼwáʼ religión bi̱ nurawi káñún mbújku̱ún mugiuún. A̱ngiu̱lú bugi̱ tséni i̱ndó rí nandún ikhiin nunimbaníí ñajunʼ dí muxnún “ikha mugiu̱u̱ Dios”. Náa xuajñuu Jeobá nimbáa ragíʼmaa maʼnimbámináʼ ni má rí mbayáʼ magiʼdoo índo̱ dí nandoo ikhaa, numuu rí bi̱ ndayáʼ “magruigú gamajkhu i̱ndó ikhaa”, ikhaa má gámínuuʼ (Pro. 25:27). Índo̱ mbáa naʼnimbamínáʼ, ikhaa má gáríyaʼ majkhuu (Pro. 11:2).
“Xúgíinʼ nimbi̱ya̱ʼ.” (Hechos 20:37)
22. Náá numuu dí nindúún kuyáá wéñuuʼ Pablo a̱ngiu̱lú bi̱ kuya̱ edxu̱u̱ náa Éfeso rá.
22 Ga̱jma̱a̱ numuu dí Pablo nindoo kaʼñún gajkhun a̱ngiu̱lú, ikhaa jngóo a̱ngiu̱lú nindúún kuyáá wéñuuʼ. Índo̱ niniñúúnʼ, “xúgíinʼ nimbi̱ya̱ʼ ga̱jma̱a̱ ndiyaraʼaa Pablo ga̱jma̱a̱ nixnáá beso” (Hech. 20:37, 38). Ikháánʼ nduʼyáá dí guáʼdáá wéñuuʼ numún ga̱jma̱a̱ nandulú kuʼñúún a̱ngiu̱lú bi̱ nuñajunʼ gakhi̱i̱ muñewu̱u̱n mugiuún Dios. Dí xóo nijmañulúʼ mbá chíʼgíiʼ ga̱jma̱a̱ numuu xkri̱da ndrígóo Pablo, na̱jkua̱nú nduʼyáá gajkhun dí ikhaa táʼthi ajngáa rígi̱ numuu dí niʼnimbamínáʼ: “Ragúʼdoo aʼkhúnʼ ga̱jma̱a̱ numuu eʼdiún xúgíinʼ xa̱bu̱” (Hech. 20:26).
a Atayáá náa kúgumaʼá “ I̱yi̱i̱ʼ dí niʼnirámáʼ Pablo náa Macedonia”.
b Mbáa ikhú niʼnirámáʼ i̱yi̱i̱ʼ rí na̱jkha̱ inún Romanos.
c Atayáá náa kúgumaʼá “ Pablo nambáñúún a̱ngiu̱lú ga̱jma̱a̱ mbújkha̱a̱”
d Náa Hechos 20:5, 6, Lucas natanga̱a̱ naʼthí mbu̱júu̱ ga̱jma̱a̱ numuu ikhaa, rígi̱ naʼni mbuʼyáá dí ikhaa ma̱ngaa nixkamamina̱a̱ʼ ga̱jma̱a̱ Pablo náa Filipos, numuu dí káaʼ niniñuuʼ ikhí nákha ginii (Hech. 16:10-17, 40).
e Índo̱ nigájnún náa Troas mu magún náa Filipos ndijñúúnʼ mbá witsu mbiʼi. Mbáa ndijyúuʼ numuu dí táxnúu giñánʼ xó má kaʼyoo mbiʼi rúʼko̱, numuu dí nákha ginii ndijñúúnʼ a̱jma̱ mbiʼi mu maguánú (Hech. 16:11).