CAPÍTULO 16
“Ayi̱ Macedonia gátambáyuxuʼ”
Dios naʼni tsajkurámíinʼ xa̱bu̱ bi̱ nundrigú ñajunʼ dí nakhánún ma̱ngaa nuraʼníí xkujndu ga̱jma̱a̱ gagi
Dí na̱ʼkha̱ raʼthí náa Hechos 16:6-40
1-3. a) Xú káʼnii ikha nixnúu espíritu santo Pablo gajmíi̱n a̱ngui̱i̱n rá. b) Ndiéjuunʼ gúʼyáá náa capítulo rígi̱ rá.
MBAʼIIN gu̱ʼu̱ nagájnún náa xuajin Filipos, náa Macedonia mu maguánú náa rawuunʼ iyaʼ dí mbiʼyuu Gangites, náa naguʼwún natri̱gi̱i̱n mu mutakáñíí Jeobá, Dios ndrígóo Israel, bi̱ xtáa xawii má xúʼko̱ maʼdxawuun dí gúthi (2 Cró. 16:9; Sal. 65:2).
2 Xígií náa Filipos náa níjniúu nagájnuu a̱jkha̱ʼ itháan dí mbá 800 kilómetros, nagájnún mbá ajtsíin misionero náa xuajin Listra, náa sur ndrígóo Galacia. Na̱nguá má eʼni mbayuuʼ dí mbá ajtsíin xa̱bu̱ niguánú náa kambu̱ún romanos, ikhaa nindxu̱u̱ Pablo, Silas ga̱jma̱a̱ Timoteo mu magún xígií náa narámáaʼ a̱jkha̱ʼ náa kúwíin mbaʼiin wéñuuʼ xa̱bu̱, náa naʼtáñajunʼ Asia. Ikhiin ra̱ʼkhá tháán nadxún dí magún náa kamba̱a̱ rígi̱ mu manújngún náa Éfeso ga̱jma̱a̱ náa i̱ʼwáʼ xuajin náa kúwíin mbaʼiin wéñuuʼ xa̱bu̱ bi̱ ndayóoʼ mudxawíín dí niʼtáráʼa Cristo. Mú nákha xóó tsegájnún magún, Jesús nijmuu espíritu santo mu maʼthúún dí xútaraʼa náa Asia. Numuu rí Jesús nijmuu espíritu ndrígóo Dios mu maʼthúún dí manújngún xúʼkhiín náa Asia Menor rí xáʼyóoʼ mutaraʼa ikhí ma̱ngaa makidiin lamáa dí rígá náa Ageo ga̱jma̱a̱ magún náa rawuunʼ mañu Gangites.
3 Rí xóo Jesús nixnúu ikha Pablo gajmíi̱n a̱ngui̱i̱n mu magún náa Macedonia rígá mbaʼa dí naʼsngúlú. Ma̱ngaa mbuʼyáá ndiéjuunʼ nirígá índo̱ ni̱jkha̱ dí maʼni a̱jma̱ nuthu Pablo xóo misionero rí nigi̱ʼdu̱u̱ nákha mijngii tsiguʼ 49.
“Dios nindxaʼwúxu muʼguá ikhí” (Hechos 16:6-15)
4, 5. a) Ndiéjuunʼ nigíʼnuu Pablo gajmíi̱n a̱ngui̱i̱n índo̱ inu maguánú náa Bitinia rá. b) Ndiéjuunʼ niraʼwi̱i̱ muni̱ ikhiin ga̱jma̱a̱ ndiéjuunʼ nirígá rá.
4 Pablo gajmíi̱n a̱ngui̱i̱n niraʼwi̱i̱ magún gútaraʼa náa mbaaʼ ndrígóo Bitinia nda̱wa̱á dí tándoo mutaraʼa náa mbaaʼ ndrígóo Asia. Mbáa nigún rajkhúún náa kamba̱a̱ xka̱wi̱ʼ náa xuajin dí na̱nguá kúwíin mbaʼiin xa̱bu̱ náa Frigia ga̱jma̱a̱ náa Galacia. Índo̱ inu maguánú náa Bitinia, Jesús nijmuu mbu̱júu̱ʼ espíritu santo mu maʼthúún dí xágún ikhí (Hech. 16:6, 7). Mbáa ikhiin nánguá ndiyáá dí muni̱, maski ajndu nduyáá ndiéjuunʼ gúthi ga̱jma̱a̱ xóo gúni̱ náa mutaraʼa, mú nánguá eyáá náa magún. Nindxu̱u̱ asndu xóo niguánú náa xkrugua ndrígóo Asia mú na̱nguá nindoo matu̱ʼu̱u̱n. Nda̱wa̱á ninimi̱jna̱ magún náa Bitinia, mú ikhí ma̱ngaa tándoo mutaraʼa. Maski ajndu xúʼko̱ nigíʼníín, mú ikhiin tákánajkún. Ikhú niraʼwi̱i̱ magún náa dí tundxaʼwami̱jna̱, nigún xígií náa narámáaʼ a̱jkha̱ʼ xóo mbá 550 kilómetros asndu náa rawuunʼ lamáa dí rígá náa Troas, mu ma̱ndoo magún náa Macedonia (Hech. 16:8). Rí maʼni ajtsú aʼphu̱ nindoo nitu̱ʼu̱u̱n náa xuajin dí ma̱ndoo mutaraʼa.
5 Lucas, bi̱ ma̱ngaa ni̱jkha̱ náa Troas, niʼthí ndiéjuunʼ nirígá: “Índo̱ niʼni mbruʼun, Pablo rígá mbá rí niwasngájmáá: Ndiʼyoo mbáa xa̱bu̱ bi̱ na̱ʼkha̱ náa Macedonia ga̱jma̱a̱ wíji̱ raʼtákáñuu: “Ayi̱ Macedonia gátambáyuxuʼ”. Nda̱wa̱á rí Pablo niwasngájmáá rígi̱, ikhú ni̱jkuáxu̱ Macedonia, numuu rí ni̱jkuánúxu ndi̱ya̱a̱ rí Dios nindxaʼwúxu muʼguá ikhí mu mutaráʼaxu ajngáa rí májánʼ” (Hech. 16:9, 10). a ¡Ikhú apóstol ndiʼyoo náa maʼga̱ gáʼtaraʼa! Mbáa nidxuu wéñuuʼ dí takanájkhoo índo̱ xtáa ra̱jkha̱ náa kamba̱a̱. Tájyúuʼ má rí mbá a̱jkhui̱i̱n xa̱bekha̱ nigún ga̱jma̱a̱ barco náa Macedonia.
“Nirajtuunxu barco náa Troas.”(Hechos 16:11)
6, 7. a) Ndiéjuunʼ ejmañuluʼ índo̱ nduʼyáá dí nigíʼnuu Pablo náa ni̱jkha̱ rá. b) Ndiéjuunʼ dí gíʼmaa mbuʼyáá gajkhun rá.
6 Mu mbuʼyáá ndiéjuunʼ ejmañuluʼ náa historia rígi̱, guʼyáá nguáná Jesús nixná ikhúún misionero náa magún gútaraʼa. Nakujmaa dí nijmuu espíritu santo mu maxná ikhúún nda̱wa̱á dí nigún náa Asia. Ikhaa má nixnúún ikha mbu̱júu̱ʼ nda̱wa̱á dí niguánú náa Bitinia. Iwáá kayuuʼ nixnúún ikha dí magún náa Macedonia nda̱wa̱á dí niguánú náa Troas. Xúʼko̱ má kayuuʼ Jesús ma̱ndoo maʼni ga̱jma̱á nindxu̱lú xúgi̱ (Col. 1:18). Mbá xkri̱da, mbáa mba̱yu̱u̱ʼ má kuwáánʼlú rundxa̱ʼwa̱míjna̱ dí manindxu̱lú precursor o mu̱ʼgua̱ gákuwáánʼ náa nda̱ñúunʼ bi̱ mutaraʼa. Mbáa mundrígúlú ikha ndrígóo Jesús asndu nda̱wa̱á dí ikháanʼ gúraʼwíí mbá dí mu̱ʼni̱. Náá numuu rá. Numuu rí ni̱ndxu̱lú xóo mbá carro, i̱ndó ma̱ndoo mi̱dxu̱ʼ cháaʼ náa ñawún májáanʼ o náa ñawún xti̱ya̱a̱ʼ á mu na̱jkha̱ má. Xúʼko̱ má kayuuʼ, Jesús naxnúlú ikha i̱ndó á mu gajkhun kuwáánʼ ru̱ʼni̱ tsiakimijna muʼtáraʼa itháan.
7 Mú á mu nda̱a̱ dí eʼyáá nacha̱ rá. Lá mbaʼyóoʼ mundxaʼwamíjna̱ dí espíritu santo na̱nguá exnúlú ikha ga̱jma̱a̱ dí mbaʼyóoʼ muniʼñááʼ ru̱ʼni̱ tsiakimi̱jna̱ ráʼ. Na̱nguá. Pablo ma̱ngaa nirígá náa tándoo maʼtáraʼa, mú ndiyóoʼ maʼngo̱o̱ a̱jkiu̱u̱n asndu maxkamaa náa kaʼnii maʼtáraʼa. Nduʼyáá gajkhun dí maguma tsajkurámáánʼ á mu nduʼyáʼ “mbá xkrugua mba̱a̱ mu mañajunʼ itháan” (1 Cor. 16:9).
8. a) Xú káʼnii ninindxu̱u̱ xuajin Filipos rá. b) Ndiéjuunʼ dí májánʼ nirígá índo̱ Pablo niʼtárúʼún gu̱ʼu̱ bi̱ kúwá rutajkáan rá.
8 Índo̱ niguánú náa Macedonia, Pablo gajmíi̱n a̱ngui̱i̱n ni̱jkha̱ náa Filipos mbá xuajin náa kúwá xa̱bu̱ bi̱ nuni̱ mbaʼumíjna̱ ga̱jma̱a̱ numuu dí nindxu̱ún romanos. Xuajin rúʼko̱ nindxu̱u̱ ikháá kayúʼ xóo Roma rí soldados bi̱ niguámbu̱u̱n ñajunʼ nuthi dí nindxu̱u̱ Italia chíʼgíiʼ dí rígá náa Macedonia. Mú náa rexo̱o̱ xuajin nanújngoo mañu Gangites. Náa rawuunʼ mañu ikhí misioneros ‹ndiyáá dí gáʼchú mutajkáan›. b Índo̱ niʼni mbiʼi sábado niguájtaa ikhí ga̱jma̱a̱ nixkamiin mbaʼiin wéñuuʼ gu̱ʼu̱ bi̱ nigimbíin mu mbuyamajkuíí Dios. Ikhaa jngóo nigíʼdi̱i̱ nitamijná gajmiún. Mbáa dí ikhaa mbiʼyuu Lidia, ikhaa “xtáa raʼdxawun […] Ikhú Jeobá nimbáʼtoo kájxi̱ a̱jkiu̱u̱n mu makro̱ʼo̱o̱”. Ra̱ʼkhá tháán ninigu̱u̱ʼ dí niʼdxawuun dí asndu nijngúun iyááʼ gajmíi̱n bi̱ kúwíin náa goʼwóo. Nda̱wa̱á niʼtákáñuu Pablo gajmíi̱n a̱ngui̱i̱n dí maguanún náa goʼwóo (Hech. 16:13-15). c
9. Xú káʼnii eyaridáá Pablo a̱ngiu̱lú ga̱jma̱a̱ xú káʼnii guma tsajkurámíinʼ xá.
9 Mbáa Pablo gajmíi̱n a̱ngui̱i̱n ra̱ʼkhá tháán nidxúún índo̱ ndiyáá dí Lidia nijngúun iyááʼ, ma̱ngaa dí ninimbu̱ún índo̱ nijuiʼthúún dí magún Macedonia. Ma̱ngaa ndiʼyoo dí Jeobá nijmiuu ikhiin mu xúʼko̱ maxtiʼña̱a̱ dí nutajkháan gu̱ʼu̱ bugi̱. Xó má nákha wajyúuʼ, xúʼko̱ má dí mbiʼi xúgi̱ ma̱ngaa, mbaʼin a̱ngiu̱lú jiámá, xabuanii, bi̱ xóó tsénu̱ju̱nʼ o xóó tsénigu̱nʼ ma̱ngaa a̱ngiu̱lú bi̱ nidamijná má, nagún gákúwíin náa nda̱ñúunʼ bi̱ mutaraʼa. Gajkhun má dí mbaʼa dí ndayóoʼ muraʼníí, mú tsémbríguii ga̱jma̱a̱ gagi dí naguáʼdáá índo̱ nuxkamiin xa̱bu̱ bi̱ nindxu̱ún xóo Lidia, bi̱ nandún majmañún dí na̱ʼkha̱ raʼthí náa Biblia. Guraximi̱jna̱lú, lá ma̱ndoo maríyaʼ awan mu maʼgá gáyambáá náa ndayóoʼ miʼtáraʼa ráʼ. Á mu nu̱ʼni̱ xúʼko̱, Jeobá maʼni tsajkurámáʼlú wéñuʼ. Guʼyáá dí nuthi bi̱ nagún gúyambáá náa i̱mba̱ xuajin. Ndxájulú Aaron bi̱ gíʼdoo 25 tsiguuʼ bi̱ xúgi̱ xtáa náa centroamerica naʼthí: “Dí maxtáá rayambáá náa i̱mba̱ xuajin nimbáyuʼ mu mambaxúʼ itháán gajmuʼ Jeobá ga̱jma̱a̱ maxtáá mijngii náa ikhaa. Ra̱ʼkhá tháán mitsaanʼ dí marataráʼa, dí xúgi̱ nasngúún mbá 8 xa̱bu̱ ga̱jma̱a̱ numuu Biblia”. Mbaʼiin a̱ngiu̱lú nuni̱ xúgi̱ kaʼnii ga̱jma̱a̱ nakumu̱ún ikháá xó má ndxájulú bugi̱.
Xú kaʼnii gándoo ‹mu̱ʼgua̱ Macedonia› ga̱jma̱a̱ muñambáá náa i̱mba̱ xuajin rá.
“Xa̱bu̱ ningujxi̱i̱n kudiin” (Hechos 16:16-24)
10. Ndiéjuunʼ niʼni Gixa̱a̱ mu marikhoo Pablo dí xáʼtáraʼa gajmíi̱n a̱ngui̱i̱n rá.
10 Gixa̱a̱ ra̱ʼkhá tháán nikiʼnáa índo̱ ndiʼyoo dí xa̱bu̱ nindrigú ajngáa dí májánʼ náa mbá xuajin dí nuni̱ i̱ndó dí nandoo ikhaa. Tséʼñulú tsiánguá dí Gixa̱a̱ niʼni xó má eʼngo̱o̱ mu marikhúún misioneros dí xútaraʼa. Xúʼko̱ má nirígá índo̱ nigún náa nutajkháan, mbáa ndxáʼgú bi̱ gíʼdaa xa̱bu̱ wéñiiʼ ni̱jkha̱ kidxúúnʼ. Ga̱jma̱a̱ numuu dí ndxáʼgú bugi̱ naʼtáriyaʼ dí marigá nda̱wa̱á naʼni dí bi̱ nutañajuíínʼ maguáʼdáá mbújkha̱a̱ ga̱jma̱a̱ tséniñuuʼ randxaʼwá: “Xa̱bu̱ bugi̱ ni̱ndxu̱ún xa̱bi̱i̱ Dios bi̱ phú mba̱a̱, ga̱jma̱a̱ nutaraʼala ga̱jma̱a̱ numuu kamba̱a̱ rí maʼni káwáanʼla”. Náá numuu dí xa̱bu̱ wéñiiʼ niʼni maʼthí rígi̱ xá. Mbáa nindoo masngájma dí naʼtáriyaʼ dxáʼgú nindxu̱u̱ ikháá má kiʼsngáa dí nasngáa Pablo, dí xúgíʼ rígi̱ na̱ʼkha̱ Dios ga̱jma̱a̱ xúʼko̱ gáʼni dí xa̱bu̱ xúndxawíín kisngáa dí nagún kuñu̱u̱ cristianos gajkhun. Mú Pablo nixkriya̱a̱ʼ xa̱bu̱ wéñiiʼ náa xuyuuʼ ndxáʼgú (Hech. 16:16-18).
11. Ndiéjuunʼ nigíʼnuu Pablo ga̱jma̱a̱ Silas nda̱wa̱á dí nixkriya̱a̱ʼ xa̱bu̱ wéñiiʼ rá.
11 Índo̱ nidxawíín bi̱ nutañajuíín ndxáʼgú dí nánguá náa ma̱ʼkha̱ mbújkha̱a̱, ra̱ʼkhá tháán nikiʼníin. Nixmajtaa Pablo ga̱jma̱a̱ Silas asndu náa naxtangujua, náa naguʼwún nagimbíi̱n xa̱bu̱ ñajunʼ bi̱ kuya̱ edxu̱u̱ náa Roma. Ga̱jma̱a̱ numuu dí xa̱bu̱ ñajunʼ tsíñún gúñún ma̱ngaa dí ndiñún dí na̱nguá guaʼdáá numún, nithi dí judíos buʼko̱ kúwíin runi jnga̱wi̱i̱n xa̱bu̱ ga̱jma̱a̱ kiʼsngáa ndrígu̱ún dí xándoo mudxawíín xa̱bu̱ romanos. Ga̱jma̱a̱ numuu dí nithi xa̱bu̱ ñajunʼ bugi̱ niʼni dí: Xa̱bu̱ mangujxi̱i̱n kudiin. “Ikhú xa̱bu̱ ñajunʼ [...] nitañajunʼ rí muxpajtiin ga̱jma̱a̱ xkuíyá”. Nda̱wa̱á nigún kudiin náa xa̱bu̱ bi̱ nañewu̱u̱n guʼwá ejua̱a̱nʼ, “ikhaa nikudiinʼ náa guʼwá e̱jua̱nʼ ga̱jma̱a̱ nikudaa’ rajkúún náa ixi̱” (Hech. 16:19-24). Náa kajchún ra̱ʼkhá tháán mikrína dí asndu na̱nguá kaʼnii mbuyamijná, mú Jeobá xtáa raʼyoo xúgíʼ dí kúwá ruguaʼníí (Sal. 139:12).
12. a) Xú kaʼnii ndiʼyoo Pablo gajmíi̱n a̱ngui̱i̱n dí niguma gíníi ga̱jma̱a̱ náá numuu rá. b) Ndiéjuunʼ tsáʼkhá dí najmuu Gixa̱a̱ asndu mbiʼi xúgi̱ gajmíi̱n bi̱ numbayíí rá.
12 Nákhi wapháá, Jesús má niʼthúún xa̱bi̱i̱ dí mangiin maguma gíníi (Juan 15:20). Ikhaa jngóo índo̱ Pablo gajmíi̱n a̱ngui̱i̱n niguánú náa Macedonia kúwá má xawii mumíniiʼ. Na̱nguá nikumu̱ún dí nimíniiʼ numuu dí Jeobá tánigu̱u̱ʼ dí nini̱, ikhiin niguánú ndiyáá dí rúʼko̱ nindxu̱u̱ tsáʼkhá dí Gixa̱a̱ nagrui̱ga̱ numuu dí nakiʼnáa. Xúʼko̱ má eni̱ dí mbiʼi xúgi̱ bi̱ numbayíí Gixa̱a̱. Nuni̱ dí majuiʼthá dí nduwaʼ ga̱jma̱a̱ numulú mu xúʼko̱ xándún gúyulú náa escuela ga̱jma̱a̱ náa nuñajunʼ. Náa tikhuu xuajin xa̱bu̱ bi̱ tsíñún gúñún bi̱ nuniga̱jma̱a̱ nagún gúxrui̱ga̱ náa inún xa̱bu̱ ñajunʼ ga̱jma̱a̱ nuthi dí ikháánʼlú nu̱ʼni̱ dí xa̱bu̱ magi̱ʼdu̱u̱n ga̱jma̱a̱ numuu dí nuʼsngáalú. Ma̱ngaa rígá xuajin náa nuni̱ gíníi ga̱jma̱a̱ nuxudi̱i̱nʼ náa guʼwá ejua̱a̱nʼ a̱ngiu̱lú. Mú xó má nákhá ikhú, Jeobá xtáa raʼyoo xúgíʼ xtáa rarígá (1 Ped. 3:12).
Mbá nacha̱ “nijngún iyááʼ” (Hechos 16:25-34)
13. Ndiéjuunʼ niʼni dí bi̱ nañewu̱u̱n guʼwá ejua̱a̱nʼ marajxi̱ ndiéjuunʼ gáʼyóoʼ maʼni mu makríya̱a̱ʼ rá.
13 Pablo ga̱jma̱a̱ Silas ndiyóoʼ mbayuuʼ mbiʼi mu xúʼko̱ maʼni̱i̱ náa nigawúúnʼ ga̱jma̱a̱ mundxaʼwamíjná dí nirígá mbiʼi rúʼko̱. Índo̱ niʼni tikhu nduʼun niʼni̱i̱ má a̱jkiu̱ún, ikhaa jngóo nigíʼdi̱i̱ nitajkháan ga̱jma̱a̱ nini̱ “mba̱a̱ Dios ga̱jma̱a̱ ajmúú”. Nda̱a̱ tsu̱ma̱ nigíʼdu̱u̱ niʼxma gakhi̱i̱ wéñuuʼ, ikhú mbá nacha̱ ndijui̱i̱ bi̱ nañewu̱u̱n guʼwá ejua̱a̱nʼ ga̱jma̱a̱ ndiʼyoo dí kambaʼtoo xkrugua, nikumu̱u̱ dí nigájnún ragáñúún bi̱ tri̱ʼi̱i̱n ikhí. Numuu dí ikhaa má ndaʼyoo dí á mu nakáwíin bi̱ tri̱ʼi̱i̱n náa guʼwá ejua̱a̱nʼ muni̱ gínáa, ikha jngóo “niríyáʼ espada ndrígóo mu maxíyaminaʼ”. Mú Pablo niʼthí gakhi̱i̱: “¡Xátaxíyaminaʼ! ¡Numuu rí xúgiáanʼ má kúwáanʼxu gi̱i̱!”. Ikhú soldado nirajxu̱u̱: “Xabuanii, ndiéjunʼ gáʼyóoʼ ma̱ni̱ mu makríñu̱u̱nʼ rá.” Pablo ga̱jma̱a̱ Silas nitháán dí ikhiin xándoo muni̱ kríyaaʼ, mú nitháán tsáá bi̱ ma̱ndoo mambáyúu: “Atanimbaaʼ xtayáá Tátá Jesús” mu makríña̱a̱nʼ ga̱jma̱a̱ bi̱ kúwá náa guʼwáaʼ (Hech. 16:25-31).
14. a) Xú káʼnii nimbáyúu Pablo ga̱jma̱a̱ Silas xa̱bu̱ bi̱ nañewu̱u̱n guʼwá ejua̱a̱nʼ rá. b) Xú káʼnii niguma tsajkurámíinʼ numuu dí niʼngu̱u̱n dí niguma gíníi xá.
14 Lá gajkhun nindxu̱u̱ dí niʼthí xáʼ. Nakujmaa dí xúʼko̱, numuu dí Pablo táʼni a̱jma̱ a̱jkiu̱u̱n ga̱jma̱a̱ numuu dí niʼthí xa̱bu̱ buʼko̱. Ikhaa nindxu̱u̱ mbáa xa̱bu̱ bi̱ na̱nguá eniniiʼ Dios, ikhaa jngóo ndiyóoʼ majmañuu dí naʼsngáa náa Biblia ga̱jma̱a̱ dí maʼga̱nú asndu náa a̱jkiu̱u̱n mu ma̱ndoo mani̱ndxu̱u̱ xa̱bi̱i̱ Cristo. Ikhaa jngóo Pablo ga̱jma̱a̱ Silas nitháán “ajngá rawuunʼ Jeobá”. Índo̱ mbájku̱ú nigíʼ edxu̱ún mu musngáa dí naʼthí náa Biblia, mbáa asndu nimbumún dí na̱ʼkhu̱ náa nigawúúnʼ. Mú bi̱ nuxi̱i̱ʼ bi̱ ndiʼkhu̱ún ejmañuu bugi̱ ndiʼyoo dí nithu tsu̱du̱ún, ikhú niʼni kaʼwii náa nigawúúnʼ. Nda̱wa̱á mbá nacha̱ “ikhaa gajmíi̱n xúgíinʼ bi̱ kúwá náa goʼwóo nijngún iyááʼ”. ¡Ra̱ʼkhá tháán niguma tsajkurámáa’ Pablo ga̱jma̱a̱ Silas numuu dí niʼngu̱u̱n dí niguma gíníi ga̱jma̱a̱ rí tándátigu̱u̱n gagi! (Hech. 16:32-34.)
15. a) Xú káʼnii eyaridáá Pablo ga̱jma̱a̱ Silas mbaʼiin a̱ngiu̱lú rá. b) Ndíjkha dí gíʼmaa matanga̱án gúʼñún má xúʼko̱ xa̱bu̱ náa nuʼtáraʼa rá.
15 Xó má Pablo ga̱jma̱a̱ Silas mbaʼiin a̱ngiu̱lú bi̱ kúwá dí mbiʼi xúgi̱ nutaraʼa índo̱ kúwá náa guʼwá ejua̱a̱nʼ ga̱jma̱a̱ numuu fe ndrígu̱ún, mangiin niguma tsajkurámíinʼ. Mbá xkri̱da, náa mbá xuajin dí na̱nguá eniñu̱u̱nʼ muni̱ ñajuunʼ Jeobá niñu̱u̱ graxe̱, ikhú nikujmaa dí itháán dí mbá tambi̱i̱n a̱ngiu̱lú nijmañún dí gajkhun náa guʼwá ejua̱a̱nʼ (Isa. 54:17). Xó má nigíʼnuu xa̱bu̱ bi̱ niñewu̱u̱n guʼwá ejua̱a̱nʼ bi̱ nigruigú dí gajkhun nda̱wa̱á dí niʼxma, xúʼko̱ má tikhuun xa̱bu̱ nudxawíín ajngáa dí májánʼ índo̱ nuraʼníí mbá gamiéjunʼ. Ikhaa jngóo ndayóoʼ mu̱ʼgua̱ gúʼñún má xúʼko̱ mu mumbáñún.
“Rí xúgi̱ nandún murawáanʼxu ngu̱ʼwa̱á xáʼ.” (Hechos 16:35-40)
16. Ndiéjuunʼ nirígá i̱mba̱ néjtsu̱u̱ dí nixnáá Pablo ga̱jma̱a̱ Silas xá.
16 I̱mba̱ néjtsuu xa̱bu̱ ñajunʼ nitañajunʼ dí muri̱ya̱a̱ʼ Pablo ga̱jma̱a̱ Silas náa guʼwá ejua̱a̱nʼ. Mú Pablo niʼthí: “Nixpajtiáanxu náa inún xa̱bu̱ asndu xóó túyáá á mu guáʼdáá aʼkhúxu ikháanʼ rí ni̱ndxu̱xu̱ʼ xa̱bu̱ romanos, ga̱jma̱a̱ nixudáanʼxu náa guʼwá e̱jua̱nʼ. Ga̱jma̱a̱ rí xúgi̱ nandún murawáanʼxu ngu̱ʼwa̱á xáʼ. ¡Na̱nguá! Gaguwáʼ ikhiin gúrawáanʼxu”. Índo̱ xa̱bu̱ ñajunʼ nidxawíín dí a̱jmi̱i̱n xa̱bu̱ bi̱ nini̱ gíníi nindxu̱ún romanos “ra̱ʼkhá tháán nimíñúún”, numuu rí ninújngurámúúnʼ xtángoo rí nañewu̱u̱n xa̱bu̱. d Mbájkhu nixtiʼkhuu xóo nirígá. Nixnúún náa inún mbaʼiin xa̱bu̱ xúʼko̱ má ndiyóoʼ muthi náa inún mbaʼiin xa̱bu̱ dí muni̱ mba̱a̱ a̱jkiu̱ún kuñún. Ikhaa jngóo nigún gúthún dí magajníín náa Filipos. Mú ginii nixnúún tsiakii a̱ngiu̱lú nda̱wa̱á nigájni̱ín náa xuajin rúʼko̱.
17. Ndiéjuunʼ xkri̱da dí májánʼ niniñuuʼ Pablo ga̱jma̱a̱ Silas náa cristianos rá.
17 Pablo ga̱jma̱a̱ Silas tágawúúnʼ á mu wapháá nithi dí nindxu̱ún xa̱bu̱ romanos (Hech. 22:25, 26). Mú, á mu nini̱ xúʼko̱ kaʼnii bi̱ ndiʼkhu̱ún ejmañún maku̱mu̱ún dí nijmún náa naguwáʼ mu xumíniiʼ ga̱jma̱a̱ numuu Cristo. Xú káʼnii gakumu̱ún bi̱ na̱nguá nindxu̱ún xa̱bu̱ romanos rá. Xtángoo na̱nguá eʼni káwíin ikhiin dí xájuixnún. Índo̱ a̱jmi̱i̱n misioneros bugi̱ niʼngu̱u̱n, nisngajmún xúgíinʼ cristianos dí maʼngu̱u̱n muguajún jmbu índo̱ naguma gíníi. Ma̱ngaa índo̱ nithúún xa̱bu̱ ñajunʼ dí nindxu̱ún xa̱bu̱ romanos, nini̱ makujmaa náa inún xa̱bu̱ dí ikhiin ninújngurámúúnʼ xtángoo. Rúʼko̱ gáyambáá mu xúni̱ gíníi eʼwíinʼ cristianos á mu nda̱a̱ mbá numuu.
18. a) Xú káʼnii eyaridáá Pablo a̱ngiu̱lú bi̱ kuya̱ edxu̱u̱ rá. b) Xú káʼnii gándoo ‹majmulú xtángoo mu mumbáyíí ajngáa rí májánʼ› rá.
18 Rí mbiʼi xúgi̱ a̱ngiu̱lú bi̱ kuya̱ edxu̱u̱ nusngulú ga̱jma̱a̱ xkri̱da ndrígu̱ún. Ikhiin nunimíjna̱ muni̱ xó má nuguaʼthi̱i̱n maguma a̱ngiu̱ún. Ma̱ngaa xúgiáánʼ bi̱ ni̱ndxu̱lú cristianos nu̱ʼni̱ xó má Pablo, nduʼyáá tsumáá nguáná ga̱jma̱a̱ xóo gándoo majmulú xtángoo dí rígá mu mañewulú. Índo̱ ndayóoʼ na̱jkua̱lú náa inún xa̱bu̱ ñajunʼ bi̱ kúwíin náa xuajñulú, o náa inún xa̱bu̱ ñajunʼ bi̱ kúwá náa xuajen mba̱ʼu̱ mu mumbáyúmíjná ga̱jma̱a̱ muʼni má xúʼko̱ Dios. Tséʼni̱ rígi̱ numuu dí nandulú maxtiʼkhuu xtángoo, ‹najmulú xtángoo mu mumbáyíí ajngáa rí májánʼ mu nimbá xárikoo rí majuiʼtáraʼa›, xó má niʼthí apóstol Pablo náa congregación ndrígóo Filipos mbá gu̱wa̱ʼ tsiguʼ nda̱wa̱á dí nixuda̱a̱ʼ guʼwá ejua̱a̱nʼ náa xuajin rúʼko̱, ikhaa niʼthí: “nijmuʼ xtángoo mu mambáyúu ajngáa rí májánʼ mu nimbá xárikoo rí majuiʼtáraʼa” (Filip. 1:7). Tséʼñuu má á mu xtángoo ga̱jma̱a̱ xa̱bu̱ ñajunʼ numbayúlúʼ o na̱nguá, kuwáánʼ xawii mu̱ʼni̱ xó má niʼni Pablo gajmíi̱n a̱ngui̱i̱n dí ‹muʼtáruʼún ajngáa rí májánʼ› xúgíinʼ xa̱bu̱ asndu náá má gáxnulú ikha espíritu santo mu̱ʼgua̱ (Hech. 16:10).
a Atayáá náa kúgumaʼá “ Lucas bi̱ niʼnirámáʼ Hechos”.
b Mbáa judíos tándoo muguáʼdáá guʼwá náa nuxnáá gamajkhu Dios numuu dí soldados bi̱ kúwá náa Filipos na̱nguá eniñu̱u̱nʼ o ga̱jma̱a̱ numuu dí náa xuajin rúʼko̱ na̱nguá kúwíin mbá gu̱wi̱i̱nʼ xa̱bekha bi̱ nindxu̱ún judíos mu ma̱ndoo magi̱ʼi̱ guʼwá náa mbuyamajkuíí Dios.
c Atayáá náa kúgumaʼá “ Lidia, bi̱ nagujua̱ xtíin miʼñuu”.
d Náa xtángoo ndrígu̱ún bi̱ romanos naʼthí dí xúgíinʼ xa̱bu̱ gíʼmaa maguma mbánuu xkujndu ndrígu̱ún xó má gíʼmaa, ma̱ngaa nditháan ragíʼmaa maguma gíníi náa inún mbaʼin xa̱bu̱ á mu xóó tséthi dí gíʼdoo aʼkhúun ga̱jma̱a̱ á mu xóó tséguma mbáníí xkujndu ndrígóo.