CRISTIANOS nikhanun xtángoo rí muniku̱ma̱a̱ rí xú káʼnii nikháñu Cristo, rí nagumbiʼyuu ma̱ngaa xó “guinisuhuañu Señor” (1 Corintios 11:20). Ndíjkha dí ra̱ʼkhá tháán gíʼdoo wéñuʼ numuu rígi̱ rá. Nguáná ga̱jma̱a̱ xú káʼnii gíʼmaa maguma rá.

Jesucristo nigíiʼ rí magumariyaʼ rígi̱ índo̱ ni̱jkha̱nú niʼni mbruʼun Pascua rí nini xa̱bu̱ judíos nákha tsiguʼ 33. Pascua ninindxu̱u̱ mbá ndxa̱a̱ rí nuniriyaʼ mámbá tsiguʼ, rí narígá mbiʼi 14 ñajunʼ gu̱nʼ nisán (calendario rí nijmún judío). Xa̱bu̱ judíos nuriyaʼ awan índo̱ na̱jkha̱nú naʼni mbríguu mbiʼi ga̱jma̱a̱ mbríguu mbruʼun rí na̱jma̱ʼnuuʼ xóo primavera. Gu̱nʼ nisán nagi̱ʼdu̱u̱ índo̱ nakujmaa timbá ikhoo gu̱nʼ nuxi̱ʼ índo̱ na̱jkha̱nú mijngii maʼni primavera. Mbiʼi Pascua nagi̱ʼdu̱u̱ 14 mbiʼi nda̱wa̱á, índo̱ narmáʼáan A̱jkha̱ʼ.

Mbruʼun rúʼko̱, Jesús niʼniriyaʼ Pascua gajmíi̱n apóstol ndrígóo, niʼtángawuu Judas Iscariote ga̱jma̱a̱ nda̱wa̱á niʼgíiʼ rí magumariyaʼ Ganitsuwañu Señor. Ganitsu rígi̱ niriʼkuriyaʼ Pascua rí nini xa̱bu̱ judíos, ikha jngó, gíʼmaa magumariyaʼ mámbá tsiguʼ.

Náa Evangelio ndrígóo Mateo naʼthí dí nirígá: “Aʼkue niriyaʼ pan Jesús, neʼ-netsakuramu, aʼkue nixpiʼta, nixnu tsi gajmi naʼsjngun, aʼkue niʼtun: Gudrigula, apola, rigueʼ ñajun xuyuʼ. Aʼkue niguaxi copa, rido huambo  niʼtun snumaʼla Dios, aʼkue nixnu, niʼtun: Anhuanla mba xuguianʼla rigueʼ. Numu ri rigueʼ ñajun iʼdiuʼ ri niʼku nuxiʼ ri nagadiramu gajma numu mbaʼin xabo, numu ri ika ruʼkue maʼga jagu aʼkan” (Mateo 26:26-28).

Tikhun xa̱bu̱ nunimbu̱ún rí Jesús nirtaxi̱i̱ xuyuʼ xóo pan, ga̱jma̱a̱ eʼdiu xóo vino. Mú xuyuʼ Jesús rígá kañiʼ índo̱ nixnáxi̱ pan. Lá nandoo gáʼthi rí apóstoles ni̱ʼphu̱ xuyuʼ Jesús ga̱jma̱a̱ niʼwa̱a̱n eʼdiu xá. Na̱nguá, á mu ikhiin nini rígi̱ nindoo gáʼthi rí ni̱ʼphu̱ xuyuʼ mbáa xa̱bu̱ ga̱jma̱a̱ rígi̱ nanújngorámuʼ náa xtángoo ndrígóo Dios (Génesis 9:3, 4; Levítico 17:10). Jesús niʼthí náa Lucas 22:20: “Copa rigueʼ ñajun ri nuxiʼ niʼku gajma iʼdiuʼ ri nagadiramu gajma numaʼla”. Lá gajkhun rí copa nirtaximínaʼ xóo mbá rí “nuxiʼ niʼkhu” xáʼ. Na̱nguá, numuu rí pacto nindxu̱u̱ rí nambánuu; na̱nguá nindxu̱u̱ mbá rí ma̱ndoo matrugua.

Pan ga̱jma̱a̱ vino nindxu̱u̱ xóo mbá símbolo. Pan nandoo gáʼthúu̱n xuyuʼ Cristo dí tágiʼdoo aʼkhá. Jesús nijmuu mbá pan rí nipídunʼ náa ganitsuwañu ndrígóo Pascua, rí na̱nguá niguma ga̱jma̱a̱ levadura (Éxodo 12:8). Náa Biblia najmaa ajngáa levadura mu maʼthí rí nindxu̱u̱ xóo aʼkhá o rí minduwaʼ. Ikha jngó, pan nandoo gáʼthi xuyuʼ Jesús dí tágiʼdoo aʼkhá rí nixnáxi̱ xóo tsigijñaʼ (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vino tinto nandoo gáʼthúu̱n eʼde ndrígóo Jesús, rí naʼni magiʼdoo numuu náa nambánuu nuxi̱ʼ. Jesús niʼthí rí magadirámáʼ eʼdiu mu “ika ruʼkue maʼga jagu aʼkan”. Ikha jngó, tikhun xa̱bu̱ ma̱ndoo makuwá kaʼwu náa inuu Jeobá ga̱jma̱a̱ ma̱ndoo matu̱ʼu̱u̱n náa nambánuu nuxi̱ʼ gajmiún ikhaa (Hebreos 9:14; 10:16, 17). Rí nambánuu rígi̱, nandoo naʼni rí mbá 144,000 cristianos bi̱ ni̱ndxu̱ún xa̱bu̱ jmbiin ma̱ndoo magúun mekhuíí. Ikhí mani̱ndxu̱ún reyes ga̱jma̱a̱ ndxajkun mu mumbañún xúgínʼ xa̱bu̱ numbaaʼ (Génesis 22:18; Jeremías 31:31-33; 1 Pedro 2:9; Revelación [Apocalipsis] 5:9, 10; 14:1-3).

Tsíin gándoo mu̱phu̱ pan ga̱jma̱a̱ muwa̱a̱n vino rí najmaa náa Conmemoración rá. Xó má guámbulúʼ ndiʼyáá, rígi̱ ma̱ndoo muni bi̱ guáʼthi̱i̱n magúun mekhuíí. Xi̱ʼ kaʼwu ndrígóo Dios naʼni mbuyáá rí gajkhun nixtaʼwíin mu mani̱ndxu̱ún reyes náa mekhuíí (Romanos 8:16). Ma̱ngaa xa̱bu̱ bugi̱ kuwa náa nambánuu mu mutañajunʼ gajmiún Jesús (Lucas 22:29).

 Ndiéjunʼ eni xa̱bu̱ bi̱ guáʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ mitsaan rá. Ikhiin nunimbu̱ún xtángoo ndrígóo Jesús, nakuwa náa Ganitsuwañu Señor ga̱jma̱a̱ nusngajma rí guáʼdáá gamajkhún índo̱ nakuwa ikhí, maski ajndu na̱nguá e̱ʼphu̱ pan ga̱jma̱a̱ na̱nguá eʼwa̱a̱n vino. Bi̱ nutaraʼa numuu Jeobá nuniriyaʼ Ganitsuwañu Señor mámbá tsiguʼ, nda̱wa̱á rí narmáʼáan A̱jkha̱ʼ índo̱ nagi̱ʼdu̱u̱ mbiʼi 14 ndrígóo nisán. Maski ajndu kuwa i̱ndó nguéjmi̱i̱n xa̱bu̱ náa xúgíʼ tsu̱du̱u̱ numbaaʼ bi̱ nuthi rí magúun mekhuíí, rí najmaku̱ma̱a̱ rígi̱ gíʼdoo wéñuʼ numuu náa xúgínʼ bi̱ ni̱ndxu̱ún cristianos. Nindxu̱u̱ mbá mbiʼi náa ma̱ndoo mundxaʼwamíjna̱ rí Jeobá Dios ga̱jma̱a̱ Jesucristo nindúún kuyulúʼ wéñuʼ (Juan 3:16).