JEOBÁ nisngájmun gaʼyee mbaʼa rí e̱ʼkha̱ raʼthí náa Biblia ga̱jma̱a̱ numuu Mesías, bi̱ nijuiʼthá ma̱ʼkha̱ gáʼni káwáanʼ. Ra̱mingíjyúuʼ mbuʼyáá tsáa nindxu̱u̱, numuu rí nijuiʼthá xú káʼnii gagumaa, xú  káʼnii gáʼtaraʼa ga̱jma̱a̱ xú káʼnii gakháñu. Xúgíʼ rí kiʼtáriyaʼ ga̱jma̱a̱ numuu Jesús ni̱jkha̱nú nimbánuu. Guʼyáá tikhuu náa naʼthí xú káʼnii ni̱jkha̱nú nirígá índo̱ nigumaa Jesús ga̱jma̱a̱ índo̱ ni̱jkha̱ ra̱ja̱a̱.

 Gaʼyee Isaías niʼtáriyaʼ rí Mesías ma̱ʼkha̱ náa xa̱bu̱ bi̱ nikuwa náa goʼwóo David (Isaías 9:7). Ga̱jma̱a̱ xúʼko̱ má nirígá: Jesús ni̱ʼkha̱ náa rey bugi̱ (Mateo 1:1, 6-17).

Imba̱a̱ gaʼyee ndrígóo Dios bi̱ nigumbiʼyuu Miqueas, niʼthí rí Jesús magumaa náa xuajen “Belén Efrata” ga̱jma̱a̱ maʼga̱nú mani̱ndxu̱u̱ mbá Xa̱bu̱ ñajunʼ (Miqueas 5:2). Índo̱ nigumaa Jesús, náa Israel nirígá a̱jma̱ xuajen rí nigumbiʼyuu Belén. Mbá xuajen Belén naguanúu mijngii náa xuajen Nazaret, imbo̱o̱ xuajen Belén naguanúu xígií náa Judá, náa mijngii xuajen Jerusalén. Xuajen Belén rí naguanúu mijngii náa xuajen Jerusalén nákha ginii nigumbiʼyuu Efrata. Ikhí náa phú xuajen rígi̱ rí nixtáa Jesús, xúʼko̱ ni̱jkha̱nú nimbánuu rí kiʼtáriyaʼ (Mateo 2:1).

Imbo̱o̱ rí naʼtáriyaʼ náa Biblia naʼthí rí Dios nindxa̱ʼóo A̱ʼdióo mu magajnúu náa xuajen “Egipto”. Ga̱jma̱a̱ xúʼko̱ má nirígá, numuu rí Ada̱ Jesús ni̱jkha̱ kiʼyáa náa xuajen Egipto. Nda̱wa̱á índo̱ nikháñu rey Herodes nitanga̱a̱ mbu̱júu̱ náa xuajñu. Xúʼko̱ ni̱jkha̱nú nimbánuu rí kiʼtáriyaʼ (Oseas 11:1; Mateo 2:15).

Náa tabla rí kama náa ináa 200 ma̱ta̱ya̱a̱ náa naʼthí “ Rí kiʼtáriyaʼ”, náa agoo ajngá rígi̱ tima texto ndrígóo Biblia náa naʼthí ga̱jma̱a̱ numuu Mesías. Nutha̱a̱nʼxu ma̱ta̱ya̱a̱ timbá texto ga̱jma̱a̱ i̱mba̱ texto rí tima náa agoo náa naʼthí “Rí nimbánuu”. Xúʼko̱ mi̱dxu̱ʼnú ma̱ta̱ya̱a̱ itháan rí Ajngá rawunʼ Dios nindxu̱u̱ rí gajkhun.

Índo̱ gídxúʼ ratraxnuu texto, xámbumaʼ rí kiʼtáriyaʼ rígi̱ nigumaraʼmáʼ mba̱yu̱ʼ tsiguʼ nákha xóó tsígumaa Jesús. Mínaʼ Jesús niʼthí: “Ndiʼyo mambanu mba xugui ri huaʼtan numuʼ Ikun naʼ xtangao Moisés gajma ri nitan gaʼyo, gajma ri huaʼtan naʼ Salmos” (Lucas 24:44). Xó má nitayáá náa Biblia ndrígáʼ, xúgíʼ rígi̱ ni̱jkha̱nú nimbánuu.