1, 2. Náa numuu rí májánʼ muʼni graxe̱ rá.

LÁ NANDOO natayáá ikháánʼ rí e̱ji̱n nuni wéñuʼ graxe̱ ráʼ. Mbaʼin nugi̱ʼdi̱i̱ nuni graxe̱ índo̱ nugi̱ʼdi̱i̱ nuthi. Ikhiin nduyaaʼ ga̱jma̱a̱ nuraxa̱ʼ: “Náa numuu rí azul mekhu rá.” “Nguáthi̱i̱n a̱ʼgua̱a̱n kuwa rá.” O “Tsáa niʼsngúún muni ajmúú ñu̱ʼu̱ rá.” Maski ajndu nuʼni mbá tsiakii mu muriʼña̱a̱ graxe̱ ndrígu̱ún mú nguáná naʼniulú mingíjyúuʼ muriʼña̱a̱. Maski ajndu ikháánʼ natriʼña̱a̱ májánʼ graxe̱ ikhiin ma̱ndoo muniaʼ imbo̱o̱ graxe̱ xóo rígi̱: “Náa numuu rá.”

² Raʼkháa i̱ndó e̱ji̱n guáʼdáá wéñuʼ graxe̱. Índo̱ na̱jkha̱ raniánʼ nuʼni má xúʼko̱ graxe̱, mbáa nuraxilú xú káʼnii gúʼgua̱nú náa mbá xuajin, mu xúguaʼnii mbá dí ra̱májánʼ o índo̱ nandulúʼ mbuʼyáá. Mú kuwa mbaʼin xa̱bu̱ bi̱ nuniñaʼ runi graxe̱, graxe̱ dí gíʼdoo itháan numuu. O nánguá eyááʼ mbuyáá xú káʼnii gáxti̱ʼña̱a̱ graxe̱ ndrígu̱ún.

3. Náa numuu rí mbaʼin xa̱bu̱ nánguá eyááʼ mbuyáá xú káʼnii maxtiʼña̱a̱ graxe̱ ndrígu̱ún rí gíʼdoo itháan numuu rá.

³ Atatsaʼwáminaʼ ga̱jma̱a̱ numuu graxe̱ rí kama náa xtóo libro rígi̱, xó má rí nakujmaa náa  kixnáxe̱ ga̱jma̱a̱ rí tima náa nagi̱ʼdu̱u̱ capítulo rígi̱. Rígi̱ nindxu̱u̱ tikhu graxe̱ dí gíʼdoo itháan numuu dí ma̱ndoo muʼnilú. Mú, mbaʼin xa̱bu̱ nánguá eyáaʼ mbuyáá xú káʼnii gáxti̱ʼña̱a̱ graxe̱ ndrígu̱ún. Náa numuu rá. Lá ma̱ndoo muxkamaa náa Biblia ráʼ. Tikhun xa̱bu̱ nundxa̱ʼwa̱míjna̱ dí ra̱ʼkhá tháán mingíjyúuʼ nindxu̱u̱ dí na̱ʼkha̱ raxtiʼña̱a̱ náa Biblia. Eʼwíínʼ tseni graxe̱ numuu rí namiñun magumamájti̱nʼ. Ga̱jma̱a̱ tikhun nakumu̱ún rí itháan májánʼ muniñaʼ graxe̱ rúʼko̱ náa xa̱bu̱ ede̱ ga̱jma̱a̱ náa ndxajkun. Ndiéjunʼ tatsaʼwáminaʼ ikháánʼ rá.

4, 5. Xú káʼnii ñajunʼ tikhuu graxe̱ rí gíʼdoo itháan numuu rí ma̱ndoo muʼni, ga̱jma̱a̱ náa numuu rí gíʼmaa mbuʼyáaʼ xú káʼnii gáxti̱ʼña̱a̱ rá.

⁴ Mbáa ikháánʼ nandaʼ ma̱ta̱ya̱a̱ xú káʼnii gáxti̱ʼña̱a̱ graxe̱ dí gíʼdoo itháan numuu ga̱jma̱a̱ rí xú kuwáanʼ. Mbáa nguáná ikháánʼ natraximínáʼ: “Náa numuu rí niguwaʼ mu makuwáanʼ náa tsu̱du̱u̱ numbaaʼ rá. Lá i̱ndó rígi̱ rígá náa ma̱ndoo makuwáanʼ ráʼ. Xú káʼnii nindxu̱u̱ Dios rá.” Májánʼ má tani rí natatsaʼwáminaʼ ga̱jma̱a̱ numuu graxe̱ rígi̱, ga̱jma̱a̱ gíʼdoo wéñuʼ numuu rí xátatsiʼñáʼ ratraxi asndu índo̱ gáta̱ya̱a̱ rí naxtiʼña̱a̱ májánʼ wéñuʼ graxe̱ ndrígáʼ. Jesucristo, bi̱ nijmaʼniiʼ xóo mbáa bi̱ naʼsngáa májánʼ wéñuʼ, niʼthí: “Gundaʼala, ikajngo majanaʼla, guʼyala, ikajngo muxkamala, gutaraʼala ikajngo mambaʼto mataʼaʼla” (Mateo 7:7).

⁵ Á mu ikháánʼ natayááʼ má xúʼko̱ rí maxtiʼña̱a̱ graxe̱ rí gíʼdoo itháan numuu, mi̱dxu̱ʼnú ma̱ta̱ya̱a̱ dí ra̱ʼkhá tháán májánʼ (Proverbios 2:1-5). Tséʼniuu má ndiéjunʼ nitha̱nʼ eʼwíínʼ, graxe̱ rúʼko̱ rígá maxtiʼña̱a̱ ga̱jma̱a̱ ma̱ndoo mataxkamaa. Rígá náa Biblia ga̱jma̱a̱ na̱nguá mingíjyúuʼ makroaʼaʼ. Rí phú itháan májánʼ, naʼni muʼnimbulúʼ rí wíji̱ ma̱ʼkha̱ nda̱wa̱á ga̱jma̱a̱ naʼni makuwaanʼ gagi, ma̱ngaa naʼni makuwáanʼ tsímáá asndu rí mbiʼi xúgi̱. Gugíʼdi̱i̱ mbuʼyáá mbá graxe̱ rí naʼni maxmiéjúnʼ mbaʼin xa̱bu̱.

6. Náa numuu rí mbaʼin xa̱bu̱ nundxa̱ʼwa̱míjna̱ rí Dios na̱nguá exmiéjúnʼ kaʼñúún xa̱bu̱ bi̱ nugíʼnii tsingíná rá.

⁶ Mbaʼin nakumu̱ún rí xúʼko̱ káʼnii nindxu̱u̱. Ikhiin nundxa̱ʼwa̱míjna̱ rí á mu Dios naxmiéjunʼ kaʼyulúʼ, mixtiʼkhu  gakuwaanʼ. Kuwáanʼ náa mbá numbaaʼ dí rígá wéñuʼ guerra, xa̱bu̱ nakiʼníin kuyamíjna̱ mbanda̱ʼkho ga̱jma̱a̱ rígá gaʼkhu. Xúgiáanʼ naʼniulú nandii, kuwáanʼ tsingíná ga̱jma̱a̱ nakháñun a̱ngiu̱lú bi̱ nandulúʼ kuʼñúún. Ikha jngó kúwi̱i̱n bi̱ nuthi: “Á mu Dios naxmiéjunʼ kaʼyulúʼ, lá xáʼni káwáanʼ náa xúgíʼ xkujndu rí kuaʼdáá ráʼ.”

7. a) Náa numuu nuʼthá rí mbaʼin ndxajkun nuni rí xa̱bu̱ mundxaʼwamíjna̱ rí Dios migujkhuʼ a̱jkiu̱u̱n rá. b) Ndiéjunʼ ñajunʼ rí phú eʼsngáa náa Biblia ga̱jma̱a̱ numuu tsingíná rí nuraʼníí rá.

⁷ Rí phú itháan raʼkhí, mbaʼin ndxajkun nuni rí xa̱bu̱ mundxaʼwamíjna̱ rí Dios migujkhuʼ a̱jkiu̱u̱n. Mbá xkri̱da, índo̱ narígá mbá gamiéjunʼ, nuthi rí Dios nindoo marigá xúʼko̱ kaʼnii. Rí nuthi, naʼni rí Dios magiʼdoo aʼkhúun ga̱jma̱a̱ numuu xúgíʼ gamiéjunʼ. Mú, lá gajkhun rúʼko̱ ráʼ. Ndiéjunʼ ñajunʼ rí phú naʼsngáa náa Biblia rá. Santiago 1:13 nariʼña̱a̱: “Riʼdo naʼdamaʼjan aʼtiun mba xabu maʼni ri ramejanʼ; xakumu mi amu ri Dios eʼni maʼdamaʼjan aʼtiun maʼni ri ramejanʼ; muri su Dios seʼdamaʼjan aʼtiun maʼni ri ramejanʼ; cami ni seʼñu ndimba xabu maʼni ri ramejanʼ”. Dios nimbá miʼtsú tséʼni marigá dí ra̱májánʼ rí nduʼyáá náa tsu̱du̱u̱ numbaaʼ (atraxnuu Job 34:10-12). Gajkhun rí ikhaa naniñuʼ marigá dí ra̱májánʼ, mú mixtiʼkhu nindxu̱u̱ rí ikhaa naniñuʼ marigá ga̱jma̱a̱ rí ikhaa maʼni marigá.

8, 9. a) Xú káʼnii nindxu̱u̱ xkri̱da rí ma̱ndoo majmaʼ ikháánʼ mu marata̱ rí mixtiʼkhu nindxu̱u̱ rí Dios naniñuʼ marigá dí ra̱májánʼ ga̱jma̱a̱ dí naʼni marigá rá. b) Náa numuu dí raʼkhí muʼthá rí Dios gíʼdoo aʼkhúun ga̱jma̱a̱ xúgíʼ dí ra̱májánʼ dí kuwa rugíʼnii xa̱bu̱ numbaaʼ rá.

⁸ Atatsaʼwáminaʼ ga̱jma̱a̱ numuu mbáa xa̱bu̱ bi̱ nandoo kaʼñúún wéñuʼ e̱ji̱i̱n ga̱jma̱a̱ najmañuu wéñuʼ bi̱ gíʼdaa mbáa a̱ʼdióo nikhi̱i̱ náa goʼwóo. Índo̱ dxámá bugi̱ tséʼnimbo̱o̱ rí naʼthúu̱n anu̱u̱ ga̱jma̱a̱ naʼthí rí ní xáxtáa náa goʼwóo, anu̱u̱ tsírikhoo. Dxámá bugi̱ naraʼwíí maʼga̱ náa mbá kamba̱a̱ dí ra̱májánʼ ga̱jma̱a̱ nakudaminaʼ xkujndu. Lá marata̱ ikháánʼ rí anu̱u̱ nigiʼdoo aʼkhúun rí nigíʼnuu a̱ʼdióo xáʼ. Na̱nguá (Lucas 15:11-13). Xúʼko̱ má Dios naniñuʼ rí xa̱bu̱ magún náa kamba̱a̱ dí ra̱májánʼ, mu rígi̱ tsíyoo gáʼthi rí ikhaa naʼni maguaʼdáá gamiéjunʼ rí ikhiin má ndiyáaʼ. Ikha jngó raʼkhí muʼthá rí Dios gíʼdoo  aʼkhúun ga̱jma̱a̱ xúgíʼ dí ra̱májánʼ rí kuwa rugíʼnii xa̱bu̱ numbaaʼ.

⁹ Dios ndaʼyoo náa numuu dí naniñúnʼ xa̱bu̱ numbaaʼ magún náa kamba̱a̱ dí ra̱májánʼ. Numuu rí ikhaa najmañuu wéñuʼ ga̱jma̱a̱ gíʼdoo tsiakii índo̱ Niʼni xúgíʼ dí rígá, ikhaa na̱nguá kaʼyoo maʼthúlú náa numuu. Mú, naʼtulúʼ numuu rí nandoo kaʼyulúʼ wéñuʼ. Náa capítulo 11 gúʼyáá itháan náa numuu rí naʼni xúʼko̱ kaʼnii. Mú, ikháánʼ ma̱ndoo ma̱ta̱ya̱a̱ gajkhun rí Dios na̱nguá gíʼdoo aʼkhúun náa xkujndu rí kuaʼdáá. Rí phú naʼni Dios, naʼtulúʼ xú káʼnii maʼnimbánuu xkujndu (Isaías 33:2).

10. Náa numuu rí ma̱ndoo makumulúʼ kuʼyáá káxi̱ Dios rí ikhaa maʼngo̱o̱ maʼni gámbáa xúgíʼ tsingíná rí nikumu̱u̱ náa dí ra̱májánʼ rá.

¹⁰ Ma̱ngaa, Dios nindxu̱u̱ santo (Isaías 6:3). Rígi̱ nandoo gáʼthi rí ikhaa nindxu̱u̱ mbáa Dios mikaʼwii, rí nda̱a̱ nditháan dí ra̱májánʼ náa ikhaa. Ikha jngó ma̱ndoo makumulúʼ kuʼyáá káxi̱ ikhaa, rígi̱ xándoo muʼni gajmiúlú xa̱bu̱ numbaaʼ, numuu rí ikhiin naguanu nuni dí ra̱májánʼ. Asndu nimbáa Xa̱bu̱ Ñajunʼ bi̱ naʼni dí májánʼ ragíʼdoo tsiakii maʼni jmbi̱i̱ rí kuwa runi xa̱bu̱ bi̱ ra̱míjínʼ. Mú Dios gíʼdoo xúgíʼ tsiakii. Ikhaa maʼngo̱o̱ maʼni gámbáa xúgíʼ tsingíná rí nikumu̱u̱ náa dí ra̱májánʼ. Índo̱ gáʼni rígi̱, maʼni gámbóo mbájkhu dí ra̱májánʼ (atraxnuu Salmo 37:9-11).

11. a) Xú káʼnii eʼyoo Dios dí ra̱májánʼ rá. b) Xú káʼnii xtáa Dios índo̱ ndaʼyoo rí kuwáanʼ tsingíná rá.

¹¹ Xú káʼnii xtáa Dios índo̱ ndaʼyoo dí narígá náa tsu̱du̱u̱ numbaaʼ ga̱jma̱a̱ rí nugíʼnii ikháanʼ rá. Náa Biblia naʼsngáa rí ikhaa ‹nandoo marigá rí jmbu› (Salmo 37:28). Ikhaa naxmiéjunʼ mbanda̱ʼkho á mu narígá mbá dí májánʼ o mbá dí ra̱májánʼ. Ga̱jma̱a̱ nawiyuʼ kaʼyoo xúgíʼ dí raʼkhí. Náa Biblia naʼthí rí nákha wajyúúʼ Dios “nixtáa gíná wéñuʼ” índo̱ ndiʼyoo nijnííʼ dí ra̱májánʼ náa tsu̱du̱u̱ numbaaʼ (Génesis 6:5, 6). Ga̱jma̱a̱ Dios táriʼkuminaʼ (Malaquías 3:6). Nakiʼnáa má xúʼko̱ kaʼyoo dí ra̱májánʼ ga̱jma̱a̱ nagáwiinʼ a̱jkiu̱u̱n kaʼñúún xa̱bu̱ bi̱ kuwa tsingíná. ‹Ikhaa naxmiéjunʼ kaʼyalaʼ›, eʼthí náa Biblia (atraxnuu 1 Pedro 5:7).

12, 13. a) Náa numuu rí nandulúʼ kuʼñúún eʼwíínʼ, ga̱jma̱a̱ xú káʼnii esngajmá ikháanʼ rí nandulúʼ kuʼñúún eʼwíínʼ índo̱ nduʼyáá tsingíná dí narígá náa tsu̱du̱u̱ numbaaʼ rá. b) Náa numuu nandoo nduʼyáá gajkhun rí Dios maʼni gámbáa xkujndu dí narígá náa xúgíʼ tsu̱du̱u̱ numbaaʼ rá.

 ¹² Náa numuu nandoo nduʼyáá gajkhun rí Dios nagáwiinʼ a̱jkiu̱u̱n índo̱ ndaʼyoo rí kuwáanʼ tsingíná rá. Guʼyáá imbo̱o̱ náa nasngájma rí xúʼko̱ káʼnii. Náa Biblia naʼsngáa rí Dios niʼnii xa̱biya̱ xó má nindxu̱u̱ ikhaa (Génesis 1:26). Ikháanʼ ni̱ndxu̱lú xa̱bu̱ májánʼ numuu rí Dios nindxu̱u̱ xa̱bu̱ májánʼ. Mbá xkri̱da, lá nagáwiinʼ a̱jkia̱nʼ ikháánʼ índo̱ natayáá rí kuwa rugíʼnii tsingíná xa̱bu̱ bi̱ tseni dí ra̱májánʼ. Á mu ikháánʼ nagáwiinʼ a̱jkia̱nʼ índo̱ natayáá narígá dí ra̱májánʼ, xúʼko̱ má Dios nagáwiinʼ a̱jkiu̱u̱n itháan.

¹³ Mbá rí najmaʼniiʼ ga̱jma̱a̱ itháan mbáa xa̱bu̱ nindxu̱u̱ rí nandoo kaʼñúún eʼwíínʼ. Ma̱ngaa rígi̱ naʼni makujmáanʼ xóo nindxu̱u̱ bi̱ Niʼniáanʼ, numuu rí náa Biblia naʼsngáa, “Dios naʼni aʼtiun caʼñu xoguinʼ xabu” (1 Juan 4:8). Nandulúʼ kuʼñúún eʼwíínʼ numuu rí Dios nandoo kaʼyulúʼ. Á mu rí ikháánʼ xtaʼdáá tsiakii mu matani gámbáa tsingíná ga̱jma̱a̱ dí ra̱májánʼ rí kuwáanʼ ruʼyáá náa tsu̱du̱u̱ numbaaʼ, lá ragájkhun rí matani gámbáa ráʼ. Lá xáʼga̱ kañán matani rígi̱ á mu nandaʼ xtañún eʼwíínʼ ráʼ. ¡Xúʼko̱ kaʼnii! Ma̱ndoo ma̱ta̱ya̱a̱ rí gajkhun Dios maʼni gámbáa xúgíʼ xkujndu dí rígá náa tsu̱du̱u̱ numbaaʼ. Rí nitraxnuu náa kixnáxe̱ libro rígi̱, rí wíji̱ marigá nda̱wa̱á na̱nguá nindxu̱u̱ xnuʼndaa: Dios nikudaminaʼ maʼni rígi̱ ga̱jma̱a̱ maʼga̱nú mambanúu. Mu muʼnimbulúʼ rí wíji̱ marigá nda̱wa̱á ndayóoʼ muniʼnííʼ itháan Dios bi̱ nikudaminaʼ maʼni rígi̱.

14. Xú káʼnii mbiʼyuu Dios, ga̱jma̱a̱ náa numuu rí gíʼmaa majmulúʼ mbiʼyuu xá.

¹⁴ Ndiéjunʼ ñajunʼ rí natani ginii índo̱ nandaʼ rí mbáa maniníínʼ rá. Lá ragájkhun dí naratháán xú káʼnii mbiʼyaaʼ xáʼ. Lá gíʼdoo mbiʼyuu Dios ráʼ. Náa mbaʼa religión nusngáa rí ikhaa mbiʼyuu “Dios” o “Señor”, mú raʼkháa rígi̱ nindxu̱u̱ phú mbiʼyuu. Título ñajunʼ rígi̱, xóo “rey” o “presidente”. Náa Biblia nasngájma rí Dios gíʼdoo mbaʼa título, xóo “Dios” ga̱jma̱a̱ “Señor”. Mú ma̱ngaa naʼsngáa rí gíʼdoo mbiʼyuu: Ikhaa mbiʼyuu Jeobá. Náa Salmo 83:18 naʼthí xúgi̱ kaʼnii: “Ikháánʼ mbiʼyaʼ Jeobá, i̱ndó ikháánʼ ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ”.  Á mu náa Biblia ndrígáʼ na̱nguá e̱ʼkha̱ mbiʼyuu Dios, nutha̱a̱nʼxu ma̱ta̱ya̱a̱ náa numuu náa apéndice dí “Mbiʼyuu Dios: xú káʼnii ejmaa ga̱jma̱a̱ rí eyoo gáʼthi”. Mbaʼa nuthu e̱ʼkha̱ mbiʼyuu Dios náa Biblia dí phú nigumaraʼmáʼ nákha ginii. Ikha jngó Jeobá nandoo ma̱ta̱ya̱a̱ xú káʼnii mbiʼyuu ga̱jma̱a̱ majmaʼ. Dios najmuu Biblia mu ma̱ta̱ya̱a̱ tsáa nindxu̱u̱ ikhaa.

15. Ndiéjunʼ eyoo gáʼthi mbiʼyuu Jeobá rá.

¹⁵ Dios má nixnáminaʼ mbiʼyuu Jeobá, ra̱ʼkhá tháán mbaʼa rí eyoo gáʼthi mbiʼyuu. Nandoo gáʼthi rí ikhaa maʼngo̱o̱ maʼnimbánuu xúgíʼ rí ekudaminaʼ maʼni ga̱jma̱a̱ maʼni xúgíʼ rí eyoo. * Mbóó mbiʼyuu Dios rígá, i̱ndó ikhaa kaʼyoo magumbiʼyuu xúʼko̱ kaʼnii. Nda̱wa̱a̱ imba̱a̱ xóo Jeobá. Guʼyáá tikhuu.

16, 17. Ndiéjunʼ eʼsngúlúʼ ga̱jma̱a̱ numuu Jeobá título rígi̱: a) “Su guiʼdo xoguiʼ ri siaqui” rá. b) “Su pu-guini ri naʼtañajunʼ” rá. c) “Niʼni xúgíʼ dí rígá” rá.

 ¹⁶ Ndiʼyáá má náa Salmo 83:18 rí naʼthí ga̱jma̱a̱ numuu Jeobá: “I̱ndó ikháánʼ ni̱ndxa̱ʼ bi̱ phú Mba̱a̱”. Xúʼko̱ má i̱ndó ikhaa egumbiʼyuu “Su guiʼdo xoguiʼ ri siaqui”. Rí huasjŋgajma Juan (Apocalipsis) 15:3 naʼthí: “Pu-mba ri guiamacu ri naʼ ñajunʼ xoguiʼ ri nitani-jan [Jeobá] Dios, su guiʼdo xoguiʼ siaqui; ri jmbu cami ri ŋacun ñajunʼ ri cambaʼ, ri ñajuanʼ su pu-guini ri miratañajunʼ su naʼ mamba numbaʼ”. Título “Su guiʼdo xoguiʼ ri siaqui” nasngájma rí Jeobá gíʼdoo itháan tsiakii ki xóo eʼwíínʼ. Nda̱wa̱á imba̱a̱ bi̱ gíʼdoo tsiakii xóo ikhaa. Ga̱jma̱a̱ título ‹Su pu-guini ri naʼtañajunʼ› naʼni marmáʼáan a̱jkiu̱lú rí i̱ndó ikhaa xtáa asndu nákha wajyúúʼ. Náa Salmo 90:2 nuraxnuu: “Ikháánʼ xtaa asndu nákha wajyúúʼ ga̱jma̱a̱ ikháánʼ má gáraxtaa asndu kámuu mbiʼi numuu rí ikháánʼ ni̱ndxa̱ʼ Dios”. Lá ragájkhun rí naguanúlúʼ tsiánguá índo̱ nundxa̱ʼwa̱míjna̱ rígi̱ ráʼ.

¹⁷ Jeobá nindxu̱u̱ mbáwíi numuu rí i̱ndó ikhaa Niʼni xúgíʼ dí rígá. Revelación 4:11 naʼthí: “Jeobá, mínaʼ ikháánʼ, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháánʼ nitani̱ xúgíʼ dí rígá, ga̱jma̱a̱ numaʼ ikháánʼ nindoo niguma xúgíʼ”. Jeobá Niʼni xúgíʼ dí rígá: Espíritu bi̱ tsékujmiin bi̱ kuwa mekhuíí, a̱ʼgua̱a̱n bi̱ nuni mambiʼi mekhuíí, xndú taun rí naxná náa ixi̱, e̱gi̱ʼ bi̱ kuwa náa xúgíʼ lamáa ga̱jma̱a̱ náa mañu ga̱jma̱a̱ i̱ʼwáʼ dí rígá.

18. Náa numuu rí tikhun xa̱bu̱ nundxa̱ʼwa̱míjna̱ rí xándoo magún kanuu náa Dios, mú ndiéjunʼ eʼsngáa náa Biblia rá.

¹⁸ Kuwa tikhun xa̱bu̱ bi̱ namiñun índo̱ nuraxnuu rí xú káʼnii xa̱bu̱ nindxu̱u̱ Jeobá. Namiñun rí Dios maxtáa mitsidanʼ wéñuʼ rí xándoo magún kanuu náa ikhaa o asndu rí tsixmiéjunʼ kaʼñúún. Lá májánʼ nindxu̱u̱ rí kuwa rundxa̱ʼwa̱míjna̱ xáʼ. Mixtiʼkhu nindxu̱u̱ rí naʼsngáa náa Biblia, ikhí naʼthí rí Jeobá “xta mijŋgui naʼ mamba su icanʼlu” (Hechos 17:27). Ikhaa  naʼthúlúʼ: “Ahuaʼcani naʼ inu Dios gajma majñuʼ sacun, ga Ica maxta mijŋgui naʼ icanʼla” (Santiago 4:8).

19. a) Xú káʼnii gándoo guʼgua̱ kanuu náa Dios, ga̱jma̱a̱ ndiéjunʼ rí gakhánulú rá. b) Ndiéjunʼ enigua̱ʼ itháan ikháánʼ rí xú xa̱bu̱ nindxu̱u̱ Dios rá.

¹⁹ Xú káʼnii gándoo mi̱dxu̱ʼ kanuu náa Dios rá. Timbá, xátatsiʼñáanʼ ratanigajmaa ga̱jma̱a̱ numuu Dios. Jesús niʼthí: “Xaʼni ri mbuye asjndo jamu, ri muninuhuinʼ mbahuin Ikan tsan ñajuanʼ Dios tsi kuhuin, gajma Jesucristo tsi nitaxunguaʼ” (Juan 17:3). Náa Biblia naʼsngáa, rí ku̱ma̱ ndrígóo Jeobá ga̱jma̱a̱ Jesús na̱jkha̱ kaguáanʼ ‹makuwáanʼ kámuu mbiʼi›. Ndiʼyáá má rí “Dios naʼni aʼtiun caʼyaʼli” (1 Juan 4:16). Mú Jeobá gíʼdoo i̱ʼwáʼ dí xú káʼnii xa̱bu̱ nindxu̱u̱, xúgíʼ rígi̱ mitsaan ga̱jma̱a̱ naʼni manigulúʼ. Mbá xkri̱da, náa Biblia naʼthí rí ikhaa “nagáwiinʼ a̱jkiu̱u̱n ga̱jma̱a̱ májánʼ a̱jkiu̱u̱n, na̱nguá kiʼnáa nacha̱ ga̱jma̱a̱ májánʼ xa̱bu̱ nindxu̱u̱ numuu rí nandoo kaʼyulúʼ ga̱jma̱a̱ gajkuwiin” (Éxodo 34:6). Nindxu̱u̱ mbáa Dios ‹májánʼ ga̱jma̱a̱ xtáa xawii mu maʼni mba̱a̱ a̱jkiu̱u̱n› (Salmo 86:5). Naʼngo̱o̱ wéñuʼ a̱jkiu̱u̱n (2 Pedro 3:9). Ikhaa nindxu̱u̱ jmbii (Revelación 15:4). Índo̱ gídxúʼ ratraxnuu Biblia, ma̱ta̱ya̱a̱ rí Jeobá nasngájma xúgíʼ rígi̱, rí xú káʼnii xa̱bu̱ nindxu̱u̱ ga̱jma̱a̱ i̱ʼwáʼ.

20-22. a) Lá xándoo mu̱ʼgua̱ kanuu náa Dios numuu rí tséʼyáá xáʼ. Arathá rí nikroaʼaʼ. b) Ndiéjunʼ consejo gándoo gúxnaʼ eʼwíínʼ xa̱bu̱, mú ndiéjunʼ gándoo gátani ikháánʼ rá.

²⁰ Gajkhun má rí na̱nguá xú mbuʼyáá Dios, numuu rí ikhaa nindxu̱u̱ mbáa espíritu (Juan 1:18; 4:24; 1 Timoteo 1:17). Mú náa Biblia naʼthí xú káʼnii nindxu̱u̱ ikhaa. Xó má niʼthí David, ikháánʼ ma̱ndoo ma̱ta̱ya̱a̱ májánʼ “xú káʼnii májánʼ nindxu̱u̱ Jeobá” (Salmo 27:4; Romanos 1:20). Índo̱ gájmañaaʼ itháan ga̱jma̱a̱ numuu ikhaa, mi̱dxu̱ʼ ratayáá rí gajkhun xtáa ikhaa, ga̱jma̱a̱ ikhú maraʼdáá mbá numuu rí maʼnda̱ʼ xtayáá ga̱jma̱a̱ makumaaʼ rí xtaa mijngii náa ikhaa.

²¹ Mañúú gídxúʼ rakroaʼaʼ náa numuu rí Biblia naʼthúlúʼ rí mbuʼyáá Jeobá xóo mbáa Anu̱lú (Mateo 6:9). Raʼkháa i̱ndó niʼni makuwáanʼ, ikhaa nandoo rí makuwáanʼ itháan májánʼ, xó má mbáa xa̱bu̱ nandoo rí makuwa májánʼ e̱ji̱i̱n (Salmo 36:9).  Ma̱ngaa náa Biblia naʼsngáa rí xa̱bu̱ numbaaʼ ma̱ndoo mambaxúún májánʼ gajmiún Jeobá (Santiago 2:23). ¡Atatsaʼwáminaʼ: Ikháánʼ ma̱ndoo mambaxáʼ májánʼ ga̱jma̱ʼ bi̱ niʼni xúgíʼ dí rígá náa numbaaʼ!

²² Índo̱ gájmañaaʼ itháan ga̱jma̱a̱ numuu Biblia, mbáa makuwíin xa̱bu̱ bi̱ muta̱nʼ rí matatsiʼñáanʼ ratanigajmaa. Mbáa muta̱nʼ rígi̱ numuu rí naxmiéjunʼ rí ikháánʼ matriʼkhu̱u̱ rí xtaa ratani̱ nákha ginii. Mú xátatsiʼñáanʼ dí nimbáa marikha̱ʼ rí mambaxáʼ májánʼ ga̱jma̱ʼ Dios, numuu dí rúʼko̱ nindxu̱u̱ itháan májánʼ dí ma̱ndoo maraʼdáá.

23, 24. a) Náa numuu dí ragíʼmaa mamiñáʼ matani graxe̱ ga̱jma̱a̱ rí xtaa rajmañaʼ rá. b) Ndiéjunʼ gúʼyáá náa imbo̱o̱ capítulo rá.

²³ Marigá rí maʼniaʼ mingíjyúuʼ makroaʼaʼ. Mu xámiñaʼ matanda̱ʼa̱ rí mumbayáʼ. Jesús niʼthí rí májánʼ manindxu̱lúʼ xa̱bu̱ wabaʼ xóo mbáa ada̱ (Mateo 18:2-4). Ga̱jma̱a̱ nduʼyáá rí e̱ji̱n nuraxi má xúʼko̱. Dios nandoo rí mataxkamaa xú káʼnii gáxti̱ʼña̱a̱ graxe̱ ndrígáʼ. Náa Biblia naʼthí májánʼ wéñuʼ ga̱jma̱a̱ numún tikhun xa̱bu̱ bi̱ nindúún majmañún wéñuʼ ga̱jma̱a̱ numuu Dios. Ikha jngó ninigajmaa májánʼ wéñuʼ Escrituras ga̱jma̱a̱ ndiyáá á mu gajkhun rí kuwa rajmañún (atraxnuu Hechos 17:11).

²⁴ Rí mambáyulúʼ muniʼniiʼ itháan májánʼ Jeobá rí muʼnigajmaa Biblia, libro rígi̱ nindxu̱u̱ mixtiʼkhu ki xóo i̱ʼwáʼ. Ndiéjunʼ rí eʼni maʼni mixtiʼkhu rá. Rígi̱ mbuʼyáá náa imbo̱o̱ capítulo.