NÁA Biblia tséʼthi náa phú mbiʼi nixtáa Jesús. Mú naʼthúlúʼ náa numuu rí táxtáa gu̱nʼ diciembre.

Náa Belén nindxu̱u̱ xuajen rí nixtáa Jesús, xú káʼnii nindxu̱u̱ gu̱nʼ diciembre rá. Náa calendario ndrígu̱ún xa̱bu̱ judíos gíʼdoo mbá gu̱nʼ rí nagumbiʼyuu kislev, gu̱nʼ rígi̱ narmáʼáan naʼni tapa ñajunʼ gu̱nʼ noviembre asndu tapa gu̱nʼ diciembre, ga̱jma̱a̱ naʼni wéñuʼ migúwán ma̱ngaa naxnúu wéñuʼ ruʼwa. Nda̱wa̱á na̱ʼkha̱ gu̱nʼ tebet, rí narmáʼáan naʼni tapa ñajunʼ gu̱nʼ diciembre asndu tapa ñajunʼ gu̱nʼ enero, gu̱nʼ rígi̱ naʼni migúwán wéñuʼ rí asndu nagajtaa idiʼ náa inuu kúbá. Guʼyáá rí eʼthí náa Biblia ga̱jma̱a̱ numuu xuajen rígi̱ á mu naʼni migúwán o naʼni mijkha.

Esdras mbáa xa̱bu̱ bi̱ niʼnirámáʼ Biblia, nisngájma rí gu̱nʼ kislev nindxu̱u̱ mbá gu̱nʼ rí naʼni wéñuʼ migúwán ga̱jma̱a̱ rí naxnúu  wéñuʼ ruʼwa. Niʼthí rí “gu̱nʼ kislev, mbiʼi mbá skíñúʼ” nigimbúun mbaʼin xa̱bu̱ náa xuajen Jerusalén, xa̱bu̱ bugi̱ ‹niguaʼin ga̱jma̱a̱ numuu rí naxnúu wéñuʼ ruʼwa›. Ma̱ngaa, naʼthí rí xúgínʼ xa̱bu̱ bi̱ nigimbúun ikhí nithi ajngáa rígi̱: “Gu̱nʼ rígi̱ naxnúu wéñuʼ ruʼwa, ga̱jma̱a̱ xándoo mutrigaanʼ rexa̱a̱” (Esdras 10:9, 13; Jeremías 36:22). Ikha jngó, índo̱ na̱jkha̱ rajngiyuu gu̱nʼ diciembre, xa̱bu̱ nagún kudiin mugiuún náa guʼún mu xaguanún gajmiún xaná.

Mú, náa Biblia naʼthí rí mbruʼun rí nigumaa Jesús nikuwa xa̱bu̱ ruñawu̱u̱n mugiuún xaná. Lucas bi̱ niʼnirámáʼ mbá Evangelios, niʼthí rí mijngii xuajen Belén nikuwa “ticun xabu su ndayaun mugu-ñu miruʼjun naʼ xana” (Lucas 2:8-12). Xó má ndiʼyáá raʼkháa i̱ndó nagún xaná rí mbiʼi, ikhiin nakuwa náa xaná. Ikhí niguáʼdiin mugiuún xaná rí mbruʼun. Á mu diciembre nindxu̱u̱ mbá gu̱nʼ rí naʼni migúwán wéñuʼ ga̱jma̱a̱ rí naxnúu wéñuʼ ruʼwa náa Belén, lá makuwa xa̱bu̱ bi̱ nuñawu̱u̱n mugu̱ náa xaná gu̱nʼ rígi̱ ráʼ. Na̱nguá. Ikha jngó, xúgíʼ rígi̱ nasngájma rí Jesús tagumaa gu̱nʼ diciembre. *

Náa Ajngáa rawunʼ Dios nasngájma kaʼwu náa phú mbiʼi nikháñu Jesús, mú tséʼthi wéñuʼ ga̱jma̱a̱ numuu mbiʼi rí nigumaa. Rígi̱ naʼni magiwa̱nʼ a̱jkiu̱lú rí niʼthí rey Salomón: “Rí muniʼníín xóo mbáa xa̱bu̱ bi̱ májáánʼ itháan májánʼ ki xóo mbá aceite, xúʼko̱ má nindxu̱u̱ mbiʼi rí nakháñaʼ ki xóo mbiʼi rí nagumáanʼ” (Eclesiastés 7:1). Nandoo nakru̱ʼu̱lú rí náa Biblia naʼthí wéñuʼ rí xú káʼnii nitaraʼa ga̱jma̱a̱ rí xú káʼnii nikháñu Cristo, mu tséʼthi wéñuʼ ga̱jma̱a̱ numuu mbiʼi rí nigumaa.