1, 2. Xú káʼnii nindxu̱u̱ tsingíná rí nuraʼníí xa̱bu̱ rí mbiʼi xúgi̱, ga̱jma̱a̱ xú káʼnii nindxu̱u̱ graxe̱ rí nuni xá.

NÁA mbá xuajen rí nirígá wéñuʼ guerra, nixmijná mixkawiʼ wéñuʼ rí niʼni makhañún mbaʼin wéñuʼ gu̱ʼu̱ ga̱jma̱a̱ e̱ji̱n. Xúgínʼ xa̱bu̱ bugi̱ nijuaʼdi̱i̱n náa mbá iñáʼ mba̱a̱ ga̱jma̱a̱ ikhí nidramaʼ mbaʼa cruz náa naʼthí: “Náa numuu rá.” Graxe̱ rígi̱ rí itháan nuni xa̱bu̱ bi̱ nikháñun a̱ngiu̱ún. Nakúwi̱i̱n gíná índo̱ a̱ngiúu̱n bi̱ nandún kuñún nakháñun náa mbá guerra, náa mbá gamiéjunʼ, náa mbá nandii, náa nuxmijná xa̱bu̱ o índo̱ naguámbáa guʼwún ga̱jma̱a̱ índo̱ naʼni muraʼníí i̱ʼwáʼ gamiéjunʼ dí ra̱májánʼ wéñuʼ. Xa̱bu̱ nandún mbuyáá náa numuu rí naguaʼnii gamiéjunʼ rígi̱.

² Náa numuu rí Dios naniñuʼ marigá tsingíná rá. Á mu Jeobá Dios gíʼdoo xúgíʼ tsiakii, nandoo kaʼyulúʼ wéñuʼ, najmañuu wéñuʼ ga̱jma̱a̱ nindxu̱u̱ jmbu, náa numuu rí tsíñún kuyamijná xa̱bu̱ ga̱jma̱a̱ narígá dí ra̱májánʼ wéñuʼ náa tsu̱du̱u̱ ku̱ba̱ʼ rá. Lá nidxu̱ʼnú nitraximínáʼ graxe̱ rígi̱ rá.

3, 4. a) Lá ra̱májánʼ nindxu̱u̱ rí muraxi̱mi̱jna̱ náa numuu rí Dios naniñuʼ marigá tsingíná ráʼ. b) Xú káʼnii eʼyoo Jeobá dí ra̱májánʼ ga̱jma̱a̱ rí tsingíná rá.

³ Lá ra̱májánʼ nindxu̱u̱ rí muraxi̱mi̱jna̱ náa numuu rí Dios naniñuʼ marigá tsingíná rá. Tikhun nakumu̱ún á mu nuni  graxe̱ rígi̱ nusngajma rí ndayóoʼ maguaʼdáá itháan fe ga̱jma̱a̱ rí na̱nguá guáʼdáá gamajkhún náa Dios. Mú, índo̱ gídxúʼ ratraxnuu Biblia ma̱ta̱ya̱a̱ rí nikuwa xa̱bi̱i̱ Dios bi̱ nini graxe̱ rígi̱. Mbá xkri̱da, gaʼyee Habacuc niʼthúu̱n Jeobá: “Náa numuu rí natatsíñáʼ mba̱yo̱o̱ wéñuʼ xúgíʼ dí ra̱májánʼ rá. Asndu náa má ejkha̱ ndaʼyoo rí xa̱bu̱ nagiʼdu̱u̱n ga̱jma̱a̱ nuxmijná; asndu náa má ejkha̱ ndaʼyoo delito” (Habacuc 1:3).

⁴ Lá niríyúu Jeobá gaʼyee Habacuc ga̱jma̱a̱ numuu graxe̱ rúʼko̱ ráʼ. Na̱nguá niríyúu. Dios niʼni rí magumaraʼmáʼ ajngóo Habacuc náa Biblia. Ma̱ngaa, nimbáyúu makro̱ʼo̱o̱ itháan májánʼ rí nixtáa raʼyoo, ga̱jma̱a̱ rí mba̱jo̱o̱ fe ndrígóo. Xúʼko̱ má eyoo maʼni Jeobá ga̱jma̱á ni̱ndxa̱ʼ. Garmáʼáan a̱jkia̱nʼ rí náa Biblia naʼsngáa rí ‹ikhaa naxmiéjunʼ› kaʼyulúʼ (1 Pedro 5:7). Dios tsíyoo gaʼyoo nditháan dí ra̱májánʼ ga̱jma̱a̱ índo̱ narígá tsingíná (Isaías 55:8, 9). Mú, náa numuu rí narígá tsingíná náa numbaaʼ rá.

5. Ndiéjunʼ ethi tikhun xa̱bu̱ ga̱jma̱a̱ numuu rí numíniʼ mú ndiéjunʼ eʼsngáa náa Biblia rá.

⁵ Mbaʼin xa̱bu̱ bi̱ kuwa náa mbaʼa religión nuraxu̱u̱n xa̱bu̱ ede̱ ndrígu̱ún náa numuu rí numíniʼ wéñuʼ. Ikhiin nuthi  rí Dios nandoo marigá rígi̱ ga̱jma̱a̱ ikhaa má niʼthí asndu nákha wajyúúʼ xúgíʼ dí marigá nda̱wa̱á, ga̱jma̱a̱ dí marigá gamiéjunʼ. Kúwi̱i̱n mbaʼin xa̱bu̱ bi̱ nutún rí Dios naʼni mbaʼa rí tsékujmaa ga̱jma̱a̱ rí ikhaa nagudíin xa̱bu̱ ma̱ngaa e̱ji̱n mu maxtáa gajmíi̱n mekhuíí. Mú xó má nijmañaʼ ikháánʼ, Jeobá na̱nguá eʼni nditháan dí ra̱májánʼ. Náa Biblia naʼthí: “¡Jeobá xáʼni nditháan dí ra̱májánʼ, ga̱jma̱a̱ bi̱ gíʼdoo Xúgíʼ tsiakii naʼni xúgíʼ rí nindxu̱u̱ jmbu!” (Job 34:10).

6. Náa numuu rí mbaʼin xa̱bu̱ nuthi rí Dios gíʼdoo aʼkhúun náa xúgíʼ tsingíná rí narígá rá.

⁶ Lá natayáá ikháánʼ náa numuu rí xa̱bu̱ nakiéʼkún índo̱ nuthi rí Dios gíʼdoo aʼkhúun náa xúgíʼ tsingíná rí narígá rá. Ikhiin nakumu̱ún rí Dios bi̱ gíʼdoo xúgíʼ tsiakii nindxu̱u̱ bi̱ naʼtáñajunʼ náa tsu̱du̱u̱ numbaaʼ rígi̱. Ikhiin na̱nguá eyáá dí ra̱ʼkhá tháán gíʼdoo numuu rí naʼsngáa náa Biblia rí ikháánʼ nijmañaʼ náa capítulo 3 ndrígóo libro rígi̱. Bi̱ phú xtáa raʼtáñajunʼ náa numbaaʼ rígi̱ nindxu̱u̱ Satanás.

7, 8. a) Xú káʼnii esngájma xa̱bu̱ bi̱ kuwa náa numbaaʼ rí ni̱ndxu̱ún xó má Xa̱bu̱ Ñajunʼ ndrígu̱ún rá. b) Náa numuu “rí na̱jkha̱nú mbiʼi ga̱jma̱a̱ xúgíʼ dí ra̱májánʼ dí na̱nguá guáʼthi̱i̱n mugíʼnin” narígá ga̱jma̱a̱ aʼkhá ndrígu̱ún xa̱bu̱ rá.

⁷ Náa Biblia naʼthí kaʼwu rí “indo su iʼhuinʼ xabu su cuhua runi ri ramejanʼ, iquin cuhue naʼ ago ñaunʼ guixa” (1 Juan 5:19). Gajkhun nindxu̱u̱ ajngáa rígi̱. Xa̱bu̱ bi̱ kuwa náa numbaaʼ nusngajma rí ni̱ndxu̱ún xó má espíritu bi̱ tsíkujmaa “su naʼniduhuinʼ xoguinʼ xabu su cuhua naʼ numbaʼ” (Rí huasjŋgajma [Apocalipsis] 12:9). Satanás naʼni nduwaʼ, nakiʼnáa mbanda̱ʼkho ga̱jma̱a̱ naʼni dí ra̱májánʼ wéñuʼ. Ikha jngó náa numbaaʼ rí xtáa raʼtáñajunʼ ikhaa rígá wéñuʼ rí minduwaʼ, xa̱bu̱ nakiʼníin mbanda̱ʼkho ga̱jma̱a̱ nuni dí ra̱májánʼ wéñuʼ. Rígi̱ nindxu̱u̱ timbá numuu rí narígá wéñuʼ tsingíná.

⁸ Rí maʼni raga̱jma̱ xó má ndiʼyáá náa capítulo 3, rí xa̱bu̱ ni̱ndxu̱ún xa̱bu̱ aʼkhá asndu nákha timbáa xa̱biya̱ táʼnimbo̱o̱ náa ixi̱ ri̱ʼi̱ Edén. Ikha jngó xa̱bu̱ aʼkhá nagíminaʼ maʼtáñajunʼ, ga̱jma̱a̱ rígi̱ naʼni marigá wéñuʼ guerra, nuni gíníi xa̱bu̱ ga̱jma̱a̱  narígá tsingíná (Eclesiastés 4:1; 8:9). Ragajtsú numuu rí nuraʼníí tsingíná nindxu̱u̱ rí naʼthí náa Biblia “rí na̱jkha̱nú mbiʼi ga̱jma̱a̱ xúgíʼ dí ra̱májánʼ dí na̱nguá guáʼthi̱i̱n mugíʼnin” (atraxnuu Eclesiastés 9:11). Náa numbaaʼ rígi̱ na̱nguá xtáa raʼtáñajunʼ Jeobá, ikha jngó, na̱nguá ñawu̱u̱n. Xa̱bu̱ nugíʼnii dí ra̱májánʼ asndu náa má kuwa.

9. Náa numuu rí nandoo nduʼyáá gajkhun rí Jeobá ndaʼyoo náa numuu rí naniñuʼ marigá tsingíná rá.

⁹ Naʼni̱i̱ a̱jkiu̱lú índo̱ nduʼyáá rí Dios na̱nguá eʼni rí marigá tsingíná. Ikhaa na̱nguá gíʼdoo aʼkhúun índo̱ narígá guerra, índo̱ xa̱bu̱ nuradímíjná, índo̱ nuni gíníi eʼwíínʼ ga̱jma̱a̱ índo̱ narígá gamiéjunʼ rí naʼni makuwíin gíná xa̱bu̱. Mú xóó tígo̱o̱ muriʼña̱a̱ graxe̱ rígi̱: Náa numuu rí Jeobá naniñuʼ marigá tsingíná rá. Ikhaa gíʼdoo xúgíʼ tsiakii mu maʼni gámbáa tsingíná. Náa numuu rí xóo tséʼni gámbáa xá. Numuu rí nijkuánú ndiʼyáá rí Jeobá nindxu̱u̱ mbáa Dios bi̱ nandoo kaʼyulúʼ wéñuʼ, ikhaa ndaʼyoo náa numuu rí xóó tséʼni gámbáa (1 Juan 4:8).

10. Ndiéjunʼ niʼthí Satanás ga̱jma̱a̱ numuu Jeobá, ga̱jma̱a̱ xú káʼnii niʼni xá.

¹⁰ Mu mbuʼyáá náa numuu rí Dios naniñuʼ marigá tsingíná, gíʼmaa matangáanʼ mbuʼyáá mbiʼi rí nigi̱ʼdu̱u̱ xúgíʼ xkujndu. Graxe̱ rí gíʼdoo wéñuʼ numuu niguma nákha Satanás niʼni rí Adán ga̱jma̱a̱ Eva xúnimbu̱u̱n náa Jeobá. Satanás táʼthi dí raʼkhí ga̱jma̱a̱ numuu tsiakii ndrígóo Jeobá numuu rí ikhaa ndaʼyoo rí nditháan tsitumuu. Satanás niʼthí rí Jeobá rakáʼyoo maʼtáñajunʼ. Índo̱ niʼthí rí Dios naʼni nduwaʼ numuu rí Dios tséxnún rí májánʼ wéñuʼ xa̱bi̱i̱, Gixa̱a̱ niʼthí rí Jeobá tseʼtañajunʼ májánʼ (atraxnuu Génesis 3:2-5). Ma̱ngaa niʼthí rí xa̱bu̱ makuwá itháan májánʼ á mu tseʼtañajúnʼ Dios. Xúgi̱ kaʼnii niʼni índo̱ Satanás niʼthí rí Jeobá rakáʼyoo maʼtáñajunʼ.

11. Náa numuu rí Jeobá táʼni gámbíin xa̱bu̱ bi̱ túnimbu̱ún náa ixi̱ ri̱ʼi̱ Edén rá.

¹¹ Índo̱ Adán ga̱jma̱a̱ Eva túnimbu̱ún náa Jeobá, ikhiin  nithi xóo ajngáa rígi̱: “Tséyóoʼ rí Dios maʼtáñajunʼxo. Ma̱ndoo mutaxo má ikháanʼ náa rí májánʼ ga̱jma̱a̱ dí ra̱májánʼ”. Xú káʼnii gaʼnimbánuu Jeobá xkujndu rígi̱ rá. Xú káʼnii gasngájma náa xúgínʼ xa̱bu̱ bi̱ túnimbu̱ún náa ikhaa rí na̱nguá nindxu̱u̱ gajkhun rí nithi, ga̱jma̱a̱ rí naʼni ikhaa nindxu̱u̱ itháan májánʼ rá. Kúwi̱i̱n bi̱ nundxa̱ʼwa̱míjna̱ rí itháan májánʼ niʼni á mu Dios niʼni gámbíin xa̱bu̱ bi̱ túnimbu̱ún ga̱jma̱a̱ niʼnii nuxi̱nʼ mbu̱júu̱ xa̱bu̱. Mú ikhaa niʼthí ma rí Ku̱ba̱ʼ maʼni̱i̱ mitsaan ga̱jma̱a̱ ikhí makuwá e̱ji̱i̱n Adán ga̱jma̱a̱ Eva (Génesis 1:28). Jeobá naʼnimbánuu má xúʼko̱ xúgíʼ rí nakudaminaʼ maʼni (Isaías 55:10, 11). Á mu ikhaa niʼni gámbíin xa̱bu̱ bi̱ túnimbu̱ún náa ixi̱ ri̱ʼi̱ Edén, xáʼga̱nú mambanúu graxe̱ rí niguma rí ikhaa rakáʼyoo maʼtáñajunʼ.

12, 13. Ndiéjunʼ xkri̱da esngájma rí Jeobá naniñuʼ Satanás maʼtáñajunʼ náa tsu̱du̱u̱ numbaaʼ ga̱jma̱a̱ rí mutañajumijná xa̱bu̱ rá.

¹² Guʼgíiʼ mbá xkri̱da. Mbáa maestro xtáa raʼthún alumnos ndrígóo xú káʼnii gúriyaʼ cuenta náa matemática rí mingíjyúuʼ wéñuʼ. Mú, mbáa alumno bi̱ najmañuu wéñuʼ tséʼnimbo̱o̱, naʼthí rí maestro na̱nguá xtáa raríyaʼ májánʼ cuenta, ga̱jma̱a̱ xúʼko̱ esngájma rí maestro na̱nguá eʼsngáa májánʼ.  Dxámá bugi̱ naʼthí rí ikhaa najmañuu maríyaaʼ itháan májánʼ cuenta. Tikhun compañeros ndrígóo nundxa̱ʼwa̱míjna̱ rí gajkhun ga̱jma̱a̱ tsénimbu̱ún kuyáá maestro mangiin. Ndiéjunʼ gáʼni maestro rá. Ikhaa ma̱ndoo maxkawíin náa clase ndrígóo alumnos bi̱ tsénimbu̱ún, mú xú káʼnii gundxaʼwamíjna̱ iʼwíínʼ rá. Mbáa mundxaʼwamíjna̱ rí gajkhun nindxu̱u̱ rí niʼthí compañero ndrígu̱ún ga̱jma̱a̱ eʼwíínʼ bi̱ niwi̱i̱n náa ikhaa. Mbáa ní xaguaʼdáá gamajkhún náa maestro ga̱jma̱a̱ nundxa̱ʼwa̱míjna̱ rí maestro mamiñúu á mu nusngajma rí ikhaa najngawa̱a̱n. Mú xúgi̱ maestro naniñuʼ rí alumno bi̱ tséʼnimbo̱o̱ masngájma náa clase xú káʼnii gándoo garíyaaʼ cuenta.

¹³ Xúʼko̱ má eʼni Jeobá ma̱ngaa. Garmáʼáan a̱jkia̱nʼ dí raʼkháa i̱ndó xa̱bu̱ bi̱ nikuwa náa ixi̱ ri̱ʼi̱ Edén ndiyáá rí nirígá ma̱ngaa ndiyáá mbaʼin wéñuʼ ángeles (Job 38:7; Daniel 7:10). Jeobá niʼnimbánuu májánʼ wéñuʼ xkujndu rí nini xa̱bu̱ bi̱ túnimbu̱ún ga̱jma̱a̱ xúʼko̱ nindoo nimbáñun ángeles ma̱ngaa náa xa̱bu̱. Ikha jngó, ndiéjunʼ rí eʼni Jeobá rá. Naniñuʼ rí Satanás masngájma xú káʼnii gáʼtañajúnʼ xa̱bu̱ numbaaʼ. Ma̱ngaa naniñuʼ rí xa̱bu̱ mutañajumijná xó má eyoo Gixa̱a̱.

14. Xú káʼnii gambáñun xa̱bu̱ rí Jeobá niniñuʼ mu mutañajumijná rá.

¹⁴ Maestro bi̱ niʼthá náa xkri̱da ndaʼyoo rí dxámá bi̱ tséʼnimbo̱o̱ ga̱jma̱a̱ alumnos bi̱ numbayíí raʼkhí nindxu̱u̱ rí nuthi. Ma̱ngaa ndaʼyoo rí á mu naniñúnʼ rí muriyaʼ cuenta xó má ejmañún ikhiin, xúgínʼ bi̱ kuwa náa clase mambáñún. Ikha jngó, índo̱ gákujmaa rí nijngawi̱i̱n alumnos bi̱ tsénimbu̱ún, ikhú alumnos bi̱ nandún majmañún mbuyáá rí i̱ndó maestro najmañuu maʼsngáa. Ma̱ngaa, makru̱ʼu̱u̱n náa numuu rí maestro naxkawíin náa clase alumnos bi̱ tsénimbu̱ún. Xúʼko̱ má Jeobá, ndaʼyoo rí xúgínʼ ángeles ga̱jma̱a̱ xa̱bu̱ bi̱ nunimbu̱ún náa ikhaa mambáñun índo̱ gúyáá dí raʼkhí nindxu̱u̱ rí niʼthí Satanás gajmíi̱n iʼwíínʼ ángeles bi̱ túnimbu̱ún ga̱jma̱a̱ rí xa̱bu̱ numbaaʼ xáʼngu̱u̱n gutañajumijná. Ikhú gúyáá rí gajkhun nindxu̱u̱ rí niʼthí gaʼyee Jeremías: “Oh Jeobá, ikhúúnʼ  nda̱yo̱o̱ májánʼ rí xa̱bu̱ numbaaʼ na̱nguá kaʼyoo maʼtáñajuminaʼ. Asndu má rakáʼyoo maʼthí xú káʼnii maxtáa” (Jeremías 10:23).

15, 16. a) Náa numuu rí Jeobá naniñuʼ rí marigá tsingíná mba̱yu̱ʼ wéñuʼ rá. b) Náa numuu rí Dios naniñúnʼ rí muradímíjná xa̱bu̱ ga̱jma̱a̱ gamiéjunʼ rá.

¹⁵ Mú, náa numuu rí Jeobá naniñuʼ rí marigá tsingíná mba̱yu̱ʼ wéñuʼ rá. Ga̱jma̱a̱ náa numuu rí naniñuʼ marigá dí ra̱májánʼ rá. Guʼyáá a̱jma̱ rí xáʼni maestro bi̱ niʼthá náa xkri̱da. Timbá maniñuʼ rí alumno bi̱ tséʼnimbo̱o̱ masngájma xú káʼnii gáriyaʼ cuenta. Raga̱jma̱, maestro xambáyúu maríyaaʼ cuenta. Xúʼko̱ má Jeobá rígá a̱jma̱ rí tágiʼ maʼni. Timbá, naniñuʼ rí Gixa̱a̱ ga̱jma̱a̱ bi̱ numbayíí musngajma á mu gajkhun nindxu̱u̱ rí nuthi. Ikha jngó niniñuʼ manújngoo mba̱yu̱ʼ mbiʼi. Niʼni má mba̱yu̱ʼ tsiguʼ rí xa̱bu̱ numbaaʼ niguáʼdiin mbaʼin Xa̱bu̱ Ñajunʼ ga̱jma̱a̱ nuni mba̱jo̱o̱ ciencia ga̱jma̱a̱ i̱ʼwáʼ rí májánʼ. Mú na̱jkha̱ rajoo má xúʼko̱ xúgíʼ dí ra̱májánʼ, rí tsingíná, delito ga̱jma̱a̱ guerra. Xúgíʼ rígi̱ nasngájma rí nimbáa xa̱bu̱ tséjmañuu maʼtáñajúúnʼ.

¹⁶ Raga̱jma̱, Jeobá tsembáyúu Satanás mu maʼtáñajunʼ náa numbaaʼ rígi̱. Á mu Dios tséniñuʼ rí muradímíjná xa̱bu̱ ga̱jma̱a̱ gamiéjunʼ, lá raʼkháa masngájma rí xtáa rambáñuun bi̱ túnimbu̱ún kuyáá xá. Lá ragájkhun rí asndu mundxaʼwami̱jna̱ rí xa̱bu̱ numbaaʼ ma̱ndoo mutañajumijná rí asndu xáʼga̱nú marigá dí ra̱májánʼ rá. Á mu Jeobá naʼni rígi̱, masngájma rí ma̱ngaa naʼni nduwaʼ. Mú, ‹Dios na̱nguá xú maʼni nduwaʼ› (Hebreos 6:18).

17, 18. Ndiéjunʼ gáʼni Jeobá náa xúgíʼ dí ra̱májánʼ rí nini Xa̱bu̱ Ñajunʼ ga̱jma̱a̱ rí niʼni Satanás rá.

¹⁷ Mú, ndiéjunʼ gándoo gúʼthá ga̱jma̱a̱ xúgíʼ dí ra̱májánʼ dí nijuiʼthá mba̱yu̱ʼ tsiguʼ ga̱jma̱a̱ numuu Dios rá. Garmáʼáan a̱jkiu̱lú rí Jeobá nindxu̱u̱ bi̱ gíʼdoo xúgíʼ tsiakii. Ikha jngó, ma̱ndoo maʼni gámbáa tsingíná ndrígu̱ún xa̱bu̱. Xó má nijmañulúʼ,  xúgíʼ rí naʼni gachúu ku̱ba̱ʼ mambáa ga̱jma̱a̱ ikhí maʼni mbá ku̱ba̱ʼ mitsaan. Fe rí guáʼdáá xa̱bu̱ náa Jesús maʼni rí makáwíin náa aʼkhá. Xa̱bu̱ bi̱ nikháñun matuxi̱ín. Xúʼko̱ gáʼni rí Dios majmiuu Jesús mu “maʼnigambale rí naʼni su guixa” (1 Juan 3:8). Jeobá maʼni xúgíʼ rígi̱ mbá mbiʼi rí ikhaa gáʼyoo májánʼ maʼni. Ma̱ndoo makuwáanʼ gagi numuu rí táʼni nákha ginii, rí Dios naʼngo̱o̱ a̱jkiu̱u̱n naʼni rí ikháanʼ majmañulúʼ rí gajkhun ga̱jma̱a̱ rí ma̱ndoo muʼni ñajunʼ ndrígóo (atraxnuu 2 Pedro 3:9, 10). Rí mbiʼi xúgi̱, Dios xtáa rañínʼ xa̱bu̱ bi̱ phú nandún mbuyamajkuíí ga̱jma̱a̱ nambáñun mu muraʼníí tsingíná náa numbaaʼ rígi̱ náa rígá wéñuʼ xkujndu (Juan 4:23; 1 Corintios 10:13).

¹⁸ Mbáa tikhun nundxa̱ʼwa̱míjna̱ rí xúgíʼ tsingíná rígi̱ tárígá á mu Dios niʼnii Adán ga̱jma̱a̱ Eva rí maʼndún munimbu̱ún. Mu mbuʼyáá náa numuu rí táʼni, garmáʼáan a̱jkia̱nʼ rí Jeobá nixnúlú mbá regalo rí gíʼdoo wéñuʼ numuu.

19. Ndiéjunʼ nindxu̱u̱ regalo rí nixnúlú Jeobá, ga̱jma̱a̱ náa numuu rí gíʼmaa muñawa̱a̱nlu rá.

¹⁹ Xó má ndiʼyáá náa capítulo 5, xa̱bu̱ ma̱ndoo muraʼwíí rí muni. Regalo rígi̱ ra̱ʼkhá tháán gíʼdoo numuu náa ikháanʼ. Dios niʼnii mbaʼin wéñuʼ xujkhúʼ, mú xujkhúʼ bugi̱ na̱nguá e̱ndxa̱ʼwa̱míjna̱ rí muni (Proverbios 30:24). Lá makuwáanʼ gagi á mu Dios niʼniáanʼ xó má xujkhúʼ ráʼ. Na̱nguá. Ikha jngó nadxulú numuu rí nandoo nuraʼwíí rí nuʼni, mbá xkri̱da, xú káʼnii xa̱bu̱ ganindxu̱lú, xú káʼnii gákuwáanʼ ga̱jma̱a̱ tsíin gándoo gambaxúlú  gajmiúlú. Ikháanʼ nanigu̱lú muraʼwíí rí muʼni, ga̱jma̱a̱ Dios nandoo rí muguaʼdáá rígi̱.

20, 21. Xú káʼnii gándoo majmaʼ májánʼ wéñuʼ regalo rígi̱ rí ma̱ndoo matraʼwíí rí matani, ga̱jma̱a̱ náa numuu rí gíʼmaa maʼndulú muʼni rígi̱ rá.

²⁰ Jeobá nandoo rí muʼni ñajunʼ ga̱jma̱a̱ xúgíʼ a̱jkiu̱lú (2 Corintios 9:7). Mbáa xa̱bu̱ tsíyoo rí a̱ʼdióo maʼthí rí nandoo kaʼyoo numuu rí nutháán maʼthí. Graxe̱ rí ikháánʼ gíʼmaa matani: “Xú káʼnii gándoo gájmuuʼ ikhúúnʼ rí Jeobá nixnúʼ rí ma̱ndoo maraʼwíí rí mani rá.” Satanás, Adán ga̱jma̱a̱ Eva tajmañún majmúún májánʼ rígi̱, numuu rí túni rí nandoo Jeobá Dios. Ndiéjunʼ gátani ikháánʼ rá.

²¹ Ikháánʼ ma̱ndoo majmaʼ májánʼ wéñuʼ regalo rígi̱ rí ma̱ndoo matraʼwíí rí matani. Ikháánʼ ma̱ndoo maraxtaa gajmiáanʼ mbaʼin wéñuʼ xa̱bu̱ bi̱ nuni rí nandoo Jeobá. Xa̱bu̱ bugi̱ nuni rí maxtáa gagi Dios numuu rí ikhiin nusngajma rí Satanás nindxu̱u̱ mbáa bi̱ naʼthí rí minduwaʼ ga̱jma̱a̱ rí ikhaa nindxu̱u̱ mbáa Xa̱bu̱ Ñajunʼ bi̱ ra̱májánʼ (Proverbios 27:11). Xúʼko̱ má ma̱ndoo matani mangáán á mu natraʼwíí maraxtaa májánʼ. Náa imbo̱o̱ capítulo gíʼthá ndiéjunʼ nindxu̱u̱ rígi̱.