NÁA ajngáa rí phú nigumarámáʼ nákha ginii, Biblia najmuu itháan rí mbá 70 nuthu ajngáa hebreo scheʼóhl ga̱jma̱a̱ náa ajngáa griego háides, nájma̱ ajngáa rígi̱ najmuu mu maʼthí índo̱ mbáa xa̱bu̱ nakháñuu. Náa i̱ʼwáʼ Biblia nurawíi ajngáa xóo “infierno” ga̱jma̱a̱ “iñáʼ”. Mú náa mbaʼa ajngáa na̱nguá rígá muthi xó má eʼthí ajngáa hebreo ga̱jma̱a̱ ajngáa griego. Ikha jngó, náa Traducción del Nuevo Mundo náa ajngáa inglés najmuu nájma̱ ajngáa náa nota: “Seol” ga̱jma̱a̱ “Hades”. Mú ndiéjunʼ eyoo gáʼthi mámbá rá. Guʼyáá xú káʼnii ejmuu náa mbaʼa texto ndrígóo Biblia.

Eclesiastés 9:10 naʼthí: “Nda̱a̱ ñajunʼ, nda̱a̱ ku̱ma̱, asndu má nda̱a̱ rí gajmañaaʼ matani náa Iñá wa̱jinʼ (“Seol”, nota), náa na̱dxu̱ʼ”. Lá rígi̱ nandoo gáʼthi rí Seol nindxu̱u̱ mámbá iñáʼ náa najuaʼdi̱i̱n xa̱bu̱ bi̱ nikháñun bi̱ nandulúʼ kuʼñúún ráʼ. Na̱nguá. Índo̱ Biblia naʼthí ga̱jma̱a̱ numuu mámbá iñáʼ náa najuaʼdi̱i̱n xa̱bu̱ bi̱ nikháñun, na̱nguá ejmuu ajngáa scheʼóhl asndu na̱nguá má ejmuu ajngáa háides, najmuu i̱ʼwáʼ ajngáa hebreo ga̱jma̱a̱ ajngáa griego (Génesis 23:7-9; Mateo 28:1). Ajngáa “Seol” na̱nguá má eyoo gáʼthi mbá iñáʼ náa najuaʼdi̱i̱n mbá nduʼ xa̱bu̱, xó má náa najuaʼdi̱i̱n bi̱ kuwa mbá guʼwíin (Génesis 49:30, 31).

Ndiéjunʼ eyoo gáʼthi ajngáa “Seol” o “Hades” rá. Náa Ajngá rawunʼ Dios naʼthí rí “Seol” o “Hades” nandoo gáʼthi mbá iñáʼ mba̱a̱ wéñuʼ. Mbá xkri̱da, náa Isaías 5:14 naʼthí rí Iñá wa̱jinʼ o Seol “mba̱a̱ wéñuʼ” rí asndu xóo ‹nakuaja̱n mba̱a̱ wéñuʼ rawunʼ›. Rí nandoo gáʼthi, Seol naʼkhu̱u̱n mbaʼin wéñuʼ xa̱bu̱ bi̱ nikháñun, ga̱jma̱a̱ xóó nandoo itháan (Proverbios 30:15, 16). Mixtiʼkhu nindxu̱u̱ náa panteón, numuu rí ikhí najuaʼdi̱i̱n nguájmi̱i̱n xa̱bu̱, mú ‹Iñá wa̱jinʼ na̱nguá giʼmuu› (Proverbios 27:20). Seol o Hades, na̱nguá e̱jkha̱nú majtíin xa̱bu̱. Ma̱ngaa na̱nguá xú mbuʼyáá ga̱jma̱a̱ idulú. Nandoo gáʼthi iñáʼ náa najuaʼdi̱i̱n xúgínʼ xa̱bu̱ bi̱ nakháñun, ma̱ngaa nandoo gáʼthi rí asndu xóo kuwa runuʼ mbaʼin xa̱bu̱ bi̱ nikháñun.

Índo̱ najmañulúʼ dí naʼsngáa náa Biblia rí xú káʼnii matuxi̱ín xa̱bu̱ bi̱ nikháñun, nakru̱ʼu̱lú itháan májánʼ ndiéjunʼ nindxu̱u̱ Seol o Hades. Náa Ajngá rawunʼ Dios naʼthí rí xa̱bu̱ bi̱ nikháñun  bi̱ kuwa náa Seol o Hades ma̱ndoo matuxi̱ín (Job 14:13; Hechos 2:31; Revelación [Apocalipsis] 20:13). * Ma̱ngaa nasngájma rí ikhí kuwa xa̱bu̱ bi̱ nini ñajunʼ ndrígóo Jeobá ga̱jma̱a̱ mbaʼin bi̱ túni ñajunʼ (Génesis 37:35; Salmo 55:15). Ikha jngó naʼthí “ri mbuya tsi jmbun, xuʼkue-ma mbuya tsi rajmbun” (Hechos 24:15).