1, 2. a) Náa numuu rí na̱nguá mbríguu rí matadxawíín ga̱jma̱a̱ numuu mbáa xa̱bu̱ bi̱ najmaʼniiʼ wéñuʼ ki xóo rí matatsiʼniiʼ májánʼ wéñuʼ rá. b) Ndiéjunʼ rí e̱ndxa̱ʼwa̱míjna̱ xa̱bu̱ ga̱jma̱a̱ numuu Jesús rá.

NÁA numbaaʼ kuwa mbaʼin xa̱bu̱ bi̱ najmaʼnuʼ wéñuʼ. Tikhun najmaʼnuʼ wéñuʼ náa xuajñún, ga̱jma̱a̱ eʼwíínʼ najmaʼnuʼ náa xúgíʼ numbaaʼ. Mú, maski ajndu ikháánʼ natayáá xú káʼnii mbiʼyuu mbáa xa̱bu̱ bi̱ najmaʼniiʼ wéñuʼ tsíyoo gáʼthi rí ikháánʼ natatsiʼniiʼ xa̱bu̱ buʼko̱, xóo muʼthá, tsítayáá xú káʼnii nixtáa nákha ginii o xú káʼnii phú xa̱bu̱ nindxu̱u̱.

² Maski ajndu ninújngoo má 2,000 tsiguʼ rí Jesucristo nixtáa náa tsu̱du̱u̱ Ku̱ba̱ʼ, najuiʼthá má xúʼko̱ ga̱jma̱a̱ numuu ikhaa náa xúgíʼ tsu̱du̱u̱ numbaaʼ. Mú mbaʼin xa̱bu̱ tséyáá tsáa phú ninindxu̱u̱. Tikhun nuthi rí ninindxu̱u̱ mbáa xa̱bu̱ bi̱ májánʼ a̱jkiu̱u̱n. Iʼwíínʼ nundxa̱ʼwa̱míjna̱ rí ikhaa ninindxu̱u̱ mbáa xa̱bu̱ gaʼyee. Ga̱jma̱a̱ kuwa bi̱ nunimbu̱ún rí Jesús nindxu̱u̱ Dios ga̱jma̱a̱ rí gíʼmaa mbuʼyamajkuíí. Lá gajkhun rígi̱ ráʼ.

3. Ndíjkha rí gíʼdoo wéñuʼ numuu matatsiʼniiʼ Jeobá Dios ga̱jma̱a̱ Jesucristo rá.

³ Gíʼdoo wéñuʼ numuu rí ikháánʼ matatsiʼnuʼ rí gajkhun ga̱jma̱a̱ numuu Jesús. Náa numuu rá. Numuu rí náa Biblia naʼthí: “Rígi̱ eyoo gáʼthúu̱n rí maraxtaa kámuu mbiʼi, rí muninuwínʼ ikháánʼ, mbáwiin ikháánʼ bi̱ ni̱ndxa̱ʼ Dios gajkhun, ga̱jma̱a̱ Jesucristo bi̱ nitaxúnguanʼ” (Juan 17:3). Á mu Jeobá  Dios ga̱jma̱a̱ Jesús ni̱ndxu̱ún bi̱ nambáxa̱ʼ gajmiáanʼ maʼga̱ kañán maraxtaa kámuu mbiʼi náa tsu̱du̱u̱ ku̱ba̱ʼ mitsaan (Juan 14:6). Ma̱ngaa, Jesús nixná mbá xkri̱da itháan májánʼ rí xú káʼnii gíʼmaa makuwáanʼ ga̱jma̱a̱ xú káʼnii gíʼmaa muʼni gajmiúlú eʼwíínʼ xa̱bu̱ (Juan 13:34, 35). Náa timbá capítulo ndrígóo libro rígi̱ ndiʼyáá ndiéjunʼ ñajunʼ rí gajkhun ga̱jma̱a̱ numuu Dios. Rí xúgi̱ guʼyáá ndiéjunʼ eʼsngáa náa Biblia ga̱jma̱a̱ numuu Jesucristo.

4. Ndiéjunʼ eyoo gáʼthi título Mesías ga̱jma̱a̱ Cristo rá.

⁴ Nákha wajyúúʼ nákha xóó tséxtáa Jesús, náa Biblia niʼtáriyaʼ rí ma̱ʼkha̱nú mbáa bi̱ Dios makunguanʼ,  bi̱ gágumbiʼyuu Mesías o Cristo. Título Mesías (na̱ʼkha̱ náa ajngáa hebreo) ga̱jma̱a̱ Cristo (na̱ʼkha̱ náa ajngáa griego) nandoo gáʼthi bi̱ “nixtiyáaʼ”. Ikha jngó bi̱ nijuiʼthá ma̱ʼkha̱ mani̱ndxu̱u̱ bi̱ nixtiyáaʼ, rí nandoo gáʼthi bi̱ ndiyáaʼ Dios mu maʼni mbá ñajunʼ kiejunʼ. Náa i̱ʼwáʼ capítulo ndrígóo libro rígi̱ gúʼyáá itháan xú káʼnii Mesías gíʼdoo wéñuʼ numuu náa rí wíji̱ maʼnimbánuu Dios. Ma̱ngaa mbuʼyáá rí Jesús ma̱ndoo maʼni tsajkurámáanʼlu rí mbiʼi xúgi̱. Mbáa asndu nákha xóó tsígumaa Jesús mbaʼin niraximi̱jna̱: “Tsáa gánindxu̱u̱ Mesías rá.”

5. Ndiéjunʼ rí niguánu ndiyáá májánʼ discípulos ndrígóo Jesús rá.

⁵ Nákha timbá siglo, discípulos ndrígóo Jesús bi̱ nixtáa náa Nazaret ndiyáá májánʼ rí ikhaa ninindxu̱u̱ Mesías bi̱ nijuiʼthá ma̱ʼkha̱ (Juan 1:41). Mbáa dí ikhiin nigumbiʼyuu Simón Pedro, ikhaa niʼthúu̱n mbájmbu: “Ikan ñajuanʼ Cristo” (Mateo 16:16). Náa numuu ndiyáá discípulos ndrígóo Jesús rí ikhaa ninindxu̱u̱ Mesías bi̱ nijuiʼthá ma̱ʼkha̱ rá. Ga̱jma̱a̱ náa numuu rí gíʼmaa mbuʼyáá rí gajkhun rúʼko̱ rá.

6. Ndiéjunʼ xkri̱da gambáyuluʼ makru̱ʼu̱lú rí xú káʼnii Jeobá nimbáñun xa̱bu̱ bi̱ nikuwa jmbu mu muniʼniiʼ Mesías rá.

⁶ Xa̱bu̱ gaʼyee ndrígóo Dios bi̱ nikuwa nákha xóó tsígumaa Jesús niʼtáriyaʼ mbaʼa rí ma̱ndoo mambáñún mu muniʼniiʼ Mesías. Muʼgíiʼ mbá xkri̱da: Á mu rí ikháánʼ na̱dxu̱ʼ gátaʼyáaʼ xa̱bu̱ bi̱ tsítatsiʼniiʼ náa kuwa mbaʼin wéñuʼ xa̱bu̱. Ikháánʼ mambáyaʼ mataxkamaa xa̱bu̱ buʼko̱ á mu nutha̱nʼ xú káʼnii nindxu̱u̱. Xúʼko̱ má ma̱ngaa rígi̱, Jeobá niʼthí náa xa̱bu̱ gaʼyee bi̱ niniraʼmáʼ Biblia rí gáʼni Mesías ga̱jma̱a̱ rí gágíʼnuu. Mu xúʼko̱ xa̱bu̱ bi̱ kuwa jmbu ma̱ndoo muniʼniiʼ nacha̱ índo̱ gúyáá rí xtáa rambánuu xúgíʼ rí kiʼtáriyaʼ.

7. Arathá a̱jma̱ xkri̱da rí nimbánuu náa Jesús.

⁷ Guʼyáá a̱jma̱ xkri̱da. Rí timbá nindxu̱u̱: Itháan rí 700 tsiguʼ nákha xóó tséxtáa Jesús, xa̱bu̱ gaʼyee Miqueas niʼtáriyaʼ rí bi̱ nijuiʼthá ma̱ʼkha̱ magumaa náa xuajin Belén, náa mbá xuajin chíʼgíʼ dí rígá náa ku̱ba̱ʼ ndrígóo Judá (Miqueas 5:2). Náa nigumaa Jesús rá. Ikhí má nigumaa náa xuajin rí  nijuiʼthá (Mateo 2:1, 3-9). Raga̱jma̱ xkri̱da nindxu̱u̱ rí niʼtáriyaʼ náa Daniel 9:25, mba̱yu̱ʼ tsiguʼ nindoo ndiyáá nguánáa phú gáʼkha̱nú Mesías: Tsiguʼ 29. * Rí nimbánuu rígi̱ ga̱jma̱a̱ i̱ʼwáʼ rí nijuiʼtáriyaʼ nasngájma rí Jesús nindxu̱u̱ Mesías bi̱ nijuiʼthá ma̱ʼkha̱.

8, 9. Xú káʼnii nikujmaa itháan kaʼwu índo̱ nijngúun náa iyaʼ Jesús rí ikhaa nindxu̱u̱ Mesías rá.

⁸ Índo̱ na̱jkha̱ mambáa tsiguʼ 29 nikujmaa itháan kaʼwu rí Jesús nindxu̱u̱ Mesías. Ikhú má tsiguʼ rúʼko̱ índo̱ Jesús nindo̱ʼo̱o̱ Juan rí makumáanʼ náa mañu dí rígá náa Jordán. Jeobá niʼthúu̱n Juan rí maxnúu mbá tsinaʼ mu ma̱ndoo maniniiʼ Mesías, Juan ndiʼyoo tsinaʼ rígi̱ índo̱ Jesús nijngúun náa iyaʼ. Náa Biblia naʼthí: “Ga Jesús riʼdo huamba huamacaʼjui nu-nacha negajnule naʼ iyaʼ, cami nu-nacha nemaʼto ri mecui, ga Jesús ndeʼyo ri su Espíritu-yo Dios ecao naʼ Ica xuri ñuʼjun paloma jaʼni. Ga icu nihuan aʼjo Dios naʼ mecaui ri naʼthan: -Suguiʼ ñajunʼ su Aʼdioʼ su naŋgajuaʼyoʼ, ga Ica nadxuʼ cayo” (Mateo 3:16, 17). Índo̱ Juan ndiʼyoo ga̱jma̱a̱ niʼdxuun rúʼko̱ ikhú ndiʼyoo májánʼ rí Jesús nindxu̱u̱ bi̱ nikunguanʼ Dios (Juan 1:32-34). Mbiʼi rúʼko̱ xi̱ʼ kaʼwu —rí nandoo gáʼthi, tsiakii ndrígóo Dios— nigadirámáʼ náa ikhaa, ikhú Jesús ni̱jkha̱nú ninindxu̱u̱ Mesías, o Cristo, xa̱bu̱ bi̱ nixtiyáaʼ mu mani̱ndxu̱u̱ Caudillo ga̱jma̱a̱ Rey (Isaías 55:4).

⁹ Rí kiʼtáriyaʼ náa Biblia nimbánuu ga̱jma̱a̱ rí niʼthí Jeobá nisngájma kaʼwu rí Jesús nindxu̱u̱ Mesías bi̱ nijuiʼthá ma̱ʼkha̱. Mú, náa Biblia naxtiʼña̱a̱ a̱jma̱ graxe̱ rí gíʼdoo wéñuʼ numuu náa Jesucristo: Náa ni̱ʼkha̱ ga̱jma̱a̱ xú káʼnii xa̱bu̱ ninindxu̱u̱.

10. Ndiéjunʼ eʼsngáa náa Biblia rí xú káʼnii nixtáa Jesús nákha xóó tséʼkha̱ náa tsu̱du̱u̱ Ku̱ba̱ʼ rá.

¹⁰ Náa Biblia naʼsngáa rí Jesús nixtáa mekhuíí nákha xóó  tséʼkha̱ náa tsu̱du̱u̱ Ku̱ba̱ʼ. Mbá xkri̱da, xa̱bu̱ gaʼyee Miqueas niʼtáriyaʼ rí Mesías magumaa náa xuajin Belén ga̱jma̱a̱ niʼthí rí ikhaa ma̱ʼkha̱ asndu “nákha wajyúúʼ” (Miqueas 5:2). Mínaʼ má Jesús niʼthí mbaʼa nutu rí nákha xóó tsígumaa xóo mbáa xa̱biya̱ ikhaa ginii nixtáa mekhuíí (atraxnuu Juan 3:13; 6:38, 62; 17:4, 5). Ikhí ninindxu̱u̱ mbáa ángel bi̱ phú nimbáxu̱u̱ májánʼ wéñuʼ ga̱jma̱a̱ Jeobá.

11. Xú káʼnii esngájma Biblia rí Jesús nindxu̱u̱ a̱ʼdióo Jeobá bi̱ nandoo kaʼyoo wéñuʼ rá.

¹¹ Rígá mbaʼa numuu rí Jesús nindxu̱u̱ a̱ʼdióo Jeobá bi̱ nandoo kaʼyoo wéñuʼ. Náa Biblia naxná mbiʼyuu “su ñajunʼ guini naʼ xoguiʼ ri riga”, numuu rí ikhaa nindxu̱u̱ timbáa bi̱ niʼnii Dios (Colosenses 1:15). * Rígá imbo̱o̱ rí naʼni kiejunʼ ada̱ bugi̱, rí ikhaa nindxu̱u̱ “Ade tsi mbahui” (Juan 3:16). Rígi̱ nandoo gáʼthi rí mbáwíi ikhaa nindxu̱u̱ bi̱ niʼnii Dios. Ma̱ngaa i̱ndó ikhaa niñajunʼ ga̱jma̱a̱ Jeobá índo̱ niʼni xúgíʼ dí rígá (Colosenses 1:16). Ma̱ngaa, nagumbiʼyuu “Ajnga” (Juan 1:14). Título rígi̱ nasngájma rí ikhaa kaʼyoo maʼthí ga̱jma̱a̱ numuu Anu̱u̱. Mbáa ikhaa niʼthún ga̱jma̱a̱ nixná ikha náa eʼwíínʼ e̱ji̱i̱n Dios, xó má ángeles ga̱jma̱a̱ xa̱bu̱ numbaaʼ.

12. Xú káʼnii eʼyáá rí Aʼdá giʼnii na̱nguá nindxu̱u̱ mbríguu xó má Dios rá.

¹² Lá mbríguu nindxu̱u̱ Dios ga̱jma̱a̱ timbáa a̱ʼdióo, xó má e̱ndxa̱ʼwa̱míjna̱ eʼwíínʼ xa̱bu̱ ráʼ. Mú náa Biblia tséʼsngáa rúʼko̱. Xó má ndiʼyáá náa párrafo rí ninújngoo, Ada̱ bugi̱ ni̱jkha̱nú nigumaa. Ikha jngó, xtáa tsáa niʼnii, mú Jeobá nda̱wa̱a̱ tsáa niʼnii (Salmo 90:2). Aʼdá giʼnii asndu na̱nguá nindxa̱ʼwáminaʼ rí mani̱ndxu̱u̱ mbríguu xó má Anu̱u̱. Náa Biblia naʼsngáa kaʼwu rí Anu̱u̱ Jesús nindxu̱u̱ itháan giʼnii ki xóo ikhaa (atraxnuu Juan 14:28; 1 Corintios 11:3). I̱ndó  Jeobá nindxu̱u̱ “Dios bi̱ gíʼdoo Xúgíʼ tsiakii” (Génesis 17:1). Ikha jngó, nda̱wa̱a̱ imba̱a̱ xóo ikhaa. *

13. Ndiéjunʼ eyoo gáʼthi náa Biblia índo̱ naʼthí rí Ada̱ “nigájnuu xó má Dios bi̱ tsikujmaa” rá.

¹³ Jeobá ga̱jma̱a̱ A̱ʼdióo bi̱ giʼnii nimbáxu̱u̱n májánʼ wéñuʼ, mba̱yu̱ʼ tsiguʼ ra̱ʼkhá tháán mba̱yu̱ʼ tsiguʼ, asndu nákha xóó tsígumiin a̱ʼgua̱a̱n ga̱jma̱a̱ nákha xóó tsígumaa Ku̱ba̱ʼ. ¡Ra̱ʼkhá tháán nindúún kuyamijná wéñuʼ! (Juan 3:35; 14:31.) Ada̱ bugi̱ nigájnuu xó má Anu̱u̱ bi̱ nandoo kaʼyoo wéñuʼ. Ikha jngó, náa Biblia naʼthí rí ikhaa “nigájnuu xó má Dios bi̱ tsikujmaa” (Colosenses 1:15). Xó má e̱ji̱n naguánu nakujmiin xó má anu̱ún, A̱ʼdióo Dios bi̱ xtáa mekhuíí nigájnuu xó má Anu̱u̱ ga̱jma̱a̱ rí xú káʼnii xa̱bu̱ nindxu̱u̱.

14. Xú káʼnii ni̱jkha̱nú nigumaa xóo mbáa xa̱biya̱ Aʼdá giʼnii ndrígóo Jeobá rá.

¹⁴ Aʼdá giʼnii ndrígóo Jeobá nindoo niniñuʼ mekhu mu ma̱ʼkha̱ xóo mbáa xa̱biya̱ náa tsu̱du̱u̱ Ku̱ba̱ʼ. Mú mbáa ikháánʼ natraximínáʼ: “Xú káʼnii nindoo niʼni rí mbáa espíritu maxtáa xóo mbáa xa̱biya̱ rá.” Nindoo nirígá rígi̱, numuu rí Jeobá niʼni mbá milagro. Niʼni rí A̱ʼdióo bi̱ giʼnii bi̱ nixtáa mekhuíí magiwa̱nʼ náa awúu̱n ndxáʼgú judía bi̱ nigumbiʼyuu María bi̱ xóó tábóoʼ ga̱jma̱a̱ nimbáa xa̱bu̱. Numuu rí na̱nguá nigiʼdaa nimbáa anu̱u̱ xa̱biya̱, María nigiʼdaa mbáa a̱ʼdióo bi̱ na̱nguá nigiʼdoo aʼkhá, bi̱ nigumbiʼyuu Jesús (Lucas 1:30-35).

15. Xú káʼnii embáyuluʼ Jesucristo mu muniʼniiʼ itháan májánʼ Jeobá rá.

¹⁵ Xúgíʼ rí niʼni Jesús ga̱jma̱a̱ rí niʼthí nákha nixtáa náa tsu̱du̱u̱ Ku̱ba̱ʼ nambáyulúʼ muniʼniiʼ itháan májánʼ. Ga̱jma̱a̱ numuu Jesús ma̱ndoo muniʼniiʼ itháan májánʼ Jeobá. Xú káʼnii gándoo rá. Garmáʼáan a̱jkia̱nʼ rí Ada̱ bugi̱ nigájnuu xó má  Anu̱u̱. Ikha jngó niʼthúu̱n mbáa discípulo ndrígóo: “Tsi ndiʼyeʼ, ndiʼyo Ana manga” (Juan 14:9). Náa a̱jkhu̱ libro ndrígóo Biblia rí najmaʼnuʼ xóo Evangelios —Mateo, Marcos, Lucas ga̱jma̱a̱ Juan—, náa na̱ʼkha̱ raʼthí xú káʼnii nixtáa Jesucristo, rí niʼni ga̱jma̱a̱ rí xú káʼnii xa̱bu̱ ninindxu̱u̱.

16. Ndiéjunʼ rí phú niʼsngáa Jesús, ga̱jma̱a̱ náa ni̱ʼkha̱ rí niʼsngáa xá.

¹⁶ Jesús nigumbiʼyuu “Maestro” (Juan 1:38; 13:13). Ndiéjunʼ niʼsngáa xá. Rí phú niʼni, niʼthí ga̱jma̱a̱ numuu “ajnga ri majan nuxiʼ xo jaʼni iʼtañajunʼ Dios”, xóo muʼthá, ajngáa rí májánʼ ga̱jma̱a̱ numuu Reino ndrígóo Dios. Xa̱bu̱ Ñajunʼ bugi̱ maʼtáñajunʼ náa mekhu asndu náa xúgíʼ tsu̱du̱u̱ Ku̱ba̱ʼ ga̱jma̱a̱ ma̱ʼkha̱ kayóo rí májánʼ wéñuʼ náa xa̱bu̱ numbaaʼ bi̱ gakuwa jmbu náa Dios (Mateo 4:23). Náa ni̱ʼkha̱ ajngáa rígi̱ rá. Mínaʼ má Jesús niʼthí: “Ri nasjngaloʼ guejio, raʼka guisjngoʼ Ikun ñajun, ri guisjngo tsi nijungun ñajun”, ikhaa ñajunʼ Jeobá (Juan 7:16). Jesús ndiʼyoo rí Anu̱u̱ nindoo rí xa̱bu̱ mudxawíín ajngáa rí májánʼ ndrígóo Reino. Náa capítulo 8 gúʼyáá itháan ga̱jma̱a̱ numuu xa̱bu̱ ñajunʼ bugi̱ ga̱jma̱a̱ rí gáʼni nda̱wa̱á.

17. Náa niʼsngáa Jesús, ga̱jma̱a̱ náa numuu rí niríyaʼ wéñuʼ tsiakii mu maʼsngáa xá.

¹⁷ Náa niʼsngáa Jesús rá. Asndu náa má kuwa xa̱bu̱: Náa nuñajunʼ xanáá, náa xuajin mba̱ʼu̱, náa xuajin ma̱jkha̱ʼ, náa xuáá ga̱jma̱a̱ náa mámbá guʼwá. Jesús na̱nguá nigi̱ʼthu̱u̱n rí xa̱bu̱ maguwáʼ náa ikhaa, rí niʼni ikhaa, ni̱jkha̱ gáñíinʼ (Marcos 6:56; Lucas 19:5, 6). Náa numuu rí niríyaʼ mbiʼi ga̱jma̱a̱ tsiakii ndrígóo Jesús mu maʼtáraʼa ga̱jma̱a̱ maʼsngáa rá. Numuu rí ikhaa rúʼko̱ rí nindoo Anu̱u̱, ga̱jma̱a̱ Jesús niʼnimbánuu má xúʼko̱ (Juan 8:28, 29). Mú nirígá imbo̱o̱ numuu rí ikhaa niʼtáráʼa, ikhaa nigáwiinʼ a̱jkiu̱u̱n kaʼñúún xa̱bu̱ bi̱ niguwáʼ gúyáá (atraxnuu Mateo 9:35, 36). Xa̱bu̱ ede̱ ndiyóoʼ musngáa rí gajkhun ga̱jma̱a̱ numuu Dios ga̱jma̱a̱ rí wíji̱ maʼni, mú ikhiin na̱nguá nisngúún. Mú Jesús ndiʼyoo dí ra̱ʼkhá tháán eyóoʼ mudxawíín xa̱bu̱ ga̱jma̱a̱ numuu Reino.

18. Ndiéjunʼ enigua̱ʼ itháan rí xú káʼnii xa̱bu̱ nindxu̱u̱ Jesús rá.

 ¹⁸ Jesús ninindxu̱u̱ mbáa xa̱bu̱ bi̱ ra̱ʼkhá tháán májánʼ a̱jkiu̱u̱n. Ikhaa ningajo̱o̱ kaʼñúún xa̱bu̱ ga̱jma̱a̱ ndiʼyamajkhún, asndu e̱ji̱n nikuwa gagi náa níjniúu ikhaa (Marcos 10:13-16). Na̱nguá niraʼwíin xa̱bu̱ bi̱ maʼthúún. Nikiʼnáa kaʼyoo mbanda̱ʼkho dí ra̱májánʼ (Mateo 21:12, 13). Nákha nixtáa ikhaa na̱nguá eyamajkhún gu̱ʼu̱ ga̱jma̱a̱ na̱nguá eñún gúñún, mu ikhaa ndiʼyamajkhún (Juan 4:9, 27). Jesús ninindxu̱u̱ mbáa xa̱bu̱ wabaʼ. Mbóo mbiʼi niʼjñáa rajkúún apóstoles, mbá ñajunʼ rí nuni xa̱bu̱ bi̱ na̱nguá guáʼdáá wéñuʼ numún.

19. Ndiéjunʼ xkri̱da esngájma rí Jesús nigáwiinʼ a̱jkiu̱u̱n kaʼñúún xa̱bu̱ bi̱ kuwa rumíniʼ rá.

¹⁹ Jesús nigáwiinʼ a̱jkiu̱u̱n kaʼñúún xa̱bu̱ bi̱ kuwa rumíniʼ, xó má nisngájma nákha niʼni thanún xa̱bu̱ ga̱jma̱a̱ xi̱ʼ ndrígóo Dios (Mateo 14:14). Mbá xkri̱da, mbáa xa̱bu̱ bi̱ gíʼdoo lepra ni̱jkha̱ gáyáaʼ Jesús ga̱jma̱a̱ niʼthúu̱n: “Xi nandaʼ, mago matsikaʼun”. Jesús niʼni rí asndu xóo ikhaa xtáa ragíʼnuu gaʼkhu rúʼko̱. Nigáwiinʼ a̱jkiu̱u̱n, ikha jngó nikruiyaʼ ñawúunʼ  mu maxkajmaa ga̱jma̱a̱ niʼthúu̱n: “Nandoʼ, gaʼnekaʼhuin”. ¡Xa̱bu̱ bi̱ naʼniu nandii niʼni̱i̱la! (Marcos 1:40-42.) Lá natatsaʼwáminaʼ xú káʼnii nixtáa xa̱bu̱ buʼko̱ ráʼ.

20, 21. Náa numuu nuʼthá rí Jesús nigíiʼ mbá xkri̱da májánʼ rí xú káʼnii niʼnimbo̱o̱ ga̱jma̱a̱ xú káʼnii nixtáa jmbu náa Dios rá.

²⁰ Jesús nigíiʼ mbá xkri̱da májánʼ rí xú káʼnii niʼnimbo̱o̱ ga̱jma̱a̱ xú káʼnii nixtáa jmbu náa Dios. Xúgíʼ rí niʼni nisngájma rí nixtáa jmbu náa Anu̱u̱ bi̱ xtáa mekhuíí, maski ajndu ikhaa niraʼnuu mbaʼa xkujndu ga̱jma̱a̱ tsingíná. Táʼndoo gagruigú nditháan rí Gixa̱a̱ nisngájmuu (Mateo 4:1-11). Tikhun a̱ngui̱i̱n na̱nguá ninimbu̱ún kuyáá. Asndu niguánu nithi: “Najagunʼ” (Marcos 3:21). Mú Jesús na̱nguá niʼni guabaminaʼ ga̱jma̱a̱ niʼni má xúʼko̱ ñajunʼ ndrígóo Dios. Índo̱ xa̱bu̱ bi̱ sia̱nʼ nitháán rí xkawiiʼ ga̱jma̱a̱ nixnáá, ikhaa niʼngo̱o̱ niʼni mba̱a̱ a̱jkiu̱u̱n ga̱jma̱a̱ ikhaa na̱nguá nigíiʼ maʼniún dí raʼkhí (1 Pedro 2:21-23).

 ²¹ Jesús nixtáa jmbu asndu índo̱ nikháñu, xa̱bu̱ bi̱ sia̱nʼ ninigawíínʼ ga̱jma̱a̱ nini gínáa wéñuʼ índo̱ nixiyáa (atraxnuu Filipenses 2:8). Atatsaʼwáminaʼ xúgíʼ rí niʼngo̱o̱ niraʼnuu nákha inuu makhañúu Jesús. Xa̱bu̱ Ñajunʼ nixuda̱ʼ náa guʼwá e̱jua̱nʼ, tikhun xa̱bu̱ nithi rí nduwaʼ ga̱jma̱a̱ numuu, jueces bi̱ ra̱míjínʼ nithi rí makhañúu, xa̱bu̱ ninduʼwajmaa ga̱jma̱a̱ soldados nini gínáa wéñuʼ. Índo̱ Jesús nidujmaa náa ixi̱, ikhaa niʼthí imbóó ajngáa: “¡Nimbanu-ma-ra!” (Juan 19:30). Ajtsú mbiʼi nda̱wa̱á, Anu̱u̱ bi̱ xtáa mekhuíí niʼnigabi̱i̱ xóo mbáa ángel (1 Pedro 3:18). Nguátha xmáná nda̱wa̱á ni̱jkha̱a̱la mekhuíí, “neguiʼjile naʼ nijñu mejunʼ su Dios” náa nigi̱ʼthu̱u̱n mu makhánáá rí maʼtáñajunʼ (Hebreos 10:12, 13).

22. Ndiéjunʼ niʼngo̱o̱ niʼni Jesús índo̱ ikhaa nixtáa jmbu asndu índo̱ nikháñu xá.

²² Ndiéjunʼ niʼngo̱o̱ niʼni Jesús índo̱ ikhaa nixtáa jmbu asndu índo̱ nikháñu rá. Rí nikháñu nindoo niʼni rí makuwáanʼ kámuu mbiʼi náa tsu̱du̱u̱ ku̱ba̱ʼ mitsaan, xó má nindoo Jeobá asndu nákha ginii. Náa imbo̱o̱ capítulo gúʼyáá xú káʼnii gambánuu rígi̱ numuu rí nikháñu Jesús.