NÁA Biblia na̱ʼkha̱ tikhuu texto náa naʼthí ga̱jma̱a̱ numuu mbá ángel bi̱ nagumbiʼyuu Miguel. Mú náa xúgíʼ texto rúʼko̱ na̱ʼkha̱ raʼthí rí ikhaa xtáa rañajunʼ má xúʼko̱. Náa libro ndrígóo Daniel na̱ʼkha̱ raʼthí rí ikhaa xtáa raxmínaʼ gajmíi̱n ángeles bi̱ ra̱míjínʼ; náa i̱yi̱i̱ʼ ndrígóo Judas naʼthí rí xtáa ragi̱ʼdu̱u̱ ga̱jma̱a̱ Gixa̱a̱, ma̱ngaa náa libro ndrígóo Revelación (o Apocalipsis), naʼthí rí xtáa raʼni guerra náa Satanás gajmíi̱n xa̱bu̱ wéñiʼ ndrígóo. Ikhaa nañawu̱u̱n má xúʼko̱ rí naʼtáñajunʼ Jeobá ga̱jma̱a̱ nagi̱ʼdu̱u̱ gajmíi̱n bi̱ guáʼdáá sia̱nʼ náa Dios. Rígi̱ nasngájma rí naʼni xó má eyoo gáʼthi mbiʼyuu: “Tsáa nindxu̱u̱ xóo Dios rá.” Mú, tsáa nindxu̱u̱ Miguel rá.

Nguáná, tikhun xa̱bu̱ guáʼdáá itháan rí mbóo mbiʼñún. Mbá xkri̱da, Jacob nindxu̱u̱ bi̱ ndiyá edxu̱u̱ náa mbá guʼwíin, ma̱ngaa nijmaʼniiʼ xóo Israel, ga̱jma̱a̱ apóstol Pedro nijmaʼniiʼ xóo Simón (Génesis 49:1, 2; Mateo 10:2). Xúʼko̱ má ma̱ngaa, náa Biblia nasngájma rí Miguel nindxu̱u̱ imbo̱o̱ mbiʼyuu Jesucristo asndu nákha xóó tséʼkha̱ náa tsu̱du̱u̱ Ku̱ba̱ʼ ga̱jma̱a̱ nda̱wa̱á rí ni̱jkha̱a̱ mekhuíí. Guʼyáá ndiéjunʼ eʼthí náa Escrituras mu ma̱ndoo makru̱ʼu̱lú rígi̱.

Arcángel. Náa Ajngá rawunʼ Dios naʼthí rí Miguel nindxu̱u̱ ‹arcángel› (Judas 9). Ajngáa rígi̱ nandoo gáʼthúu̱n “ángel bi̱ phú kayá  edxu̱u̱”. Ndiʼyáá rí Miguel nagumbiʼyuu arcángel, rígi̱ nasngájma rí xtáa mbáwíi ángel xóo bugi̱. Náa Biblia tséjmuu ajngáa ‹arcángel› mu maʼthí ga̱jma̱a̱ numún mbaʼin, i̱ndó najmuu mu maʼthí ga̱jma̱a̱ numuu mbáwíi. Ma̱ngaa, Jesús naʼni ñajunʼ xóo mbáa arcángel. Xúʼko̱ eʼyáá rí eʼthí náa 1 Tesalonicenses 4:16, náa nasngájma rí gaʼne Jesucristo bi̱ nituxi̱i̱: “Señor magajtaa asndu mekhuíí ga̱jma̱a̱ mbá aʼwá gakhi̱i̱ maʼthúún rí muni, aʼwá ndrígóo arcángel”. Náa texto rígi̱ naʼthí rí Jesús maʼthí xóo aʼwá ndrígóo arcángel. Ikha jngó, naʼni makru̱ʼu̱lú rí mínaʼ Jesús nindxu̱u̱ arcángel Miguel.

Comandante. Náa Biblia naʼthí rí “Miguel gajmíi̱n ángeles ndrígóo nixmijná gajmiún dragón [...] gajmíi̱n ángeles ndrígóo” (Revelación 12:7). Xúʼko̱, Miguel nindxu̱u̱ Comandante náa mbaʼin ángeles bi̱ kuwa jmbu. Náa libro ndrígóo Revelación nasngájma rí Jesús nindxu̱u̱ xóo Comandante náa mbaʼin ángeles bi̱ kuwa jmbu (Revelación 19:14-16). Ga̱jma̱a̱ apóstol Pablo niʼthí kaʼwu ajngáa rígi̱ ‹Señor Jesús› gajmíi̱n ‹ángeles ndrígóo bi̱ guáʼdáá tsiakii› (2 Tesalonicenses 1:7). Ikha jngó, náa Biblia naʼthí ga̱jma̱a̱ numuu Miguel gajmíi̱n “ángeles ndrígóo” xó má Jesús gajmíi̱n “ángeles ndrígóo” (Mateo 13:41; 16:27; 24:31; 1 Pedro 3:22). Náa Biblia na̱nguá e̱ʼkha̱ raʼthí nimbá texto dí rígá a̱jma̱ grupo ndrígu̱ún ángeles, mbá náa naʼtáñajunʼ Miguel ga̱jma̱a̱ i̱mba̱ náa naʼtáñajunʼ Jesús. Ikha jngó, na̱jkua̱nú nduʼyáá rí Miguel nindxu̱u̱ Jesúcristo bi̱ xtáa raʼni ñajunʼ ndrígóo náa mekhuíí. *