NINÚJNGO má ajtsú sientu tiku tsiguʼ rí nixnúu Ruʼwambiiʼ. Náa xuajin Ur dí nigiʼdo wéñuʼ, dí xúgi̱ mbiʼyuu Irak, náa nixtáa Abrahán. Ikhaa ni̱ndxu̱u̱ mbáa xa̱bu̱ bi̱ nigiʼdo fe, mú fe ndrígóo má gasngájma á mu naku̱mu̱u̱ kaʼyoo káxi Diúu̱. Guʼyaa xú káʼnii nirígá.

Jeobá nindo̱ʼo̱o̱ rí maniñuʼ ku̱ba̱ʼ náa nixtáa mú ma̱ʼga i̱mbo̱o̱ xuajin rí mbiʼyuu: Canaán. Tandxaʼwáminaʼ a̱jma̱ aʼphu, Abrahán niʼnimbo̱o̱. Nigíʼdu̱u̱ nijkha̱ mitsinguanʼ ga̱jma̱a̱ a̱ʼgiu̱u̱, Sara, ndrixio̱o̱ Lot ga̱jma̱a̱ xúgínʼ bi̱ kúwi̱i̱n náa guʼwóo. Índo̱ xtáa má náa Canaán, taxtáa mbó ikhí, nijkha̱ rajnguʼúun, niʼni guʼwá xtíin náa maxtáa. Jeobá nimbanu ga̱jma̱a̱ Abrahán: Rí xúgínʼ e̱ji̱i̱n bi̱ gakúwa nda̱wa̱á maguma tsajkuraminʼ ga̱jma̱a̱ numuu ikhaa, ma̱ngoo rí e̱ji̱i̱n maguanu mani̱ndxu̱ún mbá xuajin mba̱a̱ ga̱jma̱a̱ ku̱ba̱ʼ náa Canaán maʼni ndrígu̱ún.

Abrahán ga̱jma̱a̱ Lot niguanu niguaʼdiin mbiʼin mugu̱ mangiin xedi̱. Abrahán nini̱ndxu̱u̱ májánʼ a̱jkiu̱u̱n ma̱ngoo niniñuʼ rí ndrixio̱o̱ maraʼwíí náa ku̱ba̱ʼ gániguʼ mu muphiʼtsu xujkhiúu. Lot niraʼwíí ku̱ba̱ʼ náa mañu Jordán, numuu rí gíʼdo itháan yuskoo ku̱ba̱ʼ, nixtáa mijngii Sodoma. Mú xa̱bu̱ bi̱ kúwi̱i̱n náa xuajin rúʼko̱ nini aʼkhá rí mixkawiʼ wéñuʼ náa inuu Jeobá.

Nda̱wa̱á rí Abrahán niniñuʼ Lot, Jeobá niʼthúu̱n dí magiʼdiin mbaʼin e̱ji̱i̱n xó má mbaʼin aʼgua̱a̱n bi̱ kuwa mekuíí. Abrahán nigiʼdo fe náa Jeobá, mu Sara, a̱ʼgiu̱u̱ nanguá egiʼdiin e̱ji̱n. Índo̱ ikhaa nigiʼdo 99 tsiguʼ Sara gíʼdo 90, Diúu̱ niʼthúu̱n rí maguaʼda mbáa ada̱. Xúʼko̱ má nirígá: Ikhaa nigiʼdaa mbáa ada̱ bi̱ nixna mbiʼyuu Isaac. Maski ajndu Abrahán nigiʼdiin eʼwíínʼ e̱ji̱i̱n, bi̱ Ma̱ʼnikáwáánʼ ma̱ʼkha̱ náa tsígaʼ ndrígóo Isaac bi̱ nijuiʼtá numuu nákha náa Edén.

Índo̱ Lot xtáa xóó gajmíi̱n bi̱ kuwa náa guʼwóo náa Sodoma. Ikhaa taʼyaridoo dí mixkawiʼ dí eni xa̱bu̱, numuu dí nini̱ndxu̱u̱ mbáa xa̱bu̱ májánʼ. Ikha jngó, índo̱ rí Jeobá niʼthí maʼnigámbáa Sodoma, ginii nikunguinʼ ángeles mu muthán Lot. Ikhíínʼ nithán rí magajnúu nacha̱ gajmíi̱n bi̱ kuwa náa guʼwóo ma̱ngoo nimbáa xaguta̱nga̱a̱ mayexi tsudí. Ikhú, Diúu̱ niʼni rí mekhuíí majngutígú aguʼ ga̱jma̱a̱ azufre, mu maʼnigámbiin xúgínʼ xa̱bu̱ xó má bi̱ ra̱míjínʼ bi̱ kuwa náa Sodoma ga̱jma̱a̱ bi̱ kúwi̱i̱n mijngii náa xuajin Gomorra. Lot gajmíi̱n nájmi̱i̱n e̱ji̱i̱n wa̱ʼxa̱ʼ nikáwíin dí makhañún. Mú a̱ʼgiu̱u̱ niguta̱nga̱a̱ niyexi tsudí, mbáa mú gíwanʼ a̱jkiu̱u̱n rí niniñuʼ. Rí táʼnimbo̱o̱ nijkha̱kayáa rí makhañúu.

(Na̱ʼkha̱ náa Génesis 11:10–19:38.)