NÁKHA mbiʼi rí nikúwi̱i̱n reyes ndrígóo Israel ga̱jma̱a̱ Judá, ikhú nitu̱xu̱u̱n mbá chimbaʼin xa̱bu̱: Gaʼyee. Xúgínʼ dí ikhíínʼ ndiñúnʼ sie̱khi̱i̱ ga̱jma̱a̱ fe gujkhuʼ mu muthi ajngáa ndrígóo Diúu̱. Mbaʼa edxu̱u̱ dí nithi na̱ʼkha̱ agoo gi̱i̱:

1. Índo̱ niguambáa Jerusalén. Xa̱bu̱ gaʼyee ndrígio̱o̱ Diúu̱ —Isaías ga̱jma̱a̱ Jeremías— nithi mba̱yu̱u̱ʼ tsiguʼ ginii rí Jerusalén mambáa ma̱ngoo nímba̱a̱ na xaxtáa. Ma̱ngaa nisngajma kaʼwu xú káʼnii dí xuajin nini rí Diúu̱ makiʼnáa. Maski ajndu ikhíínʼ nithi rí nunixtiʼkuriyaa Jeobá, mu dí nisngajma dí nini dí raʼkhí náa religión ndrígu̱ún, Xa̱bu̱ Ñajunʼ bi̱ nangua etañajunʼ jmbu ma̱ngaa dí nanigunʼ muxmi̱jna̱ wéñuʼ, xúʼko̱ nisngajma rí minduwaʼ rí nithi (2 Reyes 21:10-15; Isaías 3:1-8, 16-26; Jeremías 2:1–3:13).

2. Nagi̱ʼdu̱u̱ mbu̱júu̱ nduyamajkhuíí Jeobá. Ajtsú skiñúʼ gu̱wa̱ʼ tsiguʼ rí ndijñúunʼ nikúwi̱i̱n náa Babilonia, xuajin ndrígóo Diúu̱ matangi̱i̱n náa ku̱bu̱únʼ, muni̱i̱ la mbu̱júu̱ guʼwóo Jeobá náa Jerusalén ma̱ngaa magi̱ʼdu̱u̱ mbuyamajkuíí (Jeremías 46:27; Amós 9: 13-15). A̱jma̱ cientu tsiguʼ nákha xóó tserígá rígi̱, Isaías niʼthí rí mbáa xa̱bu̱ bi̱ mbiʼyuu Ciro mato̱ʼo̱o̱ maxkawíín náa Babilonia ma̱ngoo maʼni káwiin xa̱bi̱i̱. Ma̱ngoo nisngájma rí xú káʼnii maxmínaʼ gajmíi̱n xa̱bu̱ (Isaías 44:24–45:3).

3. Índo̱ ni̱ʼkha̱nú Mesías ga̱jma̱a̱ rí káʼnii nigíʼnuu. Mesías magumaa náa xuajin rí mbiʼyuu Belén (Miqueas 5:2). Ikhaa mani̱ndxu̱u̱ mbáa xa̱bu̱ guaba̱ʼ, índo̱ mato̱ʼo̱o̱ náa Jerusalén káanʼ ma mbáa xtángidii gagriguii (Zacarías 9:9). Maski ajndu ma̱ndoo kaʼñún xa̱bu̱ dí masngájma ngajua gajmíi̱n, mu mbiʼin xaʼndun kuyaa (Isaías 42:1-3; 53:1, 3). Ma̱ngoo mamínuʼ xkawii wéñuʼ índo̱ makhañúu. Nandoo gáʼthí rúʼko̱ rí aʼkhíí gatumuu mbiʼyuu Mesías ráʼ. Nanguá, ikhaa maga̱bi̱i̱ mu maxnáxi mbiʼyuu, xúʼko̱ maʼni rí Diúu̱ maʼnimba̱a̱ a̱jkiu̱u̱n kaʼñún xa̱bu̱ numbaaʼ ga̱jma̱a̱ numuu aʼkhá (Isaías 53:4, 5, 9-12).

4. Xa̱bu̱ Ñajunʼ ndrígóo Mesías. Xa̱bu̱ aʼkhá bi̱ kúwi̱i̱n náa numbaaʼ xajmañún ikhíínʼ mutañajunʼ, mú Rey ndrígóo Mesías ikhaa dí majmañu. Ga̱jma̱a̱, ikhaa mambiʼyuu Xa̱bu̱ Ñajunʼ náa rígá rí tsímáá (Isaías 9:6, 7; Jeremías 10:23). Índo̱ gaʼtañajunʼ náa Ku̱ba̱ʼ, ma̱ri̱gá rí tsímáá náa numbaaʼ, xóo má xa̱bu̱ gajmíi̱n xujkhúʼ makuwíín mbó (Isaías 11:3-7). Mandáti̱ga̱a̱ xúgíʼ nandii (Isaías 33:24). Asndu rí nakháñun xa̱bu̱ maʼni rí ninújngoo (Isaías 25:8). Mbiʼin wéñuʼ xa̱bu̱ asndu maguanu matangiín makuwíínʼla mbu̱júu̱ (Daniel 12:13).

(Na̱ʼkha̱ náa i̱yi̱i̱ʼ ndrígóo Isaías, Jeremías, Daniel, Amós, Miqueas, ga̱jma̱a̱ Zacarías.)