AJTSÚ tsiguʼ tikhu má eʼtaraʼa Jesús ma̱ngoo ndiʼyoo rí na̱ʼkha̱nú mijngii má rí makhañúu. Xa̱bu̱ ede̱ bi̱ kúwi̱i̱n náa guʼwá dxajkun judíos niriyaʼ awan rí muxiyáa, mú nimiñun dí makiʼníin xa̱bu̱ xuajin numuu dí ikhaa guaʼda xóo gaʼyee. Ikhú, Satanás nito̱ʼo̱o̱ náa a̱jkiu̱u̱n ndrígóo Judas —ikhaa bi̱ ninindxu̱u̱ apóstol— mu magujua̱a̱ bi̱ naʼsngún. Bi̱ kuya edxu̱u̱ náa guʼwá dxajkun nininumáá mbá skiñúʼ gu̱wa̱ʼ mbújkha̱a̱ plata.

Mbruʼun Pascua, Jesús gajmíi̱n apóstoles nigimbúmijna mu muni ndxa̱a̱ rígi̱. Nda̱wa̱á rí nindo̱ʼo̱o̱ Cristo magajnáa Judas, nigíiʼ i̱mbo̱o̱ nuxi̱ʼ ndxa̱a̱: Ganitsu wañuu Señor. Ndiyá mbaxiʼtá pan, niʼtajkháan ma̱ngoo niʼni manújngoo náa gu̱wa̱ʼ i̱mbi̱i̱n apóstoles. Nda̱wa̱á niʼthí: «Rigue ñajunʼ xuyuʼ rí mixnaxi gajma numaʼla. Xaʼni gunila ri marmaʼan akianʼla-juyoʼ». Nda̱wa̱á niʼni manújngoo mbá copa vino ma̱ngoo niʼthí: «Copa rigueʼ ñajunʼ ri nuxiʼ niʼku [o rí nimbánuu] gajma iʼdiu ri nagadiramu gajma numaʼla» (Lucas 22:19, 20, AMM).

Iwáá má mbruʼun rúʼko̱, mbaʼa dí niʼsngúún Jesús apóstoles ndrígio̱o̱. Ma̱ngoo nixnun mbóo nuxi̱ʼ xtángoo: Rí maʼndun kuyamijná ga̱jma̱a̱ xúgíʼ a̱jkiu̱ún. Ma̱ngaa niʼthí: «Mba xuguin xabo muninuhuanʼla ri tsi nasjngun ñajuanʼla, [...] xi naʼne akianʼla juyamijna» (Juan 13:34, 35, AMM). Nindu̱ʼu̱u̱n rí xaxná gajmun gáʼni rí e̱ʼkha̱ magiʼnu ikhaa, nda̱wa̱á niʼtajkháan ga̱jma̱a̱ numún. Nda̱wa̱á kayuʼ ni̱ni̱ jmúú náa inu Diúu̱ ga̱jma̱a̱ nigún náa ixi̱ ri̱ʼi̱ Getsemaní.

Ikhí Jesús nismbáti̱go̱o̱ ma̱ngaa nimbaʼto a̱jkiu̱u̱n náa Jeobá. Mú nda̱a̱ tsu̱ma̱ niguaʼnu mbá chimbaʼin soldados, kuda ajua̱nʼ niguaʼnu mangiin dxajkhun nindun rí murugua̱a̱. Mu makujmaa tsáa ñajunʼ Jesús, Judas nijmuu tsinaʼ dí niʼthí: Mikhu̱ chituuʼ. Ikhú soldados nirajtuwin Cristo, nda̱wa̱á nigañun apóstoles.

Jesús niʼthí náa inún Xa̱bu̱ Ñajunʼ mba̱ʼu̱u̱n bi̱ judíos dí ikhaa ñajunʼ Aʼdióo Diúu̱. Jueces niguanu nithi dí minduwaʼ ni̱ndxu̱u̱ dí niʼthí, aʼkhúun rúʼko̱ ma̱ʼgaka̱yáa̱ makhañúu. Ikhú nigun ku̱ya̱a̱ náa inuu Poncio Pilato, Xa̱bu̱ Ñajunʼ ndrígóo roma. Ikhaa ndiʼyoo rí Jesús ni̱ndxu̱u̱ mbáa xa̱bu̱ bi̱ ragíʼdo aʼkhúun, mú xúʼko̱ má niʼni xóo má eñun xa̱bu̱ bi̱ nindxaʼwa dí makhañúu Jesús.

Cristo nijkha̱ kiʼyáa náa nagumbiʼyuu Gólgota, ikhí soldados romanos nidujmaa náa ixi̱. Núkhu má niʼni krína. Wakhíʼ má rúʼko̱, índo̱ Jesús nikháñu nigi̱ʼdu̱u̱ niʼxma gakhi̱i̱ wéñuʼ. Ikhaa nijuiʼdi̱i̱ náa tsíñu, i̱mba̱ néjtsuu, dxajkhun nigun gurigu̱u̱ sello náa riejun iñáaʼ ma̱ngoo nixna awan dí muyejngoo. Aʼkhí má niguambáa Jesús ráʼ. Nanguá, numuu rí najkha̱ ma̱ʼganú mbiʼi rí ma̱ri̱gá mbóo milagro rí mba̱a̱ wéñuʼ.

(Na̱ʼkha̱ náa tsinaʼ 26 ga̱jma̱a̱ 27 ndrígóo Mateo, tsinaʼ mba̱ʼu̱ 14 ga̱jma̱a̱ 15 ndrígóo Marcos, tsinaʼ mba̱ʼu̱ 22 ga̱jma̱a̱ 23 ndrígóo Lucas ga̱jma̱a̱ tsinaʼ mba̱ʼu̱ 12 asndu 19 ndrígóo Juan.)