LÁ MA̱NDOO muguajún jmbu xa̱bi̱i̱ Diúu̱ índo̱ gáʼkha̱nú xkujndu ga̱khi̱i̱ wéñuʼ náa inuun, maski ajndu nakujmaa rí xóo nda̱a̱ rí gambáñun ráʼ. Mbáa xa̱bu̱ bi̱ nigumbiʼyuu Job niraʼnu xkujndu rígi̱. Guʼyaa ndiéjunʼ nirígá nda̱wa̱á.

Job ñajunʼ mbáa xa̱bu̱ bi̱ kaʼyoo Abrahán, ikhaa nixtáa náa xuajin dí xúgi̱ mbiʼyuu Arabia índo̱ tsú israelitas nikúwi̱i̱n náa Egipto. Mbó mbiʼi Jeobá nindxaʼwúnʼ ángeles mekuíí ikhí niʼni dí makujmaa májánʼ Job. Ikhí nixtáa ma̱ngaa Satanás. Náa inún xúgínʼ, Jeobá niʼthí rí nda̱wa̱a̱ i̱mba̱a̱ xa̱bu̱ bi̱ káxi̱ kayuʼ a̱jkiu̱u̱n xóo Job, xúʼko̱ nisngájma ikhaa rí naku̱mu̱u̱ kaʼyoo. Mú Satanás niʼni tsu̱du̱u̱ Job rí ikhaa naʼni ñajunʼ Diúu̱ mu dí rígá mbaʼa rí nakána, ma̱ngoo nañewu̱u̱n. Niʼthí rí á mu mandáti̱go̱o̱ xúgíʼ maniñuʼ Jeobá.

Diúu̱ niniñuʼ dí Gixa̱a̱ magruigú kaʼyuʼ xúgí dí gíʼdo Job, ma̱ngaa e̱ji̱i̱n nda̱wa̱á ikhaa ndiyóo nandii. Mu Job táku̱mu̱u̱ dí Satanás nigruiga xúgíʼ gamiéjunʼ, nangua eyoo gáʼnimbo̱o̱ náa numuu dí Diúu̱ naniñuʼ ma̱ri̱gá xúgíʼ gaʼkhu̱. Maski ajndu nigiʼnu xúgíʼ rúʼko̱ thaniñuʼ Jeobá.

Ikhú niguwaʼ guyaa Job ajtsíin xa̱bo̱ bi̱ xóo nambáxu̱u̱ wéñuʼ gajmíi̱n kaʼnii, ikhú nigi̱ʼdi̱i̱ nitháán. Xúgíʼ rí nitháán kama náa i̱yi̱i̱ʼ ndrígóo Job, nini dí maku̱mu̱u̱ rí Diúu̱ nakuʼma gaʼkhu̱ rígi̱ ga̱jma̱a̱ numuu aʼkhá dí naruguamu̱ʼu̱n. ¡Mu ragajkhun kayuu dí nithi! Asndu niguanu nithi rí Diúu̱ tsexmiéjunʼ kaʼñún xa̱bi̱i̱ ma̱ngaa rí tseʼnimbo̱o̱ kaʼñún rí nuthi ikhíínʼ. Mu Job tágidaʼ edxu̱u̱ índo̱ nithan dí raʼkhí, ikhaa má niʼthúúnʼ dí ikhaa ma̱ʼni káxi̱ a̱jkiu̱u̱n náa Diúu̱ asndu ma gákhañu.

Rí nikieʼkhúun Job, rí nixmiéjunʼ wéñuʼ dí xú káʼnii gambáyuminaʼ. Elihú, mbáa dxámá bi̱ niʼdxawun xúgíʼ, nixprígu̱u̱, mu tandxaʼwáminaʼ dí Jeobá kaʼyoo maʼtáñajunʼ, dí raʼkháa mbáa xa̱bu̱ kaʼyoo. Ma̱ngaa, niríñun wéñuʼ xa̱bu̱ bi̱ niguwáʼ guyaa Job bi̱ nambáxu̱u̱ wéñuʼ gajmíi̱n kaʼnii.

Nda̱wa̱á, mínaaʼ má Jeobá nixprígu̱u̱ Job. Nijmuu xúgíʼ dí niʼni, niʼsngóo dí xa̱bu̱ ragíʼdo numuu índo̱ nambrigui ga̱jma̱a̱ xú káʼnii ni̱ndxu̱u̱ Diúu̱. Job nini̱ndxu̱u̱ xa̱bu̱ guaba̱ʼ ma̱ngaa nigruigú xúgíʼ dí nijuiʼtháán. Ma̱ngaa Jeobá ni̱ndxu̱u̱, «mejanʼ hueñuʼ-u aʼtiun cami naŋahuinʼ aʼtiun», nirigúu la nandii dí nigiʼdo ma̱ngaa niʼni tsajkurámáʼ itháan ki xóo dí nigiʼdo̱ nákha ginii, ma̱ngaa nigiʼdi̱i̱n i̱mbá gu̱wi̱nʼ e̱ji̱i̱n (Santiago 5:11). Dí niʼni káxi̱ a̱jkiu̱u̱n náa Jeobá, Job nisgájmuu Satanás dí xa̱bu̱ aʼkhá ma̱ndoo muguajún jmbu náa inuu Diúu̱ índo̱ gáʼkha̱nú gaʼkhu̱ ga̱khi̱i̱ inún.

(Na̱ʼkha̱ raʼthí náa i̱yi̱i̱ʼ ndrígóo Job.)