MBIʼI nda̱wa̱á rí nikháñu Sansón, nixtáa mbáa juez, gaʼyee ma̱ngaa bi̱ nimbiʼyuu Samuel náa xuajin Israel. Xa̱bu̱ israelitas, nithi ma xúʼko̱ rí maʼndun mbáa rey, xóo má iʼwááʼ xuajin. Jeobá nigawunʼ rí nithi, mú niʼthúu̱n Samuel rí magíiʼ Saúl xóo rey. Xa̱bu̱ bugi nini̱ndxu̱u̱ guaba̱ʼ a̱jkiu̱u̱n mú nda̱wa̱á niʼnimbamináʼ, rígi̱ niʼniuu rí ná xáʼnimbo̱o̱ kaʼyoo Diúu̱. Ikha jngó Jeobá nánguá nindoo kaʼyoo rí mani̱ndxu̱u̱ xóo rey, ma̱ngoo niʼthúu̱n Samuel rí magíiʼ i̱mba̱a̱. Mbáa dxámá bi̱ mbiʼyuu David. Mú manújngoo mba̱yu̱u̱ʼ tsiguʼ nda̱wa̱á índo̱ maʼtáñajunʼ.

Mbá mbiʼi, David nijkha̱ gáʼñún angui̱i̱n, náa kajthin gajmiún xa̱bi̱i̱ Saúl náa nuxmijná. Índo̱ nijkha̱nú, nixkamin rí xa̱bi̱i̱ Saúl namiñun wéñuʼ dí muxmi̱jna̱ gajmiún mbáa xa̱bu̱ filisteo, bi̱ mbiʼyuu Goliat. Mbáa xa̱bu̱ mba̱yiiʼ wéñuʼ dí tsejtsi mbiʼi natsijmiin wéñuʼ ikhíínʼ ma̱ngaa ga̱jma̱a̱ Diúu̱. David nikiʼnáa wéñuʼ dí asndu nindoo maxmínaʼ ga̱jma̱a̱ xa̱bu̱ buʼko̱ dí asndu tsáa má gakháñu, mú David kaʼníí dxámaa ni̱ndxu̱u̱. Ikhaa nijkha̱ garaʼnu mbáa xa̱bu̱ bi̱ mba̱yiiʼ wéñuʼ dí asndu itháán ma̱ʼni ajtsú metro rí mba̱yiiʼ, kaya mbá xkarajtsi ga̱jma̱a̱ nguajma̱ itsí. Goliat nitsijmaa David, mú ikhaa niriʼña̱a̱ rí Jeobá má gambáyuu. Ni̱ʼngo̱o̱ má mbó itsí nixíyaa ga̱jma̱a̱. Nda̱wa̱á nirigu kaʼyuu chidiúu ma̱ngoo nirujtu̱rígú edxu̱u̱. Índo̱ xa̱bi̱i̱ Goliat bi̱ filisteos ndiyaa xúʼko̱ kaʼnii, nimiñun wéñuʼ, ikhú nigáñun.

Asndu tsíangua niʼniuu rey Saúl índo̱ rí ndiʼyoo rí David tsémiñu kayuu, ikhú nixnúu mbá ñajunʼ rí gíʼdo numuu ma̱ʼni náa ejército. Índo̱ ni̱ʼngo̱o̱ mbaʼa aʼphu̱ David nixmínaʼ gajmíi̱n xa̱bu̱, Saúl nikiʼnáa kaʼyoo asndu nigíʼ maxíyaa. Mu makríaʼ David, ikhaa ndiyóóʼ dí magayúu. Maski ajndu mba̱yu̱u̱ʼ tsigu nijnguʼúun nirkaʼuminaʼ, mú ikhaa nini̱ndxu̱u̱ jmbii má xúʼko̱ náa inuu Saúl. Náa numuu rá. Numuu rí Jeobá Diúu̱ má nigíiʼ náa xíliu̱u̱. Tsiguʼ nda̱wa̱á, Saúl nikháñu náa nixmijná. Ikhú David ni̱gi̱da̱ʼ mu maʼtáñajunʼ, xóo má niʼthí Jeobá nákha ginii.

David nindoo ma̱ʼni guʼwóo Jeobá. Mú Diúu̱ niʼthúu̱n rí aʼdióo bi̱ ma̱ʼni ñajunʼ rúʼko̱, ráʼkháa ikhaa. Ikhaa bi̱ mbiʼyuu Salomón. Mú, maski ajndu má xúʼko̱ Jeobá niʼnitsajkurámáʼ David, dí nimbánuu ga̱jma̱a̱ dí xúgínʼ bi̱ gaguwáʼ nda̱wa̱á náa ikhaa matri̱ʼi̱i̱n mutañajunʼ, ikhí ma̱ʼkha̱ bi̱ Ma̱ʼnikáwáánʼ dí niʼthí Diúu̱ náa Edén. Xa̱bu̱ buʼko̱ mani̱ndxu̱u̱ Mesías, nandoo gáʼthi rí bi̱ Jeobá nigíiʼ mani̱ndxu̱u̱ Rey náa Reino ndrígóo, mbáa Xa̱bu̱ Ñajunʼ bi̱ maxtáa kámuu mbiʼi.

Mú maxnáa núma̱aʼ David nigímboo mbaʼa wéñuʼ rí majmaa, xúʼko̱ má xóo oro ga̱jma̱a̱ plata mu maguma guʼwóo Jeobá. Ma̱ngoo ikhaa niʼni mbaʼa ajmúú dí Jeobá má nixnúu ikhoo xú ma̱ʼni, mu maʼnimba̱a̱ Jeobá. Índo̱ najngiyuu makhañúu, David nixnúu xúgíʼ gamajkhu Diúu̱ ga̱jma̱a̱ numuu xúgíʼ rí niʼni: «Espíritu ndrígóo Jeobá niʼthí ga̱jma̱á ni̱ndxu̱u̱ʼ, ga̱jma̱a̱ ajngóo nijkhuáa náa rawunʼ ma̱ta̱» (2 Samuel 23:2).

(Na̱ʼkha̱ náa 1 Samuel ga̱jma̱a̱ 2 Samuel, 1 Crónicas, Isaías 9:7, Mateo 21:9, Lucas 1:32 ga̱jma̱a̱ Juan 7:42.)