Mba̱yu̱u̱ʼ tsiguʼ, xa̱bu̱ bi̱ mixtiʼkhu xóo nikúwá niguánu ndiyáá dí Biblia naʼthí rí gajkhun. Ga̱jma̱a̱ rí mbiʼi xúgi̱ mbaʼin wéñuʼ xa̱bu̱ nunimbu̱u̱n rí naʼsngáa. Mú eʼwíínʼ nakumu̱ún rí nindxu̱u̱ mbá libro wayuu ga̱jma̱a̱ rí i̱ndó na̱ʼkha̱ raʼthí cuentu. Ndiéjunʼ ku̱ma̱a̱ʼ ikháán rá. Lá ma̱ndoo muxkamaa rí gajkhun náa Biblia ráʼ.

Xú kaʼnii gándoo matayaa rí Biblia kaʼyoo matanimbaaʼ xtayáá rá. Atatsaʼwáminaʼ rí mbáa bi̱ nambáxa̱ʼ ga̱jma̱a̱ʼ mba̱yu̱u̱ʼ tsiguʼ naʼtháanʼ má xúʼko̱ rí gajkhun, lá maratha rí nindxu̱u̱ mbáa xa̱bu̱ bi̱ natanimbaaʼ xtayáá ráʼ. Ikha jngó, lá Biblia nindxu̱u̱ xóo mbáa bi̱ nambáxa̱ʼ ga̱jma̱a̱ʼ bi̱ natanimbaaʼ xtayáá ráʼ. Lá naʼthí má xúʼko̱ rí gajkhun ráʼ. Guʼyáá tikhuu xkri̱da.

Bi̱ niniraʼmáʼ nithi rí gajkhun

Bi̱ niniraʼmáʼ Biblia nithi rí gajkhun asndu nithi rí nijngawi̱i̱n ga̱jma̱a̱ rí nikiéʼkúun. Mbá xkri̱da, índo̱ gaʼyee Jonás niʼnirámáʼ libro rí na̱ʼkha̱ mbiʼyuu, niʼthí rí táʼnimbo̱o̱ (Jonás 1:1-3). Náa na̱jkha̱ raguámbá niʼnirámáʼ rí Dios nixprígúu, mú na̱nguá niʼthí rí nda̱wa̱á nigruigú rí nixpriguíí (Jonás 4:1, 4, 10, 11). Rí nithi rí gajkhun bi̱ ninirámáʼ Biblia nasngájma rí nixmiéjúúnʼ ga̱jma̱a̱ numuu rí gajkhun.

Xtágabu rí nayambáá

Lá nayambáá má xúʼko̱ xtágabu rí na̱ʼkha̱ náa Biblia ga̱jma̱a̱ numuu rí xóo makuwáanʼ mámbá mbiʼi ráʼ. Xúʼko̱. Mbá xkri̱da, atayáá rí naʼthí náa Biblia ga̱jma̱a̱ numuu rí xóo mambaxáʼ gajmiáanʼ eʼwíínʼ. “Guniu̱u̱n eʼwíinʼ xúgíʼ rí ganigua̱la muniala ikháanʼ” (Mateo 7:12). “Índo̱ naxtiʼña̱a̱ májánʼ naʼni rí xákiʼníin”, (Proverbios 15:1). Lá ragájkhun dí xtágabu rí na̱ʼkha̱ náa Biblia nayambáá rí mbiʼi xúgi̱ asndu xó má nákha nigumarámáʼ rá.

 Gajkhun rí ni̱ʼkha̱ rarígá

Mba̱yu̱u̱ʼ tsiguʼ rí ninújngoo, mbaʼa rí niguánu ndiyáá arqueológo nisngájma kaʼwu xóo nikúwi̱i̱n xa̱bu̱, náá mínaʼ ga̱jma̱a̱ ndiéjunʼ nirígá ga̱jma̱a̱ rí na̱ʼkha̱ raʼthí náa Biblia. Guʼyáá mbá xkri̱da, mbá chíʼgíiʼ rí naʼthí. Náa Biblia naʼthí rí mbiʼi rí nixtáa Nehemías, xa̱bu̱ bi̱ nikúwá náa Tiro, ma̱ngaa nagumbiʼñún fenicio bi̱ nikúwá náa Jerusalén “naguwáʼ kudiin e̱gi̱ʼ ga̱jma̱a̱ xúgíʼ eni rí maguju̱u̱n xa̱bu̱” (Nehemías 13:16).

Lá rígá rí nasngájma rí gajkhun nindxu̱u̱ rígi̱ ráʼ. Xúʼko̱. Arqueólogos nixkama̱a̱ tikhu rí niguáʼdáá bi̱ fenicio náa Israel náa nasngájma rí nákha wajyúúʼ, nugujuamíjna rí guáʼdáá. Raʼkháa i̱ndó rúʼko̱, ma̱ngaa índo̱ nixka̱ma̱a̱ itsu̱ún e̱gi̱ʼ bi̱ kúwá náa mar Mediterráneo bi̱ nakujmaa rí niguwáʼ kudiin náa costa ndrígóo Tiro rí mitsínguánʼ eguanúu. Nda̱wa̱á rí ndiyáá rí nikujma̱a̱, mbáa bi̱ naʼnigajmaa̱ xóo nirígá, ni̱jkha̱nú niʼthí: “Mbáa gajkhun rí naʼthí náa Nehemías 13:16, rí xa̱bu̱ bi̱ naguwáʼ náa Tiro nigujui̱i̱n e̱gi̱ʼ náa Jerusalén”.

Científico niguánu ndiyáá rí gajkhun

Maski má náa Biblia naʼthí ga̱jma̱a̱ numuu Dios ma̱ngaa rí nirígá, naʼthí mbájmbu índo̱ naʼthí ga̱jma̱a̱ numuu ciencia. Guʼyáá mbá xkri̱da.

Naʼni mbá ajtsú míí tikhuu tsiguʼ, náa Biblia naʼthí má rí Ku̱ba̱ʼ “nda̱a̱ rí kayóo” (Job 26:7). Ajngáa rígi̱ tsembánii ga̱jma̱a̱ nduwaʼ náa naʼthí rí Ku̱ba̱ʼ grígu náa inuu iyaʼ o dí grígu náa tsu̱du̱u̱ mbáa guʼtsíʼ mba̱a̱. Naʼni mbá míí i̱mba̱ ciento tsiguʼ nda̱wa̱á rí nigumaraʼmáʼ libro ndrígóo Job, xa̱bu̱ nunimbu̱ún má xúʼko̱ rí Ku̱ba̱ʼ rígá rí kayóo. Ndiyóoʼ muguaʼthi̱i̱n asndu tsiguʼ 1687, nijngoo ajtsú cientu tsiguʼ, índo̱ Isaac Newton niʼnirámáʼ libro rí naʼthí ga̱jma̱a̱ numuu “la fuerza de la gravedad” ikhaa naʼthí dí rígá mbá tsiakii rí tsékujmaa naʼni rí ku̱ba̱ʼ xágajnuu náa kambo̱o̱, ga̱jma̱a̱ xúgíʼ rí niguánu ndiyáá cientificos nasngájma rí naʼthí náa Biblia itháan rí ajtsú míí tsiguʼ nindxu̱u̱ gajkhun.