Mbiʼyuu. Ikhaa má eʼthí: “Ikhúúnʼ ni̱ndxu̱ʼ Jeobá. Xúʼko̱ mbiʼyuʼ” (Isaías 42:8). Náa Biblia na̱ʼkha̱ itháan rí mbá 7,000 nuthu. Mú, náa mbaʼa Biblia rí nijuiʼtájuii niriʼkhuriyaaʼ mbiʼyuu Dios ga̱jma̱a̱ nigiʼma̱a̱ xóo Tátá. Dios nandoo rí mambaxáʼ gajmaaʼ ikha jngó nandoo maratha̱a̱n ga̱jma̱a̱ mbiʼyuu (Salmo 105:1).

Rí nutháán. Náa Biblia, Jeobá ma̱ngaa nutháán Dios, Bi̱ gíʼdoo Xúgíʼ tsiakii, bi̱ Niʼniwíi xúgíʼ, Anu̱ʼ, Tátá ga̱jma̱a̱ bi̱ Naʼtáñajunʼ. Náa Biblia nuxkamaa mbaʼa xóo nitajkháan náa Dios rí nijmún xóo najmaʼniiʼ ga̱jma̱a̱ nijmún mbiʼyuu, Jeobá (Daniel 9:4).

 Xóo nindxu̱u̱. Dios nindxu̱u̱ mbáa espíritu bi̱ tsékujmaa (Juan 4:24). Náa Biblia naʼthí rí “Nimbáa xa̱bu̱ táʼyoo Dios nimbá miʼtsú” (Juan 1:18). Ma̱ngaa náa Biblia naʼthúlúʼ rí ikhaa naku̱mu̱u̱. Rí nu̱ʼni̱ ma̱ndoo maʼni rí maxtáa gagi o majmúu (Salmo 78:40, 41; Proverbios 27:11).

Cualidad ndrígóo nindxu̱u̱ mitsaanʼ wéñuʼ. Dios nandoo kaʼñún xúgíinʼ enii xa̱bu̱ tséʼniuu má asndu náa eguwáʼ ga̱jma̱a̱ xóo nikúwá (Hechos 10:34, 35). Ma̱ngaa naʼni mba̱a̱ a̱jkiu̱u̱n, nagáwiinʼ a̱jkiu̱u̱n, naʼngo̱o̱ a̱jkiu̱u̱n, gíʼdoo ngajua ga̱jma̱a̱ naʼthí rí gajkhun (Éxodo 34:6, 7). Mú gíʼdoo a̱jkhu̱ cualidad rí nagájnuriyoʼ.

Tsiakii. Ikhaa nindxu̱u̱ “Dios bi̱ gíʼdoo Xúgíʼ tsiakii”. Rúʼko̱ eyoo gáʼthi rí ma̱ndoo maʼnimbánuu rí naʼthí (Génesis 17:1).

Ku̱ma̱. Nda̱wa̱a̱ nimbáa bi̱ ndaʼyoo itháan ki xóo Dios. Ikha jngó, náa Biblia naʼthí rí ikhaa nindxu̱u̱ “mbáwíi bi̱ ndaʼyoo” (Romanos 16:27).

Naʼni rí jmbu. Dios naʼni má xúʼko̱ rí jmbu. “Nditháan tsegawa̱a̱n” ga̱jma̱a̱ “nditháan tséʼni dí raʼkhí” (Deuteronomio 32:4).

Ngajua. Náa Biblia naʼthí “numuu rí Dios nandoo kaʼñúún xúgínʼ”. (1 Juan 4:8.) Dios raʼkháa i̱ndó nasngájma cualidad rígi̱, xúʼko̱ nindxu̱u̱ ikhaa. Xúgíʼ rí naʼni, naʼni ga̱jma̱a̱ ngajua ga̱jma̱a̱ rúʼko̱ mbaʼa enii xóo embáyuluʼ.

Xóo nambájxu gajmíi̱n xa̱bu̱ numbaaʼ. Dios nindxu̱u̱ Anu̱lú bi̱ nandoo kaʼyulú (Mateo 6:9). Á mu kuaʼdáá fe náa ikhaa, ma̱ndoo mambáxulu gajmiúlú (Salmo 25:14). Dios nandoo rí ikháanʼ mu̱ʼgua̱ kanuu náa ikhaa ga̱jma̱a̱ rí muʼtákáñii ga̱jma̱a̱ rí muʼthán xúgíʼ xkujndu rí kuaʼdáá numuu rí naxmiéjunʼ kaʼyulú (Santiago 4:8; 1 Pedro 5:7).

Jesús na̱nguá nindxu̱u̱ Dios. Jesús nindxu̱u̱ mbáwíi numuu rí mínaʼ Dios niʼni̱i̱. Ikha jngó náa Biblia naʼthí rí nindxu̱u̱ A̱ʼdióo Dios (Juan 20:31). Jeobá niʼni̱i̱ Jesús, A̱ʼdióo bi̱ giʼnii ga̱jma̱a̱ nda̱wa̱á nixná mbiʼyuu “bi̱ nañajunʼ májánʼ wéñuʼ” mu mekhu ga̱jma̱a̱ xúgíinʼ enii bi̱ nduya (Proverbios 8:30, 31; Colosenses 1:15, 16).

 Jesús na̱nguá niʼthí rí nindxu̱u̱ Dios. Rí phú niʼthí: “Ni̱ndxu̱ʼ bi̱ ni̱ʼkhá ga̱jma̱a̱ numuu ikhaa, [Dios] ga̱jma̱a̱ Ikhaa nikuʼmún” (Juan 7:29). Índo̱ ikhaa xtáa rataminaʼ ga̱jma̱a̱ mbáa discipula ndrígóo Jesús niʼthí “Anu̱ʼ ga̱jma̱a̱ Ana̱ʼla mangáanʼ ga̱jma̱a̱ Dios ndrígóʼ ma̱ngaa Dios ndrígála” (Juan 20:17). Índo̱ nikháñuu, Jeobá niʼni ga̱bi̱i̱ mu maxtáa mekhuíí, ga̱jma̱a̱ nigíiʼ náa ñawun mújúnʼ ma̱ngaa nixnúu mbá ñajunʼ mba̱a̱ (Mateo 28:18; Hechos 2:32, 33).

Jesucristo ma̱ndoo mambáyaʼ mi̱dxu̱ʼ kanuu náa Dios

Ni̱ʼkha̱ náa tsu̱du̱u̱ ku̱ba̱ʼ mu maʼsngulúʼ xóo nindxu̱u̱ Anu̱u̱. Jeobá mínaʼ má niʼthí ga̱jma̱a̱ numuu Jesús: “Bigi̱ nindxu̱u̱ A̱ʼdióʼ bi̱ nandoʼ ka̱yo̱o̱. Gudxawíínla” (Marcos 9:7). Jesús nindxu̱u̱ bi̱ naniniiʼ itháan Dios. Ikhaa niʼthí: “Nimbá tseʼyoo tsáa nindxu̱u̱ Anu̱u̱ i̱ndó Ada̱ ga̱jma̱a̱ ikhaa gándoo maʼthúún xúgínʼ bi̱ nandoo ikhaa” (Lucas 10:22).

Nisngájma xóo phú nindxu̱u̱ cualidad ndrígóo Dios. Jesús ndiʼyaridoo májánʼ wéñuʼ xóo nindxu̱u̱ Anu̱u̱ dí asndu niʼthí: “Bi̱ ndiʼyoʼ ikhúúnʼ ndiʼyoo má Anu̱ʼ ma̱ngaa” (Juan 14:9). Rí xóo niʼthí ga̱jma̱a̱ dí niʼni Jesús nimbáñun xa̱bu̱ mu magún kanuu mijngii náa Dios numuu rí nisngájma rí Anu̱u̱ nandoo kaʼñún. Jesús niʼthí: “Ikhúúnʼ ni̱ndxu̱ʼ kamba̱a̱, rí gajkhun ga̱jma̱a̱ rí ndaʼya. Nimbáa xándoo maʼganú náa Anu̱ʼ á mu raʼkháa ga̱jma̱a̱ numuʼ ikhúúnʼ” (Juan 14:6). Ma̱ngaa niʼthí: “Bi̱ gajkhun mbuyamajkuíí Anu̱ʼ mbuyamajkuíí ga̱jma̱a̱ xi̱ʼ ga̱jma̱a̱ rí gajkhun. Numuu rí Anu̱ʼ xtáa rañíinʼ xa̱bu̱ bi̱ xúʼko̱ ni̱ndxu̱ún mu mbuyamajkuíí” (Juan 4:23). ¡Atatsaʼwáminaʼ! Jeobá nda̱ñínʼ xa̱bu̱ xóo ikháán, bi̱ nandún majmañún rí gajkhun ga̱jma̱a̱ numuu ikhaa.