1. Ndíjkha dí nguáná nakumu̱ún dí kúwá ndajkuíin tikhun xa̱bi̱i̱ Jeobá rá.

MBÁA xúgiáánʼ nguáná nakumulúʼ dí kuwáánʼ ndajkuáánʼ. Kúwá tikhun bi̱ mbá núngo̱o̱ má ekumu̱ún xúʼko̱, mú kúwá tikhun bi̱ tséniñaaʼ rakumu̱ún xúʼko̱ maski ajndu kúwá náa gajmiún mbaʼin xa̱bu̱. Tikhun naʼniún mingíjyúuʼ maguʼwún náa i̱mba̱ nuxi̱ʼ congregación. Eʼwíinʼ naguwáʼ náa kambáxu̱u̱n wéñuʼ gajmiún bi̱ kúwá náa guʼwún ikha jngó nakumu̱ún dí kúwá ndajkuíín índo̱ nagún gákuwá mitsínguánʼ. Kúwá tikhun bi̱ ndu̱ya̱a̱ʼ wéñuʼ makuwá gajmiún mbáa bi̱ nikháñun. Ga̱jma̱a̱ tikhun cristiano bi̱ itháan nuxi̱nʼ náa rí gajkhun nakumu̱ún rí kúwá ndajkuíin numuu rí tsíñún gúñún bi̱ kuñúún ga̱jma̱a̱ bi̱ nimbáxu̱u̱n gajmiún bi̱ na̱nguá ni̱ndxu̱ún Testigo.

2. Xkáʼnii graxe̱ gúriʼña̱a̱ náa artículo rígi̱ rá.

² Jeobá naniniaʼ májánʼ ga̱jma̱a̱ nakro̱ʼo̱o̱ kaʼyulú. Ikha jngó ikhaa ndaʼyoo rí nguáná nakumulú rí kuwáánʼ ndajkuáánʼ ga̱jma̱a̱ nandoo mambáyulú. Náa artículo rígi̱ muriʼña̱a̱ ajtsú graxe̱: Xú káʼnii embáyuluʼ Jeobá mu xákumulú rí kuwáánʼ ndajkuáánʼ rá. Ndiéjunʼ gándoo muʼni á mu nakumulú rí kuwáánʼ ndajkuáánʼ rá. Ga̱jma̱a̱, xú káʼnii gándoo mumbáñuun a̱ngiu̱lú bi̱ kúwá náa nagimbáanʼ bi̱ nakumu̱ún rí kúwá ndajkuíín rá.

3. Xú káʼnii nisngájma Jeobá rí xtáa xawii mambáyúu Elías rá.

³ Jeobá nandoo rí xúgínʼ xa̱bi̱i̱ makuwá májánʼ. Ikhaa xtáa mijngii náa mámbáa dí ikháanʼ ga̱jma̱a̱ ndaʼyoo nguáná nakumulú rí kuwáánʼ ndajkuáánʼ (Sal. 145:18, 19). Guʼyáá xú káʼnii nixtáa xawii mambáyúu gaʼyee Elías. Xa̱bi̱i̱ Dios bugi̱ nixtáa nákha niʼni mbiʼi mingíjyúuʼ náa xuajen Israel. Bi̱ tsíñún gúyáá Dios nini gíníin xa̱bi̱i̱ ga̱jma̱a̱ nindúún muxiyáa Elías (1 Rey. 19:1, 2). Elías ni̱jkha̱nú nindxa̱ʼwáminaʼ rí i̱ndó ikhaa niguanúu rí  nindxu̱u̱ gaʼyee ndrígóo Jeobá, rúʼko̱ niʼni rí majmúu wéñuʼ (1 Rey. 19:10). Mbá nacha̱ má Jeobá ndiyáʼ xóo mambáyúu Elías, nikunguaanʼ mbáa ángel maʼthúu̱n rí na̱nguá xtáa mbáwíi, dí kúwá xóó mbaʼin israelita bi̱ niguájun jmbu (1 Rey. 19:5, 18).

4. Xú káʼnii esngájma Marcos 10:29, 30 dí Jeobá naxmiéjuunʼ kaʼñúún bi̱ nánguá eñún gúñún bi̱ kuñúún ní má bi̱ nimbáxu̱u̱n gajmiún xá.

⁴ Jeobá ndaʼyoo mbaʼa tsiakii rí niʼni mu muʼni ñajuunʼ. Mbáa nánguá eñún gúyulú bi̱ kuʼñúún ni má bi̱ nimbáxulúʼ gajmiúlú bi̱ tséni ñajuunʼ Jeobá. Mbá miʼtsú, mbáa nixmiéjuunʼ apóstol Pedro índo̱ niʼthúu̱n Jesús rígi̱: “Ikháanʼ niniʼñánʼxu xúgíʼ mu magúwáʼxu kidxaaʼ, dí gúdáaʼxu rá.” (Mat. 19:27.) Ga̱jma̱a̱ ajngáa májánʼ, Jesús niʼthún xa̱bi̱i̱ rí muguaʼdiin mbaʼin wéñuʼ bi̱ mani̱ndxu̱ún xóo bi̱ kúwá náa guʼwún (atraxnuu Marcos 10:29, 30). * Ga̱jma̱a̱ Jeobá, anu̱lú bi̱ xtáa mekhuíí nakudaminaʼ dí mambáñún bi̱ nuni ñajuunʼ ikhaa (Sal. 9:10). Guʼyáá xú káʼnii gándoo mambáyulú rúʼko̱ bi̱ nguáná nakumulú dí kuwáánʼ ndajkuáánʼ.

5. Ndíjkha rí májánʼ nindxu̱u̱ rí mundxaʼwamíjná xóo embáyulú Jeobá rá.

⁵ Gundxaʼwamíjna̱ xóo embáyulú Jeobá (Sal. 55:22). Rígi̱ gambáyulú mbuʼyáá awáán xúgíʼ. Mbáa ndxájulú a̱ʼgu̱ bi̱ xóó tsenújunʼ bi̱ mbiʼyuu Carol * bi̱ i̱ndó ikhaa nindxu̱u̱ xa̱bi̱i̱ Jeobá náa goʼwóo naʼthí: “Dí mandxa̱ʼwa̱mínáʼ xú káʼni nimbáyuʼ Jeobá índo̱ nigúʼdoʼ mbá gamiéjunʼ, nindxu̱u̱ mbá dí itháan nimbáyuʼ mu xáku̱mu̱ʼ dí xtáá mbáwun. Rúʼko̱ naʼni mandxa̱ʼo̱o̱ edxu̱u̱ ma̱ngaa dí Jeobá xániñuʼ nda̱wa̱á”.

6. Xóo gándoo maxnúú tsiakii dí naʼthí 1 Pedro 5:9, 10 bi̱ nakumu̱ún dí kúwá ndajkuíín rá.

⁶ Gundxaʼwamíjna̱ xóo embañuun Jeobá eʼwíinʼ a̱ngiu̱lú bi̱ nakumu̱ún rí kúwá ndajkuíín (atraxnuu 1 Pedro 5:9, 10). * Hiroshi, mbáa  ndxájulú bi̱ i̱ndó ikhaa ninindxu̱u̱ xa̱bi̱i̱ Jeobá mbayuʼ tsiguʼ náa goʼwóo, naʼthí: “Náa nagimbáanʼ xájyúuʼ ma̱ta̱ya̱a̱ rí xúgínʼ guaʼdáá mixtiʼkhu gaʼkhu. Mú rí ma̱ta̱ya̱a̱ dí xúgiáanʼ nuʼnimi̱jna̱ muʼni xó má eʼngo̱o̱ ñajuunʼ Jeobá, naxnúxu tsiakii bi̱ na̱nguá kuáʼdíin náa rí gajkhun bi̱ kuñu̱u̱nxu”.

7. Xóo mbayáaʼ ikháán rí maratajkáan rá.

⁷ Gambaxáʼ má xúʼko̱ ga̱jma̱a̱ʼ Jeobá xúgíʼ mbiʼi. Gíʼdoo wéñuʼ numuu rí muʼthán xúgíʼ dí gíwanʼ náa a̱jkiu̱lú Jeobá ga̱jma̱a̱ muʼthán xóo ekumulú (1 Ped. 5:7). Guʼyáá ndiéjunʼ eʼthí Massiel, mbáa ndxájulú ndxáʼgú bi̱ taʼndun gúyáá bi̱ kúwá náa goʼwóo índo̱ niraʼwíí maʼni ñajuunʼ Jeobá, niʼthí: “Mbá dí nimbáyúu wéñuʼ mu xáku̱mu̱ʼ dí xtáá mbáwun nindxu̱u̱ rí matakháñuu Jeobá ga̱jma̱a̱ xúgíʼ a̱jkiu̱nʼ. I̱ndó ikhaa nindxu̱u̱ anu̱ʼ ndi̱yo̱o̱ ikhúún. Nitamijná ga̱jmu̱ʼ ikhaa mbaʼa nuthu xúgíʼ mbiʼi ga̱jma̱a̱ na̱thu̱u̱n xúgíʼ xóo eku̱mu̱ʼ”.

8. Xóo mbayáaʼ ikháán rí matraxnuu ga̱jma̱a̱ matatsaʼwamínáʼ dí naʼthí náa Biblia rá.

⁸ Ma̱ngaa rí matraxnuu Biblia xúgíʼ mbiʼi ga̱jma̱a̱ matatsaʼwamínáʼ xúgíʼ dí naʼthí ikhí náa naʼni marmáʼáan a̱jkiu̱lú dí Jeobá ra̱ʼkhá tháán eyoo kaʼyulú. Bianca, mbáa ndxájulú bi̱ ndayóoʼ maʼngo̱o̱ a̱jkiu̱u̱n numuu rí bi̱ kuyáá nuthi má xúʼko̱ dí raʼkhí ga̱jma̱a̱ numuu, naʼthí: “Nambáyuʼ wéñuʼ maguxnuu historia dí na̱ʼkha̱ náa Biblia ga̱jma̱a̱ experiencia ndrígu̱ún xa̱bi̱i̱ Jeobá dí na̱ʼkha̱ náa revista bi̱ niguaʼnii kayuʼ xó má ikhúún ga̱jma̱a̱ mandxa̱ʼwa̱mínáʼ dí naʼthí ikhí”. Tikhun a̱ngiu̱lú nagi̱da̱ʼ edxu̱ún texto dí naxnún tsiakii, xóo Salmo 27:10 ga̱jma̱a̱ Isaías 41:10. Eʼwíinʼ nuni ratamíjná mu muxuxi ñawún muthi náa reunión o eʼwíinʼ nunigajmaa Biblia índo̱ nudxawíín audio ndrígóo. Naguánu nduyáá dí rígi̱ nambáñún mu xákumu̱ún dí kúwá ndajkuíin.

9. Xú káʼnii mbayáaʼ ikháán dí nadxuʼ reunión rá.

⁹ Gíʼmaa muʼni mbá tsiakii mu̱ʼgua̱ reunión xúgíʼ mbiʼi dí narígá, numuu rí naxnúlú tsiakii ga̱jma̱a̱ nambáyulúʼ muniʼnúnʼ itháan májánʼ a̱ngiu̱lú (Heb. 10:24, 25). Massiel, bi̱ niʼthá náa kutriga̱ 7, naʼthí: “Maski ajndu ninindxu̱ʼ mbáa bi̱ nitiyuuʼ maʼthí, ninimi̱na̱ʼ maʼgá xúgíʼ reunión ga̱jma̱a̱ makuxí ñawúnʼ matha̱. Rúʼko̱ nimbáyuʼ maku̱mu̱ʼ rí xtáá mangúún náa congregación”.

10. Ndíjkha rí gíʼdoo numuu mambáxulu gajmiúlú a̱ngiu̱lú bi̱ naguajún jmbu rá.

¹⁰ Gambáxulúʼ gajmiúlú a̱ngiu̱lú bi̱ naguájun jmbu. Gambáxu gajmiúlú a̱ngiu̱lú bi̱ nuniñanʼ májánʼ xkri̱da, maski ajndu raʼkháa ikháá tsiguúnʼ xóo ikháanʼlu o mixtiʼkhu náa eguwáʼ. Náa Biblia naʼni marmáʼáan a̱jkiu̱lú dí ‹xa̱bu̱ wanii guaʼdáá ku̱ma̱› (Job 12:12). Ma̱ngaa bi̱ wanii má ma̱ndoo majmañún wéñuʼ náa bi̱ jiámá o wa̱ʼxa̱ʼ bi̱ naguájun jmbu. David itháan  chíʼgíʼ ki xóo Jonatán, mú niguánu nimbáxu̱u̱n májánʼ wéñuʼ (1 Sam. 18:1). Nájmi̱i̱n nixnamijná tsiakii muni ñajuunʼ Jeobá náa majñuuʼ xkujndu gakhii (1 Sam. 23:16-18). Irina, mbáa ndxájulú bi̱ xúgi̱ i̱ndó ikhaa nindxu̱u̱ xa̱bi̱i̱ Jeobá náa goʼwóo, naʼthí: “A̱ngiu̱lú bi̱ nuʼnigajmaa gajmiúlú ma̱ndoo mani̱ndxu̱ún xóo anu̱lú o a̱ngiu̱lú xígi̱. Jeobá ma̱ndoo majmiún ikhiin mu mani̱ndxu̱ún xóo bi̱ kúwá náa guʼwúlú bi̱ ndaʼyulúʼ”.

11. Ndiéjunʼ gáʼyoo muʼni mu muguaʼdiin bi̱ mambáxulu májánʼ gajmiúlú rá.

¹¹ Mbáa tikhun naʼniún mingíjyúuʼ mbuñíinʼ eʼwíinʼ bi̱ mambáxu̱u̱n gajmiún, itháan má á mu natiñu̱u̱n gúthi. Ratna, mbáa ndxájulú a̱ʼgu̱ bi̱ nini gínáa índo̱ nijmañuu dí gajkhun, ikhaa naʼthí: “Ni̱jkhánú ndi̱yo̱o̱ dí ndiyóoʼ mumbayúʼ a̱ngiu̱lú bi̱ nagún náa nagimbáanʼ”. Mbáa naʼniulú mingíjyúuʼ muʼthán mbáa xú káʼnii kumulúʼ, mú rúʼko̱ gíʼdoo numuu muʼni ginii mu mambáxulu májánʼ gajmiúlú mbáa. Bi̱ nambáxulúʼ gajmiúlú nandún muxnulúʼ tsiakii ga̱jma̱a̱ mumbayulúʼ, mú ikháanʼ ndaʼyoo muʼthúún xóo kuwáánʼ mú xúʼko̱ mbuyáá xóo gándoo mumbayulúʼ.

12. Xú káʼnii embáyulú dí muʼtáraʼa mambáxulu májánʼ gajmiúlú eʼwíinʼ rá.

¹² Rí muʼtáraʼa gajmiúlú mbaʼin a̱ngiu̱lú nindxu̱u̱ mbá náa itháan májánʼ rí ma̱ndoo mambáxulu gajmiúlú eʼwíinʼ. Carol bi̱ niʼthá ga̱jma̱a̱ numuu náa kutriga̱ 5, naʼthí: “Nindoo nimbáxu̱ʼ gajmíi̱n mbaʼin a̱ngiu̱lú gu̱ʼu̱ índo̱ nigájnun gátaraʼa gajmíi̱nʼ ga̱jma̱a̱ bi̱ niniʼniún náa mixtiʼkhu ñajunʼ dí nini náa xuajñuu Dios. Jeobá nijmiuu bi̱ nimbáxuʼ gajmíi̱nʼ náa xúgíʼ tsiguʼ rígi̱ mu mumbayú”. Xó má eʼyáá, gíʼdoo numuu rí muʼnimijna mambáxulu gajmiúlú a̱ngiu̱lú bi̱ naguajún jmbu. Jeobá najmiún ikhiin mumbayulúʼ índo̱ nuraʼníí xkujndu, xóo índo̱ nakumulú rí kuwáánʼ ndajkuáánʼ (Prov. 17:17).

13. Ndiéjunʼ kaʼyulúʼ muʼni xúgiáanʼ rá.

¹³ Xúgiáanʼ ndaʼyoo muʼni rí marigá dí tsímáá ga̱jma̱a̱ rí xúgínʼ maʼndún kuyamijná náa nagimbáánʼ, mú xúʼko̱ nimbáa xáku̱mu̱u̱ dí xtáa mbáwíi (Juan 13:35). Dí xóo gúʼni ga̱jma̱a̱ dí xóo gúʼthá maʼni rí manindxu̱lúʼ mixtiʼkuáanʼ. Mbáa ndxájulú a̱ʼgu̱ narmáʼáan a̱jkiu̱u̱n: “Índo̱ nijmañuʼ dí gajkhun, bi̱ nagún náa nagimbáánʼ ninindxu̱ún xóo bi̱ kúwá náa goʼwóʼ. Á mu raʼkháa ikhiin nimbayúʼ, tándoo gáni̱ndxu̱ʼ xa̱bi̱i̱ Jeobá”. Ndiéjunʼ gándoo muʼni mu bi̱ kúwá ndajkuíin náa rí gajkhun makumu̱ún rí kuwáánʼ mbá kambáxulú gajmiún náa nagimbáanʼ rá.

14. Xú káʼnii gándoo guʼni mu mambaxúlúʼ gajmiúlú bi̱ ndiʼkhún eguwáʼ náa congregación rá.

¹⁴ Guʼni rí ikháanʼ ginii mambaxúlúʼ gajmiúlú eʼwíinʼ. Ma̱ndoo mugíʼdi̱i̱ mudriguíin májánʼ bi̱ nuxi̱nʼ náa congregación (Rom. 15:7). Mú raʼkháa i̱ndó ndayóoʼ muraxiín májánʼ. Nandulú mambáxulu májánʼ gajmiúlú mañu mañúú. Ikha jngó ndayóoʼ manindxu̱lúʼ májáanʼ xa̱bu̱ ga̱jma̱a̱ gaxmiéjunlú gajkhun kuʼñúún bi̱ nuxi̱nʼ. Guʼgímijná makru̱ʼu̱lú xkujndu ndrígu̱ún, mú raʼkháa rí asndu muxuʼdámíjná mangáanʼ. Numuu rí tikhun naʼniún mingíjyúuʼ muthi xóo ekumu̱ún, ndayóoʼ muñewa̱a̱n rí gúʼthá mu xákumu̱ún dí nutsudiin wéñuʼ muthi. Itháan májánʼ rí muʼni graxe̱ dí gíʼdoo numuu ga̱jma̱a̱ ajngáa wabaaʼ, nda̱wa̱á, tsumáá guʼdxawíín dí gáʼthi. Mbá xkri̱da, ma̱ndoo muraxu̱u̱n xóo niguánu niniʼniiʼ Jeobá.

15. Xóo gándoo bi̱ najmañún itháan mumbañún eʼwíinʼ a̱ngiu̱lú bi̱ nagún náa nagimbáanʼ rá.

¹⁵ Índo̱ a̱ngiu̱lú bi̱ najmañún itháan, xóo bi̱ kuya̱ edxu̱u̱ náa nagimbáanʼ naxmiéjúnʼ kuñúún eʼwíinʼ, bi̱ nagún náa nagimbáanʼ naʼni rí mambáxu̱u̱n itháan májánʼ gajmiún Dios.  Melissa, mbáa ndxájulú bi̱ ru̱dúu̱ nimbáyúu mba̱ja̱a̱ náa rí gajkhun, naʼthí: “Asndu nda̱a̱ ajngáa mata̱ rí naxnáa wéñuʼ núma̱aʼ ga̱jma̱a̱ numuu rí xúgíʼ tsiguʼ dí nanújngoo, kúwá má xúʼko̱ a̱ngiu̱lú bi̱ nuniuʼ xóo anu̱ʼ. Mámbá índo̱ nandoʼ mata̱, xtáa má xúʼko̱ mbáa bi̱ maʼdxaunʼ”. Guʼyáá dí naʼthí Mauricio, mbáa ndxájulú dxámá bi̱ nikumu̱u̱ rí niguanátígo̱o̱ índo̱ bi̱ naʼsngóo niniñuuʼ ra̱ʼkha̱ náa reunión. “Mbá dí itháan nimbáyuʼ nindxu̱u̱ dí a̱ngiu̱lú bi̱ kuya̱ edxu̱u̱ nixmiéjuunʼ kuyoʼ. Mbaʼa nutu niriyaʼ mbiʼi mutamijná ga̱jma̱á ni̱ndxu̱ʼ, nagún ga̱jma̱á ni̱ndxu̱ʼ náa nataráʼa, nuthu̱nʼ tikhu dí gíʼdoo numuu rí nixkamaa náa Biblia índo̱ ninigajmaa ga̱jma̱a̱ asndu nitsíinʼ ga̱jma̱á ni̱ndxu̱ʼ”. Xó má Melissa ga̱jma̱a̱ Mauricio kúwá má xúʼko̱ runi káxi̱ ñajuunʼ Jeobá.

16, 17. Xú káʼnii gándoo mumbáñuun tikhun a̱ngiu̱lú rá.

¹⁶ Gumbáñuun náa ndañúunʼ (Gál. 6:10). Mbáa misionero mbiʼyuu Leo, bi̱ xtáa tsínguánʼ náa goʼwóo raʼni ñajuunʼ, naʼthí: “Mbaʼa nuthu i̱ndó rí ndaʼyáaʼ nindxu̱u̱ mbá chíʼgíʼ rí májánʼ dí gúni eʼwíinʼ ga̱jma̱a̱ numaaʼ índo̱ ndayóoʼ. Narmáʼáan a̱jkiu̱nʼ mbá miʼtsú rí nigíʼnuu mbá gamiéjunʼ ga̱jma̱a̱ karriuʼ. Índo̱ nijkhánuu náa xtáá, ra̱ʼkhá tháán nimiñuuʼ. Mú ikhú mbáa ndxájulú ga̱jma̱a̱ a̱ʼgiu̱u̱ nithu̱nʼ maʼgá náa guʼwún gakuiʼtsu. Na̱nguá ermáʼáan a̱jkiu̱nʼ dí nikhu̱, mú narmáʼáanʼ májánʼ a̱jkiu̱nʼ dí ikhiin nidxawunʼ ga̱jma̱a̱ májánʼ. Nda̱wa̱á, nánguá nimíñuʼ wéñuʼ”.

¹⁷ Xúgiáanʼ nanigulúʼ makuwáánʼ náa ndawáanʼ, itháan má índo̱ na̱jkua̱ asamblea numuu rí ndawáanʼ gajmiúlú mbaʼin a̱ngiu̱lú ga̱jma̱a̱ nandoo nuʼtámíjná rí niʼdxawíín ikhí. Mú guʼyáá dí naʼthí Carol bi̱ niʼthá ga̱jma̱a̱ numuu ginii: “Ikhúún itháan naʼniuʼ mingíjyúuʼ índo̱ narígá asamblea numuu rí ikhú itháan má naku̱mu̱ʼ dí xtáá mbáwun, numuu rí maski ajndu xtáá náa majñúnʼ mbaʼin wéñuʼ a̱ngiu̱lú, mbaʼin dí ikhiin kúwá gajmiún bi̱ kúwá náa guʼwún”. Tikhun naʼniún mingíjyúuʼ magún náa mbá asamblea timbá aʼphu̱ nda̱wa̱á dí nikháñuu bi̱ ndi̱ya̱a̱. Lá nuniʼníiʼ mbáa bi̱ xtáa xúʼko̱ ráʼ. Lá ma̱ndoo muʼthán maxtáa ga̱jma̱á ni̱ndxu̱lú i̱mba̱ aʼphu̱ dí guwáanʼlu mbu̱júu̱ʼ xáʼ.

18. Xó má naʼthí náa 2 Corintios 6:11-13, xkáʼnii gándoo mumbáñuun eʼwíinʼ rá.

¹⁸ Guríyáʼ mbiʼi makuwáánʼ mbóó gajmiúlú. Guʼnimijna muʼthúún mixtiʼkhu̱u̱n a̱ngiu̱lú náa  mámbá dí nuʼni gagimijná, mú itháan xóo bi̱ nakumu̱ún dí kúwá ndajkuíín. Nandulú “murmbáʼtáá a̱jkiu̱lú”, ga̱jma̱á ni̱ndxu̱ún (atraxnuu 2 Corintios 6:11-13). * Melissa, bi̱ niʼthá náa kutriga̱ 15, narmáʼáan a̱jkiu̱u̱n: “Ra̱ʼkhá tháán niniguxu̱ʼ rí tikhun a̱ngiu̱lú nithuxu muʼguáxu náa guʼwún o muʼguáxu gúyá i̱mba̱ ríʼkhá gajmiúxu”. Lá xtáa mbáa náa nagimbáanʼlu bi̱ ma̱ndoo muʼthán ma̱ʼkha̱ náa guʼwúlú ráʼ.

19. Nguáná gíʼdoo wéñuʼ numuu dí makuwáánʼ mijngii gajmiúlú tikhun a̱ngiu̱lú rá.

¹⁹ Rígá tikhu mbiʼi dí mámbá tsiguʼ rí ndayóoʼ makuwáánʼ mijngii gajmiúlú tikhun a̱ngiu̱lú. Mbá xkri̱da, bi̱ guáʼdiin a̱ngiu̱ún bi̱ na̱nguá ni̱ndxu̱ún xa̱bi̱i̱ Jeobá, mbáa naʼniún gakhii mbiʼi dí narígá ndxa̱a̱. Eʼwíinʼ numíniiʼ wéñuʼ índo̱ ndayáa mbiʼi dí nikháñuu mbáa bi̱ nindúún kuyáá. Índo̱ nuriʼyáʼ mbiʼi rúʼko̱ makuwáánʼ gajmiúlú a̱ngiu̱lú buʼko̱, nusngajmá dí naxmiéjunlú gajkhun kuʼñúún (Filip. 2:20).

20. Xóo gándoo gambáyulú ajngáa dí niʼthí Jesús náa Mateo 12:48-50 índo̱ nakumulúʼ dí kuwáánʼ ndajkuáánʼ rá.

²⁰ Rígá mbaʼa numuu dí nguáná mbáa cristiano maku̱mu̱u̱ dí xtáa mbáwíi. Mú xámbumulú dí Jeobá nakro̱ʼo̱o̱ májánʼ xú káʼnii ekumulú. Mbaʼa nuthu najmiuu a̱ngiu̱lú mumbayulúʼ índo̱ ndayúlú (atraxnuu Mateo 12:48-50). * Mú ikháanʼ ndaʼyóoʼ musngajmá dí nuxnáa núma̱aʼ índo̱ nuʼnimi̱jna̱ mumbáñuun eʼwíinʼ a̱ngiu̱lú bi̱ nuʼnigajmaa gajmiúlú. Tséʼniuu má xóo ekumulú nguáná, nditháan na̱nguá kuwáánʼ ndajkuáánʼ numuu rí Jeobá xtáa má xúʼko̱ náa níjniulú mambáyulú.