Pablo niʼnirámáʼ: “Náa majñu̱u̱ʼ xtángoo asndu xóo nikháñuʼ náa xtángoo, mu xúʼko̱ ma̱ndoo maxtáá ga̱jma̱a̱ numuu Dios” (Gál. 2:19).

Tikhun cristianos bi̱ kúwíin náa congregación romana dí rígá náa Galacia kúwíin runimbu̱ún náa bi̱ nusngáa nduwaʼ. Xa̱bu̱ buʼko̱ nusngáa mu ma̱ndoo makáwáanʼla ndayóoʼ dí muʼnimbulú xtángoo ndrígóo Moisés, ikhaa nindxu̱u̱ dí muthu xtóo tsáʼkhún. Mú Pablo ndiʼyoo rí Dios nánguá má e̱nda̱ʼa̱ dí xa̱bu̱ bi̱ nunimbu̱ún ndayóoʼ muthu xtóo tsáʼkhún. Ga̱jma̱a̱ ku̱ma̱ dí Dios nixnúu Pablo nisngájma dí nuthi xa̱bu̱ buʼko̱ nindxu̱u̱ nduwaʼ, ga̱jma̱a̱ numuu rúʼko̱ niʼni dí fe ndrígu̱ún bi̱ cristianos maʼni gújkhúʼ náa tsigijñaʼ dí nixná Jesús (Gál. 2:4; 5:2). Índo̱ Pablo xtáa raʼthí ga̱jma̱a̱ numuu dí nánguá má eyóoʼ munimbu̱ún Xtángoo ndrígóo Moisés, niʼnirámáʼ dí na̱ʼkha̱ raʼthí náa Galata 2:19.

Náa Biblia nasngájma kaʼwu rí índo̱ mbáa xa̱bu̱ nakháñuu nánguá eʼyoo dí xtáa rarígá ga̱jma̱a̱ nánguá má gawúunʼ (Ecl. 9:5). Índo̱ Pablo niʼnirámáʼ dí ‹nikháñuu náa xtángoo› nindoo gáʼthí rí xtángoo ndrígóo Moisés nánguá gíʼdoo tsiakii náa ikhaa. Mú ga̱jma̱a̱ numuu rí nigiʼdoo mbá fe náa dí nijuiʼtsiwáanʼlú ikhaa ‹naxtáa náa Dios›.

Mú xú káʼnii nirígá dí Pablo nixtiʼkhuu xóo nixtáa ga̱jma̱a̱ “numuu xtángoo” rá. Ikhaa niguámbóo niʼthí rí “xa̱bu̱ bi̱ naʼnimbánuu xtángoo tséjmaʼniiʼ rí nindxu̱u̱ jmbii, i̱ndó á mu nagiʼdoo fe náa Jesucristo” (Gál. 2:16). Gajkhun rí xtángoo niʼnimbánuu mbá rí gíʼdoo numuu, Pablo niʼthún rígi̱ bi̱ kúwá náa Gálata: “Nijuixná mu masngájma dí ra̱májánʼ dí nuni̱ xa̱bu̱ asndu índo̱ gáʼkha̱nú bi̱ nijuiʼthá ma̱ʼkha̱, bi̱ nijuiʼthá ga̱jma̱a̱ numuu náa rí nimbánúún” (Gál. 3:19). Ikha jngóo náa Xtángoo nisngájma kaʼwu dí xúgíinʼ xa̱bu̱ aʼkhá xáʼngu̱u̱n gúnimbaníí xó má kaʼyoo xtángoo, ga̱jma̱a̱ rí ndayóoʼ tsigijñaʼ ndrígóo mbáa bi̱ na̱nguá gíʼdoo aʼkhá mu xúʼko̱ maʼnimbánuu mbá miʼtsúú mbá xúgíʼ. Xtángoo nimbáñúún xa̱bu̱ mu mbuyáá dí Jesucristo nindxu̱u̱ bi̱ ‹nijuiʼthá ma̱ʼkha̱›. Á mu mbáa xa̱bu̱ nasngájma fe náa Jesucristo, Dios ma̱ndoo maʼthí dí xa̱bu̱ buʼko̱ nindxu̱u̱ jmbii (Gál. 3:24). Pablo ni̱jkha̱nú nijmaʼniiʼ xóo mbáa xa̱bu̱ bi̱ jmbii, ga̱jma̱a̱ numuu xtángoo ikhaa nigruiguíi Jesús ga̱jma̱a̱ nigiʼdoo fe náa ikhaa. Ikha jngóo “nikháñuu náa Xtángoo”, mú nda̱wa̱á ni̱jkha̱nú “nixtáa náa Dios”. Dios gíʼdoo tsiakii náa ikhaa mú xtángoo nánguá.

Ikháá má xó rígi̱, Pablo niʼnirámáʼ náa inún a̱ngiu̱lú bi̱ romanos. “Xúʼko̱ má mangáanʼ a̱ngui̱nʼ, Cristo niʼni káwáanʼ mu, ní xákuwáanʼ náa majñu̱u̱ʼ Xtángoo [...]. Mú rí xúgi̱ niguma káwáanʼ náa Xtángoo, numuu rí nikháñulú náa naʼtáñajunlú Xtángoo” (Rom. 7:4, 6). Xó má náa versiculo rígi̱ ga̱jma̱a̱ dí naʼkha̱ náa Galatas 2:19 nasngájma dí Pablo na̱nguá nindoo gáʼthí dí makhañúu xóo mbáa xa̱bu̱ aʼkhá ga̱jma̱a̱ numuu xtángoo, dí phu nindoo gaʼthí, rí nánguá maxtáa náa majñu̱u̱ʼ xtángoo. Xtángoo nánguá gíʼdoo tsiakii náa ikhaa, xúʼko̱ má eʼwíinʼ bi̱ ni̱ndxu̱ún xóo ikhaa. Dí xúgi̱ niguma káwíin ga̱jma̱a̱ numuu fe rí niguaʼdáá náa tsigijñaʼ dí nixnajxi̱ Jesucristo.