1. Xú káʼnii eʼni mbríguii Gixa̱a̱ ga̱jma̱a̱ mbáa xa̱bu̱ bi̱ ndañíinʼ xujkhúʼ rá.

BI̱ NDAÑÍINʼ xujkhúʼ rí phú nandoo nindxu̱u̱ rí majngutuwiin ga̱jma̱a̱ rí maxíyáa bi̱ gáxkamaa. Mu ma̱ndoo majngutuwiin najmuu mbaʼa tsáʼkhá, xó má niʼthí mbáa bi̱ nimbájxu̱u̱ ga̱jma̱a̱ Job (Job 18:8-10). Xú káʼnii eʼni mu xujkhúʼ ma̱ʼkha̱ náa tsáʼkhá rúʼko̱ xá. Ginii nayamaa náa e̱ʼkha̱, ndiéjunʼ enigu̱u̱ʼ ga̱jma̱a̱ ndiéjunʼ tsáʼkhá gándoo gátuwiin ga̱jma̱a̱. Xúʼko̱ má kayuuʼ eʼni Gixa̱a̱ ma̱ngaa, ikhaa nayejxúlú ma̱ngaa nayamáánʼ mu mbaʼyoo ndiéjunʼ eʼnilú ma̱ngaa rí enigulúʼ. Ikhú najmuu tsáʼkhá rúʼko̱ náa kaʼnii majngutíguáánʼlú. Maski asndu xúʼko̱ eʼniulú Gixa̱a̱ mú náa Biblia naʼthúlú ndiéjunʼ gándoo gámbáyulú mu xájngutíguáanʼ náa tsáʼkhá ndrígóo, ma̱ngaa náa Biblia naʼthúlú xú kaʼnii gándoo gúʼnikáwúmijná náa tsáʼkhá rúʼko̱ á mu najngutíguáánʼlú.

2. Ndiéjunʼ a̱jma̱ tsáʼkhá rí itháán nayambáá eʼyoo Gixa̱a̱ rá.

² A̱jma̱ tsáʼkhá rí itháán nayambáá eʼyoo Gixa̱a̱ rí mba̱yu̱u̱ʼ tsiguʼ má e̱ʼkha̱ rajmuu nindxu̱u̱ rí nuʼnimbaʼwumíjna̱ ga̱jma̱a̱ rí mba̱ʼwa̱ʼ muguaʼdáá wéñuuʼ. * Ikhaa nindxu̱u̱ xóo bi̱ ndañíinʼ ñu̱ʼu̱ bi̱ naʼni rí maguwáʼ náa tsáʼkhá mu xúʼko̱ majngutuwiin (Sal. 91:3). Xúniʼñámíjná majngutíguáanʼlu náa tsáʼkhá ndrígóo numuu rí Jeobá naʼthúlú ndiéjunʼ nindxu̱u̱ tsáʼkhá dí ikhaa najmuu (2 Cor. 2:11).

3. Náá numuu rí Jeobá niniñuuʼ dí magumaraʼmáʼ xkri̱da ndrígu̱ún xa̱bu̱ bi̱ ninimbaʼwumíjna̱ ga̱jma̱a̱ bi̱ nindúún muguaʼdáá wéñuʼ rá.

³ Ndiéjunʼ ejmuu Jeobá mu maʼthúlú rí gamíi nindxu̱u̱ rí muʼnimbaʼwumíjna̱ ga̱jma̱a̱ rí mba̱ʼwa̱ʼ muguaʼdáá wéñuuʼ rá. Ikha niniñuuʼ rí magumaraʼmáʼ experiencias ndrígu̱ún a̱ngiu̱lú rí mbiʼi xúgi̱, mu xúʼko̱ majmañulú rí niguáʼníí ikhiin. Náa xkri̱da rí majmañulú xúgi̱, mbuʼyáá xú káʼnii Gixa̱a̱ niʼngo̱o̱ niʼni rí mbaʼin xa̱bi̱i̱ Jeobá bi̱ kúwá má niʼníí majngutíguíin náa tsáʼkhá. Lá rúʼko̱ eyoo gáʼthúun rí xáʼngulú má kayuuʼ ráʼ. Na̱nguá. Jeobá niniñuuʼ dí magumaraʼmáʼ  náa Biblia mu maʼthúlú rí ‹gamíi nindxu̱u̱› (1 Cor. 10:11). Ikhaa ndaʼyoo dí rígá mbá rí ma̱ndoo maʼsngulúʼ rí niguáʼníí ikhiin mu xúʼko̱ xájngutíguáánʼ náa tsáʼkhá ndrígóo Gixa̱a̱ mu xúʼko̱ ma̱ndoo muʼnikáwúmijnálú.

4. Ndiéjunʼ gándoo gúguáʼníí á mu nuʼnimbaʼumíjna̱ʼlú rá.

⁴ Gixa̱a̱ nandoo rí muʼnimbaʼumíjna̱ʼlú. Ikhaa ndaʼyoo rí á mu nuniʼñáánʼ rí ku̱ma̱ rúʼko̱ mbaja̱a̱ náa ikháánʼ manindxu̱lú xóo ikhaa, ga̱jma̱a̱ muʼnimbáti̱ga̱ rí makuwáánʼ kámuu mbiʼi (Prov. 16:18). Ikha jngóo, Pablo niʼthí á mu mbáa naʼnimbamínáʼ ‹magíʼnuu xó má nigíʼnuʼ Gixa̱a̱› (1 Tim. 3:6, 7). Rígi̱ ma̱ndoo magíʼnuu asndu tsáá rí ikháánʼlu maski asndu nuyéjkualú mba̱yu̱u̱ʼ tsiguʼ náa xuajñuu Jeobá ma̱ndoo majngutíguáánʼ náa tsáʼkhá ndrígóo Gixa̱a̱.

5. Xó má eʼthí náa Eclesiastés 7:16, 20, xú káʼnii eʼni mbáa xa̱bu̱ bi̱ naʼnimbamínáʼ rá.

⁵ Mbáa xa̱bu̱ bi̱ naʼnimbamínáʼ naku̱mu̱u̱ rí gíʼdoo numuu ikhaa ki xóo eʼwíinʼ. Ikha jngóo Gixa̱a̱ nandoo maʼni rí i̱ndó mundxa̱ʼwa̱míjna̱ ga̱jma̱á numulú ikháánʼ ki xóo Jeobá, itháán índo̱ kuaʼdáá mbá xkujndu. Mbá xkri̱da. Lá niguma tsu̱du̱lú ga̱jma̱a̱ mbá rí túʼni̱ ráʼ. Lá nigumáánʼ mbá dí ra̱májánʼ ráʼ. Gixa̱a̱ nanigu̱u̱ʼ rí mu̱ʼni̱ tsu̱di̱i̱ Jeobá ga̱jma̱a̱ a̱ngiu̱lú, ga̱jma̱a̱ nanigu̱u̱ʼ rí mundxaʼwamíjna̱lú rí ma̱ndoo muʼnimbáníí xkujndu ndrígúlú xó má eyulú ikháánʼ rí asndu xúʼyáʼ ikha ndrígóo Jeobá, rí na̱ʼkha̱ náa Biblia (atraxnuu Eclesiastés 7:16, * 20). *

6. Ndiéjunʼ ejmañulú rí nigíʼnuu mbáa ndxájulú bi̱ xtáa náa Países Bajos rá.

⁶ Guʼyáá xkri̱da ndrígóo mbáa ndxájulú bi̱ na̱ʼkha̱ náa Países Bajos bi̱ tsénigu̱u̱ʼ xóo eni̱ a̱ngiu̱lú. Ni̱jkha̱nú mbá mbiʼi rí nánguá nindoo maxtáa gajmíi̱n a̱ngiu̱lú. Ikhaa naʼthí: “Niku̱mu̱ʼ rí mbáwún xtáá asndu niʼñuʼ gakhi̱i̱ mu mariʼkhu̱u̱ xóo endxaʼwamínaáʼ ga̱jma̱a̱ numún ikhiin. Ikha jngóo ni̱thu̱u̱n ajmbio̱ʼ rí ndayóoʼ muriʼkhui̱i̱ congregación ndrígúxu̱”. Ikha jngó ndiʼyoo JW Broadcasting^® dí nigájnuu marzo tsiguʼ 2016 náa  naʼthí ndiéjunʼ gíʼmaa mu̱ʼni̱ mu xúʼyáá náa nakiéʼkhún eʼwíinʼ. Ndxájulú naʼthí xóó: “Ni̱jkhánú nikro̱ʼo̱ʼ dí gíʼmaa mani̱ndxu̱ʼ xa̱bu̱ guabaaʼ, ga̱jma̱a̱ mba̱yo̱o̱ náa nakiéʼkhúnʼ ikhúún ki xóo mba̱yo̱o̱ náa nakiéʼkhúún a̱ngiu̱lú bi̱ kúwá náa congregación. Broadcasting rígi̱ nimbáyúʼ mandxa̱ʼwa̱mínáʼ ga̱jma̱a̱ numuu Jeobá ma̱ngaa xóo eʼtáñajuunʼ”. Rí phú gajkhun nindxu̱u̱ índo̱ gúguaʼdáá mbá xkujndu xámbumulú kuʼyáá Jeobá guʼtákáñii mu mbuʼñún a̱ngiu̱lú xóo eʼñún ikhaa. Anu̱lú Jeobá ndaʼyoo náa nakiéʼkhún a̱ngiu̱lú, maski asndu xúʼko̱ ikhaa xtáa xawii mu maʼni mba̱a̱ a̱jkiu̱u̱n kaʼñún a̱ngiu̱lú buʼko̱, ga̱jma̱a̱ ikhaa nandoo rí mu̱ʼni̱ xúʼko̱ kayuuʼ mangáánʼ (1 Juan 4:20).

7. Ndiéjunʼ nigíʼnuu rey Uzías rá.

⁷ Rí maʼnimbamínáʼ rey Uzías bi̱ nixtáa náa Judá rúʼko̱ niʼni rí xániñaminaʼ rí muxpriguíí ga̱jma̱a̱ maʼni mbá dí rakáʼyoo maʼni. Uzías ninindxu̱u̱ mbáa xa̱bu̱ bi̱ najmañuu naxmínaʼ májánʼ wéñuuʼ ma̱ngaa bi̱ najmañuu naʼni guʼwá ga̱jma̱a̱ najmañuu naʼdu. ‹Dios bi̱ gajkhun niʼni rí xúgíʼ maʼgajnúu májánʼ› (2 Crón. 26:3-7, 10). Mú náa Biblia naʼthí: “Rí índo̱ nigiʼdoo tsiakii, a̱jkiu̱u̱n nacha̱ nikuxi̱mínáʼ ga̱jma̱a̱ rúʼko̱ niʼni gachii”. Jeobá má niʼthí rí i̱ndó ndxajkun gíʼmaa muxnajxi̱ incienso náa templo. Ikhaa rúʼko̱ rí niʼni rey Uzías. Ikha jngóo Jeobá niʼni rí magiʼdoo lepra. Uzías nigiʼdoo lepra xúgíʼ mbiʼi rí nixtáa (2 Crón. 26:16-21).

8. Xú káʼnii embáyulú 1 Corintios 4:6, 7 mu xúʼnimbaʼumíjna̱lú rá.

⁸ Lá ma̱ndoo majngutíguáánʼ mangáánʼ náa tsáʼkhá rí muʼnimbaʼumíjna̱ ga̱jma̱a̱ muxuʼdámíjna̱ a̱ʼkhá xó má niʼni Uzías ráʼ. Guʼyáá xkri̱da ndrígóo José. Nindxu̱u̱ mbáa bi̱ kayá edxu̱u̱ náa congregación bi̱ najmañuu májánʼ, ga̱jma̱a̱ nduyamajkuíí wéñuuʼ a̱ngiu̱lú, nadaʼ májánʼ mbújkha̱a̱ náa xtáa rañajunʼ ma̱ngaa naxná discursos náa asambleas rí asndu a̱ngiu̱lú bi̱ ni̱ndxu̱ún superintendentes ndrígóo circuito nunda̱ʼa̱a̱ ikha. Mú ikhaa niʼthí: “Ga̱jma̱a̱ rí najmañuʼ wéñuuʼ ma̱ngaa rí gúʼdoo májánʼ experiencias rúʼko̱ niʼni rí magumuʼ ka̱yo̱o̱ Jeobá. Niku̱mu̱ʼ rí gújun gújkhúʼ náa Jeobá ga̱jma̱a̱ táʼgíʼ madxawun índo̱ nixprigúʼ ma̱ngaa tádxawun consejo ndrígóo Jeobá”. José nikudaminaʼ aʼkhá ga̱jma̱a̱ nigájnuu expulsado, niʼni má mbá tsiguʼ rí nitanga̱a̱ náa xuajñuu Jeobá ga̱jma̱a̱ ikhaa niʼthí: “Jeobá niʼsngóʼ rí gíʼdoo wéñuuʼ numuu muʼnimbulú dí ikhaa na̱ndu̱ʼu̱lú mu̱ʼni̱. Raʼkháa rí kuaʼdáá mbá ñajunʼ kiejuunʼ náa xuajñuu Jeobá”. Garmáʼáan a̱jkiu̱lú rí xúgíʼ rí najmañulú o ñajunʼ rí kuaʼdáá náa congregación na̱ʼkha̱ náa Jeobá, ikha jngóo á mu  ikháánʼ nuʼnimbaʼumíjna̱, Jeobá xájmiuu ga̱jma̱á ni̱ndxu̱lú (atraxnuu 1 Corintios 4:6, 7). *

9. Ndiéjunʼ niʼni Gixa̱a̱ ga̱jma̱a̱ Eva ga̱jma̱a̱ numuu rí nindúún muguaʼdáá itháan rá.

⁹ Mbáa núkhu nundxaʼwamíjna̱ ga̱jma̱a̱ numuu Gixa̱a̱ índo̱ nuʼthá rí mba̱ʼwa̱ʼ muguaʼdáá. Nákhá ikhaa ninindxu̱u̱ ángel ndrígóo Jeobá mbáa ikhaa nigiʼdoo mbaʼa ñajunʼ kiejunʼ, maski asndu xúʼko̱ ikhaa nindoo itháan rí asndu nindoo mbuyamajkuíí ikhaa ki xóo Jeobá. Ikhaa nandoo rí mu̱ʼni̱ xó má niʼni ikhaa. Ikha jngóo Gixa̱a̱ nagíminaʼ maʼñulú rí xákuwáánʼ gagi ga̱jma̱a̱ rí kuaʼdáálu. Timbá miʼtsu rí niʼni, nindxu̱u̱ índo̱ niʼninduwaaʼ Eva. Ga̱jma̱a̱ numuu rí Jeobá nindoo kaʼyoo wéñuuʼ Adán ga̱jma̱a̱ Eva, ikha jngóo niʼthúún mu̱phu̱ xúgíʼ xndúu ixi̱ dí rígá ikhí asndu magiʼmúún, mú rígá mbá rí xándoo mu̱phu̱ (Gén. 2:16). Gixa̱a̱ niʼngo̱o̱ niʼninduwaaʼ Eva ga̱jma̱a̱ niʼni mbaʼyoo rí ndayóoʼ mi̱khu̱ xndúu ixi̱ rí nijuiʼtháán rí xíkhu̱. Táʼyamajkhuu rí gíʼdoo ikhaa nindoo itháan, xó má eʼyáá ga̱jma̱a̱ numuu rí niʼni ni̱jkha̱nú nigiʼdoo aʼkhá ga̱jma̱a̱ nikháñuu (Gén. 3:6, 19).

10. Xú kaʼnii nixpríguíi David náa tsáʼkhá rí mba̱ʼwa̱ʼ magiʼdoo wéñuʼ rá.

¹⁰ Mbuʼyáá dí nigíʼnuu rey David. Jeobá nixnúu rí magiʼdoo, xóo rí mbiʼyamajkuíí ma̱ngaa rí maʼngo̱o̱ náa nuxmijná. David nidxuu ga̱jma̱a̱ rí nigiʼdoo, niʼthí rí Jeobá nixnúu itháan ki xóo rí ikhaa nikumu̱u̱ (Sal. 40:5). Mú ni̱jkha̱nú mbiʼi rí David nindoo magiʼdoo itháan ga̱jma̱a̱ nimbumuu rí Jeobá nixnúu. Maski asndu nigi̱ʼdiin mbaʼin gu̱ʼwi̱i̱ mú ikhaa ninigiu̱u̱ʼ imba̱a̱ a̱ʼgu̱, a̱ʼgiu̱u̱ Urías bi̱ mbiʼyuu Bat-Seba, mbá rí Jeobá tsénigu̱u̱ʼ. David i̱ndó nindxa̱ʼwáminaʼ ga̱jma̱a̱ numuu ikhaa. Ikha jngóo nikudaminaʼ a̱ʼkhá ga̱jma̱a̱ Bat-Seba, niguewáan ada̱. Mú raʼkháa i̱ndó rúʼko̱ niʼni magajnúu awan rí muxiyáa Urías (2 Sam. 11:2-15). Náá numuu dí xúʼko̱ niʼni xá. Lá nindxa̱ʼwáminaʼ rí Jeobá na̱nguá xtáa raʼyoo xáʼ. Maski asndu mba̱yu̱u̱ʼ nixtáa jmbu náa Jeobá mú ikhaa nijpátriguíi náa tsáʼkhá rí mba̱ʼwa̱ʼ magiʼdoo wéñuuʼ ga̱jma̱a̱ rí i̱ndó mandxa̱ʼwáminaʼ ga̱jma̱a̱ numuu ikhaa rúʼko̱ niʼni rí mamínuuʼ. Nda̱wa̱á David niʼthí aʼkhá rí nikudaminaʼ ga̱jma̱a̱ nitanga̱a̱ a̱jkiu̱u̱n mbáa ra̱ʼkhá tháán nidxun rí  Jeobá niʼni mba̱a̱ a̱jkiu̱u̱n kaʼyoo (2 Sam. 12:7-13).

11. Xó má eʼthí náa Efesios 5:3, 4 ndiéjunʼ gándoo gúʼni̱ mu xáʼwaʼ muguaʼdáá wéñuuʼ rá.

¹¹ Ndiéjunʼ ejmañulú náa rí nigíʼnuu David rá. Rí muxnáa núma̱aʼ Jeobá ga̱jma̱a̱ numuu xúgíʼ rí naxnúlú, á mu nu̱ʼni̱ xúʼko̱, xájpátríguáánʼ náa tsáʼkhá rí mba̱ʼwa̱ʼ muguaʼdáá wéñuʼ. Gaʼdxulú ga̱jma̱a̱ xúgíʼ rí kuaʼdáá (atraxnuu Efesios 5:3, 4). * Bi̱ nuʼsngúún ga̱jma̱a̱ numuu Biblia gíʼmaa muʼthúún rí mundxaʼwamíjna̱ xóo mitsaanʼ rí kúwá, ikhú muxnáa̱ núma̱aʼ Jeobá. Á mu nuni̱ xúgi̱ kaʼnii mbá xmáná, ikhiin makuwá ruthi mbá juwan mixtiʼkhu enii náa nutajkháan (1 Tes. 5:18). Lá xúʼko̱ má e̱ʼni̱ mangáánʼ ráʼ. Á mu nundxa̱ʼwa̱míjna̱lú náa xúgíʼ rí Jeobá niʼni ga̱jma̱á numulú muxnáa̱ wéñuuʼ núma̱aʼ, ga̱jma̱a̱ makuwáánʼ gagi jma̱a̱ rí kuaʼdáálu, xúʼko̱ xájngutíguáánʼ náa tsáʼkhá rí mba̱ʼwa̱ʼ muguaʼdáá.

12. Ndiéjunʼ niʼni Judas ga̱jma̱a̱ numuu rí ndiwa̱ʼ magiʼdoo wéñuuʼ rá.

¹² Rí xúgi̱ muʼthá ga̱jma̱a̱ numuu Judas Iscariote. Nduʼyáá rí ikhaa nindxu̱u̱ bi̱ nigujua̱a̱ Jesús, mú nákhá ginii ninindxu̱u̱ májáanʼ xa̱bu̱ (Luc. 6:13, 16). Ma̱ngaa Jesús ndiyáaʼ mu mani̱ndxu̱u̱ xa̱bi̱i̱, ikhaa nikumu̱u̱ kaʼyoo, Ikha jngóo nixnúu caja náa kajti mbújkha̱a̱ mu majmúún náa miʼtáraʼa. Ma̱ndoo muʼthá rí nindxu̱u̱ xóo mbújkha̱a̱ rí nuxná rí mbiʼi xúgi̱ dí maguma ga̱jma̱a̱ ñajunʼ náa xúgíʼ numbaaʼ. Jesús niʼthúún má guapháá rí gíʼmaa muñeumíjna̱ náa rí ndawaʼ maguaʼdáá wéñuuʼ, mú Judas táʼnimbo̱o̱ ikha jngóo nda̱wa̱á nigíʼdúu niʼni kúwáʼ (Mar. 7:22, 23; Luc. 11:39; 12:15).

13. Nguáná nisngájma Judas rí nindoo magiʼdoo wéñuuʼ rá.

¹³ Judas nisngájma rí nindoo magiʼdoo wéñuuʼ nákhá xóo tsékháñuu Jesús. Mbá xkri̱da índo̱ Simón bi̱ gíʼdoo lepra niʼthúu̱n Jesús rí maʼga gajmíi̱n discípulos ndrígóo náa goʼwóo, ma̱ngaa ikhí xtáa María ga̱jma̱a̱ Marta. Índo̱ tri̱gi̱i̱n ruphiʼtsu María nitu̱jxu̱u̱ ga̱jma̱a̱ nixídiramuuʼ náa edxu̱u̱ Jesús mbá aceite rí minumuu wéñuuʼ. Ga̱jma̱a̱ numuu rúʼko̱ Judas gajmíi̱n eʼwíinʼ discípulo nikiʼníin. Discípulo ndrígóo Jesús nindxaʼwamíjna̱ rí mbújkha̱a̱ rúʼko̱ ma̱ndoo majmaa náa majuiʼtáraʼa. Mú Judas nikiʼnáa ga̱jma̱a̱ i̱mba̱ numuu: “Ikhaa nindoo maʼni kúwáʼ” mbújkha̱ʼ rí kajti náa caja. Ga̱jma̱a̱ numuu rí Judas ndiwa̱ʼ magiʼdoo wéñuuʼ ikha jngóo ni̱jkha̱nú nigujua̱a̱ Jesús xóo numuu mbáa yumbáá (Juan 12:2-6; Mat. 26:6-16; Luc. 22:3-6).

14. Xú káʼnii ninimbaníí xa̱bu̱ gajmii rí naʼthí náa Lucas 16:13 rá.

¹⁴ Jesús niʼni marmáʼáan a̱jkiu̱ún rígi̱ xa̱bi̱i̱: “Xándoo mu̱ni̱ ñajuunʼ Dios á mu ikhú má mbuʼyáʼ mbújkha̱a̱” (atraxnuu Lucas 16:13). * Rígi̱ kaʼníí eyambáá asndu rí mbiʼi xúgi̱. Guʼyáá rí niguáʼníí a̱ngiu̱lú gajmii bi̱ kúwá náa Rumania bi̱ ninimbaníí ajngáa rí niʼthí Jesús índo̱ nixruʼún ñajunʼ náa mbá xuajin dí rígá wéñuuʼ mbújkha̱a̱. Ikhiin nithi: “Mba̱a̱ mbújkha̱a̱ gíʼmáanʼxu náa banco. Ikha jngóo niku̱mu̱xu rí ñajunʼ rígi̱ nindxu̱u̱ náa mbá rí ma̱ndoo maʼni tsajkurámáanʼxu Jeobá”. Mú ñajunʼ rígi̱ maʼni rí xáguaʼdáá mbiʼi mu mu̱ni̱ ñajuunʼ Jeobá. Nda̱wa̱á rí nirájxnuxu La Atalaya (Bi̱ Nayejngoo) dí nigájnuu 15 ñajunʼ gu̱nʼ agosto tsiguʼ 2008 rí kayá edxu̱u̱ “Mantengámonos leales con un corazón unificado”, ikhú niraʼwíi mbá rí mu̱ni̱. Ikhiin nithi “Á mu nanduxu muñajunʼ náa i̱mba̱ xuajin mu makánuxu itháan mbújkha̱a̱, makuwáanʼxu rusngajmá rí itháan gíʼdoo numuu mbújkha̱a̱ ki xóo Jeobá, ndu̱ya̱a̱ gajkhun dí rúʼko̱ gáʼni rí xámbájxu̱ gajmiúxu  Jeobá”. Ikha jngóo túndrigú ñajunʼ rúʼko̱, má nda̱wa̱á ikhaa nixkamaa mbá ñajunʼ náa xuajñuu mu makánúu mbújkha̱a̱ mu ma̱ʼtsi̱ rí ndayóoʼ. Ikhaa naʼthí: “Jeobá nambáñún má xúʼko̱ xa̱bi̱i̱”. Nájmi̱i̱n kúwá gagi numuu rí nuni̱ ñajuunʼ Jeobá ki xóo rí mbuyáʼ mbújkha̱a̱.

15. Náá numuu rí nduʼyáá gajkhun rí maʼngo̱o̱ muʼnikáwúmijnálú náa tsáʼkhá ndrígóo Gixa̱a̱ rá.

¹⁵ Á mu ni̱jkuánú nijnguatíguáánʼ náa tsáʼkhá rí nuʼnimbaʼwumíjna̱ ga̱jma̱a̱ rí mba̱ʼwa̱ʼ muguaʼdáá wéñuuʼ. Lá rígá xóo muʼnikáwúmijnálú ráʼ. Xúʼko̱, Pablo niʼthí á mu nijngutíguáánʼ náa tsáʼkhá ndrígóo Gixa̱a̱ ma̱ndoo muʼnikáwúmijnálú ( 2 Tim. 2:26). Rúʼko̱ rí niʼni David, niʼnimbo̱o̱ índo̱ Natán nixprígúu, nitanga̱a̱ a̱jkiu̱u̱n ga̱jma̱a̱ nánguá ndiyáʼ magiʼdoo itháan, xúʼko̱ nindoo nimbájxu̱u̱ mbu̱júu̱ʼ ga̱jma̱a̱ Jeobá. Xámbumulú rí Jeobá gíʼdoo itháan tsiakii ki xóo Gixa̱a̱, á mu nuniʼñamíjnálú rí Jeobá mambáyulú xúʼko̱ ma̱ndoo muʼnikáwúmijnálú náa tsáʼkhá ndrígóo Gixa̱a̱.

16. Ndiéjunʼ gámbáyulú mu xájngutíguáánʼ náa tsáʼkhá ndrígóo Gixa̱a̱ rá.

¹⁶ Xúguaʼthi̱i̱n asndu índo̱ gájngutíguáánʼ náa tsáʼkhá ndrígóo Gixa̱a̱ mbuʼyáʼ xú káʼnii gándoo gúʼnikáwúmíjna̱lú, ma̱ndoo mu̱ʼni̱ gaʼduunʼ asndu nákha wapháá ga̱jma̱a̱ tsiakii ndrígóo Jeobá. Mú xákumulú kuʼyamíjná wéñuuʼ, numuu rí mbaʼin xa̱bi̱i̱ Jeobá bi̱ kúwá má mba̱yu̱u̱ʼ tsiguʼ nunimbaʼumíjna̱ ga̱jma̱a̱ nduyáʼ muguaʼdáá. Guʼtákáñii Jeobá xúgíʼ mbiʼi mu mambáyulú mbuʼyáá á mu nda̱ja̱a̱ ku̱ma̱ rúʼko̱ náa ikháánʼ, xúniʼñámíjná majngutíguáánʼ náa tsáʼkhá ndrígóo Gixa̱a̱ (Sal. 139:23, 24).

17. Ndiéjunʼ rí wíji̱ magíʼnuu Gixa̱a̱ rá.

¹⁷ Gixa̱a̱ nayéjkha̱ tsiguʼ nagrui̱ga̱ tsáʼkhá náa inún xa̱bu̱. Mú nánguá má mba̱yu̱u̱ʼ rí maxtuguáraʼaa nda̱wa̱á maguma gámbáa (Apoc. 20:1-3, 10). !Ra̱ʼkhá tháán eyulú rí ma̱ʼkha̱nú mbiʼi rúʼko̱!. Mú rí xúgi̱ guñawumíjnalú mu xájngutíguáánʼ náa tsáʼkhá ndrígóo Gixa̱a̱. Gu̱ʼni̱ asndu xó má eʼngo̱o̱ mu xúʼnimbaʼumíjna̱ ga̱jma̱a̱ rí mbuʼyáʼ rí muguaʼdáá wéñuuʼ, guʼnimbulúʼ consejo rígi̱: “Guguajún jti̱i̱n Gixa̱a̱ ga̱jma̱a̱ ikhaa gátsingu̱u̱nʼ náa ikháanʼla” (Sant. 4:7).