Ikhúún nixtáá nákha 19 ñajunʼ gu̱nʼ mayo tsiguʼ 1940 náa xuajen rí mbiʼyuu Amiún (Líbano). Mbá nguáthá tsiguʼ nda̱wa̱á nijkuá gákúwáanʼxu náa xuajen rí mbiʼyuu Trípoli. Nixtáá náa mbá familia bi̱ mbá kambájxu̱u̱n ga̱jma̱a̱ ni̱ndxu̱ún míjíinʼ xa̱bu̱ bi̱ nuniʼniiʼ ga̱jma̱a̱ nandún kuyáá Jeobá. Nindxu̱xu̱ ajmáanʼ dí jiámá ga̱jma̱a̱ ajtsíin wa̱ʼxa̱ʼ, mú ikhúún nindxu̱ʼ bi̱ itháán giʼtha̱á. Rí itháán gíʼdoo numuu eʼyoo anu̱ʼ nindxu̱u̱ rí manigajmaa Biblia, maʼgá náa reunión, mambáñún eʼwíinʼ mu muniʼniiʼ Jeobá raʼkháa rí mba̱yáʼ mbújkha̱a̱.

Náa congregación ndrígúxu̱ nikúwi̱i̱n mbaʼin a̱ngiu̱lú bi̱ kaxtaʼwíin, mbáa dí ikhaa nindxu̱u̱ Michel Aboud bi̱ nixná estudio ndrígóo libro. Ikhaa nijmañuu rí gajkhun ga̱jma̱a̱ numuu Biblia náa Nueva York, nda̱wa̱á ni̱jkha̱ gáʼsngáa náa xuajen Líbano índo̱ ndiya̱a̱ tsiguʼ 1920. Narmáʼáan a̱jkiu̱nʼ xú káʼnii eʼyamajkhún ga̱jma̱a̱ nambáñún a̱jmi̱i̱n a̱ngiu̱lú gu̱ʼu̱, bi̱ mbiʼyuu Anne ga̱jma̱a̱ Gwen Beavor bi̱ nirámúnʼ náa Escuela ndrígóo Galaad. Ikhiin nimbájxu̱u̱n májánʼ wéñuuʼ gajmiún bi̱ kúwi̱i̱n náa goʼwóʼ, nguáthá tsiguʼ nda̱wa̱á ra̱ʼkhá tháán nidxu̱ʼ rí nixkama̱a̱ Anne náa Estados Unidos. Nda̱wa̱á ndi̱yo̱o̱ Gwen bi̱  ndiyáa Wilfred Gooch ga̱jma̱a̱ kúwíin ruyambáá náa sucursal dí rígá náa Londres (Inglaterra).

Nákha kaʼníí chíʼgiúnʼ xóó nda̱wi̱i̱n mbaʼin xa̱bi̱i̱ Jeobá náa Líbano, maski ajndu xúʼko̱ nusngúún xa̱bu̱ dí naʼthí náa Biblia rí gídáʼ náa edxu̱xuʼ. Nisngúúnxu xa̱bu̱ maski asndu eʼwíinʼ xa̱bu̱ ede̱ bi̱ kúwíin náa i̱ʼwáʼ religión tsénigunʼ ga̱jma̱a̱ tsíñún, asndu rí mbiʼi xúgi̱ kaʼníí narmáʼáan a̱jkiu̱xu rí niguáʼníí.

Mbá mbiʼi, ikhúún ga̱jmu̱ʼ ndxájuʼ Sana kúwáanʼxu rutaráʼa náa mbá guʼwá mba̱a̱. Índo̱ kúwáanʼxu rutaráʼa náa mbá cuarto, ikhú nigájnuu mbáa ndxajkuun, mbáa xtáa tsáa niʼthúu̱n. Ikhú ndxajkuun nigíʼdu̱u̱ niʼtáweñuuʼ ndxájuʼ ga̱jma̱a̱ nigíʼdu̱u̱ nijmajngu̱u̱ʼ dí asndu nirmajngua̱nʼ náa escalera ndxájuʼ. Ikhú mbáa xa̱bu̱ niʼtárúʼún policía, ikhiin niguwáʼ mbá nacha̱ mu mumbayíí ndxájuʼ numuu rí nigawúunʼ índo̱ nixpátriguíi náa escalera. Ikhú policía nigún kuya̱a̱ ndxajkun ga̱jma̱a̱ ndiyáá rí kayá mbá ajua̱nʼ, bi̱ nayéjkha̱ edxu̱u̱ náa policía nirajxu̱u̱: “Tsáá lá nindxa̱a̱ʼ ikháán, lá nindxa̱a̱ʼ ndxajkun o mbáa bi̱ kayá edxu̱u̱ náa cholo che̱ʼ”.

Ma̱ngaa tsíyoo gámbumuʼ dí niguáʼnííxu mbá mbiʼi índo̱ nitíʼñááxu carru mu muʼguá gútaráʼa náa mbá xuajen mitsínguánʼ. Kuwáanxu rutaráʼa májánʼ asndu índo̱ ndxajkun bi̱ xtáa náa xuajen rúʼko̱ niʼkha̱nú, numuu rí niʼdxuun rí ikhí jnguʼúnxu ga̱jma̱a̱ nigímbíin mbaʼin xa̱bu̱ mu muxnuxu. Xa̱bu̱ niguáʼdi̱i̱ nidaʼ itsí, nixnáá náa edxu̱u̱ anu̱ʼ. Narmáʼáan a̱jkiu̱nʼ dí ra̱ʼkhá tháán tsóworígú eʼdi náa inuu. Ikha jngóo ru̱dúʼ nitanga̱a̱ kayáa anu̱ʼ náa carru ga̱jma̱a̱ xúgiáanʼ nijkhuaaʼxu ga̱jma̱a̱ gamíi. Na̱nguá mbumuʼ dí niʼthí ru̱dúʼ mbiʼi rúʼko̱ índo̱ xtáa rakúdíi inuu anu̱ʼ: “Jeobá atani̱ mba̱a̱ a̱jkia̱a̱nʼ xtañún numuu rí tséyáá dí eni̱”.

I̱mba̱ miʼtsu̱u̱ nijkhuáaʼxu gúñu̱u̱n bi̱ kuñu̱u̱n náa xuajen rí phú nigúwáʼxu. Índo̱ nijkuánúuʼ náa goʼwóo xiʼñúxu ikhí xtáa obispo, mbáa xa̱bu̱ ede̱ bi̱ ra̱ʼkhá tháán gíʼdoo numuu, ikhaa ndaʼyoo rí aniu̱ʼ ni̱ndxu̱ún má xa̱bi̱i̱ Jeobá. Maski ajndu káaʼ góʼdoo majun tsiguʼ ikhaa nirajxu̱ʼ: “Náá numuu rí xóó tséjnguáanʼ iyááʼ ikháán rá.” Ikhúún ni̱thu̱u̱n dí káʼníí chíʼgiúnʼ ga̱jma̱a̱ á mu nandoʼ majngúnʼ iyááʼ ndayóoʼ majmañuʼ itháán dí na̱ʼkha̱ raʼthí náa Biblia ma̱ngaa rí magúʼdoo mbá fe gújkhúʼ. Numuu rí tánigu̱u̱ʼ rí xóo ni̱thu̱u̱n ikhaa niʼthúu̱n xiʼñúnʼ dí ikhúún táyamajkhuu.

Gajkhun má dí na̱nguá mbaʼa nuthu niguaʼnííxu xóo rígi̱. Rí phú gajkhun nindxu̱u̱ dí xa̱bu̱ Líbano ni̱ndxu̱ún xa̱bu̱ míjíinʼ ga̱jma̱a̱ nundriguíin májánʼ xa̱bu̱. Ikha jngóo nanigu̱u̱nʼ dí marathu̱u̱n ga̱jma̱a̱ numuu Biblia ma̱ngaa nusngúnxu mbaʼin xa̱bu̱.

Índo̱ ikhúún kaʼníí xtáá náa escuela, mbáa ndxájulú bi̱ na̱ʼkha̱ náa Venezuela ni̱ʼkha̱ gáʼyuxu náa Líbano. Na̱ʼkha̱ náa reunión ndrígúxu̱, ikhú nigíʼdu̱u̱ nininiiʼ ndxájuʼ Wafa, nda̱wa̱á nidamijná, ikhú nigún gákúwi̱i̱n náa Venezuela. Ndxájuʼ Wafa niʼnirámáʼ carta náa inuu anu̱ʼ niʼthúu̱n rí  nandoo muʼguá mu makuwáanʼxu náa Venezuela numuu rí ndañáanʼxu wéñuuʼ. Nda̱wa̱á niʼngo̱o̱ niʼni dí mu̱ʼguáxu náa Venezuela.

Nijkhuánuxu náa Venezuela tsiguʼ 1953 ga̱jma̱a̱ ni̱jkuá gákúwáanʼxu náa Caracas mijngíí náa xtáa presidente. Numuu rí kaʼníí chiʼgiúnʼ, naniguʼ mba̱yo̱o̱ xóo nanújngoo presidente ga̱jma̱a̱ carriu̱u̱ ma̱ngaa chofe ndrígóo, mú aniu̱ʼ niʼniún mingíjyúuʼ maguʼwún makuwíin ikhí, numuu rí xúgíʼ nindxu̱u̱ nuxi̱ʼ: Xuajen, ajngáa dí nuthi, xóo kúwíin, ganitsu ga̱jma̱a̱ clima. Ndiʼkhún kúwáanʼxu raguʼwun índo̱ nirígá mbá rí niʼni makuwáanʼxu gíná.

Mbá nacha̱ anu̱ʼ nindoo káñuu. Niʼniuxu tsiánguá numuu rí nindxu̱u̱ mbáa xa̱bu̱ mixkujiiʼ ga̱jma̱a̱ ngruigo̱o̱ májánʼ, na̱nguá ermáʼáan a̱jkiu̱xu dí mbóoʼ mbiʼi nindoo káñuu. Mbá nacha̱ nitháán dí gíʼdoo cáncer náa páncreas ndrígóo ikhú nini̱i̱ operar. Phú gíná nindxu̱u̱ dí mbá xmáná nda̱wa̱á nikháñuu.

Nda̱a̱ ajngáa muta̱xu̱ ga̱jma̱a̱ numuu xóo gíná nikúwáanʼxu mbiʼi rúʼko̱. Ikhúún káaʼ gúʼdoo 13 tsiguʼ, nditháan túndxaʼwamíjna̱ dí anu̱xu makhañúu ga̱jma̱a̱ niku̱mu̱xu dí xándoo matangáanʼ makuwáanʼxu gagi mbu̱júu̱ʼ. Mba̱yu̱u̱ʼ tsiguʼ ru̱dúʼ niʼñuu mingíjyúuʼ maxtáa mbáwíí numuu rí ndáwa̱a̱ anu̱ʼ, mú ndiya̱a̱xu̱ rí ndayóoʼ maʼngu̱xu̱. Ga̱jma̱a̱ numuu rí Jeobá nimbáyúxu niʼngo̱o̱ nikúwáanʼxu gagi. Índo̱ nigúʼdoo 16 tsiguʼ niguámbóʼ náa escuela secundaria náa Caracas, niku̱mu̱ʼ rí ndiyóoʼ mambáñún bi̱ kúwíin náa goʼwóʼ.

Tsiguʼ rúʼko̱ ndxájuʼ Sana ndiyáa Rubén Araujo bi̱ nirámuuʼ náa Escuela ndrígóo Galaad ga̱jma̱a̱ nitanga̱a̱ náa Venezuela. Niraʼwíi dí magún gákúwíin náa Nueva York. A̱ngui̱nʼ nithi rí ikhúún ma̱ngaa ndayóoʼ manigajmaa náa universidad, ikha jngóo ni̱jkhá ga̱jmu̱ʼ Sana ga̱jma̱a̱ Rubén náa Nueva York mu manigajmaa ikhí. Índo̱ nixtáá gajmíʼ ikhiin nimbáyuʼ mu mambajxúʼ itháan ga̱jmu̱ʼ Jeobá, ma̱ngaa nimbayúʼ wéñuuʼ a̱ngiu̱lú bi̱ kúwíin náa congregación Brooklyn náa ajngáa xtílóo numuu dí guájun jmbu náa Jeobá. A̱jmi̱i̱n dí ikhiin ni̱jkhánú nimbáxuʼ gajmíʼ, Milton Henschel ga̱jma̱a̱ Frederick Franz bi̱ kúwíin ruñajunʼ náa Betel dí rígá náa Brooklyn.

Índo̱ gítháán maráʼmuʼ dí mbá tsiguʼ náa universidad dí rígá náa Nueva York nigíʼdu̱u̱ nirajximínáʼ, ndiéjunʼ dí xtáá rani̱ rá. Nigúxnuu náa i̱yi̱i̱ʼ La Atalaya náa naʼthí ga̱jma̱a̱ numuu metas rí matani̱ ñajuunʼ Jeobá, rúʼko̱ niʼni dí mandxa̱ʼwa̱mínáʼ. Xtáá ra̱yo̱o̱ dí precursores ga̱jma̱a̱ betelitas bi̱ kúwíin náa congregación ndrígóʼ kúwá gagi ga̱jma̱a̱ xúʼko̱ nindoʼ maxtáá mangúún, mú xóó tséjngúnʼ iyááʼ. Ikha jngóo tájyúuʼ má nijkhánú ndi̱yo̱o̱ rí ndayóoʼ maxnaxímínáʼ náa Jeobá mu ma̱ni̱ ñajuunʼ, xúʼko̱ má ni̱ni̱. Nijngúnʼ iyááʼ nákha 30 ñajunʼ gu̱nʼ marzo tsiguʼ 1957.

Nda̱wa̱á dí nijngúnʼ iyááʼ nindxa̱ʼwa̱mínáʼ maraʼwíí imbo̱o̱ʼ rí ma̱ni̱ dí ma̱ni̱ kájxi̱ ñajuunʼ Jeobá. Mámbá mbiʼi nindoʼ mani̱ndxu̱ʼ itháán precursor, mú ndi̱yo̱o̱ dí rúʼko̱ maʼni mingíjyúuʼ. Nirajximínáʼ,  xú káʼnii gáni̱ magóoʼ horas mu mani̱ndxu̱ʼ precursor á mu xtáá ranigajmaa náa universidad rá. Ikhú nikunguanʼ carta náa Venezuela mu mbuyáá bi̱ kúwíin náa goʼwóʼ ga̱jma̱a̱ ikhiin nixunguáanʼ náa Nueva York, mu xúʼko̱ mathu̱u̱n a̱ngui̱nʼ dí niraʼwíí maniʼñúuʼ escuela mu matanga̱án Venezuela mu mani̱ndxu̱ʼ precursor.

Nitangáanʼ náa Caracas nákha junio tsiguʼ 1957, mú ni̱jkhánú ndiyóo rí bi̱ kúwíin náa goʼwóʼ na̱nguá kúwá májánʼ ndayóoʼ rí mixtambáñún. Ikha jngóo nirajximínáʼ, lá ma̱ndoo mambáñún xáʼ. Nixroʼoʼ mbá ñajunʼ náa banco, mú dí phú nindoʼ rí mani̱ndxu̱ʼ precursor, ga̱jma̱a̱ numuu rúʼko̱ rí nitangáanʼ náa xuajñuʼ. Ikha jngóo niraʼwíí dí mani̱ a̱jma̱ ñajunʼ dí mbá miʼtsúú, rí mañajunʼ náa banco ga̱jma̱a̱ rí mani̱ndxu̱ʼ precursor rúʼko̱ ni̱ni̱ mba̱yu̱u̱ʼ tsiguʼ. Nditháan tágúʼdoo wéñuuʼ ñajunʼ xóo xúgi̱ ga̱jma̱a̱ rí maxtáá gagi.

Imbo̱o̱ʼ dí niʼni maxtáá gagi nindxu̱u̱ rí niniʼniiʼ Sylvia, mbáa dxáʼgú mitsiʼyáa bi̱ na̱ʼkha̱ náa Alemania bi̱ nandoo kaʼyoo wéñuuʼ Jeobá. Ni̱ʼkha̱ gáxtáa gi̱i̱ náa Venezuela gajmíin aniu̱u̱. Nda̱wa̱á nidamíjnáxu ga̱jma̱a̱ niguáʼdiin a̱jmi̱i̱n e̱jñu̱xu bi̱ nixnambiʼí Michel (mu nutha̱a̱nxu Mike) ga̱jma̱a̱ Samira. Ma̱ngaa niraʼwííxu dí ru̱dúʼ ma̱ʼkha̱ gáxtáa ga̱jma̱á ni̱ndxu̱xu̱ mu xúʼko̱ ma̱ndoo muñewa̱a̱n. Maski ajndu niniʼñúunʼ rani̱ndxu̱ʼ precursor mu mañewu̱u̱n bi̱ kúwíin náa goʼwóʼ, mú nitaráʼa má xúʼko̱ xóo mbáa precursor. Mámbá índo̱ naʼngo̱o̱ nanindxu̱xuʼ precursor auxiliar índo̱ naguáʼdááxu vacación.

Experiencia ndrígóʼ dí nitala nákha nigíʼdúu, e̱ji̱nʼ kaʼníí kúwíin náa escuela. Mata̱la dí xtáá májánʼ ga̱jma̱a̱ nduyamajkhuʼ eʼwíinʼ xa̱bu̱ bi̱ nuñajunʼ náa banco. Maski asndu xúʼko̱, nindoʼ dí xa̱bu̱ mbuyoʼ dí ni̱ndxu̱ʼ mbáa xa̱bi̱i̱ Jeobá, tániʼñu̱u̱ʼ randxa̱ʼwa̱mínáʼ rúʼko̱. Ikha jngóo niʼgúnʼ ga̱jmu̱ʼ Sylvia mu muríyáaʼxu cuenta, ndi̱ya̱a̱xu̱ á mu niniʼñúuʼ rañajunʼ náa banco muxnuʼ mba̱a̱ mbújkha̱a̱. Numuu rí na̱nguá gíʼmáanʼxu, ni̱jkuánú ndi̱ya̱a̱xu̱ á mu na̱nguá guáʼdáá wéñuuʼ maʼngo̱o̱ mbújkha̱a̱ rúʼko̱ mba̱yu̱u̱ʼ tsiguʼ.

Dí niraʼwíí ma̱ni̱, rúʼko̱ ninindxu̱u̱ mingíjyúuʼ mú aʼgiuʼ ga̱jma̱a̱ ru̱dúʼ nimbayúʼ wéñuuʼ, ikha jngóo nitangáanʼ nini̱ kájxi̱ ñajuunʼ Jeobá mbu̱júu̱ʼ. ¡Ra̱ʼkhá tháán gagi nixtáá!, ndi̱yo̱o̱ rí ndaa dí marikoʼ ma̱ni̱ ñajuunʼ Jeobá. Mú nda̱wa̱á nirígá mbá rí táguaʼtíi̱nxu.

Mbá mbiʼi, doctor niʼthúxu̱ dí Sylvia kaguewáan mbáa ada̱, rúʼko̱ rí nditháan táguaʼtíi̱nxu ra̱ʼkhá tháán nadxuxu rí maxtáa imba̱a̱ a̱ʼdiúxu  mu makuwáanʼ gajmiúxu, mú káʼníí xtáá randxa̱ʼwa̱mínáʼ ga̱jma̱a̱ numuu rí mani̱ndxu̱ʼ precursor. Nirajximínáʼ, lá ma̱ndoo xóó mani̱ndxu̱ʼ precursor ráʼ.

Índo̱ nitrigáanʼxu̱ ndiya̱a̱ májánʼ meta ndrígúxu̱, ikhú niraʼwíí dí mani̱ndxu̱ʼ má precursor. A̱ʼdióʼ Gabriel nixtáa nákha abril tsiguʼ 1985. Niniʼñúuʼ rañajunʼ náa banco ga̱jma̱a̱ nitangaán ninindxu̱ʼ precursor regular nákha junio tsiguʼ 1985. Nguáthá tsiguʼ nda̱wa̱á ninindxu̱ʼ Comité ndrígóo Sucursal náa xuajen rúʼko̱. Numuu dí Sucursal gíʼ mbá 80 kilómetros náa xuajen Caracas, ikha jngóo ni̱jkhá a̱jma̱ o ajtsú nuthu rí mbá xmáná.

Numuu dí sucursal rígá náa xuajen Victoria, ikha jngóo ndiyóoʼ muraʼwííxu dí muʼguá gákuwáanʼxu ikhí mu ma̱ndoo makuwáanʼ mijngíí náa Betel, rúʼko̱ niʼni wáa kayuuʼ mingíjyúuʼ. Nadxuʼ ga̱jma̱a̱ naxni̱ín núma̱aʼ bi̱ kúwíin náa goʼwóʼ numuu rí nuniñami̱jna̱ magún asndu náá má, rúʼko̱ nambáyuʼ wéñuuʼ. Ndxájuʼ Baha niʼthí rí ikhaa má gáñewu̱u̱n ru̱dúʼ. A̱ʼdióʼ Mike ndiyáa má a̱ʼgu̱, mú Samira ga̱jma̱a̱ Gabriel káʼníí kúwíin ga̱jma̱á ni̱ndxu̱xu̱ʼ. Ikha jngóo ndiyóoʼ muniñu̱u̱ʼ bi̱ nambájxu̱u̱n gajmiún náa Caracas. Ma̱ngaa a̱ʼgiu̱ʼ Sylvia ndiyóoʼ maguʼwuun maxtáa náa mbá xuajen chíʼgíiʼ ga̱jma̱a̱ rí maniñuuʼ capital. Ndiyóoʼ maguʼwunxu makuwáanʼ náa mbá guʼwá chíʼgíiʼ, ikha jngóo dí niraʼwííxu magajnúxu náa Caracas mu muʼguá gákuwáanʼxu náa Victoria niʼni wáa kayuuʼ mingíjyúuʼ.

Nirígá i̱ʼwáʼ dí nixtiʼkhu̱u̱, Gabriel ndiyáa a̱ʼgu̱, Samira ni̱jkha̱ gáxtáa i̱mba̱ ríʼkhá. Índo̱ niʼni 2007 ikhúún ga̱jmu̱ʼ Sylvia nituxu̱ dí muʼguá gákuwáanʼxu náa Betel. Ra̱ʼkhá tháán mitsaanʼ xóo nikúwáanʼxu asndu rí mbiʼi xúgi̱. Mike a̱ʼdióʼ bi̱ giʼnii nindxu̱u̱ anciano ga̱jma̱a̱ precursor ga̱jma̱a̱ a̱ʼgiu̱u̱ bi̱ mbiʼyuu Mónica. Gabriel ma̱ngaa nindxu̱u̱ anciano, xtáa rayambáá náa Italia ga̱jma̱a̱ a̱ʼgiu̱u̱ bi̱ mbiʼyuu Ambra. Samira ma̱ngaa nindxu̱u̱ precursora ga̱jma̱a̱ nayambáá náa Betel xóo voluntaria.

Xúgíʼ mbiʼi dí nixtáá ra̱ʼkhá tháán mbaʼa rí ndiyóoʼ maraʼwíí dí ma̱ni̱, mú na̱nguá tanga̱a̱ a̱jkiu̱nʼ ga̱jma̱a̱ matangaán ma̱ni̱ mbu̱júu̱ʼ á mu nandoo. Naxnáa wéñuuʼ núma̱aʼ Jeobá numuu dí mbaʼa ñajunʼ nindoo ni̱ni̱ náa ikhaa. Mba̱yu̱u̱ʼ tsiguʼ nindoo ndi̱yo̱o̱ dí ra̱ʼkhá tháán gíʼdoo numuu dí mambajxúlú májánʼ gajmiúlú Jeobá, tséʼñuu á mu nuraʼwíí mu̱ʼni̱ mbá rí mba̱a̱ o chíʼgíiʼ, Jeobá ‹maxnúlú tsímáá dí na̱ʼkha̱ náa tsiakii ndrígóo› (Filip. 4:6, 7). Ikhúún ga̱jmu̱ʼ Sylvia kuwáanʼ nadxuxu ru̱ni̱ ñajunʼ náa Betel ga̱jma̱a̱ nduyaxu dí xúgíʼ dí niraʼwíí muníxu nigájnuu májánʼ, numuu rí niku̱mu̱xu ku̱ya̱a̱ má xúʼko̱ Jeobá.