1. Ndiéjunʼ rí nijuiʼthúún xa̱bu̱ bi̱ nirajxi̱ ndiéjunʼ rí gíʼmaa muni rá.

MBAʼIN wéñuʼ xa̱bekha ga̱jma̱a̱ gu̱ʼu̱ niguwáʼ náa Jerusalén bi̱ nuthi mixtiʼkhu ajngáa ga̱jma̱a̱ bi̱ naguwáʼ náa mixtiʼkhu xuajen mba̱ʼu̱. Mbiʼi rúʼko̱ nirígá mbá rí nimbáa tágiʼthu̱u̱n. Tikhun judío nigi̱ʼdi̱i̱ nithi ajngáa dí nuthi xa̱bu̱ buʼko̱. Mú rí itháan nigájnuriyooʼ raʼkháa dí nithi imbo̱o̱ʼ ajngáa, nindxu̱u̱ rí nithi judíos ga̱jma̱a̱ rí niʼthún xúgínʼ xa̱bu̱ apóstol Pedro. Tikhu dí niʼthún nindxu̱u̱ dí ma̱ndoo makáwíin á mu naguáʼdáá fe náa Jesucristo. Ajngáa rúʼko̱ ni̱jkha̱nú asndu náa a̱jkiu̱ún, ikha jngó nirajxi̱, “ndiéjunʼ gíʼmaa munixu rá.” Ikhú Pedro niʼthún: “Mámbáa dí ikháanʼ majngúun iyááʼ” (Hech. 2:37, 38).

2. Ndiéjunʼ guʼyáá náa artículo rígi̱ rá. (Atayáá xtiʼkhuu rí na̱ʼkha̱ náa timbá ináa).

² Dí nirígá nda̱wa̱á nagui̱i̱ wéñuʼ, niʼni rí mbá 3,000 xa̱bu̱ majngún iyááʼ mbiʼi rúʼko̱, mu mani̱ndxu̱u̱n xa̱bi̱i̱ Cristo. Xúʼko̱ nigi̱ʼdu̱u̱ nijuiʼsngúún mbaʼin wéñuʼ xa̱bu̱ xó má niʼtáñajunʼ Jesús muni xa̱bi̱i̱. Ñajunʼ rúʼko̱ narígá má xúʼko̱ náa tsiguʼ 2000. Rí mbiʼi xúgi̱, raʼkháa i̱ndó nguáthá hora eyóoʼ mu xa̱bu̱ maxtáa xawii majngúun iyááʼ. Nguáná ndayóoʼ mbayuʼ gu̱nʼ o mbá tsiguʼ o asndu itháan dí mbá tsiguʼ mu mbáa majngúun iyááʼ. Ndayóoʼ wéñuʼ tsiakii mu mbáa mani̱ndxu̱u̱ xa̱bi̱i̱ Jesús, xó má eyáá bi̱ nusngúún xa̱bu̱ ga̱jma̱a̱ numuu Biblia. Náa artículo rígi̱ mbuʼyáá xóo gumbáñuun bi̱ nuʼsngúún majngún iyááʼ.

3. Xó má eʼthí Mateo 28:19, 20, ndiéjunʼ gíʼmaa maʼni bi̱ naʼnigajmaa mu majngúun iyááʼ rá.

³ Nákhá xóó tséjngúun iyááʼ bi̱ naʼnigajmaa, gíʼmaa magíʼ maʼnimbánuu  dí naʼsngáa náa Biblia (atraxnuu Mateo 28:19, 20). * Índo̱ naʼni xúʼko̱, nindxu̱u̱ xóo “xa̱biya̱ bi̱ nandxa̱ʼóo májánʼ edxu̱u̱” náa xkri̱da dí niʼthí Jesús bi̱ niʼndii mi̱jnu̱ʼ wéñuʼ mu maʼni goʼwóo náa itsí dí gújkhúʼ (Mat. 7:24, 25; Luc. 6:47, 48). Mú xúgi̱ mbuʼyáá ajtsú dí gíʼmaa muʼni mu mumbáyíi bi̱ nuʼsngáá maʼnimbánuu dí najmañuu.

4. Xú káʼnii gándoo mumbáyii bi̱ nuʼsngáá maʼga̱nú majngúun iyááʼ rá. (Ma̱ngaa atayáá kúgumaʼá náa naʼthí: “ Atambáyii bi̱ narasngáá mu magíʼ meta ga̱jma̱a̱ maxkamaa”).

⁴ Gumbaʼyíí bi̱ nuʼsngáá magíʼ mbá dí ma̱ndoo maʼni. Ndíjkha rí gíʼdoo numuu rá. Gundxaʼwámíjná náa xkri̱da rígi̱: Á mu na̱jkua̱ mitsínguánʼ wéñuʼ, mbáa manigulúʼ muguajún mu manújngulú náa mitsaanʼ mu̱ʼgua̱ gúʼyáa. Xúʼko̱ gáʼni dí xúʼyáá mitsínguánʼ wéñuʼ náa na̱jkua̱. Xúʼko̱ má kayuuʼ, índo̱ mbáa bi̱ nuʼsngáá nandxa̱ʼóo edxu̱u̱ tikhu dí maʼni ga̱jma̱a̱ naʼnimbánuu, mbáa xúʼko̱ gáʼga̱nú mbaʼyoo dí na̱nguá má mingíjyúuʼ maʼga̱nú majngúun iyááʼ. Ma̱ndoo mbuʼyáá náa kúgumaʼá náa naʼthí “Rí ma̱ndoo matani” dí na̱ʼkha̱ náa libro Araxtaa gagi kámuu mu mumbaʼyíí bi̱ nuʼsngáá maʼniminaʼ má xúʼko̱. Nda̱wa̱á dí guʼnigajmaa gajmiúlú náa mámbá kíxnuu, guʼtháán xú káʼnii embánii ga̱jma̱a̱ dí magíʼ maʼni rúʼko̱, xó má rí ndiʼkhú nijmañuu. Á mu nandulú muʼthán i̱ʼwáʼ rí ma̱ndoo maʼni, ma̱ndoo muʼnirámáʼ náa naʼthí “I̱ʼwáʼ rí ma̱ndoo matani”. Ma̱ngaa ikhú ma̱ndoo muʼthán mbu̱júu̱ bi̱ nuʼsngáá xóo ejkha̱ ga̱jma̱a̱ asndu ndiéjunʼ má dí nigíminaʼ maʼni.

5. Xó má eʼthí náa Marcos 10:17-22, ndiéjunʼ niʼthúunʼ Jesús maʼni mbáa xa̱bu̱ bi̱ gíʼdoo, ga̱jma̱a̱ ndíjkha niʼthúu̱n xúʼko̱ xá.

⁵ Gumbaʼñún bi̱ nuʼsngúún mu muriʼkhu̱u̱ʼ xóo  kúwíin (atraxnuu Marcos 10:17-22). * Jesús niʼthúu̱n mbáa xa̱bu̱ bi̱ gíʼdoo magujua̱a̱ xúgíʼ, maski ajndu ndiʼyoo dí maʼniuu mingíjyúuʼ wéñuʼ xa̱bu̱ buʼko̱ (Mar. 10:23). Ndíjkha niʼthúu̱n xúʼko̱ xá. Numuu rí nindoo kaʼyoo. Mbáa nguáná tsíyulú gúʼthán bi̱ nuʼsngáá dí magíʼ maʼnimbánuu dí xtáa rajmañuu numuu dí na̱nguá xóó xtáa xawii. Gajkhun ma rí mañu mañúú eʼni rí xa̱bu̱ mariʼkuminaʼ xóo nindxu̱u̱ ga̱jma̱a̱ rí xóo eʼni (Col. 3:9, 10). Mú, á mu itháan má wapháá eʼtháán xa̱bu̱ náa ndayóoʼ mariʼkhu̱u̱, wapháá má gáʼniminaʼ ma̱ngaa. Índo̱ nuʼtámijná gajmiúlú xúʼko̱, makujmaa rí nandulú kuʼyáá (Sal. 141:5; Prov. 27:17).

6. Ndíjkha rí gíʼdoo numuu murajxi̱i̱ xóo endxa̱ʼwáminaʼ xá.

⁶ Gíʼdoo numuu murajxi̱i̱ xóo endxa̱ʼwáminaʼ bi̱ nuʼsngáá. Graxe̱ rúʼko̱ mambáyulú mbuʼyáá xóo ekro̱ʼo̱o̱ ga̱jma̱a̱ xóo eku̱mu̱u̱. Á mu naguʼwunlú nuraxi̱i̱ xúʼko̱, xáʼniulu miʼskhoo muʼtámíjná gajmiúlú dí itháan mingíjyúuʼ nda̱wa̱á. Náa libro Araxtaa gagi kámuu kagu̱ mbaʼa graxe̱ náa naʼthí xóo endxa̱ʼwáminaʼ ikhaa. Mbá xkri̱da náa kíxnuu 4 narajxi̱: “Xú káʼnii xtáa Jeobá índo̱ najmaaʼ mbiʼyuu ku̱ma̱a̱ʼ ikháán rá.” Ga̱jma̱a̱ náa kíxnuu 9 naʼthí graxe̱ rígi̱: “Ndiéjunʼ enigua̱a̱ʼ ikháán marata índo̱ naratájkáan rá.” Mbáa índo̱ nugíʼdi̱i̱ nuʼnigajmaa gajmiúlú maʼniuu miʼskhoo mariʼña̱a̱ graxe̱ xóo rígi̱. Ma̱ndoo mumbaʼñún rí mundxaʼwami̱jna̱ náa texto ndrígóo Biblia ga̱jma̱a̱ xtiʼkhu dí na̱ʼkha̱ náa kíxnuu.

7. Xú káʼnii gándoo majmulú xóo nikúwá eʼwíinʼ mumbaʼñúún bi̱ nuʼsngúún rá.

⁷ Índo̱ bi̱ nuʼsngáá nakro̱ʼo̱o̱ má ndiéjunʼ gíʼmaa maʼni, gajmulú xkri̱da rí xóo nikúwá eʼwíinʼ mu mumbaʼyíí má xúʼko̱ maʼniminaʼ. Mbá xkri̱da, á mu naʼniuu miʼskhoo maʼga̱ reunión, ma̱ndoo musngajmáá video rí kayá edxu̱u̱ Jeobá naxmiéjunʼ kaʼyoʼ, dí na̱ʼkha̱ náa kíxnuu 14 náa naʼthí “Atayáá itháan”. Mbaʼa kíxnuu dí na̱ʼkha̱ náa libro Araxtaa gagi kámuu na̱ʼkha̱ mbaʼa experiencia ndrígu̱ún eʼwíinʼ náa naʼthí “Gajmañaaʼ itháan” o “Atayáá itháan”. * Xúʼthán bi̱ nuʼsngáá: “Á mu ikhaa najmaa ikháán mangáán majmáán” mu xúʼni mbríguii ga̱jma̱a̱ imba̱a̱ xa̱bu̱. Guniʼñáʼ dí ikhaa má gáʼga̱nú mbaʼyoo xúʼko̱, guʼtháán tikhu dí nimbáyúu xa̱bu̱ bi̱ na̱ʼkha̱ náa video dí nimbáyúu magíʼ maʼni dí naʼthí náa Biblia, xó mbá texto ndrígóo Biblia dí gíʼdoo numuu o i̱mba̱ dí niʼni. Mú mámbá índo̱ nandoo, guʼni mbaʼyoo xú káʼnii nimbáyúu Jeobá xa̱bu̱ buʼko̱.

8. Xóo gándoo mumbáyii bi̱ nuʼsngáá maʼndoo kaʼyoo Jeobá rá.

⁸ Gumbáyii bi̱ nuʼsngáá mu maʼndoo kaʼyoo Jeobá. Guʼyáʼ xó gándoo muʼtháán rí xóo nindxu̱u̱ Jeobá. Gumbaʼyíí bi̱ nuʼsngáá mbaʼyoo Jeobá xóo mbáa Dios bi̱ nadxuu a̱jkiu̱u̱n bi̱ xtáa má xúʼko̱ xawii mambáñún bi̱ nandún kuyáá (1 Tim. 1:11; Heb. 11:6). Guʼtháán xóo embáyúu ikhaa rí magíʼ maʼni dí xtáa rajmañuu ga̱jma̱a̱ guʼtháán dí rúʼko̱ nindxu̱u̱ mbá rí xóo nasngájma Jeobá rí nandoo kaʼyoo (Is. 48:17, 18). Índo̱ gándoo kaʼyoo itháan Jeobá xúʼko̱ má gánigu̱u̱ mariʼkuminaʼ ma̱ngaa (1 Juan 5:3).

9. Xó má eʼthí Marcos 10:29, 30, ndiéjunʼ gámbáyúu mbáa xa̱bu̱ maʼniminaʼ majngúun iyááʼ rá.

⁹ Bi̱ nuʼsngáá ndayóoʼ maʼni mbá tsiakii mu majngúun iyááʼ. Xó má xa̱biya̱ bi̱ nigiʼdoo wéñuʼ bi̱ niʼthá náa kutriga̱ 5, mbáa tikhun bi̱ nuʼsngúún ndayóoʼ muniñaaʼ mbaʼa dí gíʼdoo numuu. Mbáa tikhun ndayóoʼ muniñaaʼ ñajunʼ ndrígu̱ún numuu dí nanújngorámuuʼ ikha dí na̱ʼkha̱ náa Biblia. Mbáa tikhun ndayóoʼ muniñaaʼ rambáxu̱u̱n gajmiún tikhun bi̱ na̱nguá eñún kuyáá Jeobá. Mbáa eʼwíinʼ numíniiʼ ga̱jma̱a̱ numuu rí bi̱ kuñúún tsíñún gúñún numuu rí tsénigu̱u̱n kuñúún xa̱bi̱i̱ Jeobá. Jesús niʼthí rí tikhun maʼniún mingíjyúuʼ muni tsiakii rúʼko̱. Mú Jeobá nikudaminaʼ rí maʼnitsajkurámiin xa̱bi̱i̱, rí makuwá má xúʼko̱ bi̱ maʼndún kuñúún (atraxnuu Marcos 10:29, 30). * Xú káʼnii gándoo gumbáyii bi̱ nuʼsngáá mbaʼyoo rí gajkhun rúʼko̱ rá.

10. Ndiéjunʼ ejmañulú dí niʼthí Manuel rá.

¹⁰ Gambáxulúʼ gajmiúlú bi̱ nuʼsngáá. Gíʼmaa maxmiéjunlú gajkhun kuʼyáá ga̱jma̱a̱ gusngajmáá. Ndíjkha rá. Guʼyáá ndiéjunʼ niʼthí mbáa ndxájulú mbiʼyuu Manuel bi̱ na̱ʼkha̱ náa México nákha ikhaa niʼnigajmaa Biblia, naʼthí: “Nákha xóó tségi̱ʼdu̱u̱ maʼnigajmaa gajmuʼ, bi̱ niʼsngóʼ niraxuʼ má xúʼko̱ xú káʼnii xtáá. Rúʼko̱ nimbáyuʼ maʼni̱i̱ a̱jkiu̱u̱n ga̱jma̱a̱ mathu̱u̱n asndu ndiéjunʼ má. Xúʼko̱ niku̱mu̱ʼ dí gajkhun nixmiéjuunʼ kaʼyoʼ”.

11. Ndíjkha rí májánʼ muriʼyáʼ mbiʼi makuwáánʼ gajmiúlú bi̱ nuʼsngáá rá.

¹¹ Xó má niʼni Jesús dí niríyaʼ mbiʼi maxtáa gajmíi̱n xa̱bi̱i̱, xúʼko̱ má guʼni mangáán gajmiúlú bi̱ nuʼsngáá (Juan 3:22). Á mu bi̱ nuʼsngáá naʼniminaʼ má xúʼko̱ ga̱jma̱a̱ á mu nduʼyáá májánʼ, ma̱ndoo muʼthán maʼga̱ náa guʼwúlú maga̱a̱n café, o muʼthán maʼga̱ gakuiʼtsu o mbuʼyáá mbóó gajmiúlú JW Broadcasting dí nagájnuu mámbá igu̱nʼ. Mbáa itháán ganigu̱u̱ʼ á mu  nuʼtháán maʼga̱ índo̱ narígá ndxa̱a̱, numuu dí ikhú mbáa naku̱mu̱u̱ dí xtáa mbáwíi. Kazibwe, bi̱ xtáa náa Uganda, naʼthí: “Mbiʼi rí bi̱ niʼsngóʼ niríyaʼ maxtáa ga̱jma̱á ni̱ndxu̱ʼ nijmañuʼ mbaʼa wéñuʼ ga̱jma̱a̱ numuu Jeobá xó má índo̱ niʼsngóʼ ga̱jma̱a̱ numuu Biblia. Ndi̱yo̱o̱ xú káʼnii Jeobá naxmiéjuunʼ kaʼñún xa̱bi̱i̱ ga̱jma̱a̱ rí xú káʼnii kúwá gagi. Rúʼko̱ dí nindoʼ mangúún”.

12. Ndíjkha rí májánʼ mu̱ʼgua̱ kuʼdiin mixtiʼkun publicador mámbá índo̱ na̱jkua̱ gúxná estudio rá.

¹² Guʼthúún mixtiʼkun publicador mu̱ʼgua̱ gúxná gajmiúlú estudio. Mbáa nakumulú dí na̱nguá mingíjyúuʼ mu̱ʼgua̱ ndajkuáánʼ gúxná estudio o dí mu̱ʼgua̱ gajmiúlú ikháá publicador. Maski ajndu mbáa nguáná rúʼko̱ nakujmaa dí nindxu̱u̱ itháan májánʼ, mú mambáyúu itháan bi̱ nuʼsngáá á mu na̱jkua̱ gajmiúlú mixtiʼkun a̱ngiu̱lú. Dimitri, bi̱ xtáa náa Moldavia, naʼthí: “Mámbáa publicador bi̱ na̱jkha̱ ga̱jma̱a̱ bi̱ naʼsngóʼ mixtiʼkhu enii xóo esngáa, rúʼko̱ nimbáyuʼ makro̱ʼo̱ʼ mixtiʼkhu enii dí xtáá rajmañuʼ ga̱jma̱a̱ na̱nguá nitiyuʼ wéñuʼ maʼgá timbá aʼphu̱ reunión numuu rí naniʼniún má mbaʼin a̱ngiu̱lú xa̱bekha ga̱jma̱a̱ gu̱ʼu̱”.

13. Ndíjkha rí gíʼmaa mumbaʼyíí bi̱ nuʼsngáá maʼga̱ reunión rá.

¹³ Gumbaʼyíí bi̱ nuʼsngáá maʼga̱ reunión. Náá numuu rá. Numuu rí nindxu̱u̱ mbá rí niʼtáñajuunʼ Jeobá ga̱jma̱a̱ rúʼko̱ nindxu̱u̱ mbá rí xóo nduʼyamajkuíí (Heb. 10:24, 25). Ma̱ngaa, a̱ngiu̱lú bi̱ kúwá náa nagimbáánʼ ni̱ndxu̱ún xóo a̱ngiu̱lú mijngii xígi̱ bi̱ nuʼni ñajuunʼ mbóó gajmiúlú Dios. Índo̱ nakuwáánʼ gajmiúlú ikhiin náa reunión, nindxu̱u̱ asndu xóo kuwáánʼ mbóó jnduʼ nundrígú ganitsu. Índo̱ numbaʼyíí mbáa bi̱ nuʼsngáá maʼga̱ reunión, nuʼni rí ikhaa maʼni mbá rí gíʼdoo wéñuʼ numuu mu maʼga̱nú majngúun iyááʼ. Mú mbáa rígá dí narikhoo maʼga̱. Xú káʼnii gándoo majmulú libro Araxtaa gagi kámuu mu mumbaʼyíí xá.

14. Xú káʼnii gándoo gúxkaxi̱i̱ bi̱ nuʼsngáá maʼga̱ reunión rá.

¹⁴ Ma̱ndoo majmulú kíxnuu 10 ndrígóo libro Araxtaa gagi kámuu mu muxkaxi̱i̱ maʼga̱ reunión bi̱ nuʼsngáá. Nákhá xóó tsegájnun mbuyáá xúgínʼ libro rígi̱, nixtadu̱ʼu̱u̱n tikhun publicadores bi̱ najmañún mu mbuyáá kíxnuu rígi̱ gajmiún bi̱ nusngúún, ga̱jma̱a̱ ra̱ʼkhá tháán májánʼ nirígá. Mú gajkhun má xuguaʼthi̱i̱n rí mu̱ʼgua̱ asndu náa kíxnuu 10 muʼthán maʼga̱ reunión bi̱ nuʼsngáá. Wapháá má gugíʼdi̱i̱ muʼthán maʼga̱ ga̱jma̱a̱ guʼtháán má xúʼko̱. Mámbáa bi̱ nuʼsngáá nindxu̱u̱ mixtiʼkuii ga̱jma̱a̱ gíʼdoo dí naʼniuu gakhii. Ikha jngó guʼyáá ndiéjunʼ eyóoʼ mámbáa ga̱jma̱a̱ gundxaʼwámíjná xóo gumbaʼñún. Xájmúlú á mu tséjkha̱ nacha̱ reunión. Gaʼngo̱o̱ a̱jkiu̱lú, mú guʼtháán má xúʼko̱ maʼga̱.

15. Ndiéjunʼ dí mbáa gamíi mamiñún bi̱ nuʼsngáa rá.

¹⁵ Á mu narmáʼáan a̱jkiu̱lú índo̱ ikháanʼ kuwáanʼ ruʼnigájmaa Biblia, lá nimíñulú manindxu̱lú xa̱bi̱i̱ Jeobá ráʼ. Mbáa niku̱mu̱luʼ dí xájmáʼ nditháan muʼtáraʼa mámbá guʼwá. O mbáa nimíñulú dí bi̱ kúwi̱i̱n náa guʼwúlú ga̱jma̱a̱ bi̱ nambáxuʼ gajmiúlú makiʼníin kuyulúʼ. A mu xúʼko̱ niguaʼnii, ma̱ndoo makru̱ʼu̱lú xóo kaʼnii eku̱mu̱u̱ bi̱ nuʼsngáá. Jesús má niʼthí dí tikhun xa̱bu̱ maguaʼdáá gamíi rúʼko̱, mu nimbañúún xa̱bi̱i̱ mu xúniñaʼ dí gamíi marikhún dí xúni̱ ñajuunʼ Jeobá (Mat. 10:16, 17, 27, 28). Xú kaʼnii nimbañúún mu xámiñún xá. Ga̱jma̱a̱, xú kaʼnii gándoo guʼni xúʼko̱ mangáán rá.

16. Xú kaʼnii guʼsngáá mu maʼthúún eʼwíinʼ dí najmañuu bi̱ nuʼsngáá rá.

¹⁶ Guʼsngáá mañu mañúú maʼthúún eʼwíinʼ dí najmañuu bi̱ nuʼsngáá. Xa̱bi̱i̱ Jesús nimíñúún mangiin índo̱ nikuʼmiin magún gutaráʼa. Mú ikhaa nimbañúún mu mbuyáá tsíin gándoo mutaruʼúún ga̱jma̱a̱ ndiéjunʼ gúthi (Mat. 10: 5-7). Xú kaʼnii gándoo guʼyaridáá xkridoo xá. Ma̱ndoo mumbaʼyíí bi̱ nuʼsngáá mbaʼyoo náá gándoo maʼtáraʼa. Mbá xkri̱da, gura̱xi̱i̱ á mu naniniiʼ mbáa bi̱ mambáyúu á mu majmañuu mbá kiʼsngáa dí na̱ʼkha̱ náa Biblia. Nda̱wa̱á gumbáyii maʼni rataminaʼ mu xáʼniun mingíjyúuʼ maʼthí rúʼko̱. Índo̱ gúʼyáá dí ma̱ndoo, guʼniratamijná gajmiúlú dí na̱ʼkha̱ raʼthí náa libro Araxtaa gagi kámuu náa naʼthí “Rí nuthi tikhun” ga̱jma̱a̱ “Dí nurajxi tikhuun”. Índo̱ guʼgua̱ ruʼyáá gajmiúlú ikhí, guʼsngáá majmuu ma̱ja̱nʼ Biblia mu mariʼñaa gua̱ba̱ʼ ga̱jma̱a̱ gamajkhu mbá graxe̱.

17. Xú káʼnii gándoo gájmulúʼ Mateo 10:19, 20, 29-31, mu mumbaʼyíí bi̱ nuʼsngáá maku̱mu̱u̱ kaʼyoo Jeobá rá.

¹⁷ Gumbaʼyíí bi̱ nuʼsngáá maku̱mu̱u̱ kaʼyoo Jeobá. Jesús niʼthún xa̱bi̱i̱ dí Jeobá nandoo kaʼñún ga̱jma̱a̱ numuu rúʼko̱ ikhaa má gambáñúún (atraxnuu Mateo 10:19, 20, * 29-31). * Guʼni marmáʼáan a̱jkiu̱u̱n bi̱ nuʼsngáá dí Jeobá má gámbáyúu ma̱ngaa. Ma̱ndoo muʼsngáá mambáyuminaʼ náa Jeobá índo̱ gúʼthá ndiéjunʼ nigíminaʼ maʼni náa nuʼtájkáan ga̱jma̱á nindxu̱u̱. Franciszek bi̱ xtáa náa Polonia, naʼthí: “Índo̱ naʼtájkháan bi̱ niʼsngóʼ, mbaʼa aʼphu̱ naʼthí ga̱jma̱a̱ numuu dí nigíminaʼ mani. Índo̱ ndi̱yo̱o̱ dí Jeobá nariʼña̱a̱, mbá nacha̱ nigi̱ʼdu̱u̱ nitakáñuu mangúún. Ndi̱yo̱o̱ xú kaʼnii Jeobá nimbáyuʼ mu muxnuʼ permiso maʼgá asamblea ga̱jma̱a̱ maxtáá reunión náa imbo̱ʼ nuxi̱ʼ ñajunʼ dí gúʼdoo”.

18. Xóo eku̱mu̱u̱ Jeobá numuu xúgíʼ ñajuunʼ dí nuni bi̱ nusngáa ga̱jma̱a̱ numuu Biblia rá.

¹⁸ Mú, á mu na̱nguá kuaʼdaa mbáa bi̱ nuʼsngáá numuu Biblia rá. Lá ma̱ndoo mumbáyii mbáa bi̱ najuiʼsngáá majngúun iyááʼ ráʼ. Ma̱ndoo. Xú káʼnii rá. Índo̱ na̱jkua̱ gajmiúlú eʼwíinʼ náa estudio ndrígu̱ún. Nakujmaa kaʼwu dí Jeobá naxmiéjuunʼ wéñuʼ kaʼñúún bi̱ najuiʼsngún ga̱jma̱a̱ numuu Biblia. Ma̱ngaa nanga̱jo̱o̱ wéñuʼ ñajunʼ dí nuʼni mu mumbáñuun xa̱bu̱ muxuʼmamijná náa ikhaa ga̱jma̱a̱ numuu rúʼko̱ nandoo kaʼyulú wéñuʼ (Is. 52:7).