Bi̱ nidamijná nuñajunʼ mbóó, xóo mbáa piloto ga̱jma̱a̱ mbáa copiloto rí nagún mbríguu nájmi̱i̱n ga̱jma̱a̱ nduyáá dí mbóó náa gáguánú. Índo̱ nuraʼníí mbóoʼ xkujndu na̱nguá endxaʼwamíjna̱ ga̱jma̱a̱ i̱ndó numún ikhiin, nundxaʼwamíjna̱ ndiéjunʼ dí gambáñún mbá nájmi̱i̱n, maski ajndu narígá xkujndu.

IKHA RÍ NA̱ʼKHA̱ NÁA BIBLIA: “Nánguá ni̱ndxu̱ún a̱jmi̱i̱n, maʼni̱i̱ imbawíí xa̱bu̱” (Mateo 19:6).

“Bi̱ nidamijná gíʼmaa muñajunʼ mbá kambájxu̱u̱n, mu xúʼko̱ muñajunʼ májánʼ mbríguu” (Cristóbal).

Índo̱ bi̱ nidamijná na̱nguá ñajunʼ mbóó jnduʼ, índo̱ narígá mbá xkujndu na̱nguá enimbáníí, nagiʼdu̱u̱n kaníkiin, rúʼko̱ eʼni dí maʼni itháán mba̱a̱ xkujndu ki xóo nákha ginii.

“Ra̱ʼkhá tháán májánʼ dí muñajunʼ mbóó bi̱ nidamijná. Á mu ikhúún gajmuʼ a̱jmbio̱ʼ na̱nguá eñajunʼxuʼ mbóó, i̱ndó mani̱ndxu̱xuʼ xa̱bu̱ bi̱ káaʼ kúwi̱i̱n náa mbóʼ guʼwá, bi̱ na̱nguá ejmi̱i̱n gúraʼwíí májánʼ dí phú gíʼdoo numuu muni” (Alejandra).

ATRAJXI̱MÍNÁʼ

• Lá natatsaʼwáminaʼ dí mbújkha̱a̱ dí natadaaʼ i̱ndó ndrígáa ikháán ráʼ.

• Lá naku̱ma̱a̱ʼ dí ndayáa xa̱a̱ʼ índo̱ nda̱wa̱a̱ bi̱ ndiyáa ráʼ.

• Lá tsémbájxaaʼ gajmiáanʼ familia ndrígóo bi̱ ndiyáa maski má ikhiin kambájxu̱u̱n wéñuuʼ ráʼ.

ARATAMÍJNÁ GA̱JMA̱A̱ʼ BI̱ NDIYÁA

• Náá mbiʼyaa ñajunʼ ma̱ndoo muni̱ májánʼ mbá nájmáanʼxu rá.

• Náá mbiʼyaa ndayóo’ muriʼkumíjnáxu rá.

• Ndiéjunʼ ma̱ndoo munixu mu muñajunʼ itháán májánʼ mbá kambájxuʼxu rá.

RÍ MA̱NDOO MATANI̱

• Atatsaʼwáminaʼ dí índo̱ nudamijná nindxu̱u̱ xóo mbóo partido ndrígóo basquet. Ndiéjunʼ ma̱ndoo muni mu mutsíinlá’ mbóó, ra̱ʼkháa dí mámbáa gáʼtsíin náa mámbá equipo rá.

• Ra̱ʼkháa i̱ndó matatsaʼwamínáʼ xú káʼnii gándoo maʼngaaʼ ikháán, atatsaʼwáminaʼ xú káʼnii ma̱ndoo maʼngala mbá nájmáanʼ.

“Tséʼñuu tsáa gíʼdoo aʼkhúu̱n. Dí itháán gíʼdoo numuu nindxu̱u̱ dí makuwáanʼla tsímáá ga̱jma̱a̱ dí mambajxála májánʼ” (Emmanuel).

IKHA RÍ NA̱ʼKHA̱ NÁA BIBLIA: “Xúʼyáʼ i̱ndó rí ndayála ikháanʼ, guʼyáʼ rí ndañúunʼ eʼwíinʼ ma̱ngaa” (Filipenses 2:3, 4).