Rígá tikhu ikha dí nambáñúún xabuanii mu mbuyáá xú káʼnii gakúwi̱i̱n, mbá xkri̱da nunimijna mú xúthi dí nduwaʼ.

Mbáa xa̱bu̱ bi̱ ndaʼyoo ndiéjuunʼ nindxu̱u̱ dí májánʼ, naʼni májánʼ ñajunʼ, tséraʼwíin xa̱bu̱, nandxa̱ʼwáminaʼ ga̱jma̱a̱ numún eʼwíinʼ, cualidad rígi̱ tséʼni gakhi̱i̱ wéñuuʼ magiʼdoo mbáa dxámá o dxáʼgú.

IKHA RÍ NA̱ʼKHA̱ NÁA BIBLIA: “Arasngáá ada̱ maʼga náa kamba̱a̱ rí gíʼmaa maʼga ga̱jma̱a̱ índo̱ gíkhíi̱ xágájnutiyo̱o̱ʼ ikhí” (Proverbios 22:6).

Gíʼdoo numuu majmañulú muʼni dí májánʼ rí mbiʼi xúgi̱: “Mbáa a̱ʼgú nikhi̱i̱ bi̱ mbiʼyuu Karyn naʼthí: E̱jñu̱lú ma̱ndoo majmañún dí ra̱májánʼ náa celular ga̱jma̱a̱ tablet, dí maski ajndu kuwáanʼ mbóó gajmiúlú ikhiin nduyáá dí xkawiiʼ kayuuʼ”.

IKHA RÍ NA̱ʼKHA̱ NÁA BIBLIA: “Xabuanii, bi̱ nijmañún mundxaʼwamíjna̱ [...] niʼni rí majmiin mbuyáá xóo mixtiʼkhu nindxu̱u̱ rí májánʼ ga̱jma̱a̱ dí ra̱májánʼ” (Hebreos 5:14).

Gíʼdoo numuu maguaʼdáá gamajkhu. Gíʼdoo numuu muʼthá “mbá péñu” ga̱jma̱a̱ muxnáa “núma̱aʼ”, gíʼmaa maxmiéjunlú kuʼñúún eʼwíinʼ. Mbaʼin xa̱bu̱ na̱nguá egímijna muni̱ rígi̱ numuu dí itháán naxmiéjúnʼ mbuyáá celular ki xóo mudxawún xa̱bu̱ bi̱ kúwá gajmiún.

IKHA RÍ NA̱ʼKHA̱ NÁA BIBLIA: “Guniu̱u̱la eʼwíinʼ xúgíʼ rí nandala muniala ikháanʼ” (Lucas 6:31).

Arathá ndiéjunʼ dí nindxu̱u̱ májánʼ tayáá ikháán. Tikhu estudio dí niguma naguánú nduyáá dí á mu najuiʼsngúún e̱ji̱n asndu náa guʼwún dí xkawiʼ kayuuʼ nindxu̱u̱ dí mata̱ba̱a̱ʼ ga̱jma̱a̱ʼ mbáa bi̱ na̱nguá nindxu̱u̱ ajmbia̱a̱ʼ o a̱ʼgia̱a̱ʼ, rígi̱ gáʼni dí índo̱ gánindxu̱ún jiámá o wa̱ʼxa̱ʼ xúni̱ aʼkhá dí tsaga rígi̱.

RÍ MA̱NDOO MATANI̱: Á mu natadxawíín mbóoʼ dí ra̱májánʼ dí nirígá xíjkhoo arathún: “¡Phú xkawiiʼ kayuuʼ dí nirígá! Náá numuu ku̱ma̱a̱ʼ ikháán dí xúʼko̱ eni̱ xa̱bu̱ rá.” Arathún ndiéjunʼ dí májánʼ gíʼmaa muni̱.

“Mu xáʼniún gakhi̱i̱ muraʼwíí dí muni̱ e̱ji̱n, ginii gíʼmaa mbuyáá ndiéjuunʼ nindxu̱u̱ dí májánʼ ga̱jma̱a̱ dí ra̱májánʼ” (Brandon).

Arasngúún maguaʼdáá gamajkhún. Asndu e̱ji̱n bi̱ itháán majkhiinʼ ma̱ndoo majmañún dí maxmiéjúúnʼ kuñúún eʼwíinʼ ga̱jma̱a̱ muthi “mbá péñu” ma̱ngaa muxnáa “núma̱aʼ”. Náa libro dí mbiʼyuu Parenting Without Borders (Padres sin fronteras) naʼthí: “Índo̱ e̱ji̱n guyáá dí ikhiin ma̱ngaa guaʼdáá numún náa mbá guʼwíin, náa nagún gúnigajmaa ma̱ngaa náa xuajen dí kúwi̱i̱n, rígi̱ gáxkajxi̱i̱n mumbañún eʼwíinʼ”.

RÍ MA̱NDOO MATANI̱: Araxnún dí muni̱ e̱jña̱a̱ʼ mu xúʼko̱ majmañún dí gíʼdoo numuu mumbañún eʼwíinʼ.

“Á mu dí e̱jña̱a̱ʼ najmañún muni̱ ñajunʼ dí narígá náa guʼwáá, rígi̱ gambáñún mu mbuyáá ndiéjuunʼ gúni̱ índo̱ gakúwi̱i̱n ndajkuíín ga̱jma̱a̱ munimbáníí ñajunʼ dí gaguaʼdáá” (Tara).