Dí mataʼgíʼ meta dí matani̱ tsíyoo gáʼthúu̱n mbóoʼ dí i̱ndó nanigua̱a̱ʼ maʼga̱nú marigá. Mú matani̱ rígi̱ ndayóoʼ matríyaʼ májánʼ awan, matriʼkhu̱u̱ xóo matiejunʼ ga̱jma̱a̱ matani̱ mbá tsiaki̱i̱ mu maʼnga̱a̱ʼ matanimbaníí.

Á mu mbá dí nitraʼwíí matani̱ ni̱ndxu̱u̱ chíʼgíiʼ o mba̱a̱ ma̱ndoo manújngoo nguáthá mbiʼi, gu̱nʼ o tsiguʼ. Mu maʼnga̱a̱ʼ matanimbaníí mbóoʼ dí ndajyúuʼ, ndayóoʼ mataʼgíʼ matani̱ mañu mañúú.

Índo̱ gáʼnga̱a̱ʼ gátanimbaníí dí nitraʼwíí matani̱, maʼni dí maku̱ma̱a̱ʼ dí ikháán majmáán matani̱ i̱ʼwáʼ ñajunʼ ga̱jma̱a̱ maraʼdiin bi̱ mambajxáaʼ gajmiáanʼ ga̱jma̱a̱ maʼdxuu a̱jkia̱a̱nʼ.

Maku̱ma̱a̱ʼ dí ikháán majmáán matani̱ i̱ʼwáʼ ñajunʼ. Á mu nataʼgíʼ matani mbóoʼ dí chíʼgíiʼ ga̱jma̱a̱ naʼnga̱a̱ʼ natanimbaníí, rúʼko̱ gáʼni dí mataʼgíʼ matani̱ dí itháán mba̱a̱. Ma̱ngaa rígi̱ gáʼni dí maʼga̱a̱ matani̱ ga̱jma̱a̱ʼ xkujndu dí natraʼníí mámbá mbiʼi, xóo mbóoʼ dí natsudán matani̱.

Maraʼdiin bi̱ mambajxáaʼ gajmiáanʼ. Xúgiáanʼ nandulú mambajxulú gajmiúlú xa̱bu̱ bi̱ nduyáá ndiéjuunʼ dí nandún muni̱ ga̱jma̱a̱ nuni̱ tsiakimíjna̱ munimbáníí, ma̱ngaa nduyáá asndu náá mbríga̱a̱ eʼngu̱u̱n muni̱. Naʼni dí mambajxulú itháán májánʼ gajmiúlú eʼwíinʼ índo̱ nuñajunʼ mbóó gajmiúlú.

Maʼdxaaʼ itháán. Índo̱ naʼnga̱a̱ʼ natanimbaníí mbóoʼ dí nitraʼwíí matani̱ naʼni maʼdxuu a̱jkia̱a̱nʼ.

“Naniguʼ magíʼ meta dí mani numuu dí rúʼko̱ naʼni dí xániʼñúuʼ manújngoo xúʼkhiín mbiʼi ga̱jma̱a̱ naʼni mba̱yo̱o̱ dí rígá mbóoʼ dí nandoʼ manimbánuu. Ra̱ʼkhá tháán mitsaanʼ nindxu̱u̱ índo̱ naʼnga̱a̱ʼ natanimbaníí mbóo dí nanigua̱a̱ʼ, numuu dí naʼni marmáʼáan a̱jkia̱a̱nʼ ga̱jma̱a̱ naratá: ‹Niʼngo̱ʼ ninimbanúu›” (Cristóbal).

IKHA RÍ NA̱ʼKHA̱ NÁA BIBLIA: “Bi̱ ndaʼyoo giñáánʼ xáʼdu ga̱jma̱a̱ bi̱ ndaʼyoo du̱u̱n nda̱a̱ rí gágujxi̱i̱” (Eclesiastés 11:4).

Mu mataʼgíʼ mbá meta dí matani̱ ga̱jma̱a̱ maʼnga̱a̱ʼ matani̱ mbáníí, atani̱ xó má eʼthí gi̱i̱.

Atraʼwíí dí matani̱. Ataniraʼmáʼ xúgííʼ dí nandaaʼ matani̱, nda̱wa̱á atraʼwíí ndiéjuunʼ gátagíʼdi̱i̱ mu maʼnga̱a̱ʼ matanimbaníí.

Atríya̱ʼ májánʼ awan. Xígi̱ káʼnii gátani̱ ga̱jma̱a̱ mámbá dí gátraʼwíí:

• Ataniraʼmáʼ mbiʼi dí nandaaʼ mambáaʼ.

• Ataniraʼmáʼ xú káʼnii gídxúʼ ratani̱ mbáníí.

• Atatsaʼwáminaʼ xú káʼnii xkujndu gátraʼníí ga̱jma̱a̱ xkáʼnii gátanimbánii.

Atagíʼdi̱i̱ matani̱ má. Atatsaʼwáminaʼ ginii ndiéjuunʼ gátani̱ mu maʼnga̱a̱ʼ matanimbaníí dí nitagíʼ matani̱. Índo̱ gátanimbaníí mbá chíʼgíiʼ ariejún matayaa xúgííʼ dí niʼnga̱a̱ʼ nitani̱.

IKHA RÍ NA̱ʼKHA̱ NÁA BIBLIA: “Awan rí naríya’ bi̱ nañajun’ magajnúu májánʼ” (Proverbios 21:5).