Dí matani̱ mba̱a̱ a̱jkia̱a̱nʼ nandoo gáʼthúu̱n dí mambumaaʼ dí raʼkhí niʼñaaʼ mbáa ga̱jma̱a̱ dí xátiejxíi sia̱nʼ. Rígi̱ na̱nguá eyoo gáʼthúu̱n dí nigíʼnaa na̱nguá gíʼdoo numuu o matani xóo nda̱a̱ má dí nirígá.

IKHA RÍ NA̱ʼKHA̱ NÁA BIBLIA: “Gaʼngo̱o̱ a̱jkia̱la ga̱jma̱a̱ gu̱ni̱ mba̱a̱ a̱jkia̱la kuyamíjna̱ má xúʼko̱, maski ajndu mbáa gíʼdoo mbá numuu rí maxiéʼka ga̱jma̱a̱ numuu i̱mba̱a̱” (Colosenses 3:13).

“Índo̱ nandaaʼ xtayáá mbáa na̱nguá tayáá náa nakiéʼkúun, i̱ndó natayáá náa naʼniminaʼ maʼni dí májánʼ” (Aarón).

Á mu natiéjxi̱i̱ sia̱nʼ, maʼñaa nandii ga̱jma̱a̱ maʼni dí maraxtaa gíná ma̱ngaa maʼni gachúu xóo embájxa̱a̱ʼ ga̱jma̱a̱ʼ bi̱ ndiyáa.

“Mbá miʼtsú a̱jmbio̱ʼ nindo̱ʼo̱ʼ dí mani mba̱a̱ a̱jkiu̱u̱n ka̱yo̱o̱ numuu dí niʼni gawúunʼ wéñuuʼ, maski ajndu niʼñuʼ gakhi̱i̱, mú nini mba̱a̱ a̱jkiu̱nʼ ka̱yo̱o̱. Nagáwíinʼ a̱jkiu̱nʼ dí táni wapháá, mbáa asndu tumíníinʼxu wéñuuʼ á mu xúʼko̱ ni̱ni̱” (Julia).

ATRAJXI̱MÍNÁʼ

Atrajxi̱mínáʼ rígi̱ índo̱ naʼnigawáanʼ bi̱ ndiyáa:

• Lá tséjyúu egawúnʼ ráʼ.

• Lá ndayóoʼ mathu̱u̱n maʼni mba̱a̱ a̱jkiu̱u̱n kaʼyoʼ o i̱ndó ma̱ndoo mambumuu xúʼkhíin dxe̱ʼ.

ARATAMÍJNÁ GA̱JMA̱A̱ʼ BI̱ NDIYÁA

• Nguáthá mbayuuʼ enújngoo mu muni mba̱a̱ a̱jkiu̱nxu kuʼyamijnáxuʼ rá.

• Ndiéjuunʼ gándoo gúnixu̱ mu muni mba̱a̱ a̱jkiu̱xu̱ wapháá kuyamíjnaxu rá.

RÍ MA̱NDOO MATANI

• Índo̱ bi̱ ndiyáa naʼni gawáanʼ xáku̱ma̱ʼ dí niʼni kiejuunʼ.

• Gakrua̱ʼa̱a̱ʼ xtayáá bi̱ ndiyáa, xámbumaaʼ dí “xúgiáánʼ nakiéʼkulu mbaʼa nuthu” (Santiago 3:2).

“Tséʼni gakhi̱i̱ muni mba̱a̱ a̱jkiu̱xu̱ kuyamíjna̱ índo̱ nájmáanʼ kuaʼdáá aʼkhúxu̱, mú ra̱ʼkhá tháán gakhi̱i̱ matani mba̱a̱ a̱jkia̱a̱nʼ índo̱ mbawíí gíʼdoo aʼkhúun. Mu matani mba̱a̱ a̱jkia̱a̱nʼ xtayáá mbáa ndayóoʼ mani̱ndxa̱a̱ʼ xa̱bu̱ wabaaʼ” (Kimberly).

IKHA RÍ NA̱ʼKHA̱ NÁA BIBLIA: “Ataniminaʼ matanimbánii wapháá xkujndu” (Mateo 5:25).