NA̱JKHA̱ INÚN XABUANII
6. Ataxprígúún
NDIÉJUUNʼ EYOO GÁʼTHÚU̱N RÁ.
Rí mataxprígúún ejña̱a̱nʼ nandoo gáʼthúu̱n rí maraxnu̱u̱n ikha, marasngúún, ga̱jma̱a̱ marathu̱u̱n náa dí raʼkhí e̱ni̱, ma̱ngaa marasngúún muraʼwi̱i̱ muni dí májánʼ ga̱jma̱a̱ dí xájngawi̱i̱n.
NDÍJKHA RÍ GÍʼDOO NUMUU RÁ.
Náa iwáá tsiguʼ, mbaʼin xabuanii nánguá xprigún e̱jñu̱ún numuu dí namíñúún muni gawúúnʼ. Mú xabuanii bi̱ míjíinʼ nugíʼ ikha ga̱jma̱a̱ nusngúún e̱jñu̱ún mu munimbaníí.
“Nda̱ñúunʼ majuiʼthúún e̱ji̱n asndu náá ma̱ndoo muni, mu maguánú mani̱ndxu̱ún míjíinʼ xabuanii ga̱jma̱a̱ awa̱án gúraʼwíí dí muni. Á mu tserígá xúʼko̱, mani̱ndxu̱ún xóo mbá barco dí na̱nguá gíʼdoo timón: Maʼga̱nú mbóoʼ mbiʼi dí mbaʼ gáʼgáá ga̱jma̱a̱ maguʼwi̱i̱n” (Pamela).
NDIÉJUUNʼ GÁNDOO MATANI RÁ.
Ataxpríguíí ga̱jma̱a̱ xó má dí naʼni. Á mu a̱ʼdiáaʼ na̱nguá eʼnimbo̱o̱ aratháán dí mbaʼyóoʼ mataxpríguíí. Á mu naʼnimbo̱o̱ aratháán dí májánʼ niʼni.
“Mámbá mbiʼi nathu̱u̱n dí májánʼ eni̱ e̱ji̱nʼ numuu dí nunimbu̱ún, numuu dí náa numbaaʼ rígi̱ nimbáa nánguá eʼnimbo̱o̱. Rúʼko̱ nambáñúún mu xáʼñúún gakhi̱i̱ munimbu̱ún índo̱ naxprígún” (Cristina).
IKHA RÍ NA̱ʼKHA̱ NÁA BIBLIA: “Rí xtáa raʼdu mbáa, rúʼko̱ má gágujxi̱i̱” (Gálatas 6:7).
Awáán gátani̱i̱. Índo̱ gátaxpríguíí a̱ʼdiáaʼ atatsaʼwáminaʼ ga̱jma̱a̱ numuu nguáthá tsiguuʼ, xóo e̱jma̱ endxaʼwáminaʼ ga̱jma̱a̱ nguáthá mba̱a̱ dí nikiéʼkúun. Nañambáá wéñuuʼ dí mataxpríguíí índo̱ naʼni mbá dí ra̱májánʼ. Mbá xkri̱da, á mu a̱ʼdiáaʼ na̱nguá eʼnimbo̱o̱ dí niratháán ga̱jma̱a̱ xóo majmuu celular, mbáa ma̱ndoo matrígú kaʼyííʼ o ni xájmuu wéñuuʼ. Mú xátani maʼni itháán mba̱a̱ xkujndu.
“Nandxa̱ʼwa̱mínáʼ á mu a̱ʼdióʼ táʼnimbo̱o̱ kaʼyoʼ gajuunʼ o gajkhun nijnga̱wa̱a̱n. Na̱nguá nindxu̱u̱ ikháá dí mataxpríguíí índo̱ tséʼnimbo̱o̱ ki xóo matambáyii mbaʼyoo náa nijnga̱wa̱a̱n” (Santiago).
IKHA RÍ NA̱ʼKHA̱ NÁA BIBLIA: “Xúni̱ rí makiʼníin ejñala, mu xákáguabiinʼ” (Colosenses 3:21).
Atani̱ ga̱jma̱a̱ ngajua. Á mu nataxprígúún ejña̱a̱nʼ ga̱jma̱a̱ ngajua, ikhiin mbuyáá ga̱jma̱a̱ xáʼñúún gakhi̱i̱ munimbu̱ún índo̱ gátaxprígúún ga̱jma̱a̱ xátangi̱ín muni ikháá má mbu̱júu̱ʼ.
“Índo̱ a̱ʼdiúxu nakiéʼkúun nutha̱a̱nxu dí nadxuxu ga̱jma̱a̱ xúgííʼ dí niraʼwíí maʼni nákha wapháá. Ma̱ngaa nutha̱a̱nxu á mu nariʼkhu̱u̱ dí naʼni xátanga̱a̱ maʼni kikháá ga̱jma̱a̱ dí ikháanʼxu̱ mumbáyíí” (Daniel).
IKHA RÍ NA̱ʼKHA̱ NÁA BIBLIA: “Ngajua naʼngo̱o̱ a̱jkiu̱u̱n ga̱jma̱a̱ májánʼ a̱jkiu̱u̱n” (1 Corintios 13:4).
