NA̱JKHA̱ INÚN XA̱BU̱ BI̱ NIDAMIJNÁ
3. Gamajkhu
NDIÉJUUNʼ EYOO GÁʼTHÚU̱N RÁ.
Índo̱ xa̱bu̱ bi̱ nidamijná naguaʼdáá gamajkhu náa bi̱ ndiya̱a̱ ma̱ngaa naxmiéjúúnʼ kuñún tséʼniuu má á mu na̱nguá mbríguii rí naku̱mu̱ún. Libro Diez claves para transformar tu matrimonio naʼthí: “Xa̱bu̱ gajmii na̱nguá guanún ga̱jma̱a̱ i̱ndó dí nundxaʼwamíjna̱ o dí naku̱mu̱ún ikhiin. Dí nuni̱ nindxu̱u̱ rí nutamijná ga̱jma̱a̱ numuu xkujndu rí guáʼdáá ma̱ngaa nudxawíín dí naʼthí imba̱a̱ ga̱jma̱a̱ gamajkhu. Nda̱wa̱á nambánúún muni rí mambáñúún mbá najmiin”.
IKHA RÍ NA̱ʼKHA̱ NÁA BIBLIA: “Ngajua [...] na̱nguá eyáʼ i̱ndó rí ndayóoʼ” (1 Corintios 13:4, 5).
“Ikhúún nasngajmá rí ndayamajkhuu a̱ʼgiu̱ʼ índo̱ nda̱yo̱o̱ rí gíʼdoo numuu ga̱jma̱a̱ na̱nguá eni̱ nimbá dí maʼni gawúunʼ ikhaa o mani gachúu rí xóo embájxuʼ gajmuʼ” (Miqueas).
NDÍJKHA RÍ GÍʼDOO NUMUU RÁ.
Índo̱ xa̱bu̱ bi̱ nidamijná na̱nguá eyamajkhumijná, najmún ajngáa mu mutha numamijná, mutsijmamijná o munigawúmijná. Xa̱bu̱ bi̱ nduyáá nuthi dí rígi̱ maʼga kagui̱i̱n muniñamijnáá.
“Di majmaaʼ ajngáa dí raʼkhí, dí xárata kaʼwu o natatsíjmaa a̱ʼgia̱a̱ʼ maʼni dí maxtáa ngíná ga̱jma̱a̱ xákumu̱u̱ kaʼyaaʼ” (Brayan).
NDIÉJUUNʼ GÁNDOO MATANI̱ RÁ.
ATRAJXI̱MÍNÁʼ
Atatsaʼwáminaʼ xú káʼnii ratamíjná ga̱jma̱a̱ʼ bi̱ ndiyáa ma̱ngaa xú káʼnii nimbájxala náa iwáá xmáná rígi̱. Nda̱wa̱á atriʼña̱a̱ graxe̱:
-
Guata nuthu niratá numáá xá. Ga̱jma̱a̱ guata nuthu niratháán mbóoʼ ajngáa rí májánʼ xá.
-
Xú káʼnii nitasngájma rí nitayamajkuíí xá.
ARATAMÍJNÁ GA̱JMA̱A̱ʼ BI̱ NDIYÁA
-
Ndiéjuunʼ ajngáa dí najmuxu̱ o dí nunixu nasngájma rí nduyamajkumijnáxu rá.
-
Ndiéjuunʼ ajngáa dí najmuxu̱ o dí nunixu tsesngájma rí nduyamajkumijnáxu rá.
RÍ MA̱NDOO MATANI̱:
-
Mámbáa dí ikháanʼ gaʼnirámáʼ ajtsú enii xóo naniguala masngájma gamajkuu ajmbiala o a̱ʼgia̱la. Araxnáá i̱yi̱ʼ dí nitaniraʼmáʼ bi̱ ndiyáa ga̱jma̱a̱ nda̱wa̱á gunitsiakimijnala mu munimbáníla dí nigumaraʼmáʼ.
-
Ataniraʼmáʼ náa mbá i̱yi̱ʼ cualidad dí gíʼdoo bi̱ ndiyáa ga̱jma̱a̱ dí nanigua̱a̱ʼ, ma̱ngaa aratháán xú káʼnii nanigua̱a̱ʼ rí nasngájma xúgííʼ cualidad rígi̱.
“Ikhúún nasngajmá rí ndayamajkhuu a̱jmbio̱ʼ índo̱ nani dí naniguuʼ ga̱jma̱a̱ nandoʼ dí maxtáa gagi. Na̱nguá má eyóoʼ matani mbá dí mba̱a̱ wéñuuʼ mu matasnga̱jmá rí natayamajkuíí” (Megan).
Dí itháan gíʼdoo numuu ni̱ndxu̱u̱ dí bi̱ ndiyáa maku̱mu̱u̱ dí natayamajkuíí, raʼkháa dí ikháán makumaaʼ dí xtaʼdáá gamajkuaaʼ.
IKHA RÍ NA̱ʼKHA̱ NÁA BIBLIA: “Gusngajmá dí nagáwíinʼ a̱jkia̱la kuyamíjna̱, gu̱nila rí májánʼ, ganindxa̱la xa̱bu̱ guabaaʼ, xákiʼnáanʼla ga̱jma̱a̱ gaʼngo̱o̱ a̱jkia̱la” (Colosenses 3:12).
