NA̱JKHA̱ INÚN XA̱BU̱ BI̱ NIDAMIJNÁ
1. Gunimbáníí rí nixuʼdámíjna muni̱
NDIÉJUUNʼ EYOO GÁʼTHÚU̱N RÁ.
Índo̱ xa̱bu̱ bi̱ nidamijná nduyáá dí gíʼdoo numuu munimbáníí dí nixudamijna muni̱ ga̱jma̱a̱ dí makuwá mbóó jnduʼ asndu kámuu. Na̱nguá exmiéjúúnʼ dí maʼga̱nú mbóoʼ mbiʼi dí muniñamijna̱á maski ajndu mbaʼa enii dí gúraʼníí.
Tikhuun xa̱bu̱ bi̱ nidamijná kúwíin mbóó numuu dí nutsudiin bi̱ kúwíin náa guʼwún o bi̱ nambájxu̱u̱n gajmiún. Mú itháán májánʼ dí makuwá mbóó numuu dí nandún kuyamijná ga̱jma̱a̱ nduyamajkumijná.
IKHA RÍ NA̱ʼKHA̱ NÁA BIBLIA: “Xa̱biya̱ ragíʼmaa maniñuuʼ a̱ʼgiu̱u̱” (1 Corintios 7:11).
“Índo̱ bi̱ nidamijná nduyáá dí gíʼdoo numuu tsékiʼníi nacha̱ wéñuuʼ ga̱jma̱a̱ tséʼñuu miʼskhaa dí muni mba̱a̱ a̱jkiu̱ún kuyamijná, ma̱ngaa xkujndu dí gúraʼníí xúyáá dí mba̱a̱ wéñuuʼ dí asndu maguánú muniñamijna̱á” (Miqueas). a
NDÍJKHA RÍ GÍʼDOO NUMUU RÁ.
Á mu bi̱ ninigu̱nʼ nduyáá dí ragíʼdoo numuu dí nidamijná, índo̱ guguaʼdáá xkujndu mundxaʼwamíjna̱ dí tsembayúmijná, ikhú mbuyáʼ dí muniñamijna̱á.
“Mbaʼin xa̱bu̱ bi̱ ninigu̱nʼ nduyáʼ dí muni̱ mu muniñamijna̱á. Á mu nitanigúúnʼ o nitanújúnʼ ga̱jma̱a̱ natatsaʼwáminaʼ dí matatsiʼñáanʼ mbóoʼ mbiʼi bi̱ ndiyáa, nandoo gáʼthúu̱n dí na̱nguá tayáá dí gíʼdoo numuu matanimbaníí dí niratá matani̱” (Juana).
NDIÉJUUNʼ GÁNDOO MATANI̱ RÁ.
ATRAJXI̱MÍNÁʼ
Xú káʼnii tani índo̱ natagiʼda̱a̱ʼ ga̱jma̱a̱ʼ ajmbia̱a̱ʼ o a̱ʼgia̱a̱ʼ rá.
-
Lá nagáwíinʼ a̱jkia̱a̱nʼ rí ndiyáa xáʼ.
-
Lá natatsaʼwáminaʼ xú káʼnii gáraxtaa á mu ndiyáa imba̱a̱ xa̱bu̱ o a̱ʼgu̱ ráʼ.
-
Lá naratá “maniʼñáánʼ” o “mbaʼyáaʼ imba̱a̱ bi̱ maxtáá gajmuʼ itháán májánʼ” dxe̱ʼ.
Á mu nitri̱ʼña̱a̱, xúʼko̱, náa mbóoʼ o mbá xúgííʼ graxe̱ rígi̱, rí xúgi̱ gíʼmaa ma̱ta̱ya̱a̱ dí gíʼdoo numuu matanimbaníí dí nitaxúdaminaʼ matani.
ARATAMÍJNÁ GA̱JMA̱A̱ʼ BI̱ NDIYÁA
-
Lá naku̱ma̱a̱ʼ dí nánguá gíʼdoo numuu matanimbáníí dí nitaxúdaminaʼ matani ráʼ. Á mu dí xúʼko̱, náá numuu rá.
-
Ndiéjuunʼ gándoo matani mu ma̱ta̱ya̱a̱ dí gíʼdoo numuu matanimbaníí dí nitaxúdaminaʼ matani̱ rá.
RÍ MA̱NDOO MATANI̱
-
Ataniraʼmáʼ mbá i̱yi̱ʼ náa inuu ajmbia̱a̱ʼ o a̱ʼgia̱a̱ʼ náa maratha̱a̱n dí nandaaʼ xtayáá.
-
Araʼdáá fotiúu bi̱ ndiyáa náa natiejunʼ o náa billetera ndrígáaʼ.
-
Aratáráʼáá bi̱ ndiyáa xúgííʼ mbiʼi índo̱ natiejunʼ o índo̱ na̱nguá xtaa gajmaaʼ mbóó.
IKHA RÍ NA̱ʼKHA̱ NÁA BIBLIA: “Rí niruwaa Dios, xárkuájiiʼ nimbáa xa̱bu̱” (Mateo 19:6).
[Nota]
a Nixtiʼkhuu mbiʼñún tikhun.
