NA̱JKHA̱ INÚN JIÁMÁ GA̱JMA̱A̱ WA̱ʼXA̱ʼ
10. Ganindxa̱a̱ʼ bi̱ ma̱ndoo maku̱mu̱ún kuyaaʼ
NDIÉJUUNʼ EYOO GÁʼTHÚU̱N RÁ.
Xa̱bu̱ bi̱ ma̱ndoo maku̱mu̱ún kuyáá, naʼnimbánuu ikha dí nakhánáá maʼni, naʼnimbánuu dí nikudaminaʼ maʼni ga̱jma̱a̱ naʼthí má xúʼko̱ di gajkhun. Xúʼko̱ eʼni dí anu̱u̱ ga̱jma̱a̱ ru̱dúu̱, bi̱ nambájxu̱u̱ gajmíi̱n ma̱ngaa xa̱bu̱ bi̱ nañajuunʼ ga̱jma̱a̱, maku̱mu̱ún kuyáá.
NDÍJKHA RÍ GÍʼDOO NUMUU RÁ.
Gíʼmaa matasnga̱jmá dí nindxa̱a̱ʼ mbáa xa̱bu̱ bi̱ ma̱ndoo maku̱mu̱ún kuyáá, mu xúʼko̱ ma̱ndoo muxnaaʼ matani xó má eyaaʼ ikháán.
“Mu ana̱a̱ʼ ga̱jma̱a̱ ru̱dáʼ ma̱ndoo maku̱mu̱ún kuyaaʼ, gíʼdoo numuu dí manindxaaʼ mbáa bi̱ nadxaʼóo májánʼ edxu̱u̱ bi̱ naʼnimbánuu dí kaʼyoo maʼni, raʼkháa i̱ndó natani xúʼko̱ índo̱ xtaa gajmiáanʼ ikhiin” (Sara).
IKHA RÍ NA̱ʼKHA̱ NÁA BIBLIA: “Gusngajmá má xúʼko̱ mu mbu̱ya̱a̱ xóo nindxa̱la” (2 Corintios 13:5).
NDIÉJUUNʼ GÁNDOO MATANI̱ RÁ.
Tikhu consejo dí na̱ʼkha̱ gi̱i̱ mambáyáaʼ dí ana̱a̱ʼ ga̱jma̱a̱ ru̱dáʼ maku̱mu̱ún kuyaaʼ mbu̱júu̱ʼ o matani rí maku̱mu̱ún kuyaaʼ itháan.
Arathá dí gajkhun. Á mu nathani nduwaʼ, xa̱bu̱ ní xákumu̱ún kuyaaʼ. Á mu naratá má xúʼko̱ dí gajkhun ga̱jma̱a̱ nathani xó má kaʼyoo, itháan má índo̱ najngawa̱a̱n, rúʼko̱ gáʼni dí eʼwíinʼ maku̱mu̱ún kuyaaʼ.
“Na̱nguá eʼni gakhi̱i̱ marata dí gajkhun índo̱ rígá dí nambáyaaʼ má ikháán, mú índo̱ naratá má xúʼko̱ dí gajkhun maski ajndu migamíi magíʼnaa dí raʼkhí naʼni dí eʼwíinʼ maku̱mu̱ún kuyaaʼ” (Germán).
IKHA RÍ NA̱ʼKHA̱ NÁA BIBLIA: “Nanduxu mu̱tha̱ rí gajkhun náa xúgíʼ” (Hebreos 13:18).
Atanimbánii dí kaʼyoo matani. Itháan rí mbá taguaphi̱i̱n xa̱bu̱ bi̱ guaʼdáá ñajunʼ mbaʼu náa Estados Unidos, nithi dí bi̱ nunimbánii dí kaʼyoo muni nindxu̱u̱ “mbá dí gíʼdoo wéñuʼ numuu mu muxkamaa ajndu xkáʼnii má ñajunʼ”. Rí majmañaaʼ matanimbánii rí kaʼyoo matani xúgi̱, rúʼko̱ gámbáyáaʼ wéñuʼ índo̱ gáʼni nikhiin.
“Á mu nanimbánuu mbá nacha̱ dí nuthu̱nʼ dí asndu tséyóoʼ má muthu̱nʼ mbaʼa nuthu, anu̱ʼ ga̱jma̱a̱ rúdu̱úʼ naguánu nduyáá rúʼko̱. Ikha jngóo índo̱ nanimbánuu dí kaʼyoo mani, naku̱mu̱ún kuyoʼ itháan” (Sara).
IKHA RÍ NA̱ʼKHA̱ NÁA BIBLIA: “Nda̱yo̱o̱ má rí matani̱ dí natha̱nʼ, [...] ga̱jma̱a̱ rí matani̱ itháan ki xóo rí naniraʼmáʼ” (Filemón 21).
Gaʼngo̱o̱ a̱jkia̱a̱nʼ. Xájyúuʼ ma̱ndoo ma̱ta̱ya̱a̱ índo̱ mbáa xa̱bu̱ niriʼkuminaʼ dí mbájníi, mú ndajyúuʼ mbayuuʼ ma̱ta̱ya̱a̱ á mu nadxaʼwóo má májánʼ edxu̱u̱.
“Xándoo dí ana̱a̱ʼ ga̱jma̱a̱ ruda̱áʼ o eʼwíinʼ xa̱bu̱ maku̱mu̱ún kuyaaʼ mbá nacha̱, mú á mu dí nindxa̱a̱ʼ bi̱ naʼnimbánuu dí kaʼyoo, rúʼko̱ gáʼni dí maku̱mu̱ún kuyaaʼ itháan” (Brandon).
IKHA RÍ NA̱ʼKHA̱ NÁA BIBLIA: “Gusngajmá dí [...] naʼngo̱o̱ a̱jkia̱la” (Colosenses 3:12).
