NÁA IWÁÁ TSIGUʼ, NIJUIʼYÁʼ WÉÑUUʼ GA̱JMA̱A̱ NUMUU XÚ KÁʼNII KÚWÍIN BI̱ NUNIMBÁTI̱GA̱A̱ MBÁA BI̱ KUYÁÁ. Mú, xó má ndiʼyáá dí nuthi bi̱ najmañún nasngájma ku̱ma̱ dí na̱ʼkha̱ náa Biblia. Rígi̱ nakujmaa kaʼwu dí consejo dí na̱ʼkha̱ ikhí nayambáá asndu mbiʼi xúgi̱. Ma̱ngaa Biblia ra̱ʼkhá i̱ndó naxnúlú ikha dí mambáyulú. Ma̱ngaa naxnúlú ikha rí xándoo muxkamaa náa i̱ʼwáʼ libro ga̱jma̱a̱ naʼni̱i̱ a̱jkiu̱ún bi̱ ninimbáti̱ga̱a̱ mbáa bi̱ nandún kuyáá.

• Bi̱ kuʼñúún na̱nguá kúwá rumíniiʼ nda̱wa̱á rí nikháñun.

  Náa Eclesiastés 9:5 naʼthí dí bi̱ nikháñún ‹nánguá eya nditháan kayuuʼ›, ku̱ma̱ ndrígu̱ún niguámbáa (Salmo 146:4). Ikha jngóo náa Biblia naʼnimbrígui̱i̱ rí nakháñulú ga̱jma̱a̱ ginuʼ (Juan 11:11).

• Naʼni̱i̱ a̱jkiu̱lú rí kuaʼdáá fe náa Dios bi̱ nandoo kaʼyulú.

  Náa Biblia naʼthí dí: “Jeobá * ndaʼñún bi̱ jmbiin ga̱jma̱a̱ naʼdxawún índo̱ nunda̱ʼa̱a̱ mambáñún” (Salmo 34:15). Rí muʼtháán Dios xú kaʼnii ku̱mu̱lú nambáyulú itháán ki xóo muʼtháán mbáa xa̱bu̱. Dí phú nambáyulú nindxu̱u̱ dí mambájxulú gajmiúlú bi̱ Niʼniáánʼ bi̱ ma̱ndoo majmuu tsiakii ndrígóo mu maʼni̱i̱ a̱jkiu̱lú.

• Mbá rí májánʼ kua̱ʼthi̱i̱n nda̱wa̱á.

  Náa Biblia naʼthí mbaʼa nuthu dí matangi̱ín makuwá mbu̱júu̱ʼ bi̱ nikháñún. Mbá xkri̱da, Dios naʼthí xú kaʼnii gákúwi̱i̱n mbu̱júu̱ʼ náa tsu̱du̱u̱ Ku̱ba̱ʼ nda̱wa̱á. Ikhí naʼthí: “Dí makudi̱i̱ xúgíʼ iyaʼ idún [xúgíinʼ xa̱bu̱], ni xákháñún itháan, ni xárígá itháan tsingíná ni má xtambi̱ya̱ʼ ni má ga̱ʼkhu̱” (Apocalipsis 21:3, 4). Lá naʼngo̱o̱ natatsaʼwáminaʼ xóo gáʼni ikhú ráʼ.

Ga̱jma̱a̱ numuu dí kuaʼthi̱i̱nlú mbuʼñún mbujuáaʼ bi̱ nikháñún, mbaʼin xa̱bu̱ bi̱ nunimbu̱ún náa Jeobá Dios bi̱ ajngóo rí na̱ʼkha̱ náa Biblia, nambáñúún mu maʼngu̱u̱n ga̱jma̱a̱ tsíginá dí ikhiin ninimbáti̱ga̱a̱ mbáa ndxájúún. Mbá xkri̱da, Ann bi̱ niʼnimbáti̱ga̱a̱ ajmbio̱o̱ nda̱wa̱á rí 65 tsiguʼ dí nixtáá ga̱jma̱a̱, naʼthí: “Náa Biblia naʼthí dí a̱ngiu̱lú bi̱ nikháñún na̱nguá kúwá rumíniiʼ ga̱jma̱a̱ dí Dios makujxi̱ín xúgíinʼ bi̱ gíʼdiin náa ku̱ma̱ ndrígóo. Nandxa̱ʼwa̱mínáʼ má xúʼko̱ rígi̱. Índo̱ narmáʼáan a̱jkiu̱nʼ eʼni a̱jmbio̱ʼ, rúʼko̱ nambáyuʼ maʼngo̱ʼ náa ga̱jmá rí nigíʼnuu”.

Tina, bi̱ niʼthá ga̱jma̱a̱ numuu ginii naʼthí: “Asndu mbiʼi rí nikháñuu Timo ndi̱yo̱o̱ xu kaʼnii Dios nimbáyúʼ. Jeobá nimbáyúʼ má xúʼko̱ náa mbiʼi gakhi̱i̱. Ndi̱yo̱o̱ rí gajkhun nindxu̱u̱ dí naʼthí náa Biblia dí nda̱wa̱á matangi̱ín makuwá mbu̱júu̱ʼ bi̱ nikháñún, rúʼko̱ naxnúʼ tsiakii mu maxtáá asndu índo̱ gátanga̱án mba̱yo̱o̱ Timo”.

Ajngáa rígi̱ nasngájma xú káʼnii ku̱mu̱ún xa̱bu̱ bi̱ nduyáá rí gajkhun dí na̱ʼkha̱ raʼthí náa Biblia. Á mu ikháán natatsaʼwáminaʼ dí nindxu̱u̱ xóo mbá xnuʼndaa dí na̱ʼkha̱ raʼthí náa Biblia. Atayáʼ ma̱ta̱ya̱a̱ dí consejo rí na̱ʼkha̱ ikhí nayambáá ga̱jma̱a̱ dí nijuiʼtáriyaʼ nambánuu. Ikhú mi̱dxu̱ʼnú ma̱ta̱ya̱a̱ rí Biblia nambáñún wéñuuʼ bi̱ ninimbáti̱ga̱a̱ mbáa bi̱ kuyáá.

Náa ináa ndrígóo Internet jw.org ma̱ndoo mataxkamaa video rí naʼthí ga̱jma̱a̱ numuu rígi̱.

 DÍ EGUÁʼNÍÍ ÍNDO̱ NAKHÁÑULÚ RÁ.

LÁ MANIGUA̱A̱ʼ MATADXAWÍÍN AJNGÁA RÍ MÁJÁNʼ RÁʼ.