KÍXNUU 6
Ikha rí májánʼ
NDIÉJUNʼ NINDXU̱U̱ RÁ.
Nindxu̱u̱ índo̱ mbáa xa̱bu̱ ndaʼyoo rí nindxu̱u̱ májánʼ ga̱jma̱a̱ dí ra̱májánʼ. Rígi̱ tsixtiʼkhuu maski ajndu naxtiʼkhuu xóo xtáa. Nindxu̱u̱ mbá jnduʼ ikha rí naʼthúu̱n rí maʼni maski ajndu nda̱wa̱á tsáa eʼyoo.
NDÍJKHA GÍʼDOO NUMUU RÁ.
Rí mbiʼi xúgi̱ bi̱ nunigajmaa gajmiún, ajmúú, películas ga̱jma̱a̱ programas rí nagájnuu náa televisión naʼni rí e̱ji̱n maguaʼdáá mbá ku̱ma̱ raʼkhí numuu rí tséyáá xú káʼnii nindxu̱u̱ rí májánʼ ga̱jma̱a̱ dí ra̱májánʼ. Ku̱ma̱ rúʼko̱ naʼni rí mbaʼyoo mixtiʼkhu ikha rí nikánaa.
Rígi̱ itháan narígá índo̱ ni̱ndxu̱ún jiáma o wa̱ʼxa̱ʼ. Náa libro Beyond the Big Talk (Nda̱wa̱á “ada̱ naʼtámíjná ga̱jma̱a̱ anu̱u̱”) naʼthí rí ikhú jiáma o wa̱ʼxa̱ʼ “gíʼmaa makuwá xawii numuu rí náa escuela a̱ngiu̱ún ga̱jma̱a̱ náa i̱yi̱i̱ʼ o náa i̱ʼwáʼ ajua̱nʼ nutsudíín mu majmaʼnuʼ itháan. Gíʼmaa majmañún muraʼwíí rí muni xó má ikha rí nikhánún maski ajndu muni i̱mba̱ núthu ki xóo bi̱ nambáxu̱u̱n gajmiún”. Nakujmaa kaʼwu rí ikha rígi̱ gíʼmaa mixnún nákha xóó majkhinʼ.
XÚ KÁʼNII GÍ’SNGÚN IKHA RÍ MÁJÁNʼ XÁ.
Atagíʼ mbá ikha rí gíʼmaa maʼnimbánuu
IKHA RÍ NA̱ʼKHA̱ NÁA BIBLIA: “Xa̱bu̱ wanuu [...] najmañún mundxaʼwa̱a̱ májánʼ edxu̱ún mu muraʼwíí rí májánʼ ga̱jma̱a̱ dí ra̱májánʼ” (Hebreos 5:14).
-
Atayáá rí nuni. Gajmaaʼ rí narígá mámbá mbiʼi ga̱jma̱a̱ atani mbríguii. Mbá xkri̱da, arathá: “Rígi̱ nindxu̱u̱ rí marata̱ rí gajkhun. Rígi̱ nindxu̱u̱ rí xárata rí gajkhun”. “Rígi̱ nindxu̱u̱ rí matani rí jmbu. Rígi̱ nindxu̱u̱ rí xátani rí jmbu”. “Rígi̱ nindxu̱u̱ májánʼ. Rígi̱ na̱nguá nindxu̱u̱ májánʼ”. Nda̱wa̱á a̱ʼdiáaʼ mbaʼyoo rí ikha májánʼ nagujtuminaʼ ga̱jma̱a̱ rí maʼni.
-
Arathún náa numuu rí gíʼmaa munimbánii ikha rí májánʼ. Atani rí mandxa̱ʼóo edxu̱u̱ a̱ʼdiáaʼ mu xúʼko̱ maʼsngóo ku̱ma̱ ndrígóo. Mbá xkri̱da, atraxi̱i̱: “Ndíjkha rí itháan májánʼ marata̱ rí gajkhun rá.” “Ndíjkha rí matani nduwaʼ maʼni rí xambáxu̱u̱n ga̱jma̱á ni̱ndxa̱ʼ” o “ndíjkha dí raʼkhí matani kuʼwáʼ rá.”
-
Arathá xú káʼnii eyambáá rí ma̱ta̱ya̱a̱ rí gíʼdoo numuu ikha rí májánʼ. Ma̱ndoo maratha̱a̱n: “Á mu naratá rí gajkhun xa̱bu̱ munimbu̱ún kuyaaʼ” o “á mu nanindxa̱ʼ májaanʼ xa̱bu̱, eʼwíínʼ maʼndún mambaxúún ga̱jma̱á ni̱ndxa̱ʼ”.
Atani rí bi̱ kuwa náa guʼwáaʼ munimbánii ikha rí májánʼ
IKHA RÍ NA̱ʼKHA̱ NÁA BIBLIA: “Gusngajmá má xúʼko̱ rí xú káʼnii nindxa̱laʼ” (2 Corintios 13:5).
-
Xúgínʼ bi̱ kuwa náa guʼwáaʼ gíʼmaa munimbánii ikháá má ikha rí májánʼ, xúʼko̱ ma̱ndoo marata̱:
-
“Ikháanʼ tséʼni nduwaaʼ”.
-
“Náa guʼwúlú nimbáa tséxnúu imba̱a̱ ni má tseʼndxaʼwájmaa”.
-
“Ikháanʼlu tséʼta wéñumíjná”.
-
Xúʼko̱, a̱ʼdiáaʼ mbaʼyoo rí ikha raʼkháa i̱ndó nindxu̱u̱ mbá xtángoo rí gíʼmaa maʼnimbánuu, nindxu̱u̱ mbá rí nasngájma xóo ni̱ndxu̱ún bi̱ kuwa náa goʼwóo.
-
Gajmaaʼ rí narígá mámbá mbiʼi mu maratha̱a̱n a̱ʼdiáaʼ ga̱jma̱a̱ numuu ikha rí nunimbaníí mbá guʼwáanʼ. Ma̱ndoo matani mbríguii ga̱jma̱a̱ ikha rí nunimbaníí a̱ngui̱i̱n o rí najuiʼthá náa i̱yi̱i̱ʼ o i̱ʼwáʼ ajua̱nʼ rí najmaʼnuuʼ. Atraxi̱i̱: “Ndiéjunʼ gátani á mu ikháán” o “ndiéjunʼ gúʼni ikháanʼ náa guʼwúlú rá.”
Ataniminaʼ rí e̱jña̱ʼ maguaʼdáá má xúʼko̱ ikha rí májánʼ
IKHA RÍ NA̱ʼKHA̱ NÁA BIBLIA: “Gaguaʼdáá mbá conciencia májánʼ” (1 Pedro 3:16).
-
Arathún rí májánʼ eni. Índo̱ a̱ʼdiáaʼ naʼnimbánuu ikha rí májánʼ, aratháán rí májánʼ niʼni ga̱jma̱a̱ aratháán náa numuu rí májánʼ ninindxu̱u̱ rí niʼni. Mbá xkri̱da, ma̱ndoo maratha̱a̱n: “Niratá rí gajkhun. Nadxuʼ wéñuʼ ga̱jma̱a̱ numaaʼ”. Á mu a̱ʼdiáaʼ naʼtháanʼ rí niʼni mbá dí ra̱májánʼ, araxnáa núma̱aʼ rí niʼthí ga̱jma̱a̱ nda̱wa̱á gataxpríguii.
-
Ataxprígun índo̱ nuni dí raʼkhí. Atambáyii a̱ʼdiáaʼ mu maraʼnuu rí niʼni. E̱ji̱n gíʼmaa mbuyáá rí nini dí ra̱májánʼ ga̱jma̱a̱ náa numuu rí náa guʼwálaʼ tsénigunʼ rígi̱. Tikhun xa̱bu̱ tsíñún muni gawúunʼ e̱jñún, mú á mu nuthúún rí nini mambáñun mu musngáá ku̱ma̱ ndrígu̱ún ga̱jma̱a̱ mbuyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ.
