Nindxu̱u̱ mbá rí nambáyulú muraʼníí xkujndu o gaʼkhu rí asndu xákaguabáanʼ. Rígi̱ naraʼdáá índo̱ nadxuʼ rakhi̱i̱n. Xó má mbáa ada̱ mu majmañuu maʼga majngrádaaʼ má tsiekii, ma̱ngaa mu maxtáa májánʼ náa vida ndrígóo mbaʼyóoʼ maraʼnuu gaʼkhu.

Tikhun e̱ji̱n nakáguabiinʼ índo̱ rígá mbá rí tsegájnuu májánʼ, nuraʼníí mbá xkujndu gakhi̱i̱ o índo̱ mbáa naxprígún, ga̱jma̱a̱ eʼwíínʼ e̱ji̱nʼ nánguá etangi̱i̱n muni. Mú májánʼ rí makru̱ʼu̱u̱n rígi̱:

• Xáʼngu̱u̱n muni xúgíʼ xóo gíʼmaa (Santiago 3:2).

• Xúgiáanʼ nuraʼníí mbiʼi gakhi̱i̱ (Eclesiastés 9:11).

• Xúgiáanʼ ndayóoʼ rí muxprigúlú. I̱ndó xúʼko̱ majmañulúʼ (Proverbios 9:9).

Á mu a̱ʼdiáaʼ najmañuu naraʼnuu xkujndu, maʼngo̱o̱ maraʼnuu xúgíʼ xkujndu rí gáʼkha̱nú inuu.

Índo̱ najngawi̱i̱n

IKHA RÍ NA̱ʼKHA̱ NÁA BIBLIA: “Mbáa xa̱bu̱ jmbii ma̱ndoo maxpátri̱ga̱a̱ asndu mbá juwan nuthu, ga̱jma̱a̱ matuxi̱i̱ mbu̱júu̱” (Proverbios 24:16).

Atambáyii a̱ʼdiáaʼ mu awáán gáʼyoo xúgíʼ. Mbá xkri̱da, ndiéjunʼ gáʼni á mu tsénújngoo examen xá. Lá makáguabaaʼ ga̱jma̱a̱ maʼthí: “¡Nimbá rí nani tsegájnuu májánʼ!”

Mu marasngáá a̱ʼdiáaʼ maraʼnuu xkujndu, atambáyii mandxaʼwáminaʼ ndiéjunʼ gándoo maʼni xóó itháan. Xúʼko̱ maraʼnuu xkujndu ki xóo rí mamínuuʼ. 

Mú xátanimbánii xkujndu ndrígóo. Atambáyii mu ikhaa maʼnimbánuu. Ma̱ndoo matraxi̱i̱: “Ndiéjunʼ gátani mu makruaʼaʼ itháan májánʼ materia rí nusngáaʼ xá.”

Índo̱ narígá mbá gamiéjunʼ

IKHA RÍ NA̱ʼKHA̱ NÁA BIBLIA: “Tséya̱a̱ ikháanʼla dí gúgiʼnii dí mbiʼi gajtsi” (Santiago 4:14).

Tsetayáá ndiéjunʼ gátagíʼnii. Mbújkha̱a̱ ga̱jma̱a̱ rí xóo májánʼ xtaa ma̱ndoo mandáti̱ga̱a̱ mbá nacha̱. Xóo eʼthí náa Biblia: “Bi̱ nagáñun tseʼngu̱u̱n gagáñun, xa̱bu̱ bi̱ guáʼdáá tsiakii tseʼngu̱u̱n guxmijná, [...] numuu rí na̱jkha̱nú mbiʼi ga̱jma̱a̱ gamiéjunʼ rí na̱nguá kuaʼti̱i̱n naguaʼnii xúgiáanʼ” (Eclesiastés 9:11).

 Ikháán natani xúgíʼ rí naʼngo̱o̱ mu matiewa̱a̱n a̱ʼdiáaʼ náa tsáʼkhá. Mú xándoo matiewa̱a̱n náa xúgíʼ tsáʼkhá rí gáraʼnuu náa vida ndrígóo.

Mbáa a̱ʼdiáaʼ xóó chíʼgíʼ ikha jngó xóó tsendáti̱go̱o̱ mbá ñajunʼ o tséminuuʼ ga̱jma̱a̱ numuu mbújkha̱a̱, mú mbáa rígá i̱ʼwáʼ xkujndu rí naraʼnuu xóo rí ní xambáxu̱u̱ ga̱jma̱a̱ mbáa o índo̱ nakháñuu mbáa bi̱ kaʼyoo. *

Índo̱ nuxprigún

IKHA RÍ NA̱ʼKHA̱ NÁA BIBLIA: “Atadxawíín xtágabu [...] mu xúʼko̱ manindxa̱ʼ mbáa xa̱bu̱ bi̱ ndaʼyoo nda̱wa̱á” (Proverbios 19:20).

Rí muxpriguíí tsíyoo gáʼthúu̱n rí nuni gínáa. Rígi̱ mambáyúu mu mariʼkhu̱u̱ mbá dí ra̱májánʼ rí naʼni.

Rí marasngáá a̱ʼdiáaʼ magruigú xtágabu mambáyaʼ ikháán ga̱jma̱a̱ ikhaa. Mbáa xa̱bu̱ bi̱ mbiʼyuu John naʼthí: “Á mu natanimbaníí xúgíʼ xkujndu ndrígóo a̱ʼdiáaʼ ikhaa xájmañuu nditháan. Magiʼdoo má xúʼko̱ xkujndu, ga̱jma̱a̱ ikháán matani numa̱a̱ xúgíʼ xkujndu rí gákudaminaʼ a̱ʼdiáaʼ. Rúʼko̱ gáʼni rí xáraxtaa tsímáá ga̱jma̱a̱ʼ a̱ʼdiáaʼ”.

Xú káʼnii gándoo gátambáñun e̱jña̱ʼ mundrigú xtágabu rá. Índo̱ mbáa gaxprígúu náa escuela o i̱mba̱ níʼkhá, xáratha̱a̱n rí ikhaa tséyóoʼ maʼdxuun xtágabu rúʼko̱. Itháan májánʼ matraxi̱i̱:

• “Náa numuu rí nixpriguáʼ xá.”

• “Xú káʼnii gándoo matani itháan májánʼ rá.”

• “Ndiéjunʼ gátani i̱mba̱ miʼtsu rí gátagíʼniin rígi̱ rá.”

Garmáʼáan a̱jkia̱nʼ, rí índo̱ guxpriguíí a̱ʼdiáaʼ mambáyúu xúgi̱ ga̱jma̱a̱ nda̱wa̱á.