Mambajxáaʼ gajmiáanʼ xúgíinʼ
Mbaʼin xa̱bu̱ naʼniún gakhi̱i̱ mambaxúun gajmiún eʼwíínʼ. Guʼyáá tikhu ikha rí na̱ʼkha̱ náa Biblia rí ma̱ndoo mambáyulúʼ mu mambaxúlúʼ májánʼ gajmiúlú eʼwíínʼ.
XAXMIÉJUANʼ I̱NDÓ GA̱JMA̱A̱ NUMAAʼ
IKHA RÍ NA̱ʼKHA̱ NÁA BIBLIA: “Xaxmiéjuanla kuyamíjna̱ i̱ndó ga̱jma̱a̱ numala ikháanʼ, ma̱ngaa gíʼmaa maxmiéjuanla ku̱ñu̱u̱n eʼwíínʼ” (Filipenses 2:4).
DÍ EYOO GÁʼTHÚU̱N. Mu ma̱ndoo mambaxúlúʼ májánʼ gajmiúlú eʼwíínʼ, ndayóoʼ rí muxná raʼkháa i̱ndó muguaʼthi̱i̱n rí makhánulúʼ. Rí maxmiéjuanʼ xtayaminaʼ i̱ndó ikháán, ma̱ndoo maʼni rí nimbáa xándoo mambaxúu ga̱jma̱á ni̱ndxa̱ʼ. Mbá xkri̱da, náa xa̱bu̱ gajmii, á mu mbáa dí ikhaa i̱ndó naxmiéjuunʼ kaʼyaminaʼ mbáa asndu maʼga̱nú maʼninduwaaʼ bi̱ ndiyáa. Mbáa bi̱ naʼnimbamínáʼ ga̱jma̱a̱ rí gíʼdoo ma̱ngaa rí najmañuu, xágiʼdiin bi̱ mambaxúu gajmíi̱n. Xó má eʼthí náa libro El camino del carácter, rí i̱ndó maxmiéjuanʼ xtayaminaʼ nda̱a̱ rí gayambáá.
DÍ GÁNDOO MATANI
-
Atambáñun eʼwíínʼ. Mbáa bi̱ nambáxa̱ʼ májánʼ ga̱jma̱a̱ʼ ma̱ndoo maratha̱a̱n asndu dí má eyaʼ ikháán, ma̱ngaa xtáa xawii mu mambáyaaʼ. Xó má nuthi tikhun xa̱bu̱ bi̱ nduyáá, rí xa̱bu̱ bi̱ nuniu̱u̱n rí májánʼ eʼwíínʼ tsixmiéjúúnʼ wéñuʼ ga̱jma̱a̱ nakúwá itháan májánʼ.
-
A̱ku̱ma̱a̱ʼ xóo eku̱mu̱ún eʼwíínʼ. Rígi̱ nandoo gáʼthúu̱n rí mataniminaʼ makumaaʼ mangáán xóo naku̱mu̱u̱ imba̱a̱ xa̱bu̱. Á mu ikháán natani xúʼko̱ kaʼnii, rúʼko̱ gáʼni rí xájmaanʼ ajngáa rí matani gawíínʼ mbáa.
Rí maku̱ma̱a̱ʼ xóo eku̱mu̱u̱ imba̱a̱, rúʼko̱ gáʼni rí maʼngo̱o̱ a̱jkia̱nʼ. Rí ma̱nindxa̱a̱ʼ mbáa xa̱bu̱ xúgi̱ kaʼnii, mambáyaʼ maʼndaaʼ xtañún xúgíinʼ enii xa̱bu̱ ga̱jma̱a̱ ma̱ndoo mataxkamiin bi̱ mambajxáa gajmiáanʼ bi̱ mixtiʼkhu náa eguwáʼ.
-
Atríyaʼ mbiʼi maraxtaa gajmiáanʼ eʼwíínʼ. Mbá rí mambáyulúʼ muniʼnúnʼ eʼwíínʼ nindxu̱u̱ rí muríyáʼ mbiʼi mu makuwáanʼ gajmiúlú. Mu muguaʼdiin bi̱ mambáxulu májánʼ gajmiúlú, ndayóoʼ muʼtámíjná gajmiúlú. Ikha jngó gajmañaaʼ matadxun rí gúthi bi̱ nambáxa̱a̱ʼ gajmiáanʼ ga̱jma̱a̱ gaxmiéjuanʼ xtañún. Xíjkhóó xa̱bu̱ bi̱ nunigajmaa ga̱jma̱a̱ numuu rígi̱, niguánu ndiyáá rí “xa̱bu̱ bi̱ nutamijná májánʼ nakúwá itháan tsímáá”.
ATRAʼWÍIN MÁJÁNʼ BI̱ MAMBAXÁAʼ GAJMIÁANʼ
IKHA RÍ NA̱ʼKHA̱ NÁA BIBLIA: “Rí mambaxáʼ gajmiáanʼ bi̱ nuni dí raʼkhí maʼgakañán matasiʼñáanʼ ratani dí májánʼ” (1 Corintios 15:33, nota).
DÍ EYOO GÁʼTHÚU̱N. Rí mangáánʼ muʼni xó má nuni bi̱ nambáxulúʼ gajmiúlú. Sociólogos (bi̱ nunigajmaa xóo nindxu̱ún ga̱jma̱a̱ xóo eni xa̱bu̱) nduyáá dí xúʼko̱ kaʼnii nindxu̱u̱. Ikhiin nuthi rí xa̱bu̱ bi̱ nambáxu̱u̱n gajmiún bi̱ nutsikha ndíí o bi̱ nuniñiínʼ bi̱ nudiin, mbáa asndu xúʼko̱ má gáguánu muni mangiin.
DÍ GÁNDOO MATANI. Atañíinʼ bi̱ mambajxáaʼ gajmiáanʼ bi̱ guaʼdáá cualidad ga̱jma̱a̱ bi̱ nuni rí ikháán nanigua̱a̱ʼ mu xúʼko̱ matayaridúún, xóo xa̱bu̱ bi̱ nuñewa̱a̱n rí nuni, bi̱ nduyamajkhún eʼwíínʼ, bi̱ nuxná rí guáʼdáá ga̱jma̱a̱ bi̱ májánʼ a̱jkiu̱ún.
I̱ʼWÁʼ IKHA RÍ NA̱ʼKHA̱ NÁA BIBLIA
Atayáá videos rí nagájnuu náa Biblia rí mambáñun xa̱bu̱ gajmii, jiáma ga̱jma̱a̱ wa̱ʼxa̱ʼ ma̱ngaa e̱ji̱n mu makuwá itháan májánʼ náa mbá guʼwíin.
XÁRATA AJNGÁA RÍ MAʼNIGAWÚNʼ EʼWÍÍNʼ
“Bi̱ tsindxaʼwóo edxu̱u̱ rí maʼthí, naʼni gawúnlú xóo índo̱ narujtáanʼ chídí rí a̱jma̱ inuu” (PROVERBIOS 12:18).
ARAXNÁ RÍ XTAʼDÁÁ
“Xa̱bu̱ bi̱ naxná rí gíʼdoo magiʼdoo itháan” (PROVERBIOS 11:25).
ATANIU̱U̱N EʼWÍÍNʼ XÓ MÁ ENDAAʼ MUNIANʼ
“Xúgíʼ rí nandala muniala xa̱bu̱, xúʼko̱ má guniu̱u̱n mangáanʼla” (MATEO 7:12).
