Mambajxáa májánʼ ga̱jma̱a̱ʼ Dios
Xó má ndiʼyáá náa timbá artículo, mbaʼin xa̱bu̱ nduyáá rí Biblia nindxu̱u̱ mitsuʼkhaan. Índo̱ nuraxnuu ga̱jma̱a̱ nunimbánii xtágabu rí na̱ʼkha̱ ikhí, nakumu̱ún rí kúwá mijngii náa Dios ga̱jma̱a̱ nduyáá rí gíʼdoo numuu makuwá.
Índo̱ náa Biblia naʼthí ga̱jma̱a̱ numuu ajngáa espiritualidad o rí mambajxáaʼ májánʼ ga̱jma̱a̱ʼ Dios, nandoo gáʼthi ga̱jma̱a̱ numuu xú káʼnii tayáá rí maraxtaa (Judas 18, 19). Xa̱bu̱ bi̱ tséku̱mu̱u̱ kaʼyoo Dios, i̱ndó naku̱mu̱u̱ kaʼyaminaʼ ikhaa. Mú bi̱ naku̱mu̱u̱ kaʼyoo Dios naʼnimbo̱o̱ ikha ndrígóo (Efesios 5:1).
ARAʼTHI̱I̱N RÍ MARÍGÁ NDA̱WA̱Á
IKHA RÍ NA̱ʼKHA̱ NÁA BIBLIA: “Á mu nakawabáánʼ náa mbiʼi rí mingíjyúuʼ, nda̱yáaʼ tsiakii” (Proverbios 24:10).
DÍ EYOO GÁʼTHÚU̱N. Rí majmáanʼ naʼni rí maʼni néʼnga̱a̱ʼ ga̱jma̱a̱ numuu xkujndu rí natraʼníí mámbá mbiʼi. Mú, rí maraʼti̱i̱n mbá rí marigá nda̱wa̱á maʼni rí mbi̱ya̱a̱ tsiakii, ga̱jma̱a̱ maʼni ma̱ta̱ya̱a̱ rí tikhu xkujndu xájyúuʼ má kámuu mbiʼi ga̱jma̱a̱ nguáná índo̱ xtáa awúu̱n mbá xkujndu mbaʼa rí ma̱ndoo majmañaaʼ.
DÍ GÁNDOO MATANI. Ataniminaʼ matayaa ga̱jma̱a̱ gagi rí marigá nda̱wa̱á. Raʼkháa rí maxmiéjuanʼ ga̱jma̱a̱ mbá rí makumaaʼ rí ma̱ndoo marigá o maraʼti̱i̱n rí xúgíʼ magajnúu májánʼ, ataniminaʼ matanimbaníí rí nandaaʼ matani. Gajkhun má rí nguáná marigá mbá dí tséraʼthi̱i̱n (Eclesiastés 9:11). Mú, nguáná xúgíʼ má nagájnuu májánʼ. Náa Biblia naʼthí ga̱jma̱a̱ mbá xkri̱da xóo najuiʼdu, ikhí naʼthí: “Atadu tsígáʼ, ga̱jma̱a̱ asndu wakhííʼ xáyáa xa̱ʼ; numuu rí tsítayáá náa mínaʼ gakráʼáan, gi̱jyooʼ o ñuʼún, o mbáa nájma̱ má mani̱ndxu̱u̱ májánʼ” (Eclesiastés 11:6).
ATAYÁʼ XÓO NAXTIʼÑA̱A̱ GRAXE RÍ ITHÁAN GÍʼDOO NUMUU
IKHA RÍ NA̱ʼKHA̱ NÁA BIBLIA: “Atani dí makro̱ʼo̱ʼ [...]. Náa ajngáaʼ rígá rí gajkhun” (Salmo 119:144, 160).
DÍ EYOO GÁʼTHÚU̱N. Náa Biblia nariʼña̱a̱ graxe̱ rí xúgiáánʼ nuʼnimíjna. Xóo rígi̱:
-
Lá gíʼdoo numuu makuwáanʼ ráʼ.
-
Náá numuu dí rígá wéñuʼ tsingíná rá.
-
Ndiéjunʼ egíʼniin índo̱ nakháñulú rá.
-
Ndiéjunʼ rí guáʼthi̱i̱n nda̱wa̱á ráʼ.
Mbaʼin wéñuʼ xa̱bu̱ náa xúgíʼ numbaaʼ, kúwá gagi numuu rí niguánu ndiyáá xú kaʼnii Biblia nariʼña̱a̱ graxe̱ rí nuni.
DÍ GÁNDOO MATANI. Nutáanʼxu rí ma̱ta̱ya̱a̱ ikháán mínaʼ rí naʼthí náa Biblia. Atanda̱ʼa̱a̱ mbáa xa̱bi̱i̱ Jeobá mu mambáyaaʼ makruaʼaʼ. Ma̱ngaa ma̱ndoo mata̱ʼa̱ʼ náa ináa ndríguxu jw.org o mi̱dxu̱ʼ náa nawáanʼxu. Xaxtumáán ga̱jma̱a̱ xunda̱ʼa̱ʼ mbújkha̱a̱.
I̱ʼWÁʼ IKHA RÍ NA̱ʼKHA̱ NÁA BIBLIA
Ata̱ʼa̱ʼ náa jw.org ga̱jma̱a̱ atayáá video Náa numuu rí gíʼmaa muʼnigajmaa Biblia rá. Rígá náa mbá 880 ajngáa.
NDAYÓOʼ MBUʼYÁÁ RÍ NDAYÚLÚ DIOS
“Gagi kuwa bi̱ nduyáá rí nda̱ñúnʼ mbuyáaʼ Dios” (MATEO 5:3).
MUNIʼNÍIʼ DIOS BI̱ NAʼTHÍ NÁA BIBLIA
“Guxu̱ʼmámíjná náa Dios ga̱jma̱a̱ ikhaa makuʼmaminaʼ náa ikháanʼ” (SANTIAGO 4:8).
MURAXNUU BIBLIA GA̱JMA̱A̱ MUNDXAʼWAMIJNA RÍ NAʼTHÍ
“Ra̱ʼkhá tháán xtáa gagi xa̱bu̱ bi̱ [...] naniguʼ maʼni xó má eʼthí náa xtángoo ndrígóo Jeobá *, ga̱jma̱a̱ mbiʼí mbruʼun nandxaʼwáminaʼ rí niguxnuu. [...] Ga̱jma̱a̱ xúgíʼ rí gáʼni magajnúu májánʼ” (SALMO 1:1-3).
^ párr. 23 Náa Biblia naʼthí rí Dios mbiʼyuu Jeobá.
