Maraxtaa májánʼ
Náa Biblia naʼthí rí mu̱ʼni̱ gaʼduunʼ ku̱ma̱ dí ra̱májánʼ, mú ku̱ma̱ rí májánʼ nambáyulú.
XAKIʼNÁN
IKHA RÍ NA̱ʼKHA̱ NÁA BIBLIA: “Bi̱ tsígigaa nacha̱ nindxu̱u̱ itháan májánʼ ki xóo mbáa xa̱bu̱ bi̱ gíʼdoo tsiakii” (Proverbios 16:32).
DÍ EYOO GÁʼTHÚU̱N. Gíʼmaa rí majmañulúʼ mú xákiʼnálú, maski ajndu nguáná rígá mbá numuu mu makiʼnáanʼ. Á mu tsíñewa̱a̱n xóo ekiʼnáanʼ asndu gamíi ma̱ʼkha̱ kagu̱u̱ ga̱ʼkhu̱. Nakujmaa kaʼwu rí mbáa xa̱bu̱ bi̱ nakiʼnáa wéñuʼ, naʼni o naʼthí mbá rí nda̱wa̱á natanga̱a̱ a̱jkiu̱u̱n.
DÍ GÁNDOO MATANI. Gajmañaaʼ matani ga̱jma̱a̱ʼ rí nakiʼnán, xátatsiʼñáanʼ rí ikhaa maʼngo̱o̱. Tikhun xa̱bu̱ nakumu̱ún dí á mu nakiʼníin nusngajma rí itháan guáʼdáá tsiakii, mú raʼkháa xúʼko̱ nindxu̱u̱, rí tséʼngu̱u̱n guxprigumíjná nasngájma dí tséʼngo̱o̱ a̱jkiu̱ún. Náa Biblia naʼthí: “Xóo mbá xuajin rí niguámbáa ga̱jma̱a̱ dí ragíʼdoo xtátsí xúʼko̱ kaʼnii nindxu̱u̱ mbáa xa̱bu̱ bi̱ tsexpríguminaʼ” (Proverbios 25:28). Rí mu̱ʼgua̱nú mbuʼyáá májánʼ dí nirígá mambáyulúʼ mu xákiʼnáanʼ mbá nacha̱. “Xa̱bu̱ bi̱ nakro̱ʼo̱o̱ tsíkiʼnáa nacha” (Proverbios 19:11). Rí matadxawíín májánʼ dí phú nirígá, rúʼko̱ mambáyaʼ mu ma̱nindxa̱a̱ʼ mbáa xa̱bu̱ bi̱ nakro̱ʼo̱o̱ ga̱jma̱a̱ xákiʼnáán mbá nacha̱.
ARAXNÁA NÚMA̱Aʼ
IKHA RÍ NA̱ʼKHA̱ NÁA BIBLIA: “Gusngajmá rí nuxna̱a̱ núma̱aʼ” (Colosenses 3:15).
DÍ EYÓO GÁʼTHÚU̱N. I̱ndó xa̱bu̱ bi̱ nuxna̱a̱ núma̱aʼ nakúwá gagi. Asndu bi̱ ninimbáti̱ga̱ xúgíʼ rí guáʼdáá, niguánu ndiyáá dí gajkhun nindxu̱u̱ rúʼko̱. Nuthi rí nuxna̱a̱ núma̱aʼ ga̱jma̱a̱ numuu rí guáʼdáá raʼkháa náa ninimbáti̱ga̱, rí mundxa̱ʼwa̱mijna̱ xúʼko̱ kaʼnii naʼni rí makuwá gagi.
DÍ GÁNDOO MATANI. Xúgíʼ mbiʼi, ataniraʼmáʼ rí nandaaʼ maraxna̱a̱ núma̱aʼ. Ma̱ndoo maraxna̱a̱ numaaʼ ga̱jma̱a̱ numuu rí nandoo natayáá xóo najtsi, rí nandoo naratamíjná ga̱jma̱a̱ mbáa bi̱ xtayáá o ga̱jma̱a̱ numuu rí naraxtaa imbo̱ʼ mbiʼi. Á mu ikháán natagíʼ matanimbaníí rígi̱, maraxtaa itháan májánʼ.
Mbá rí ma̱ndoo mambáyaaʼ wéñuʼ, nindxu̱u̱ rí maraxníin núma̱aʼ bi̱ xtañún ga̱jma̱a̱ bi̱ nambájxa̱a̱ʼ gajmiáanʼ. Atatsaʼwáminaʼ ndiéjunʼ rí májánʼ tayáá rí nuni ikhiin ga̱jma̱a̱ nda̱wa̱á arathún o ataniraʼmáʼ náa mbá i̱yi̱i̱ʼ, mbá correo electrónico o náa mbá mensaje rí naraxníin numaaʼ. Xúʼko̱ ma̱ndoo mambajxáaʼ itháan májánʼ gajmiáanʼ ga̱jma̱a̱ maraxtaa gagi índo̱ gáta̱ya̱a̱ rí nátaniu̱u̱n rí májánʼ eʼwíínʼ (Hechos 20:35).
I̱ʼWÁʼ IKHA RÍ NA̱ʼKHA̱ NÁA BIBLIA
Ma̱ndoo matrígú aʼwá ndrígóo Biblia, dí rígá náa jw.org náa itháan rí mbá 40 ajngáa.
XATAʼYÁʼ AJNGÁA
“Rí matagíʼdi̱i̱ ajngáa nindxu̱u̱ xóo matatsiʼñáánʼ magadíí iyaʼ; ikha jngó nákha xóó tséʼni mba̱a̱ xkujndu, atani nijníminaʼ” (PROVERBIOS 17:14).
XAXMIÉJUANʼ XÓO GARAXTAA NDA̱WA̱Á
“Ikha jngó, xáxmiéjuanla nditháan ga̱jma̱a̱ rí mbiʼi gájtsíí, numuu rí gájtsíí ma̱ngaa marigá rí maʼni maxmiéjuanla. Mámbá mbiʼi gíʼdoo xkujndu ndrígóo” (MATEO 6:34).
ATATSAʼWÁMINAʼ MÁJÁNʼ RÍ MATANI
“Rí najmáán natatsaʼwáminaʼ gáñe̱wa̱a̱nʼ, ga̱jma̱a̱ rí najmáán natraʼwíí rí májánʼ gáʼni kriña̱a̱nʼ” (PROVERBIOS 2:11).
