Matiewa̱a̱n xóo majmaaʼ mbújkha̱a̱
Mbaʼin xa̱bu̱ najmañún najmúnʼ májánʼ mbujkhún índo̱ nunimbáníí ikha rí na̱ʼkha̱ náa Biblia.
ATRÍYAʼ MBÁ MÁJÁNʼ AWAN
IKHA RÍ NA̱ʼKHA̱ NÁA BIBLIA: “Awan rí nagájnuu tsumáá magajnúu májánʼ, mú bi̱ nacho̱o̱ maʼni migínáa” (Proverbios 21:5).
DÍ EYOO GÁʼTHÚU̱N. Mu magajnúu májánʼ rí matani, gíʼdoo wéñuʼ numuu matriʼyáʼ mbá májánʼ awan ga̱jma̱a̱ mataʼgíʼ matanimbánii. Garmáʼáan a̱jkia̱nʼ rí xáʼngáaʼ gáratsi xúgíʼ rí nandaaʼ. Ikha jngó gíʼmaa matiewa̱a̱n májánʼ xóo majmaaʼ mbújkha̱a̱.
DÍ GÁNDOO MATANI
-
Atanimbáníí awan rí nitriyaʼ. Atanirámáʼ náa mbá i̱yi̱i̱ʼ xúgíʼ náa majmaaʼ mbújkha̱a̱. Nda̱wa̱á atayáá nguáthá mba̱a̱ mbújkha̱a̱ gámbaaʼ. Á mu ndayáaʼ xóó itháan mbújkha̱a̱ ki xóo nitriyaʼ awan, ga̱jma̱a̱ʼ rí niphídúnʼ náa mbújkha̱a̱ rí taguambáaʼ. Mbá xkrida̱, á mu niguámbaaʼ mba̱a̱ mbújkha̱a̱ náa gasolina, ma̱ndoo majmaaʼ mbújkha̱a̱ rí nitríyáʼ mu matani gagimina̱a̱ʼ.
-
Xátani mbaʼ mataníí gidxóó. Xataxudaminaʼ wéñuʼ gidxóó. Á mu rígá mbá rí nandaaʼ maratsi, ginii atagímbóó mbújkha̱a̱. Á mu natatíʼñáán mbújkha̱a̱, atanimiʼnaʼ matani̱i̱ wa̱pháá gidxawaʼ, mu xúʼko̱ xáʼga inuu mbújkha̱a̱. Ga̱jma̱a̱ á mu gíʼmáán má, atriyaʼ mbá awan mu midxu̱ʼ ratani̱i̱.
Májánʼ gáʼni rí xátani gidxóó. Xa̱bu̱ niguánu ndiyáá, rí matatiʼñáán mbujkha̱a̱ rí na̱jkha̱ inuu, maʼni rí matani̱i̱ itháán mba̱a̱ mbujkha̱a̱. Ikha jngó itháan májánʼ gáʼni rí xátatíʼñáan mbújkha̱a̱ á mu tséyaaʼ.
GANINDXA̱A̱ʼ MBÁA MÁJÁANʼ XA̱BU̱
IKHA RÍ NA̱ʼKHA̱ NÁA BIBLIA: “Iʼskha naskhoo gáxnuu xku̱bi̱ índo̱ naxnáa ruʼwa, ikha jngó, majngruigóó randa̱ʼa̱ índo̱ gájma̱a̱ eni bi̱ nudu, índo̱ nándáa gáʼni” (Proverbios 20:4).
DÍ EYOO GÁʼTHÚU̱N. Tsiskha maʼni rí nda̱a̱ dí gáraʼdáá. Ikha jngó atatsaʼwáminaʼ xóo gáraxtaa nda̱wa̱á ga̱jma̱a̱ atagíminaʼ matiejunʼ ma̱ngaa atayáá májánʼ xóo majmaaʼ mbújkha̱a̱.
DÍ GÁNDOO MATANI
-
Ganindxa̱a̱ʼ mbáa bi̱ nañajunʼ. Á mu natiejuunʼ májánʼ, nimbáa xáxkriña̱a̱ʼ náa natiejuunʼ. Patrón nangajuun kuñúún bi̱ nuñajunʼ májánʼ.
-
Xátani kuʼwáʼ. Bi̱ naʼni kúwáʼ náa nañajunʼ mandátigo̱o̱ ñajunʼ ndrígóo ga̱jma̱a̱ maʼniuu gakhi̱i̱ maxkamaa i̱mba̱ ñajunʼ.
-
Xánigua̱ʼ maraʼdáá wéñuʼ. Rí mataʼyáʼ maraʼdáá wéñuʼ, maʼni rí maʼniaʼ nandii o matatsiñúnʼ bi̱ nambáxáaʼ gajmiáanʼ. Garmáʼáan a̱jkia̱nʼ: Mbújkha̱a̱ xáʼni rí maraxtaa tsímáá.
I̱ʼWÁʼ IKHA RÍ NA̱ʼKHA̱ NÁA BÍBLIA
Atraxnuu Biblia náa jw.org, dí rígá náa mbaʼa ajngáa.
XÁJMAAʼ MBIʼI GA̱JMA̱A̱ MBÚJKHA̱A̱ NÁA TSÉYÓOʼ
“Bi̱ najngi̱i̱n ga̱jma̱a̱ bi̱ nupiʼtsu egún ngíníin gáʼni, ga̱jma̱a̱ ginuʼ gáʼni rí magúwúnʼ xtískhá” (PROVERBIOS 23:21).
XAXMIÉJUAAN’ WÉÑUʼ
“Xáxmiéjuanla wéñuʼ ga̱jma̱a̱ numuu rí makuwáanʼ, xóo rí muphula o rí muwanla, o ga̱jma̱a̱ xuyala rí káʼnii gúguʼwánla” (MATEO 6:25).
XÁXÍGUÁAʼ
“Xa̱bu̱ bi̱ naxígúu ra̱ʼkhá tháán eyoo magiʼdoo, mú tséʼyoo rí tsingíná ma̱ʼkha̱nú nda̱wa̱á” (PROVERBIOS 28:22).
