Xáʼniaʼ wéñuʼ nandii
Biblia na̱nguá nindxu̱u̱ mbá libro náa naʼthí ga̱jma̱a̱ numuu thana, mú naʼthí xóo gúʼni mu xáʼniulu nandii. Guʼyáá tikhu ikha rí na̱ʼkha̱ ikhí rí ma̱ndoo mambáyulúʼ.
GUÑAWUMÍJNA̱ MU XÁʼNIULU NANDII
IKHA RÍ NA̱ʼKHA̱ NÁA BIBLIA: “Nimbáa xa̱bu̱ na̱nguá wiyuʼ kaʼyaminaʼ; rí naʼni, naxniʼtsuminaʼ, ga̱jma̱a̱ nañewuminaʼ májánʼ wéñuʼ” (Efesios 5:29).
DÍ EYOO GÁʼTHÚU̱N. Ikha rí na̱ʼkha̱ náa Biblia naʼthúlúʼ rí mu̱ʼni̱ xó má eʼngo̱o̱ mu muñeumíjna̱. Bi̱ nunigajmaa ga̱jma̱a̱ numuu thana, niguánu ndiyáá dí narígá nandii numuu rí tsíñawamíjnalu. Ikha jngó, ndayóoʼ muñeumíjna̱ mu xáʼniulu nandii.
DÍ GÁNDOO MATANI
-
Matiewa̱a̱n rí miʼtsu. Ataniminaʼ miʼtsu ganitsu rí mambáyaʼ ga̱jma̱a̱ agi̱i̱n mba̱ji̱nʼ iyaʼ.
-
Xáraʼwún wíyáaʼ. Rígi̱ ma̱ndoo mambáñun xúgínʼ xa̱bu̱ tséʼniuu má nguáthá tsiguúnʼ o á mu guáʼdáá mbá nandii rí nándáa thanuu. Bi̱ kuñún o bi̱ najmañún ga̱jma̱a̱ numuu thana ma̱ndoo mumbañún muni ejercicio, mú mámbáa má kaʼyoo maraʼwíí rí maʼni.
-
Mi̱nuʼ májánʼ. Rí matani guʼwuminaʼ rí maxínuʼ mba̱yu̱u̱ʼ maʼni rí mbayáaʼ nandii. Mbaʼin xa̱bu̱ tsénuʼ májánʼ numuu rí nuñajunʼ hora rúʼko̱. Mú bi̱ ndu̱ya̱a̱ májánʼ xu̱únʼ nakúwá májánʼ.
ATAʼTSÍÑÁÁNʼ RATANI̱ RÍ XÁMBÁYÁAʼ
IKHA RÍ NA̱ʼKHA̱ NÁA BIBLIA: “Guʼni kaʼwumijnáanʼlu xúgíʼ rí mitsaga rí nagua̱ʼa̱ náa xuwiʼ ga̱jma̱a̱ espíritu” (2 Corintios 7:1).
DÍ EYOO GÁʼTHÚU̱N. Xáʼniaaʼ nandii á mu tsítani gachíí xuyaaʼ, xóo matatsikha̱ ndíí, rígi̱ najmaʼnuuʼ wéñuʼ numuu rí naʼni marigá nandii ga̱jma̱a̱ nagudíin wéñuʼ xa̱bu̱.
DÍ GÁNDOO MATANI. Atagíʼ mbiʼi mu matatsiʼñáánʼ rataʼtsikhá ndíí, atani̱rámáʼ náa calendario ndrígáaʼ ga̱jma̱a̱ aratháán mbáa bi̱ natayáá rí gajkhun mambáyaaʼ. Nákha xóó tséjkha̱nú mbiʼi rúʼko̱, ataxídíí xúgíʼ ndíí ga̱jma̱a̱ rí najmaaʼ mu mataskamáán ga̱jma̱a̱ o mbá xúgíʼ rí naʼni magua̱ʼa̱ matatsikha. Xánújngaaʼ náa trigi̱i̱n xa̱bu̱ bi̱ nutsikha ndíí.
I̱ʼWÁʼ IKHA RÍ NA̱ʼKHA̱ NÁA BIBLIA
Á mu nandaaʼ makhánáʼ mbá Biblia, aratháán mbáa bi̱ naʼtaraʼa numuu Jeobá bi̱ xtáa náa xuajñanʼ.
ATATSAʼWÁMINAʼ MÁJÁNʼ RÍ MATANI
“Á mu natani mbá guʼwá, gíʼmaa matani gúloo náa tsu̱du̱u̱ guʼwáaʼ, mu xáraʼdáá aʼkhánʼ á mu mbáa gáxpatríguii ikhí” (DEUTERONOMIO 22:8).
XAKIʼNÁN NACHA̱
“Bi̱ tségigaa nacha̱ nasngájma rí najmañuu, mú bi̱ tséjyúuʼ gigaa nasngájma rí skágunʼ nindxu̱u̱” (PROVERBIOS 14:29).
XÁTATSIʼTSU WÉÑAʼ
“Xadxuʼnú maraxtaa gajmiáanʼ [...] bi̱ naʼphu̱ ega wéñuʼ” (PROVERBIOS 23:20).
