3 Náa numuu rí numíniiʼ xa̱bu̱ míjíinʼ rá.
Ndíjkha gíʼdoo numuu mbuʼyáá xóo extiʼña̱a̱ rá.
Raʼkhí rí xa̱bu̱ bi̱ míjíinʼ mumíniiʼ. Índo̱ eʼwíinʼ nduyáá rí numíniiʼ, mbáa makumún rí tséyóoʼ má mugíʼ muni rí májánʼ.
Atatsaʼwáminaʼ rígi̱
Tikhun xa̱bu̱ nakumu̱ún rí índo̱ nakháñulú nagumáanʼ mbu̱júu̱ʼ. Nakumu̱ún rí á mu nuʼni rí májánʼ náa vida rígi̱ maguaʼdáá mbá vida itháan májánʼ índo̱ gágumáanʼ mbu̱júu̱ʼ, mú á mu nuʼni dí ra̱májánʼ maguaʼdáá wéñuʼ xkujndu. Ga̱jma̱a̱ numuu ku̱ma̱ rígi̱, mbáa xa̱bu̱ májáanʼ ma̱ndoo mamínuuʼ á mu niʼni dí ra̱májánʼ náa vida rí nixtáa má. Atraxi̱mínáʼ:
-
Ndiéjunʼ gáyambáá á mu mumíniiʼ ga̱jma̱a̱ numuu rí ni̱ʼni̱ náa imbo̱o̱ vida, ga̱jma̱a̱ rí tsermáʼáan a̱jkiu̱lú rí ni̱ʼni̱ rá.
-
Náa numuu rí nuñeumíjna̱ wéñuʼ mu xáʼniulú nandii o mu xákambiyulú á mu kiʼthá má rí mugíʼniin ga̱jma̱a̱ numuu rí ni̱ʼni̱ náa imbo̱o̱ vida rá.
MU MA̱TA̱YA̱A̱ ITHÁAN
Ayuʼ náa jw.org ma̱ngaa atayáá video Náá numuu rí Dios naniñuuʼ mumíniiʼ rá.
Rí naʼthí náa Biblia
Tsingíná na̱nguá nindxu̱u̱ mbá castigo ndrígóo Dios
Nguáná narígá rígi̱ numuu rí kuwáanʼ náa rakáʼyoo ga̱jma̱a̱ mbiʼi dí rakáʼyoo.
“Xa̱bu̱ bi̱ nagáñun tseʼngu̱u̱n gagáñun, xa̱bu̱ bi̱ guáʼdáá tsiakii tseʼngu̱u̱n guxmijná, asndu xa̱bu̱ bi̱ nduyáá na̱nguá guáʼdáá ganitsu, asndu xa̱bu̱ bi̱ nakru̱ʼu̱u̱n na̱nguá guáʼdáá wéñuʼ, asndu xa̱bu̱ bi̱ guáʼdáá ku̱ma̱ nda̱a̱ rí embáñún; numuu rí na̱jkha̱nú mbiʼi ga̱jma̱a̱ gamiéjunʼ rí na̱nguá kuaʼti̱i̱n naguaʼnii xúgiáanʼ” (ECLESIASTÉS 9:11).
Numíniiʼ numuu rí nigumáanʼ ga̱jma̱a̱ aʼkhá
Xa̱bu̱ najmún ajngáa aʼkhá mu muthi ga̱jma̱a̱ dí ra̱májánʼ rí nuni. Mú ma̱ngaa náa Biblia najmuu ajngáa rígi̱ mu maʼthí ga̱jma̱a̱ numuu aʼkhá rí niʼda̱a̱lú xúgiáanʼ náa Adán ga̱jma̱a̱ Eva.
“Atayáá, asndu nákha nigumún gúʼdoo má aʼkhúunʼ, ga̱jma̱a̱ aʼkhá má nigumún náa awúu̱n ru̱dúʼ” (SALMO 51:5, nota).
Aʼkhá naʼni rí mumíniiʼ wéñuʼ xa̱bu̱ numbaaʼ
Niʼni gachúu rí nambáxulúʼ gajmiúlú bi̱ Niʼniáanʼ ma̱ngaa xúgíʼ rí niʼni, xóo muʼthá, gajmiúlú eʼwíinʼ xa̱bu̱ numbaaʼ ga̱jma̱a̱ dí rígá náa mbájndi kuwáanʼ. Rígi̱ naʼni rí xúgínʼ xa̱bu̱ mumíniiʼ.
“Índo̱ nandoʼ mani rí májánʼ, nacha̱ má wíji̱ dí ra̱májánʼ” (ROMANOS 7:21).
“Xúgínʼ xa̱bu̱ numbaaʼ nuxieʼkhá ga̱jma̱a̱ numíniiʼ má xúʼko̱ asndu mbiʼi xúgi̱” (ROMANOS 8:22).
