Xa̱bu̱ hindúes nakumu̱ún rí numíniiʼlú ga̱jma̱a̱ numuu rí ni̱ʼni̱ náa vida rígi̱ o rí ni̱ʼni̱ náa i̱mba̱ vida. Mbáa xa̱bu̱ nánguá mínuuʼ índo̱ naxkamaa moksha, xóo muʼthá, índo̱ nánguá egumaa mbu̱júu̱ʼ. Mu maxkamaa rígi̱ ndayóoʼ rí xáxmiejunʼ nditháan ga̱jma̱a̱ numuu rí narígá náa numbaaʼ rígi̱.

Xa̱bu̱ musulmanes nakumu̱ún rí tsingíná nindxu̱u̱ mbá castigo rí na̱ʼkha̱ ga̱jma̱a̱ numuu aʼkhún ma̱ngaa naʼni musngajma fe ndrígu̱ún. Sayyid Syeed, bi̱ nindxu̱u̱ presidente náa Sociedad Islámica ndrígóo América del Norte, naʼthí rí tsingíná naʼni marmáʼáan a̱jkiu̱lú “rí gíʼmaa muxnáa núma̱aʼ Dios ga̱jma̱a̱ numuu xúgíʼ rí májánʼ rí naxnúlú ma̱ngaa dí ndayóoʼ mumbáñuun bi̱ nda̱ñúunʼ”.

Judíos nakumu̱ún rí numíniiʼ ga̱jma̱a̱ rí nu̱ʼni̱. Tikhun judíos nakumu̱ún dí magabiín xa̱bu̱ bi̱ nimíniiʼ rí asndu rakáʼñun ga̱jma̱a̱ nda̱wa̱á magumiin rí májánʼ. Mú judaísmo místico o cabalístico nusngáa rí índo̱ mbáa xa̱bu̱ naxtáa náa imba̱a̱ xa̱bu̱, rígi̱ nambáyúu mu maʼnijngudi̱i̱ aʼkhúun.

Xa̱bu̱ budistas nakumu̱ún rí nagumáanʼ mbaʼa nuthu ga̱jma̱a̱ rí numíniiʼ náa mámbá vida asndu índo̱ námbáa rí nagua̱ʼa̱ mu̱ʼni̱ ga̱jma̱a̱ dí ra̱májánʼ rí nakumulú. Ku̱ma̱, rí májánʼ rí nuʼnilú ga̱jma̱a̱ rí muxpriguíí rí nundxa̱ʼwa̱míjna̱ xúʼko̱ ma̱ndoo muxkamaa nirvana, xóo muʼthá, náa nánguá rígá tsingíná.

Xó má eʼthí Diccionario de religiones comparadas, xa̱bu̱ bugi̱ nunimbu̱ún rí tsingíná narígá “numuu rí xa̱bu̱ nakiéʼkúún”. Tikhun nuthi rí xárígá wéñuʼ tsingíná á mu xa̱bu̱ naxtáa xóo gíʼmaa. Mú nakumu̱ún rí numíniiʼ ga̱jma̱a̱ numún bi̱ tsékujmiin bi̱ guaʼdáá itháan tsiakii ki xóo xa̱bu̱ numbaaʼ. I̱ndó rí kaʼyoo maʼni xa̱bu̱, maxtáa xó má kaʼyoo maxtáa.

Tikhu religión ma̱jkha̱ʼ nuthi dí numíniiʼ ga̱jma̱a̱ numún brujo. Tikhun nakumu̱ún rí brujos ma̱ndoo muni makuwá májánʼ xa̱bu̱ o rí mugíʼníí mbá gamiéjunʼ, ga̱jma̱a̱ nda̱a̱ rí gugíʼníí á mu nuni tikhu costumbre. Ikha jngó índo̱ xa̱bu̱ bugi̱ naʼniún nandii, nagún gúyáá mbáa xa̱bu̱ xawan mu maʼni gámbáa rí nuniu̱u̱ brujo.

Cristianos nuthi rí tsingíná ni̱ʼkha̱ numuu rí timbíin xa̱bu̱ nixudami̱jná aʼkhá, xóo eʼthí náa Génesis, timbá libro ndrígóo Biblia. Mú mbaʼa religión nuthi xó má ekumu̱ún ikhiin. Mbá xkri̱da, tikhun católicos nakumu̱ún rí ma̱ndoo muxnaxi náa Dios tsingíná rí nuraʼníí mu xúʼko̱ maʼni tsajkurámuuʼ guʼwá dxájkiún o mu maʼnikríyaaʼ imba̱a̱ xa̱bu̱.