Consejo rí mambáyulú mu makuwáanʼ gagi ga̱jma̱a̱ rí kuaʼdáá
Xúgiáanʼ, tséʼniuu á mu xóo tsénigúnʼ, xóo tsenújúnʼ o nidamijná má, jiámá, wa̱ʼxa̱ʼ o xabuanii nandulú rí makuwáanʼ gagi ga̱jma̱a̱ rí kuaʼdáá. Bi̱ Niʼniánʼlu ma̱ngaa nandoo rí makumulú xúʼko̱. Ikha jngóo naxnulu consejo rí májánʼ wéñuuʼ rígi̱.
Ganindxa̱a̱ʼ mbáa xa̱bu̱ bi̱ nañajunʼ
“Gañajunʼ gakhi̱i̱ mu maʼni mbá ñajunʼ májánʼ ga̱jma̱a̱ ñawúunʼ mu xúʼko̱ magiʼdoo mbá rí maxnúu bi̱ ndayóoʼ” (EFESIOS 4:28).
Bi̱ Niʼniáanʼlu naʼthúlú rí gíʼmaa mbuʼyáá ñajunʼ xóo mbá dí nindxu̱u̱ májánʼ. Náa numuu rá. Numuu rí mbáa xa̱bu̱ bi̱ nañejunʼ májánʼ nadaaʼ májánʼ ga̱jma̱a̱ maxniʼtsun bi̱ kúwá náa goʼwóoʼ ma̱ngaa rúʼko̱ naʼni rí maxtáa gagi. Asndu ma̱ndoo mambáyúu mbáa bi̱ ndayóoʼ. Bi̱ ni̱ndxu̱ún patrón nduyamajkhún bi̱ nuñajunʼ májánʼ ga̱jma̱a̱ ikhiin ndajñún náa ñajunʼ rúʼko̱. Ikha jngóo tsijnga̱waanʼ Escritura índo̱ naʼthí rí matiejunʼ gakhii “nindxu̱u̱ mbá regalo rí nixná Dios” (Eclesiastés 3:13).
Guʼni dí májánʼ
“Ndu̱ya̱a̱xu gajkhun rí kuaʼdááxu mbá ku̱ma̱ májánʼ ga̱jma̱a̱ nanduxu mutha rí gajkhun náa xúgíʼ” (HEBREOS 13:18).
Á mu ni̱ndxu̱lú mbáa xa̱bu̱ bi̱ naʼni rí májánʼ, makuwáanʼ májánʼ má ikháanʼlu, makuwáanʼ tsímáá ga̱jma̱a̱ ma̱ndoo mbuya̱a̱xuluʼ májánʼ rí mbruʼun. Ma̱ngaa mbuyamajkulú ga̱jma̱a̱ maku̱mu̱ún kuyulú eʼwíinʼ. Xa̱bu̱ bi̱ tséni rí májánʼ ikhiin má tsékúwá gagi. Ku̱ma̱ ndrígún naʼni gajmún ga̱jma̱a̱ namíñúún dí maʼga̱nú mbá mbiʼi rí mbuñún.
Awa̱án gáta̱ya̱a̱ mbújkha̱a̱
“Gusngajmá rí tséyala ku̱ya̱a̱ mbújkha̱a̱ ga̱jma̱a̱ gakuwáanʼ gagi ga̱jma̱a̱ rí kuaʼdáá” (HEBREOS 13:5).
Gajkhun má dí mbújkha̱a̱ najmaa mu mu̱ʼtsi̱ ganitsu o i̱ʼwáʼ, mú dí manigulúʼ wéñuʼ mbújkha̱a̱ gamiiʼ nindxu̱u̱. Mbáa xa̱bu̱ ma̱ndoo majmuu itháán mbiʼi ga̱jma̱a̱ tsiakii ndrígóo mu mbayáʼ itháán rí magiʼdoo. Á mu naʼni xúʼko̱ gamíi maʼni wájíinʼ bi̱ kúwi̱i̱n náa goʼwóo xóo a̱ʼgiu̱u̱, e̱ji̱i̱n o asndu ikhaa gamíi maʼniuu nandii (1 Timoteo 6:9, 10). Ma̱ngaa xa̱bu̱ bi̱ nanigu̱u̱ʼ magiʼdoo wéñuʼ mbújkha̱a̱ gamíi maxkajxi̱i̱ a̱jkiu̱u̱n maʼni dí raʼkhí. Mbáa xa̱bu̱ bi̱ najmañuu naʼthí: “Mbáa xa̱bu̱ bi̱ nawi̱ji̱ jmbu maguma tsajkurámaaʼ, mú bi̱ nandoo mani̱ndxu̱u̱ rico mbá nacha̱ xáʼngo̱o̱ gawijithu̱u̱n rí maʼni” (Proverbios 28:20).
Atraʼwíí mbá májánʼ kiʼsngáa
“Atatsaʼwáminaʼ májánʼ ga̱jma̱a̱ gani̱ndxa̱ʼ mbáa xa̱bu̱ bi̱ najmañuu wéñuʼ” (PROVERBIOS 3:21).
Kiʼsngáa rígi̱ mambáyulú mu manindxu̱lú mbáa xa̱bu̱ bi̱ maʼnimbánuu ñajunʼ dí nakhánáá ma̱ngaa rí manindxu̱lú májáanʼ xa̱bu̱ nikhii. Mú kiʼsngáa rígi̱, xáʼni dí makuwáanʼ gagi ga̱jma̱a̱ rí maguáʼdáá mbújkha̱a̱. Mu magajnúu májánʼ xúgíʼ dí muʼni ndayúlú kiʼsngáa dí na̱ʼkha̱ Dios. Náa Escritura naʼthí rí xa̱bu̱ bi̱ naʼdxaun Dios nagájnuu májánʼ xúgíʼ rí naʼni (Salmo 1:1-3).
Puede que también le interese
BI̱ NAYEJNGOO
Xú káʼnii gándoo gániguluʼ muñajunʼ wéñuʼ rá.
Atayáá xtágabu rí na̱ʼkha̱ náa Biblia mu mambáyaʼ maraxtaa tsímáá náa natiejunʼ.
