Rí muʼninííʼ Dios naʼni rí makuwáanʼ mijngii náa ikhaa
Bi̱ Niʼniáanlu raʼkháa i̱ndó tsiakii nindxu̱u̱. Ikhaa gíʼdoo cualidad ndrígóo rí nindxu̱u̱ mitsaanʼ. Numuu rí nandoo majmañulú ga̱jma̱a̱ numuu ikhaa ma̱ngaa rí mambáxulu gajmiulúʼ, ikha jngóo naʼthúlú xóo nindxu̱u̱ (Juan 17:3; Santiago 4:8).
Bi̱ Niʼniáanlu gíʼdoo mbiʼyuu
“Mu xa̱bu̱ mbuyáá rí ikháán mbiʼyaaʼ Jeobá, i̱ndó ikháán ni̱ndxa̱ʼ bi̱ phú Mba̱a̱ náa xúgíʼ tsu̱du̱u̱ ku̱ba̱ʼ” (SALMO 83:18).
Náa Biblia nasngáa rí Jeobá nindxu̱u̱ mbáwíi Dios bi̱ gajkuwin ikhaa niʼniwíi xúgíʼ dí rígá ga̱jma̱a̱ rí ma̱ndoo makuwáanʼ. Ikha jngóo i̱ndó ikhaa kaʼyoo muxnáa gamajkhu (Apocalipsis 4:11).
Jeobá nindxu̱u̱ mbáa Dios bi̱ gíʼdoo ngajua
“Dios nindxu̱u̱ ngajua” (1 JUAN 4:8).
Jeobá najmuu Biblia ga̱jma̱a̱ rí niʼniwíi mu maʼsngulúʼ xú káʼnii nindxu̱u̱ ikhaa. Rí nasngájma itháan rí ikhaa nindxu̱u̱ ngajua, numuu rí xúgíʼ rí naʼni, naʼni ga̱jma̱a̱ ngajua. Índo̱ nuʼniníiʼ itháan Jeobá, nandulú kuʼyáá itháan.
Jeobá naʼni mba̱a̱ a̱jkiu̱u̱n
“Ikháán ni̱ndxa̱ʼ mbáa Dios bi̱ xtáa xawii matani mba̱a̱ a̱jkia̱a̱nʼ” (NEHEMÍAS 9:17).
Jeobá ndaʼyoo rí ni̱ndxu̱lú xa̱bu̱ aʼkhá ikha jngóo naʼni mba̱a̱ a̱jkiu̱u̱n kaʼyulú. Á mu nunda̱ʼa̱ rí maʼni mba̱a̱ a̱jkiu̱u̱n kaʼyulú ga̱jma̱a̱ nuʼni tsiakimijna muniʼñáaʼ ru̱ʼni̱ rí ikhaa tsénigu̱ʼ, ikhaa maʼni mba̱a̱ a̱jkiu̱u̱n kaʼyulú ga̱jma̱a̱ xaxnulú castigo ga̱jma̱a̱ numuu rí nakiéʼkulu (Salmo 103:12, 13).
Jeobá nandoo rí muʼtákáñii
“Jeobá xtáa mijngii náa xúgíinʼ xa̱bu̱ bi̱ nutakáñii [...]; maʼdxawun índo̱ gutakáñii rí mambáñun” (SALMO 145:18, 19).
Jeobá tsínigu̱ʼ majmulú mbá rí kiejunʼ o i̱ʼwáʼ mu muʼtákáñii. Ikhaa naʼdxun rí nuʼtákáñii xóo má mbáa xa̱bu̱ nikhii naʼdxawún e̱ji̱i̱n.
