Náá numuu rí numínii’, naniáanlu ga̱jma̱a̱ rí nakháñulú rá.
Bi̱ Niʼniáanlú ndaʼyulúʼ rí ni̱ndxu̱lú e̱ji̱i̱n, ikhaa tsíyoo dí mumíniiʼ. Mú ndíjkha dí rígá wéñuʼ tsingíná rá.
Aʼkhúún timbíin xa̱bu̱
“Ga̱jma̱a̱ numuu mbáwíi xa̱bu̱, nito̱ʼo̱o̱ aʼkhá náa numbaaʼ, ma̱ngaa rí nakháñulú nito̱ʼo̱o̱ ga̱jma̱a̱ numuu aʼkhá, ikha jngóo xúgíinʼ xa̱bu̱ nakháñún numuu rí xúgíinʼ nixudami̱jná aʼkhá” (ROMANOS 5:12).
Dios niʼnii timbíin xa̱bu̱, ikhaa nindxu̱u̱ Adán ga̱jma̱a̱ Eva, ikhiin na̱nguá ninindxu̱ún xa̱bu̱ aʼkhá. Guʼún ninindxu̱u̱, náa ku̱ba̱ʼ mitsaanʼ rí mbiʼyuu ixi̱ ri̱ʼi̱ Edén. Dios niʼthúún rí ma̱ndoo muphu xúgíʼ xndúu ixi̱ dí rígá ikhí, mu káaʼ mbóó rí xándoo. Adán ga̱jma̱a̱ Eva ni̱ʼphu̱ xndúu ixi̱ rúʼko̱, ikhú ikhiin niguánú nixudamíjna̱ aʼkhá (Génesis 2:15-17; 3:1-19). Numuu rí túnimbu̱u̱n kuyáá Dios, ikha jngóo ikhaa nixkháwíin náa ixi̱ ri̱ʼi̱. Asndu má nákha mbiʼi rúʼko̱ niʼniún gakhii wéñuʼ xóo makuwá, nda̱wa̱á niguáʼdiin e̱jñu̱ún ga̱jma̱a̱ ikhiin nánguá nikúwá májánʼ. Xúgiáanʼ naniáanʼ ma̱ngaa nakháñulú (Génesis 3:23; 5:5). Ikha jngóo, xúgiáanʼ naʼniulú nandii, naganiáanʼ ga̱jma̱a̱ nakháñulú numuu rí xúgiáanʼ niguwa̱ʼ náa Adán ga̱jma̱a̱ náa Eva ma̱ngaa ikháanʼ ni̱ndxu̱lú e̱ji̱i̱n.
Aʼkhúún ángeles bi̱ xkawi̱i̱nʼ
“Náa xúgíʼ numbaaʼ rígá tsiakii ndrígóo Gixa̱a̱” (1 JUAN 5:19).
“Gixa̱a̱” bugi̱ nindxu̱u̱ mbáa ángel bi̱ nikujximínáʼ náa Dios (Juan 8:44; Apocalipsis 12:9). Nda̱wa̱á eʼwíinʼ ángeles nigún kidxuuʼ Gixa̱a̱ ga̱jma̱a̱ ninindxu̱ún xa̱bu̱ wéñiiʼ. Ga̱jma̱a̱ ikhiin, najmúún espiritu ndrígu̱ún mu muni nduwiinʼ xa̱bu̱ mu muni tsingumíjná náa Dios, o mu muxkajxi̱i̱n xa̱bu̱ mu muni̱ dí ra̱májánʼ (Salmo 106:35-38; 1 Timoteo 4:1). Gixa̱a̱ ma̱ngaa xa̱bu̱ wéñiiʼ ra̱ʼkhá tháán nanigu̱u̱nʼ muni gínáanlu.
Aʼkhúlú índo̱ nuraʼwíí dí ra̱májánʼ
“Rí xtáa raʼdu mbáa, rúʼko̱ má gágujxi̱i̱” (GÁLATAS 6:7).
Nguáná numíniiʼ ga̱jma̱a̱ numuu dí aʼkhá rí nindrígúlú o numuu dí Gixa̱a̱ naʼtáñajunʼ náa numbaaʼ. Nguáná ikháanʼ má e̱ʼni̱ dí mumíniiʼ, xóo má índo̱ nuʼni rí májánʼ nakuwáánʼ má májánʼ, xúʼko̱ má índo̱ nuʼni dí raʼkhí naguáʼníí má rúʼko̱. Mbá xkri̱da, á mu mbáa xa̱bu̱ nikhii nandxa̱ʼóo májánʼ edxu̱u̱, nañajunʼ májánʼ ma̱ngaa naxtáa gagi ga̱jma̱a̱ rí gíʼdoo, rúʼko̱ maʼni rí bi̱ kúwá náa goʼwóo makuwá gagi. Á mu natsíjmuu mbújkha̱a̱, naʼga̱a̱n wéñuʼ iya najnga̱a̱ o naskoo gáñajunʼ, maʼni rí bi̱ kúwá náa goʼwóo xáguaʼdáá nditháan. Ikha jngóo májánʼ dí muʼnimbulú ikha ndrígóo bi̱ Niʼniáanlu, numuu dí ikhaa nandoo rí mundrig̱ú dí májánʼ ikhaa nindxu̱u̱ rí makuwáanʼ “tsímáá” (Salmo 119:165).
Kuwáánʼ “iwáá mbiʼi”
“Índo̱ gáʼni iwáá mbiʼi [...] xa̱bu̱ maʼndún kuyamíjna̱ i̱ndó ikhiin, maʼndún kuyáá wéñuuʼ mbújkha̱a̱ [...], xúnimbu̱ún kuñún anún [...], xúñewa̱a̱n rí muni, mani̱ndxu̱u̱n xóo xujkhú xáná bi̱ najmangu̱u̱nʼ, xáʼndúún kuyáá rí májánʼ” (2 TIMOTEO 3:1-5).
Dí kiʼtáriyaʼ rígi̱ nambánuu rí mbiʼi xúgi̱ numuu rí xúʼko̱ e̱ni̱ xa̱bu̱, ga̱jma̱a̱ rígi̱ nasngájma “rí kúwáanʼ iwáá mbiʼi” náa numbaaʼ rígi̱. Náa Escrituras ma̱ngaa naʼthí rí mbiʼi dí kúwáanʼ marigá guerras, ewiʼ, gaxma̱ ma̱ngaa nandii (Mateo 24:3, 7, 8; Lucas 21:10, 11). Mbaʼin xa̱bu̱ numíniiʼ ma̱ngaa nakháñuu ga̱jma̱a̱ numuu rígi̱.
