Gíʼdoo numuu ma̱ta̱ya̱a̱ xóo extiʼña̱a̱ ráʼ.
Ndíjkha rí gíʼdoo wéñuuʼ numuu ma̱ta̱ya̱a̱ dí xtaa mbáa bi̱ Niʼniwíi rá. Á mu nidxu̱ʼnú nitayáá dí xtaa mbáa Dios bi̱ gíʼdoo xúgíʼ tsiakii, mbáa maʼndaaʼ ma̱ta̱ya̱a̱ á mu dí Biblia ni̱ʼkha̱ náa Dios, ma̱ngaa á mu dí naku̱ma̱a̱ʼ xtayáá dí naʼthí náa Biblia mambáyaaʼ.
Manigua̱a̱ʼ maraxtaa
NÁA BIBLIA NAʼTHÍ: Rí Dios “niʼni xúgíʼ enii rí májánʼ. Índo̱ niʼni rí maxnúu ruʼwa ga̱jma̱a̱ majma̱a̱ májánʼ rí nudu, nixnúún wéñuuʼ ganitsu ga̱jma̱a̱ niʼni rí makuwá gagi” (Hechos 14:17).
NDIÉJUNʼ EYOO GÁʼTHÚU̱N RÍGI̱ RÁ. Xúgíʼ dí mitsaanʼ dí rígá náa tsu̱du̱u̱ ku̱ba̱ʼ nixnáaʼ ikháán bi̱ Niʼniwíi, ga̱jma̱a̱ índo̱ gídxúʼnúʼ ma̱ta̱ya̱a̱ dí náa Biblia naʼthí rí Dios naxmiéjuunʼ wéñuuʼ kaʼyaaʼ maʼni rí manigua̱a̱ʼ itháan.
Mataxkamaa májánʼ consejo dí mambáyaaʼ.
NÁA BIBLIA NAʼTHÍ: “Makrua̱ʼa̱a̱ʼ xúgíʼ dí nindxu̱u̱ jmbu ga̱jma̱a̱ xúgíʼ dí nindxu̱u̱ májánʼ” (Proverbios 2:9).
NDIÉJUNʼ EYOO GÁʼTHÚU̱N RÍGI̱ RÁ. Numuu rí Dios nindxu̱u̱ bi̱ Niʼníí, ikha jngóo ndaʼyoo ndiéjunʼ rí nda̱yáaʼ mu maraxtaa tsímáá. Á mu natayáá tsumáá dí naʼthí náa Biblia mataxkamaa májánʼ consejos rí ma̱ndoo mambáyaaʼ.
Ma̱ndoo maxtiʼña̱a̱ graxe̱ ndrígáaʼ.
NÁA BIBLIA NAʼTHÍ: “Mataxkamaa ku̱ma̱ ndrígóo Dios” (Proverbios 2:5).
NDIÉJUNʼ EYOO GÁʼTHÚU̱N RÍGI̱ RÁ. Rí ma̱ta̱ya̱a̱ dí xtáa mbáa bi̱ Niʼni dí rígá, mambáyaaʼ mu maxtiʼña̱a̱ graxe̱ ndrígáaʼ dí gíʼdoo wéñuuʼ numuu, xóo, náá numuu kuwáánʼ rá. Náá numuu rí numíniiʼ wéñuuʼ o, náá kúwíin xa̱bu̱ índo̱ nakháñún rá. Graxe̱ rígi̱ naxtiʼña̱a̱ náa Biblia.
Maraʼti̱i̱n mbá rí májánʼ makánáaʼ nda̱wa̱á.
NÁA BIBLIA NAʼTHÍ: “I̱ndó ikhúún eyo̱o̱ ndiéjunʼ rí endxaʼwamínáʼ ma̱ni̱ ga̱jma̱a̱ numala, eʼthí Jeobá, nandoʼ makuwáanʼla tsímáá raʼkháa dí mumíníiʼ, nandoʼ rí makuwáanʼla májánʼ nda̱wa̱á ga̱jma̱a̱ makhánala mbá rí wíji̱ ma̱ʼkha̱” (Jeremías 29:11).
NDIÉJUNʼ EYOO GÁʼTHÚU̱N RÍGI̱ RÁ. Dios nakudaminaʼ maʼni gámbáa xúgíʼ enii dí ra̱májánʼ dí naʼni mumíníiʼ ga̱jma̱a̱ dí nakháñulú. Á mu naku̱ma̱a̱ʼ xtayáá rí nakudaminaʼ maʼni Dios, maraʼdáá tsiakii matraʼníí xkujndu dí narígá mámbá mbiʼi.
