Atayáá náa májánʼ eni eʼwíinʼ
Dí narígá
Rí muʼni mbaʼumíjna̱ naʼni dí mundxaʼwáá edxu̱lúʼ dí raʼkhí ga̱jma̱a̱ numún eʼwíinʼ xóo kiexu̱u̱n. Naʼni rí i̱ndó mundxaʼwamíjná rí májánʼ ga̱jma̱a̱ numulú. Bi̱ naʼnimbamínáʼ naku̱mu̱u̱ dí itháan gíʼdoo numuu ki xóo eʼwíinʼ bi̱ mixtiʼkhuiin ki xóo ikhaa. Asndu tsáa ma̱ndoo maxpátríguíi náa tsáʼkhá rígi̱. Náa Encyclopædia Britannica naʼthí: “Mbaʼin xa̱bu̱ nakumu̱ún rí xóo kúwá, ganitsu rí naʼphu̱, xtíin rí nugíʼ, rí naguʼwún nuni, rí nunimbu̱ún, rí xóo nijmañún o i̱ʼwáʼ, nindxu̱u̱ itháan májánʼ ki xóo bi̱ kúwá i̱ʼwáʼ xuajen”. Ndiéjunʼ gándoo gúʼni mu xajngutíguáanʼ náa tsáʼkhá rígi̱ rá.
Ikha rí na̱ʼkha̱ náa Biblia
“Gani̱ndxa̱la xa̱bu̱ guabaaʼ, gu̱ya̱a̱ rí eʼwíinʼ itháan guáʼdáá numún ki xóo ikháanʼla” (FILIPENSES 2:3).
Ndiéjunʼ eyoo gáʼthúu̱n rá. Mu xúʼni̱ mbaʼumíjna̱ ndaʼyóoʼ manindxu̱lúʼ xa̱bu̱ wabaaʼ. Á mu ni̱ndxu̱lú xúʼko̱ mbuʼñún eʼwíinʼ rí ni̱ndxu̱ún itháan míjínʼ xa̱bu̱ ga̱jma̱a̱ guaʼdáá itháan numún. Nimbáa ragíʼdoo itháan numuu ki xóo eʼwíinʼ.
Guʼyáá rí nigíʼnuu Stefan. Ikhaa ndija̱a̱ náa mbá país comunista ikhaa nda̱wa̱á nánguá nindxa̱ʼwáminaʼ dí raʼkhí ga̱jma̱a̱ numún xa̱bu̱
bi̱ na̱nguá eguwáʼ náa xuajñuu ikhaa. Ikhaa naʼthí: “Mu xátatsaʼwamínaʼ dí raʼkhí ga̱jma̱a̱ numún eʼwíinʼ xóo kiexu̱u̱n, gíʼdoo wéñuʼ numuu ma̱ta̱ya̱a̱ rí eʼwíinʼ guaʼdáá itháan numún. Ikhúún tsíjmañún xúgíʼ mú nda̱yo̱o̱ dí rígá má xúʼko̱ dí ma̱ndoo majmañuʼ náa eʼwíinʼ”.Rí ma̱ndoo matani
Atayáá rí gajkhun ga̱jma̱a̱ atayáá rí ikháán ma̱ngaa nakiéʼkáanʼ. Atayáá náa májánʼ eni eʼwíinʼ dí ikháán tséjmáán. Xatatsaʼwamínáʼ rí xúgínʼ xa̱bu̱ bi̱ nuthi dí raʼkhí ga̱jma̱a̱ numún ni̱ndxu̱ún mbríguíin.
Mu xatatsaʼwamínáʼ dí raʼkhí ga̱jma̱a̱ numuu eʼwíinʼ xa̱bu̱, atraximínaʼ:
Atayáá náa májánʼ eni eʼwíinʼ dí ikháán tséjmáán
-
Lá gajkhun dí raʼkhí nindxu̱u̱ rí tsénigu̱ʼ eʼni xa̱bu̱ buʼko̱ ráʼ. O i̱ndó nindxu̱u̱ mixtiʼkhu ki xóo rí ikhúún nagu̱ʼwu̱n nda̱yo̱o̱ dxe̱ʼ.
-
Lá ma̱ndoo mbaʼyoo xa̱bu̱ buʼko̱ dí raʼkhí eni ikhúún ráʼ.
-
Xú kaʼnii rí itháán májánʼ dí naʼni xa̱bu̱ buʼko̱ ki xóo ikhúún rá.
Á mu natriʼña̱a̱ gajkhun, ni xátatsaʼwamínaʼ dí raʼkhí ga̱jma̱a̱ numuu ma̱ngaa mi̱dxu̱ʼnú ma̱ta̱ya̱a̱ ndiéjunʼ rí májánʼ eʼni xa̱bu̱ buʼko̱.