Gakuma̱a̱ʼ xóo eku̱mu̱u̱ imba̱a̱
Dí narígá
Á mu nduʼyáá wéñuʼ náa rí naʼni mixtiʼkuiin eʼwíinʼ, maʼni mbuʼyáá dí rúʼko̱ nindxu̱u̱ mbá dí tséjmaa náa ikhiin. Ma̱ngaa makumulúʼ rí ikháanʼ itháan najmáán ki xóo ikhiin. Á mu nundxa̱ʼwáá edxu̱lúʼ xúʼko̱ maʼni mingíjyúuʼ magáwíinʼ a̱jkiu̱lú kuʼñúún o rí makumulúʼ xóo eku̱mu̱ún eʼwíinʼ.
Ikha rí na̱ʼkha̱ náa Biblia
“Gaʼdxala gajmiála xa̱bu̱ bi̱ nadxún; gumbiyaʼ gajmiála xa̱bu̱ bi̱ numbiyaʼ” (ROMANOS 12:15).
Ndiéjunʼ eyoo gáʼthúu̱n rá. Ikha rígi̱ ma̱ndoo muʼthá ga̱jma̱a̱ nguéjma̱ ajngáa: Gakumulú xóo eku̱mu̱u̱ imba̱a̱. Mu maʼni xúʼko̱ ndayóoʼ makumulúʼ rí kuwáánʼ xóo xtáa ikhaa.
Xóo nayambáá rí makumulúʼ xóo ekumu̱ún eʼwíinʼ
Índo̱ nakumulú xóo ekumu̱ún eʼwíinʼ, nduʼyáá dí mbríguáanʼ mbá xúgiáánʼ. Na̱jkua̱nú nduʼyáá rí eʼwíinʼ nakumu̱ún xó má ikháanʼ ga̱jma̱a̱ nuni xó má ikháanʼlu. Rí makumulúʼ xóo kúwá eʼwíinʼ nambáyulúʼ makru̱ʼu̱lú dí tséʼniuu má tsáa ni̱ndxu̱lú, xúgiáánʼ mbániáanʼ xóo mbá guʼwáanʼ. Índo̱ nuʼnimijna mbuʼyáá rí eʼwíinʼ ni̱ndxu̱ún xó má ikháanʼ, maʼni dí xúndxaʼwamíjna dí raʼkhí ga̱jma̱a̱ numún.
Rí makumulúʼ xóo ekumu̱ún eʼwíinʼ mambáyulúʼ mbuʼyamajkún. Anne-Marie bi̱ na̱ʼkha̱ náa Senegal táʼndoo gáʼñúnʼ guéjmi̱i̱n xa̱bu̱ bi̱ tsíñún gúñún numuu rí nuthi dí nda̱a̱ numún. Ikhaa niʼthí ndiéjunʼ nimbáyúu maku̱mu̱u̱ xóo ekumu̱ún eʼwíinʼ: “Índo̱ ndi̱yo̱o̱ xú káʼnii nimíniiʼ xa̱bu̱ buʼko̱, nindxaʼwamínaʼ xóo gákumuʼ ikhúún á mu xtáá xóo ikhiin, ikhú ni̱jkhánú ndi̱yo̱o̱ rí ikhúún nda̱a̱ dí nini mu magúʼdoʼ itháan numuʼ ki xóo eʼwíinʼ”. Ikha jngó, mu makru̱ʼu̱lú májánʼ xóo kúwá ga̱jma̱a̱ rí xúʼthá numún eʼwíinʼ ndayóoʼ muʼnimijna makru̱ʼu̱lú xóo kúwi̱i̱n.
Rí ma̱ndoo matani
Xáta̱ya̱a̱ wéñuʼ ndiéjunʼ eʼni mixtiʼkuiin xa̱bu̱ bi̱ tsíyaaʼ xtañún, itháan májánʼ gáʼni rí ma̱ta̱ya̱a̱ ndiéjunʼ eni xó má ikháán. Mbá xkri̱da, atatsaʼwáminaʼ xú káʼnii ku̱mu̱ún xa̱bu̱ buʼko̱ á mu nuni o nuraʼníí rígi̱:
Rí makumulúʼ xóo ekumu̱ún eʼwíinʼ nambáyulúʼ mbuʼyáá rí xúgiáánʼ kuwáánʼ xóo mbá guʼwáanʼ
Índo̱ nuphiʼtsu mbá guʼwíin.
Índo̱ niguámbu̱u̱n niñajunʼ kañiʼ mbiʼi.
Índo̱ kúwá gajmiún bi̱ nambáxu̱u̱n.
Índo̱ nudxawíín ajmúú rí nanigu̱u̱nʼ.
Atatsaʼwáminaʼ xóo ekumu̱ún ga̱jma̱a̱ atraxi̱mínáʼ rígi̱:
“Ndiéjunʼ gáni ikhúún á mu nduyoʼ rí nda̱a̱ numuʼ xá.”
“Xóo gákumuʼ á mu nuthi dí raʼkhí ga̱jma̱a̱ numuʼ rí asndu xóó tséniʼniún xá.”
“Á mu ikhúún xtáá xóo ikhiin, xóo gániguʼ dí muniuʼ xá.”
Puede que también le interese
BI̱ NAYEJNGOO
Lá naku̱mu̱u̱ Dios rí nakumulú ráʼ.
Náa Biblia nasngájmulúʼ rí Dios ndaʼyoo májánʼ xúgíʼ rí nugíʼnilu, rí nundxa̱ʼwa̱míjna̱ ga̱jma̱a̱ rí nakumulú, ma̱ngaa naku̱mu̱u̱ xóo ekumulúʼ.
¡AWAXUNʼ!
Atani rí: Mambajxáaʼ gajmiáanʼ xúgíinʼ
Mu ma̱ndoo mambaxúlúʼ májánʼ gajmiúlú eʼwíínʼ, ndayóoʼ rí muxná raʼkháa i̱ndó muguaʼthi̱i̱n rí makhánulúʼ.
