Mbaʼin wéñuʼ xa̱bu̱ ninimbánii ikha ndrígóo Biblia dí ndiʼyáálu ga̱jma̱a̱ niʼngu̱u̱n niriyaaʼ náa a̱jkiu̱ún rí xundxaʼwamíjna dí raʼkhí xóo kiexu̱u̱n xa̱bu̱. Mú xáʼngulú ndajkuáán guriʼyáaʼ mbá kayuuʼ dí naʼni dí xáʼndulú kuʼñúún eʼwíinʼ xóo kiexu̱u̱n. Ndiéjunʼ gambáyulú rá.

Xúgíʼ tsiguʼ dí nanújngoo nasngájma rí xa̱bu̱ ñajunʼ tséʼngu̱u̱n gúni gámbáa dí tséndúún kuyamijná xa̱bu̱ xóo kiexu̱u̱n. Lá rúʼko̱ eyoo gáʼthúu̱n dí nimbáa xa̱bu̱ ñajunʼ xáʼngo̱o̱ gaʼni gámbáa ráʼ.

Mu xa̱bu̱ ñajunʼ maʼngo̱o̱ maʼni gámbáa dí nawiñunʼ kuyamijná xa̱bu̱, ndayóoʼ maʼni rígi̱:

1. 1. Maxkajxi̱i̱n xa̱bu̱ muriʼkui̱i̱ xóo endxa̱ʼwamíjna ma̱ngaa xóo ekumu̱ún ga̱jma̱a̱ numún eʼwíinʼ.

2. 2. Maʼni mandáa náa nimíniiʼ numuu rí eʼwíinʼ tsíñún gúñún.

3. 3. Magiʼdiin bi̱ muxna ikha bi̱ maʼndún kuñún xúgínʼ enii xa̱bu̱.

4. 4. Maʼni rí makuwá mbá kambáxu̱u̱n xa̱bu̱ bi̱ kúwá náa xúgíʼ tsu̱du̱u̱ numbaaʼ.

Náa Biblia naʼthí dí Dios nigíiʼ mbáa xa̱bu̱ ñajunʼ bi̱ maʼni xúgíʼ rígi̱, ikhaa nindxu̱u̱: “Reino ndrígóo Dios” (Lucas 4:43).

Atayáá ndiéjunʼ gáʼni xa̱bu̱ ñajunʼ bugi̱.

Xa̱bu̱ bi̱ gákuwá náa tsu̱du̱u̱ Ku̱ba̱ʼ majmañún muni dí jmbu (ISAÍAS 26:9).

“Á mu narígá dí jmbu marigá rí tsímáá, ga̱jma̱a̱ náa rígá dí jmbu naʼni dí xárígá gamíi kámuu mbiʼi” (ISAÍAS 32:17).

Ndiéjunʼ eyoo gáʼthúu̱n rá. Reino ndrígóo Dios maʼsngúún xa̱bu̱ dí nindxu̱u̱ májánʼ. Índo̱ nduʼyáá ndiéjunʼ nindxu̱u̱ rí májánʼ ga̱jma̱a̱ dí ra̱májánʼ, naxtiʼkhu̱u̱ xóo nakumulú ga̱jma̱a̱ numún eʼwíinʼ. Xúgínʼ xa̱bu̱ guyáá dí májánʼ nindxu̱u̱ rí maʼndún kuñún xúgínʼ enii xa̱bu̱.

Dios “margujndooʼ xúgíʼ iyooʼ idún, ní xákháñún itháan, ní xarígá tsingíná, ni xtambiyaʼ asndu má gaʼkhu. Xúgíʼ dí nirígá nákha ginii nindáti̱ga̱a̱ gáʼni ikhú” (APOCALIPSIS 21:4).

Ndiéjunʼ eyoo gáʼthúu̱n rá. Reino ndrígóo Dios maʼni gámbáa xúgíʼ gaʼkhu dí niʼni marigá dí ra̱májánʼ. Bi̱ niguma gíníi ní xákasngáñúnʼ ga̱jma̱a̱ numuu rúʼko̱.

“Xánda̱ʼa̱a̱ cuenta i̱ndó xóo kiexu̱u̱ xa̱bu̱ ni má xaxprígúu nimbáa xa̱bu̱ i̱ndó rí naʼdxun kaníí ga̱jma̱a̱ numuu. Índo̱ gánda̱ʼa̱a̱ cuenta náa xa̱bu̱ gíníi maʼni ga̱jma̱a̱ májánʼ, maxprígun ga̱jma̱a̱ májánʼ xa̱bu̱ bi̱ májánʼ a̱jkiu̱ún bi̱ kúwá náa tsu̱du̱u̱ ku̱ba̱ʼ mu mambáñun má ikhiin” (ISAÍAS 11:3, 4).

Ndiéjunʼ eyoo gáʼthúu̱n rá. Jesucristo, bi̱ nindxu̱u̱ Rey náa Reino ndrígóo Dios, ikhaa maʼtáñajunʼ asndu mekhuíí náa tsu̱du̱u̱ Ku̱ba̱ʼ ma̱ngaa xaraʼwíinʼ xa̱bu̱ bi̱ maʼtáñajúúnʼ. Jesús maʼtáñajúúnʼ májánʼ xúgínʼ xa̱bu̱ ga̱jma̱a̱ maʼni rí xtángoo ndrígóo munimbánii náa xúgíʼ numbaaʼ.

Reino ndrígóo Dios maʼnii rí xa̱bu̱ ‹mundxa̱ʼwa̱míjna ikháá ga̱jma̱a̱ mbríguu gaʼndún kuyamíjna̱, makuwá mbóó jnduʼ, ga̱jma̱a̱ mbóó rí gundxaʼwa̱a̱ edxu̱ún› (FILIPENSES 2:2).

Ndiéjunʼ eyoo gáʼthúu̱n rá. Makujmaa kaʼwu rí makuwá mbá kambáxu̱u̱n xa̱bu̱ bi̱ gakúwi̱i̱n índo̱ gáʼtañajunʼ Reino ndrígóo Dios. “Makuwá mbóó jnduʼ” numuu dí gajkhun maʼndún kuyamijná.