Rígi̱ nindxu̱u̱ rí nithi̱ bi̱ ndu̱ya̱ʼ bi̱ kúwá náa grupo internacional, rí xóo na̱jkha̱ raxtiʼkhu̱u̱ clima. Á mu ikháán nakumaaʼ dí xtaa bi̱ Niʼniwíi ga̱jma̱a̱ naxmiéjuunʼ kaʼyulú, rí nithi científico rígi̱ maʼni ma̱ta̱ya̱a̱ rí niʼni Dios mu mañajunʼ ikháá mu Ku̱ba̱ʼ maʼni̱i̱ májánʼ.

Xa̱bu̱ numbaaʼ nuni̱ gachíí wéñuuʼ Ku̱ba̱ʼ rí tséʼngo̱o̱ maʼni kaʼwuminaaʼ ikháá. Lá ma̱ndoo muʼnimbulú rí Dios maʼni májáanʼ Ku̱ba̱ʼ ga̱jma̱a̱ xúgíʼ ndaʼya dí rígá ikhí ráʼ.

Textos rí na̱ʼkha̱ náa recuadro nasngájma kaʼwu rí ku̱ba̱ʼ xámbáa ga̱jma̱a̱ rí makuwíin má xúʼko̱ xa̱bu̱ ga̱jma̱a̱ xujkhú.

• Dios niʼni Ku̱ba̱ʼ. “Ginii kayuuʼ, Dios niʼni mekhu ga̱jma̱a̱ ku̱ba̱ʼ” (Génesis 1:1).

• Ku̱ba̱ʼ nindxu̱u̱ ndrígóo Dios. “Jeobá a kaʼyoo ku̱ba̱ʼ ga̱jma̱a̱ xúgíʼ dí rígá ikhí,mbaaʼ náa najma̱a̱ ga̱jma̱a̱ bi̱ kúwá ikhí” (Salmo 24:1).

• Dios niʼni ku̱ba̱ʼ mu marigá kámuu mbiʼi. “Jeobá niʼni ku̱ba̱ʼ ga̱jma̱a̱ ikhaa má niʼthí náa magi̱ʼi̱; ikhí má gaguanúu kámuu mbiʼi” (Salmo 104:5).

• Dios nakudaminaʼ rí Ku̱ba̱ʼ makuwíin má xúʼko̱ ga̱jma̱a̱ xujkhúʼ. “Numuu dí rígi̱ niʼthí Jeobá, bi̱ Niʼni mekhu, Ikhaa, bi̱ Dios gajkuwin, bi̱ Niʼni ku̱ba̱ʼ. Bi̱ nigíiʼ ku̱ba̱ʼ náa kaʼyoo magiʼi, ikhaa táʼni marigá i̱ndó ku̱ba̱ʼ, ikhaa niʼni mu makuwá xa̱bu̱: “Ikhúúnʼ ni̱ndxu̱ʼ Jeobá, ga̱jma̱a̱ nda̱wa̱a̱ nimbáa xóo ikhúúnʼ” (Isaías 45:18).

• Dios nakudaminaʼ rí Ku̱ba̱ʼ mani̱ndxu̱u̱ má xúʼko̱ náa makuwá xa̱bu̱. “Bi̱ míjíinʼ makána̱án ku̱ba̱ʼga̱jma̱a̱ makuwá kámuu ikhí” (Salmo 37:29).

Núma̱aʼ má rí xígi̱ kaʼnii niʼni Dios, Ku̱ba̱ʼ ma̱ndoo mañajunʼ májánʼ á mu dí xa̱bu̱ tséni tsagáá wéñuuʼ o nuñe̱wa̱a̱n xóo najmún. Náa Biblia naʼthí rí Jeobá nigíʼ má mbiʼi rí maʼni gámbíin bi̱ kúwá runi̱ gámbáa Ku̱ba̱ʼ (Apocalipsis 11:18).

Náa Biblia naʼthí rí índo̱ gájngoo xúgíʼ rígi̱, Dios maʼni májáanʼ Ku̱ba̱ʼ maʼni̱i̱ mbá Ku̱ba̱ʼ mitsaanʼ ma̱ngaa narmbáʼtoo ñawúunʼ ga̱jma̱a̱ naxnún rí “nda̱ñúnʼ xúgínʼ bi̱ kúwá nduya” (Salmo 145:16).